Solomoni Yihoowawu goynnido wode, Israaˈeela biittay sarotettan deˈiis. SHin Solomoni hara biittaappe daro maccaasaa ekkiis; qassi eti eeqawu goynnoosona. Leddan leddan, Solomoni laamettidi, eeqawu goynniis. Yihooway hanqqettiis. I Solomonayyo hagaadan giis: ‘Israaˈeela Kawotettay pooshettidi naaˈˈawu shaahettana. Taani dariya baggaa ne ashkkarawu immana; qassi ne zaree haaranay guuxxiyaagaa xalla.’

Yihooway kuuyidobaa hara ogiyankka qonccissiis. Solomona ashkkaratuppe issoy, Iyorbbaami ogiyan hemettiiddi hananabaa odiya Akiiyaara gayttiis. Akiiyi ba maayuwaa 12 kessi pooshshidi, Iyorbbaamassi hagaadan giis: ‘Yihooway Israaˈeela kawotettaa Solomona zariyaappe ekkidi, naaˈˈu kessi shaakkana. Tammu pooshota neeyyo ekka; ayssi giikko, neeni tammu zaretu bolli kawotana.’ Solomoni hegaa siyidi, Iyorbbaama woranawu koyiis! Yaatiyo gishshawu Iyorbbaami Gibxxe baqatiis. Wurssettan, Solomoni hayqqin, a naˈay Robiˈaami kawotiis. He wode Iyorbbaami saro gi qoppidi Israaˈeela simmiis.

Israaˈeela cimati Robiˈaamawu, ‘Neeni asaa maara oyqqikko, eti neeyyo ammanettana’ yaagidosona. SHin Robiˈaama a yelaga laggeti,  ‘Neeni asawu iitana koshshees! Etawu oosuwaa yaa deexetta!’ yaagidosona. Robiˈaami ba yelaga laggetu zoriyaa siyiis. I asawu iitin, eti makkalidosona. Eti Israaˈeela kawotettaa geetettida, tammu zaretu bolli Iyorbbaama kawoyidosona. Hara naaˈˈu zareti Yihudaa kawotettaa geetettidosona; eti Robiˈaamawu ammanettidi deˈidosona. Israaˈeela 12 zareti haˈˈi shaahettidosona.

Iyorbbaami ba asay Robiˈaama kawotettaa giddon deˈiya Yerusalaame biidi goynnanaadan koyibeenna. Aybissakko eray? Iyorbbaami eti ba bolli denddidi Robiˈaama maaddana giidi yayyiis. Hegaa gishshawu i worqqaappe naaˈˈu maratu misileta medhidi, asaayyo, ‘Yerusalaamee keehi haaho. Intte hagan goynnana danddayeeta’ yaagiis. Asay worqqaa maratu misiliyawu goynniyoogan, zaarettidi Yihoowa dogiis.