1-3. Yihooway ashkke gidiyoogaa nuuni ammanettana danddayiyoy aybissee?

 ISSI aaway keehi koshshiyaabaa ba guutta naꞌaa tamaarissanawu koyees. A wozanaa denttettanawu I yeemottees. I waati tamaarissana koshshii? I naꞌaa sinttan eqqidi, yayyanaadan oottiyaanne meqetti baynnaagaa bessiya qaalaa haasayana koshshii? Woy qassi I naꞌaa matan ziqqi giidi shonggaara deꞌiya ufayssiya qaalaa haasayana koshshii? Bana ziqqi oottiya aaway loꞌꞌo hanotan haasayissanaagee qoncce.

² Yihooway ay mala Aawee? I otoranchcheeyye ashkkee? Meqetti baynnaageeyye kehee? Yihooway ubbabaa erees. Gidoppe attin, eratettaynne akeekay asay ashkke gidanaadan oottennaagaa neeni akeekadii? Geeshsha Maxaafay yootiyoogaadan, “eratettai otorssees.” (1 Qoronttoosa 3:19; 8:1) SHin, Yihooway “ba wozanan aadhdhida eranchcha,” qassi ashkke. (Iyyooba 9:4) Hegaa giyoogee Yihoowa maatay woy anggay ziqqa giyoogaa gidennan, I mule otorettenna giyoogaa. Hegaadan giyoy aybissee?

³ Yihooway geeshsha. Otorettiyoogee tunissiya eeshsha gidiyo gishshawu otoroy an baawa. (Marqqoosa 7:20-22) Qassi hananabaa yootiya Ermmaasi Yihoowawu woygidaakko akeeka: “Neeni tana tumuppe hassayananne tana maaddanawu hokkana.” a (Ermmaasa Zilaassaa 3:20, NW) Ane qoppa! Salo gufantton Ubbaa Haariya Godaa Yihooway nagaranchcha Ermmaasabaa nashshidi  siyanawu akko hokkanawu woy duge ziqqi gaanawu eeno giis. (Mazamure 113:7) Ee, Yihooway ashkke. SHin, Xoossaa ashkketettay aybin qonccii? Hegee aadhdhida eratettaara waani gayttii? Qassi hegee nuuyyo keehi koshshiyoy aybissee?

4, 5. (a) Ashkketettay aybee, I waani qonccii, qassi hegee shugo gidiyoogaa woy xala gidennaagaa bessiyaaba giidi balan akeekana koshshennay aybissee? (b) Daawita oyqqido hanotan Yihooway ashkke gidiyoogaa waati bessidee, qassi Yihoowa ashkketettay nuuyyo keehi koshshiyoy aybissee?

⁴ Ashkketettay axiraarennaagaanne otorettennaagaa bessiyaaba. Ashanqqa, danddayaanne shaaga giyoogeetu mala eeshshatun qoncciya ashkketettay wozanan deꞌiya eeshsha. (Galaatiyaa 5:22, 23) Gidoppe attin, Xoossaa ufayssiya he eeshshati shugo gidiyoogaa woy xala gidennaagaa bessiyaaba giidi balan akeekana koshshenna. Hegeeti Yihoowa xillo hanqquwaara woy xayssanawu I goꞌettiyo wolqqaara maayettennaba gidokkona. Yihooway ba ashkketettan wottiyoobi baynna ogiyan ba huuphiyaa  naagiyo zawi baynna ba minotettaa woy ba wolqqaa bessees. (Isiyaasa 42:14) Ashkketettay aadhdhida eratettaara waani gayttii? Geeshsha Maxaafaara gayttida issi xuufee hagaadan giis: “Ashkketettay . . . babaappe aattidi haratubaa qoppiyoogaara gayttidaba, qassi aadhdhida eratetta ubbawu keehi koshshiyaaba.” Yaatiyo gishshawu, ashkketettay baynnan tumu aadhdhida eratettay deꞌenna. Yihoowa ashkketettay nuna waati goꞌꞌii?

⁵ Kawuwaa Daawiti Yihoowayyo hagaadan yexxiis: “Tana ashshiya ne gonddalliyaa neeni taayyo immadasa. Ne ushachcha kushee tana zemppissees; ne lo77o ohettai [“ashkketettay,” NW] tana gitayees.” (Mazamure 18:35) Hegee, Yihooway nagaranchcha Daawita ubba galla naaganawunne maaddanawu hokkees giyoogaa mala. Daawiti ba morkketuppe attanay, ubba qassi wurssettan kawotidi gitatanay Yihooway hegaadan ashkke gidanawu koyiyo gishsha xallaana gidiyoogaa akeekiis. Yihooway siiqiya Aawadan nuna oyqqanawu ba dosan hokkiya ashkke gidennaakko, attiyo hidootay nuuppe ooyyo deꞌanee?

6, 7. (a) Yihooway ashkke gidiyoy ayba ogiyaanee? (b) Ashanqqa gidiyoogaa giddooninne aadhdhida eratettaa giddon ayba gaytotettay deꞌii, qassi hegaara gayttidaagan ooppenne aadhdhiya leemisoy oonee?

⁶ Ashkketettay ammanettida asawu deꞌana bessiya loꞌꞌo eeshsha. He eeshshay aadhdhida eratettaara gayttidaba. Leemisuwawu, Leemiso 11:2y hagaadan gees: “Ashkketettaara aadhdhida eratettai yees.” Gidoppe attin, Geeshsha Maxaafay Yihooway asaa mala ashkke mule geenna. Aybissi? Hegee I ashkke gidenna giyoogaa gidenna. SHin Geeshsha Maxaafay ashkketettaa asaara gattidi qonccissiyo wode izaawu baassi danddayettennabaa akeekiyoogaa yootees. Ubbaa Danddayiyaagee I kessido xillotettaa maaraa gishshawu bana teqqiyoogaappe attin, ayyo danddayettennabi baawa. (Marqqoosa 10:27; Tiitu 1:2) Qassi I Ubbaappe Xoqqiyaagaa gidiyo gishshawu ooyyoonne haarettenna. Yaatiyo gishshawu, qommoora yootido ashkketettay Yihoowayyo hanenna.

⁷ SHin, Yihooway ba dosan asaa maaddiyoogan ashkke. Qassi Yihooway ashanqqa. Ashanqqa gidiyoogee tumu aadhdhida  eratettawu keehi koshshiyoogaa I ba ashkkarata tamaarissees. Hegaa gishshawu, Geeshsha Maxaafay ‘aadhdhida eratettaappe pulttiya ashkketettaabaa’ woy ashanqqa gidiyoogaabaa yootees. b (Yaaqooba 3:13) Hegaara gayttidaagan Yihooway ooppenne aadhdhiya leemiso waani gidiyaakko ane beꞌoos.

8-10. (a) Yihooway haratussi aawatettaa immanawunne eti yootiyoobaa siyanawu koyiyoogee maalaaliyaaba gidiyoy aybissee? (b) Ubbaa Danddayiyaagee ba kiitanchchatuura waatidi ashkketettan haasayidee?

⁸ Yihooway haratussi aawatettaa immanawunne eti yootiyoobaa siyanawu koyiyoogee A ashkketettaa bessiya keehi ufayssiyaaba. Harati yootiyoobaa I siyiyoogee keehi maalaaliyaaba; Yihoowawu maadoy woy zoree koshshenna. (Isiyaasa 40:13, 14; Roome 11:34, 35) Gidoppe attin, Yihooway hegaa mala ogetun duge hokkiyoogaa Geeshsha Maxaafay darotoo yootees.

⁹ Leemisuwawu, Abrahaama deꞌuwan hanida keehi gitabaa qoppa. Abrahaami heezzu imattata mokkiis; hegeetuppe issuwaa I Yihoowa giidi xeegiis. Imattati kiitanchchata gidikkonne, etappe issoy Yihoowa sunttan yiido gishshawu A sunttan oottiis. He kiitanchchay haasayido wodenne oottido wode, hegaa Yihooway haasayiisinne oottiis giyoogaa mala. “Sadoomappenne Gamoorappe waassiyo” waasuwaa siyidoogaa Abrahaamawu Yihooway he kiitanchchaa baggaara yootiis. Yihooway hagaadan giis: “Eti oottidobi taakko gakkida waasuwaa keesa iitakkonne be7anau ane taani duge wodhdhais; hegaa mala iita gidana xayikkonne erana.” (Doomettaabaa 18:3, 20, 21) Yihoowa kiitay Ubbaa Danddayiyaagee ‘duge wodhdhanaagaa’ bessiyaaba gidenna. I ba gishshaa haranttuwaakka kiitanchchata kiittiis. (Doomettaabaa 19:1) Aybissi? Ubbabaa beꞌiya Yihooway hegan tumuppe haniyaabaa “erana” danddayennee? Danddayees. SHin, Yihooway he kiitanchchati hanotaa xomoosanaadaaninne  Sadooman deꞌiya Looxanne A soo asaa oychchanaadan ashkketettan etawu oosuwaa immiis.

¹⁰ Qassi, harati yootiyoobaa Yihooway siyees. I iita Kawuwaa Akaabi kunddanaadan dumma dummabaa yootana mala ba kiitanchchata issi wode oychchiis. Yihoowawu hegaa mala maadoy koshshenna. SHin kiitanchchatuppe issoy yootidobaa I maayettidi, hegaa he kiitanchchay polanaadan A kiittiis. (1 Kawotu Maxaafaa 22:19-22) Hegee ashkketettaa bessiyoogee qoncce.

11, 12. Abrahaami Yihoowa ashkketettaa waati eridee?

¹¹ Yihooway nagaranchcha asati banttana qofissidabaa yootanawu koyiyo wodekka ba dosan siyees. Leemisuwawu, Yihooway Sadoomanne Gamoora xayssanawu qoppidoogaa Abrahaamawu koyro yootido wode, he ammanettida bitanee akeekanawu metootiis. Abrahaami hagaadan giis: “Hegee neeppe haakko. . . . Ha sa7aa ubbaa pirddiyaagee xillo pirddenneeyye?” Yan 50 xilloti deꞌikko Yihooway he katamata ashshanaakkonne I oychchiis. Yihooway ashshanaagaa awu yootiis. SHin Abrahaami qoodaa 45, 40 giidi, qassi hegaappekka guuttidi zaarettidi oychchiis. Yihooway ammanttiyaabaa yootikkonne, Abrahaami qoodaa tammaa gakkanaashin guuttidi aggennan oychchiis. Yihooway keehi maariyaagaa gidiyoogaa Abrahaami he wode gakkanaassi waayi loytti akeekana. Abrahaami he oyshata oychchido gaasoy ayba gidikkonne, Yihooway ba dabboynne ba ashkkaray Abrahaami bana qofissidabaa hegaa mala ogiyan qonccissanaadan danddayaaninne ashkketettan eeno giis.—Doomettaabaa 18:23-33.

¹² Eran baappe keehi guuxxiya uri haasayiyo wode danddayan siyiya eranchcha asi woqqee? c Xoossay keehi danddayidi siyiyoogan, gita ashkketettaa bessiis. Abrahaami Yihoowaara haasayiyo wode, Yihooway ‘hanqquwaassi eesotennaagaakka’ akeekiis. (Nahimiyaa 9:17) Abrahaami, “Hai, Godai taayyo hanqqettoppo” giidi naaꞌꞌutoo woossidoy, Ubbaappe Xoqqiyaagee oottiyoobaa oychchanawu bawu maatay baynnaagaa akeekido  gishshaassa gidennan aggenna. (Doomettaabaa 18:30, 32) Yihooway hanqqettibeenna. Tumukka ayyo ‘aadhdhida eratettaappe pulttiya ashanqqa’ gidiyo eeshshay deꞌees.

13. Geeshsha Maxaafay shaaga giyo qaalaa ay qonccissanawu goꞌettii, ha qaalay Yihoowabaa loytti qonccissees giyoy aybissee?

¹³ Yihoowa ashkketettaa qonccissiya hara loꞌꞌo eeshshay I shaaga gidiyoogaa. Ha eeshshay deꞌiyo asay daro gidennaagee azzanttiyaaba. Yihooway asaynne kiitanchchati yootiyoobaa siyana xallawu gidennan, I kessido xillotettaa maarata phalqqennaba gidikko he qofaa maayanawu eeno gees. Geeshsha Maxaafay “eeno giyoogaa” qonccissanawu shaaga giya qaalaa goꞌettees. He eeshshaykka Xoossaa aadhdhida eratettaa loytti qonccissiyaaba. ‘Bollappe yiya aadhdhida eratettay ashkke’ woy shaaga gidiyoogaa Yaaqooba 3:17y yootees. Ubbabaa eriya Yihooway shaaga giyoogee woygiyoogee? I hanotaadan ba qofaa laammiyoogee shaaga gidiyoogaa bessiya issiba. Yihoowa sunttay I ba halchchuwaa polanawu hanana koshshiyo aybanne haniyoogaa nuna tamaarissiyoogaa hassaya. Hegee hanotaadan ba qofaa laammiyoogaanne shaaga gidiyoogaa bessiyaaba gidennee?

14, 15. Hizqqeeli saluwaa saragallaa beꞌido ajjuutaappe saluwan deꞌiya Yihoowa dirijjitiyaabaa ay tamaariyoo, qassi he dirijjitee alamiyaa dirijjitetuppe waani dummatii?

¹⁴ Yihooway hanotaadan ba qofaa laammiyoogaa nuuni guuttaa akeekanaadan maaddiyaabay Geeshsha Maxaafan deꞌees. Hananabaa yootiya Hizqqeeli saluwan deꞌiya ayyaana meretata bessiya Yihoowa dirijjitiyaa ajjuutan beꞌiis. I Yihooway kaamedan ubbatoo ba koyidosaa efiyo maalaalissiya keehi gita saragallaa beꞌiis. Saragallay issisaappe harasaa biyo hanotay aybippenne aaruwan maalaalissiyaaba. Oyddu ginay deꞌiyo keehi gita irzzoti ayfee kumidoogeeta gidiyo gishshawu, eti ubbasaa xeellana danddayoosona, qassi eqqennan woy yuuyennan issi kutti ginaa laammana danddayoosona. He wolqqaama saragallay koyidoogaadan laagganawu metiya, asi medhdhido keehi gita kaamiyaadan goshoshattenna. Hegee wolqqanttaadan eesuwan baana danddayees, ubba qassi sinttawu biiddi issi kutti miyyiyawu  simmana danddayees! (Hizqqeela 1:1, 14-28) Ee, Yihoowa dirijjitee A kaalettiya Ubbaa Haariyaagaadan, ubbatoo laamettiya hanotaappenne oottana koshshiyaabaappe denddidaagan laammiyoobay keehi maalaalees.

¹⁵ Asay hegaadan wottiyoobi baynna ogiyan hanotaadan laammana danddayenna. Darotoo, asaynne eta dirijjiteti hanotaadan laammiyoogaappe aaruwan zozza. Leemisuwawu, gita markkabiyaa woy gita baaburiyaa gitatettaynne wolqqay keehi maalaalissees. SHin eti naaꞌꞌaykka hanotaadan sohuwaara laammana danddayiyoonaa? Gita baaburiyaa ogiyan xubbiyaabay gayttiyaakko, I yuuyyana danddayeenna. Eesuwan eqqanawu keehi metootees. Issi gita baaburiyaa essanawu pireeniyaa oyqqi simminkka 2 kilo meetiriyaa baana danddayees. Qassi, motoriyaa xayssi simmin gita markkabee 8 kilo meetiriyaa sinttawu baana danddayees. Gita markkabiyaa guyye laaggiyoogaa doommi simminkka, 3 kilo meetiriyaa sinttawu baana danddayees. Asaa dirijjitetikka zozza gidiyo gishshawu hegaa mala. Asay otorettiyo gishshawu, koshshiyaagaadaaninne hanotaadan laamettanawu darotoo koyenna. Hegaadan zozzu giyoogee dirijjiteti kasaaranaadan, ubba qassi kawotettati kunddanaadan oottiis. (Leemiso 16:18) Yihooway woy A dirijjitee asaa dirijjitetu mala mule gidenna gishshawu, nuuni keehi ufayttoos!

16. Sadoomanne Gamoora xayssanaappe kase Yihooway Looxessi oottidoban shaaga gidiyoogaa waati bessidee?

¹⁶ Sadoomanne Gamoora xayuwaabaa zaarettada ane qoppa. Yihoowa kiitanchchay, “Deriyaakko baqatite!” yaagidi Looxeyyoonne A soo asawu qoncce azazuwaa yootiis. SHin hegaa Looxee dosibeenna. I, “CHii! Hai ta godaatoo, yaagoppite” giidi woossiis. Looxee deriyaakko baqatikko hayqqana giidi qoppido gishshawu, inne A soo asay matan deꞌiya Xooꞌaaro giyo katamaa baqatanaadan paqqadana mala mintti woossiis. Yihooway he katamaa xayssanawu halchchidoogaa hassaya. Hegaa bollikka, Looxee yayyanaadan oottiyaabi baawa. Deretiya heeran  Yihooway Looxa ashshana danddayiyoogee qoncce! Gidoppe attin, Yihooway Looxe woosaa siyidi Xooꞌaaro xayssibeenna. Kiitanchchay Looxessi qoppiyoogaa bessiis. (Doomettaabaa 19:17-22) Hegee Yihooway shaaga gidiyoogaa bessiyaaba.

17, 18. Yihooway Nanawe asaara gayttidaagan shaaga gidiyoogaa waati bessidee?

¹⁷ Bantta nagaraappe wozanappe simmiyaageeta Yihooway maariyoogan ubbatoo suurebaa oottees. Hananabaa yootiya Yoonaasi iitanne makkalanchcha katamaa Nanawe kiitettido wode hanidabaa qoppa. Gita katamay Nanawee 40 gallassaappe guyyiyan xayanaagaa, Yoonaasi Nanawe ogetuura kanttiyo wode ayyaanay denttettin qonccebaa awaajjiis. SHin, qoppennan hanotay laamettiis. Nanawe asay ba nagaraappe simmiis!—Yoonaasa, shemppo 3.

¹⁸ Hanotay laamettin Yihoowawu siyettidabaanne Yoonaasawu siyettidabaa geeddarssiyoogee maaddees. He wode Yihooway wolqqaama “olanchcha” gidiyoogaa aggidi Maariyaagaa gidiyoogan hanotaadan laamettiis. d (Kessaabaa 15:3) Qassi, Yoonaasi hanotaadan laamettibeennanne maaribeenna. I Yihoowaagaadan shaaga gidiyoogaa aggidi qommoora beꞌido gita baabure woy gita markkabe mala gidiis. I bashshaabaa awaajjido gishshawu, bashshay gakkana bessees giidi qoppiis. SHin Yihooway I kiittin hananabaa yootiya danddaayi baynna Yoonaasa danddayidi, shaaganne maariyaagaa gidiyoogaara gayttidaagan dogettennabaa tamaarissiis.—Yoonaasa, shemppo 4.

19. (a) Yihooway nuuppe naagiyooban shaaga gidiyoogaa nuuni ammanettana danddayiyoy aybissee? (b) Yihooway ‘loꞌꞌonne’ shaaga Goda, qassi laggetiyaabi baynna ashkke gidiyoogaa Leemiso 19:17y waati qonccissii?

¹⁹ Yihooway nuuppe naagiyoobaykka I shaaga gidiyoogaa bessees. Kawuwaa Daawiti hagaadan giis: “Nuuni aibippe merettidaakkonne i erees; nuuni biitta gidiyoogaa i akeekees.” (Mazamure 103:14) Nu oottana danddayennabaanne nuuni nagaranchcha  gidiyoogaa Yihooway nuuppe aaruwan akeekees. Nuuni oottana danddayiyoogaappe aarobaa oottanaadan I nuuppe mule naagenna. Geeshsha Maxaafay goda gidida ufayttenna asata ‘loꞌꞌonne ashkke’ woy shaaga gidida godatuura geeddarssees. (1 PHeexiroosa 2:18) Yihooway ay mala Godee? Leemiso 19:17y, “Hiyyeesaassi kehiya asi GODAASSI tal77ees” giyoogaa akeeka. Hiyyeesatussi kehatettan oottiyo ubbabaa akeekiyay loꞌꞌonne shaaga goda xalla gidiyoogee qoncce. Hegaa bollikka, hegaa mala kehatettaa bessiya asawu salo gufanttuwaa Medhdhidaagee kushiyaa zaarana bessiyoobadan qoppiyoogaa he xiqisee qonccissees. Hegee laggetiyaabi baynna ashkketetta.

20. Yihooway nu woosaa siyiyoogaanne hegaa zaariyoogaa ammanettanaadan oottiyaabay aybee?

²⁰ Yihooway ha wodiyan ba ashkkarata oyqqiyo ogiyan hegaadan ashanqqanne shaaga. Nuuni ammanuwan woossiyo wode, I siyees. Nuna haasayissanaadan I kiitanchchata kiittana xayikkonne, nu woosaa I zaarenna giidi nuuni qoppana koshshenna. Kiitettida PHawuloosi I qashuwaappe birshshettanaadan ba mala Kiristtaaneti ‘Xoossaa woossanaadan’ oychchido wode, “Xoossai tana inttekko eesuwan zaarana mala” giidoogaa hassaya. (Ibraawe 13:18, 19) Yihooway nuuni woossana xayiyaakko oottennabaa oottanaadan nu woosay denttettana danddayees!—Yaaqooba 5:16.

21. Yihoowa ashkketettaa xeelliyaagan nuuni ay kuuyana koshshennee? SHin abaa nuuni ay akeekana koshshii?

 ²¹ Yootiyoobaa siyiyo, ashanqqa, danddayanchchanne shaaga gidiyo Yihoowa ashkketettaa bessiya eeshshatuppe awugeenne I xillotettawu kessido maarata bonchchennaagaa bessiyaaba gidenna. Kiristtaane giyo haymaanooteta kaalettiyaageeti Yihooway kessido kandduwaa maarata lefettidi bantta wudeta ufayssiyaabaa yootiyoogan banttana shaaga giidi qoppana danddayoosona. (2 Ximootiyoosa 4:3) Gidoppe attin, asay ba dosiyoobawu giidi maarata lefettiyoogee Xoossay shaaga gidiyoogaara mule gayttenna. Yihooway geeshsha; I xillotettawu kessido maarata mule hambbalaashenna. (Wogaabaa 11:44) Hegaa gishshawu, Yihooway shaaga gidiyoogee A ashkketettaa bessiyo gishshawu he eeshshaa nuuni dosana koshshees. Salo gufantton ooppenne aaruwan aadhdhida eranchchaa, Xoossaa Yihoowa gita ashkketettaa qoppiyoogee nena keehi ufayssiyaaba gidiyoogee qoncce. Yihooway keehi gita gidikkonne, ashanqqa, danddayanchchanne shaaga gidida akko shiiqiyoogee keehi ufayssiyaaba!