1, 2. Wodiyaa aattiyoobaa xeelliyaagan nuuni ay doorana koshshii?

ISSI malˈˈiya mittaa teeraa neeni maana hanaydda issi baggay wooqqidoogaa akeekidabadan qoppa. Hegaa waatuutii? Wooqqida baggaakka ashennan muliyaa maana danddayaasa; woy he teeraa muleera ola aggana danddayaasa; woykko wooqqida baggaa qanxxa olada loˈˈo baggaa maana danddayaasa. Neeni awugaa dooruutee?

² Issi issi ogiyan, wodiyaa aattiyoobay he mittaa teeraa mala. Issi issi wode, issiban allaxxana koyaasa; shin ha wodiyan deˈiya wodiyaa aattiyoobay daroban moorettida kandduwaa bessiyaaba gidiyoogan he wooqqida mittaa teeraa mala gidiyoogaa akeekaasa. Yaatin, neeni waatuutee? Issoti issoti ha alamee shiishshiyo wodiyaa aattiyo ubbabaa maayanaunne iita gididabaa ekkanau eeno gaana danddayoosona. Harati qohuwaa gattiya aybinne banttana gakkenna mala wodiyaa aattiyo ubbabaappe haakkana danddayoosona. Harati qassi qohuwaa gattiya wodiyaa aattiyoobaappe naagettiyaaba gidikkonne, issi issi wode amarida hanotan loˈˈo gididabatun wodiyaa aattana danddayoosona. Neeni Xoossaa siiquwan deˈanau awugaa doorana koshshii?

3. Nuuni haˈˈi aybaa xeelliyaagan tobbanee?

³ Nuuppe dariya baggay heezzantto qofaa doorees. Allaxxiyoobay guuttaa koshshiyoogaa akeekoos; shin kandduwan geeshsha gididabaa xallan wodiyaa aattana koyoos. Yaatiyo gishshau, loˈˈo gididabaanne loˈˈo gidennabaa waatidi shaakkana danddayiyaakko qoppana koshshees. Gidikkonne, wodiyaa  aattanau nu dooriyoobay Yihoowayyo nuuni goynniyoogaa waatidi bochiyaakko ane koyruwan tobboos.

4. Nuuni nu huuphiyaa geppidoogee wodiyaa aattiyoobaa xeelliyaagan nu dooruwaa waatidi bochana koshshii?

⁴ Amarida wodiyaappe kase, 1946n xammaqettida issi cimida Yihoowa Markkay: “Xinqqatiyaa haasayay shiiqiyo wode ubban he sohuwan beettada, taani xammaqettiyaabadan akeekan ezggays” yaagiis. Aybissi? “Taani ammanettada deˈanau keehippe koshshiya tanggoy tana geppidoogaa qofan wottiyoogaa” yaagidi qonccissiis. Neeni ha xeelan maayiyoogau siree baawa. Neeni ne deˈo laytta ubban Yihoowayyo oottanau qaalaa gelidoogaa hassayiyoogee neeni genccanaadan denttettees. (Eranchchaa 5:4; Ibraawe 10:7) Ne huuphiyaa geppidoogaa wotta dentta qoppiyoogee Kiristtaane oosuwaa xallau gidennan, wodiyaa aattiyoobaa gujjin ne deˈuwan oottiyo hara ubbabankka ne xeelaa bochees. Kiitettida PHauloosi ba wode deˈida Kiristtaanetussi: “Intte ai miikkonne, woi ai uyikkonne, woi intte ai oottikkonne, ubbabaa Xoossaa bonchchuwaassi oottite” yaagidi xaafido wode hegee tuma gidiyoogaa boxooxissiis.—1 Qoronttoosa 10:31.

5. Roome 12:1n deˈiya seera mentto akeekissuwaa eranaadan Wogaabaa 22:18-20y waatidi maaddii?

⁵ Deˈuwan neeni oottiyoobay aybinne neeni Yihoowayyo goynniyo goynuwaara gayttees. Rooma asatuyyo  xaafido dabdaabbiyan, PHauloosi baagaa mala ammanoy deˈiyoogeeti ha tumaa shaakki erana mala aaho birshshettay deˈiyo qaalata goˈettiis. ‘Intte intte asatettaa Xoossaa ufayssiya deˈonne geeshsha yarshsho oottidi, Xoossau shiishshite; Xoossau intte goynnanau bessiya tumu ogee hegaa’ yaagidi i eta mintti zoriis. (Roome 12:1) Ne asatettay ne qofaa, ne wozanaanne ne bollaa minotettaa gujjees. Neeni Xoossaayyo oottiyoogan hagaa ubbaa goˈettaasa. (Marqqoosa 12:30) PHauloosi hegaa mala kumetta shemppuwan oottiyo oosoy yarshsho gidiyoogaa yootiis. Yarshsho yaagiya qaalay seera menttoy deˈiyo akeekissuwaa oyqqiis. Muuse Higgiyan, bollay tilla gidenna yarshshoy Xoossan ixettidaba. (Wogaabaa 22:18-20) Hegaadankka, issi Kiristtaanee ayyaanaaban shiishshiyo yarshshoy issi issi ogiyan hambbalaashettikko, hegee Xoossan ekettennaba. Gidikkonne, hegaadan waanidi hanana danddayii?

6, 7. Issi Kiristtaanee ba asatettaa waatidi tunissana danddayii? Hegee ay gattana danddayii?

⁶ PHauloosi Roome biittan deˈiya Kiristtaaneta: “Intte asatettaappe issisaanne . . . nagarau immoppite” yaagidi mintti zoriis. PHauloosi ‘eti bantta asatettaa oosuwaa woranaadankka’ yootiis. (Roome 6:12-14; 8:13) Kasetidi ha dabdaabbiyan, hegaa mala ‘asatettaa oosuwau’ leemiso gidiya issi issibata yootiis. Nagarancha asaa naata xeelliyaagan: “Eta doonan hanttaara qanggettai kumiis.” ‘Eta gedee suutta gussanau daro eesotees.’ “Qassi Xoossaassi yayyiyoobi [et]a qofan [ayfiyan] baawa” yaagiyaagaa nabbaboos. (Roome 3:13-18) Issi Kiristtaanee ba “asatettaappe issisaanne” hegaa mala nagara oosuwau goˈettikko, ba asatettaa moorees. Leemisuwau, ha wodiyan issi Kiristtaanee xiire kalluwaa bessiya misiliyaa mala kandduwan moorettidabaa woykko qareti baynnaagaa qonccissiya makkala oosuwaa eriiddi beˈikko, i ‘ba ayfiyaa nagarau immees;’ qassi hegan ba kumetta asatettaa tunissees. A goynoy awugeenne geeshsha gidennanne Xoossan ekettenna yarshsho gidees. (Zaarettido Wogaa 15:21; 1 PHeexiroosa 1:14-16; 2 PHeexiroosa 3:11) I wodiyaa aattiyo loˈˈo gidennabata dooridoogee, tumuppe keehi qohiyaabaa gattees!

 ⁷ Issi Kiristtaanee wodiyaa aattanau dooriyoobay keehi iitabaa kaalettiyoogee qoncce. Yaatiyo gishshau, nuuni Xoossaayyo shiishshiyo yarshshuwaa tunissenna wodiyaa aattiyoobaa dooranau koyiyoogee erettidaba. Awugee loˈˈokko, awugee loˈˈo gidennaakko nuuni waatidi shaakkana danddayiyaakko ane haˈˈi tobboos.

8, 9. (a) Xaaxi waaxi xeelliyo wode, wodiyaa aattiyoobati ayba naaˈˈu citan shaahettana danddayiyoonaa? (b) Wodiyaa aattiyooban nuuni ixxiyoy ayba qommoo? Aybissi?

⁸ Xaaxi waaxi xeelliyo wode, wodiyaa aattiyoobay naaˈˈu citan shaahettana danddayees. Issoy, Kiristtaaneti muleera haakkana bessiya wodiyaa aattiyoobaa gujjees; hara qassi wodiyaa aattiyoobay, Kiristtaaneti maayiyooba woy maayennaba gidana danddayees. Koyro citan deˈiya, Kiristtaaneti haakkana bessiya wodiyaa aattiyoobaa pilggiyoogan ane doommoos.

⁹ SHemppuwaa 1n qonccidaagaadan, wodiyaa aattiyoobatuppe issi issi qommoti Geeshsha Maxaafan qoncciyan digettidabata bessoosona. Leemisuwau, qareti baynnaagaa woy iita ayyaana oosuwaa woy xiire kalluwaa woy sheneyiyaanne shori baynna asho gaytotettaa minttettiyaabaa bessiya Weeb saytiyaanne pilimiyaa, televizhiiniyaa progiraamiyaanne yettaa qoppa. Wodiyaa aattiyooban hagaa mala moorettidabati Geeshsha Maxaafaa baaso siraatata kanttiyoogaa woy Geeshsha Maxaafaa higgeta menttiyoogaa loˈˈoba ootti bessiyo gishshau, tumu Kiristtaaneti etappe baqatana bessees. (Oosuwaa 15:28, 29; 1 Qoronttoosa 6:9, 10; Ajjuutaa 21:8) Hegaa mala wodiyaa aattiyo loˈˈo gidennabata ixxiyoogan, neeni tumuppe ‘iitabaa ixxiyoogaanne’ ubbatoo ‘iitaappe shaahettiyoogaa’ Yihoowayyo qonccissaasa. Hegaadan oottiyoogan, ‘asi beˈo giyoobi baynna ammanoy’ neeyyo deˈana.—Roome 12:9; Mazamure 34:14; 1 Ximootiyoosa 1:5.

10. Wodiyaa aattiyoobaa xeelliyaagan iita gididay woygi qoppiyoogee? Aybissi?

¹⁰ Gidikkonne, shori baynna asho gaytotettaa qoncciyan  bessiya wodiyaa aattiyoobaa beˈiyoogee issotuyyo issotuyyo qohennabadan siyettana danddayees. Eti, ‘taani hegaa pilmiyan woy televizhiiniyan beˈana danddayays; shin taani ta huuphe hegaa malabaa mule oottikke’ yaagidi qoppoosona. Hegaadan qoppiyoogee cimmiyaabanne qohiyaaba. (Ermmaasa 17:9) Yihooway ixxiyoobaa beˈiyoogan nuuni ufayttiyaaba gidikko, tumuppe nuuni ‘iitabaa ixxiyoo’? Mooro kandduwaabaa zaari zaari beˈiyaaba, siyiyaaba woykko nabbabiyaaba gidikko, nu wozanay dammees. (Mazamure 119:70; 1 Ximootiyoosa 4:1, 2) Hegaa mala oosoy, nuuni oottiyoobaa woykko haratu bala oosuwaa nuuni xeelliyo hanotaa bochana danddayees.

11. Wodiyaa aattiyoobaa xeelliyaagan Galaatiyaa 6:7n deˈiyaagee waanidi tuma gididee?

¹¹ Hegee tumu hanidaba. Issi issi Kiristtaaneti meeze oottidi beˈiyo wodiyaa aattiyoobaa gaasuwan shori baynna asho gaytotettaa polidosona. “Asi ba zeriyoogaa zaarettidi cakkana” yaagiyaagaa banttana gakkida iitabaappe akeekidosona. (Galaatiyaa 6:7) SHin hegaa mala azzanttiyaabay gakkennaadan haahuwan teqettana danddayees. Neeni akeekan ne qofan loˈˈobaa zeriyaaba gidikko, ne deˈuwan ufayssiya loˈˈobaa cakkana.—Sinttaa 67n deˈiya “ Taani Wodiyaa Aattanau Ay Doorana Koshshii?” yaagiya saaxiniyaa xeella.

12. Galaatiyaa 6:5y wodiyaa aattiyoobaara waanidi gayttii? Nu huuphe kuuyiyoobau ayba kaaletoy deˈii?

¹² Naaˈˈantto citan deˈiya, Xoossaa Qaalay qoncciyan diggenna woy minttettenna oosoti deˈiyo, wodiyaa aattiyoobaa ane haˈˈi tobboos. Kiristtaaneti wodiyaa aattiyooban hagaa malabatuppe dooriyo wode, huuphiyan huuphiyan loˈˈo gididabaa banttau kuuyana koshshees. (Galaatiyaa 6:5) Gidikkokka, hegaa mala dooruwaa dooriyo wode, nuuyyo kaaletoy deˈees. Geeshsha Maxaafay nuuni Yihoowa qofaa shaakkidi eranau danddayissiya baaso siraatata woykko baaso gidida tumata oyqqiis. Hegaa mala baaso siraatata akeekiyoogan, nu dooriyo wodiyaa  aattiyoobaa gujjin ubbaban “Godai koyiyoobai aibakko” shaakki erana danddayoos.—Efisoona 5:17.

13. Yihoowa azzanttana danddayiya wodiyaa aattiyoobatuppe haakkanaadan nuna denttettiyay aybee?

¹³ Kandduwaabaa xeelliyaagan ubba Kiristtaaneetussi issi mala akeekay deˈennaagee erettidaba. (Piliphphisiyuusa 1:9) Gujjidikka, wodiyaa aattiyoobaa xeelliyaagan dosiyoobaynne ixxiyoobay xeelaadan dummatiyoogaa Kiristtaaneti akeekoosona. Yaatiyo gishshau, ubba Kiristtaaneti issi mala kuushshaa  kuuyoosona giidi naagana danddayokko. Gidikkonne, Xoossaa baaso siraatay nu qofaanne nu wozanaa denttettanaadan oottiiddi biyo wode, Yihoowa azzanttana danddayiya wodiyaa aattiyo aybippenne haakkiyo koshshay gujji gujji baana.—Mazamure 119:11, 129; 1 PHeexiroosa 2:16.

14. (a) Wodiyaa aattiyoobaa dooriyo wode nuuni qoppana bessiyaabi aybee? (b) Xoossau goynniyo goynuwaara gayttidabaa nu deˈuwan waatidi kaseyana danddayiyoo?

¹⁴ Wodiyaa aattiyoobaa dooriyo wode keehippe qoppana bessiya harabay ne wodiyaa. Neeni wodiyaa aattiyoobay oyqqidobay neeni loˈˈo giyoobay aybakko bessees; qassi neeni hegan aattiyo wodee neeni kaseyiyoobay aybakko bessees. Kiristtaanetussi keehippe koshshiyaabay Xoossaayyo goynniyo goynuwaara gayttidabaa gidiyoogee tuma. (Maatiyoosa 6:33) Yaatin, neeni Xoossaayyo goynniyo goynuwaara gayttidabau ne deˈuwan koyro sohuwaa immidoogaa waata erana danddayay? Kiitettida PHauloosi: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite. Wodee iita gidiyo gishshau, intte lo77o wodiyaa coo xaissoppite” yaagidi qonccissiis. (Efisoona 5:15, 16) Wodiyaa aattiyoobau goˈettiyo saatiyau qoncce gidida zawaa wottiyoogee “keehippe koshshiyaabau,” giishin neeni ayyaanaaban payya gidanaadan maaddiya oosotuyyo gidiya wodiyaa demmanaadan maaddees.—Piliphphisiyuusa 1:10, NW.

15. Wodiyaa aattiyoobaa dooriyo wode, qohuwaa gattiyaabaara gayttidabaa doorennaagee eratetta gididoy aybissee?

¹⁵ Wodiyaa aattiyoobaa dooriyo wode, qohuwaa gattiyaabaara gayttidabaa doorennaagee eratetta. Hegaa giyoogee woygiyoogee? Issito ane mittaa teeraa leemisuwaabaa qoppa. Neeni wooqqida baggaa akeekennan meenna mala, wooqqida baggaa xalaalaa gidennan a heeran deˈiyaagaakka qanxxada olaasa. Hegaadankka, wodiyaa aattiyoobaa dooriyo wode, qohuwaa gattiyaabaara gayttidabaa aggiyoogee eratetta. Issi erancha Kiristtaanee wodiyaa aattiyoobatun Geeshsha Maxaafaa baaso siraatata kanttanaadan oottiya, qoncce gididabatu xalaalaa giddennan, sirissiyaaba gidida woykko Yihoowaara deˈiya dabbotaa moorana danddayiyaabi deˈiyooba malatiyaabatuppekka haakkees.  (Leemiso 4:25-27) Geeshsha Maxaafan deˈiya zoriyaa minttada kaalliyoogee Xoossaara deˈiya dabbotaa moorana daddayiya wodiyaa aattiyoobatuppe haakkanaadan nena maaddees.

16. (a) Kandduwaabaa xeelliyaagan nuuyyo Yihoowaagaa mala xeelay deˈiyoogaa waatidi bessana danddayiyoo? (b) Geeshsha Maxaafaa baaso siraatata oosuwan peeshshiyoogee ne deˈuwan ubbatoo oottiyooba gidana danddayiyoy ayba ogiyaanee?

¹⁶ Tumu Kiristtaaneti wodiyaa aattiyoobaa dooriyo wode, ubbaappe kaseyidi Yihoowa xeelaa qoppoosona. Geeshsha Maxaafay Yihoowayyo siyettiyaabaanne i kessido maaratubaa qonccissees. Leemisuwau, Kawuwaa Solomoni, “worddotiya inxxarssaa, ashkke asata woriya kushiyaa, iitabaa maqqiya wozanaa, iitabaakko eesotidi woxxiya tohuwaa” malatiya Yihooway ixxiyo amaridabata xaafiis. (Leemiso 6:16-19) Yihoowa xeelay ne xeelaa waatidi bochana koshshii? Yettanchay “Yihoowa siiqiyaageetoo iitabaa ixxite” yaagidi zoriis. (Mazamure 97:10, NW) Wodiyaa aattiyooban neeni dooriyoobay Yihooway ixxiyoobaa neeni tumuppe ixxiyoogaa bessana koshshees. (Galaatiyaa 5:19-21) Neeni qoncciyan oottiyoobaappe asi baynnasan oottiyoobay neeni tumuppe ay mala asakko qonccissiyoogaakka akeeka. (Mazamure 11:4; 16:8) Yaatiyo gishshau, kandduwaabaa xeelliyaagan ne deˈuwan ubba macaran Yihoowa ufayssiyaabaa oottanau wozanappe koyikko, ubba wode Geeshsha Maxaafaa baaso siraatatuura moggottiyaabaa dooraasa. Hegee ne deˈuwan ubbatoo oottiyooba gidana.—2 Qoronttoosa 3:18.

17. Wodiyaa aattiyoobaa dooranaappe kase, nuuni ayba oyshata oychana koshshii?

 ¹⁷ Wodiyaa aattiyoobaa dooriyo wode, Yihoowa qofaara moggiyaabaa neeni oottiyoogaa shaakkada eranau harabaa ay oottana danddayay? ‘Hagee tananne Xoossaa sinttan deˈiya ta equwaa waatidi bochii?’ yaagiya oyshaa loyttada qoppa. Leemisuwau, issi pilmiyaa beˈanaakko agganaakko qofaa qachanaappe kase, ‘Ha pilmiyan deˈiyaabay ta zoriya wozanaa waatidi qohii?’ yaagada ne huuphiyaa oycha. Hegaa xeelliyaagan oosuwan peˈana danddayiya baaso siraatati awugeetakko ane beˈoos.

18, 19. (a) Nuuni wodiyaa aattiyoobay loˈˈokkonne loˈˈo gidennaakko shaakkidi eranau, Piliphphisiyuusa 4:8n deˈiya baaso siraatay waati maaddana danddayii? (b) Wodiyaa aattiyo loˈˈo gididabaa dooranaadan nena maaddana danddayiya hara baaso siraatati awugeetee? (Tohossa qofaa xeella.)

¹⁸ Issi keehippe koshshiya baaso siraatay: “Intte wozanan lo77obaanne galatissiyaabaa qoppite; tuma gidiyaabaa ubbaa, bonchchissiyaabaa ubbaa, mooro gidennabaa ubbaa, geeshshabaa ubbaa, siiqobaa ubbaa, lo77o haasaya gidiyaabaa ubbaa qoppite” yaagiya, Piliphphisiyuusa 4:8n deˈiyaagaa. PHauloosi yootiiddi deˈiyoy wodiyaa aattiyoobaa gidennan, Xoossaa ufayssiya yohota waanna oottidi wozanan wotti denttidi qoppiyoogaa gidiyoogee qoncce. (Mazamure 19:14) Gidikkonne, PHauloosa qaalati wodiyaa aattiyoobaara gayttidaagankka oosuwan peˈana danddayoosona. Waanidi?

¹⁹ Nena ne huuphe kaalliyaagaadan oycha: ‘Pilmiyan, viiduwaa kaassan, yettan, woykko hara qommo wodiyaa aattiyoobatun taani dooriyoobay ta qofan “geeshshabaa ubbaa” kunttanaadan oottiyaabee?’ Leemisuwau, neeni issi pilmiyaa beˈa simmada, zaara zaara qoppiyoobi aybee? Hegee ufayssiyaaba, geeshshanne, woppissiyaaba gidikko, neeni wodiyaa aattiyoobay loˈˈo gidiyoogaa hegan eraasa. Gidoppe attin, neeni beˈido pilmee geeshsha gidennabaa qoppanaadan oottikko, neeni wodiyaa aattidobay loˈˈo gidenna; ubba qohiyaaba. (Maatiyoosa 12:33; Marqqoosa 7:20-23) Aybissi? Kandduwan geeshsha  gidennabaa qoppiyoogee ne garssa sarotettaa xayssiyo, Geeshsha Maxaafan loohida ne zoriya wozanay moorettanaadan oottiyoonne neeni Xoossaara medhido dabbotaa moorana danddayiyo gishshataassa. (Efisoona 5:5; 1 Ximootiyoosa 1:5, 19) Hegaa mala wodiyaa aattiyoobay nena ne huuphe qohiyo gishshau, hegaappe haakkanau murttidaagaa gida. * (Roome 12:2) “Pattennabaa xeellenna mala, ta aifeta teqqa” yaagidi Yihoowakko woossida yettanchaa mala gida.—Mazamure 119:37.

20, 21. Koyro Qoronttoosa 10:23, 24y wodiyaa aattiyo loˈˈobaa dooriyoogaara waanidi gayttii?

²⁰ PHauloosi, buzo allaalletun qofaa qachiyo wode, qoppana bessiya keehippe koshshiya Geeshsha Maxaafaa baaso siraata qonccissiis. I, “Ubbabaa oottanau tana diggiyaabi baawa; shin ubbabai go77enna. Ubbabaa oottanau diggiyaabi baawa; shin ubbabai maaddenna. Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo” yaagiis. (1 Qoronttoosa 10:23, 24) He baaso siraatay wodiyaa aattiyooban loˈˈobaa dooriyoogaara waanidi gayttii? Nena ne huuphe, ‘Taani wodiyaa aattanau dooriyoobay harata waatidi bochii?’ gaada oychanau koshshees.

²¹ Neeni bessiyaabadan woykko ‘diggiyaabi baynnabadan’ xeelliyo wodiyaa aattiyo issi issibata ne zoriya wozanay coˈˈu giidi xeellana danddayees. Gidikkokka, wodiyaa aattiyo issi issiban shaahettennaadan eta zoriya wozanay diggiyo ammaniya harati hegaa bessennabadan xeelliyoogaa neeni akeekikko, hegan shaahettennaadan neeni qofaa qachana danddayaasa. Aybissi? ‘Neeni ne ishantta naaqqanau’ koyenna gishshataassa—woykko ubba neegaa mala ammanoy deˈiyo urau Xoossaayyo ammanettiyoogee keehippe deexxanaadan oottada, PHauloosi giidoogaadan ‘Kiristtoosa naaqqanau’ koyenna gishshataassa. ‘Xube  gidoppa’ yaagiya zoriyaa wozanan wotta. (1 Qoronttoosa 8:12; 10:32) Ha wodiyan tumu Kiristtaaneti ‘diggiyaabi baynnaba’ gidikkonne ‘maaddennaba’ gidana danddayiya wodiyaa aattiyoobatuppe haakkiyoogan, PHauloosi qaretaaninne akeekan immido zoriyaa siyoosona.—Roome 14:1; 15:1.

22. Huuphe allaalle xeelliyaagan haratussi deˈiya dumma dumma xeelaa Kiristtaaneti ammanidi ekkiyoy aybissee?

²² Gidikkokka, haratu goˈˈaa koyiyo hara ginaykka deˈees. Zoriya wozanay darobaa diggiyo issi Kiristtaanee wodiyaa aattiyo bessiyaabaa xeelliyaagan, Kiristtaane gubaaˈiyan deˈiya ubbay ba xeelaara maayettana koshshees gaana bessenna. I hegaadan oottiyaaba gidikko, kaamiyaa laaggiyo ogiyan kaamiyaa laaggiya harati ubbay baagaadan laaggana bessees giya ura mala gidees. Hegaa mala koshshay bessiyaaba gidenna. Darobaa diggiya zoriya wozanay deˈiyo issi uri wodiyaa aattiyoobaa xeelliyaagan baagaappe dumma gidikkonne, Kiristtaane baaso siraataara moggiya xeelay deˈiyo baagaa mala ammanoy deˈiyoogeeta Kristtaane siiquwaappe denddidaagan bonchana koshshees. Hegaa oottiyoogan, ‘asay ubbay a ashkketettaa eranaadan’ oottees.—Piliphphisiyuusa 4:5; Eranchchaa 7:16.

23. Neeni wodiyaa aattanau dooriyoobay loˈˈo gidiyoogaa waata shaakka erana danddayay?

²³ Qanttan, neeni wodiyaa aattanau dooriyoobay loˈˈo gidiyoogaa waata shaakka erana danddayay? Xoossaa Qaalan qoncciyan digettida, borssiyaaba gidida shori baynna asho gaytotettaa bessiya ay qommo wodiyaa aattiyoobaappekka haakka. Geeshsha Maxaafan qoncciyan odettibeenna wodiyaa aattiyoobata xeelliyaagan oosuwan peˈana danddayiya Geeshsha Maxaafaa baaso siraatata kaalla. Ne zoriya wozanaa qohiya wodiyaa aattiyoobaappe haakka; hegaadankka harata, ubba qassi neegaa mala ammanoy deˈiyoogeeta yiilloyana danddayiya wodiyaa aattiyoobata aggiyaagaa gida. Neeni hegaadan oottanau kuuyiyo mino kuushshay Xoossaayyo bonchuwaa ehiyaagaanne neeninne ne soo asay a siiqauwan deˈanaadan oottiyaagaa gido.