1, 2. Xoossaa Yihoowa siiqanaadan nena denttettiyay aybee?

XOOSSAA siiqay? Ne huuphiyaa Xoossaa Yihoowau geppada aara dabbotaa medhidaba gidikko, neeni wozanappe ee yaagada zaariyoogau siree baawa—qassi hegee bessiya zaaro! Nuuni Yihoowa siiqiyoogee tumuppe bessiyaaba. Nuuni Xoossaa siiqiyoy, i nuna siiqido gishshataassa . Hegaa Geeshsha Maxaafay: “Xoossai koiro nuna siiqido gishshau, nuuni a siiqoos” yaagidi qonccissees.—1 Yohaannisa 4:19.

² Yihooway ba siiquwaa nuuyyo kasetidi qonccissiis. I nuuni deˈanaadan saˈaa loˈˈiya soho oottidi giigissiis. I nuuyyo asatettaaninne aquwan koshshiyaabaa kunttees. (Maatiyoosa 5:43-48) Hegaappe aaruwan, ayyaanaaban nuna koshshiyaabaa kunttees. Nuuyyo ba Qaalaa Geeshsha Maxaafaa immiis. Hegaa bollakka, i nu woosaa siyanaagaanne nuna maaddanau ba geeshsha ayyaanaa immanaagaa ammanettidi, akko woosaa shiishshanaadan shoobbees. (Mazamure 65:2; Luqaasa 11:13) Aybippenne aadhiyaabay, nuuni nagaraappenne hayquwaappe kiyanaadan ooppenne aattidi siiqiyo ba Naˈaa nuna Woziyaagaa oottidi kiittidoogaa. Yihooway nuussi ayba gita siiqo bessidee!—Yohaannisa 3:16; Roome 5:8.

3. (a) Xoossaa siiquwan deˈanau, nuuppe koyettiyay aybee? (b) Nuuni qoppana bessiya keehi koshshiya oyshay woygiyaagee? Hegaa zaaroy deˈiyoy awaanee?

³ Yihooway nuuni a siiquwaappe merinau goˈettanaadan  koyees. Gidikkokka, nuuni goˈettiyoy woy aggiyoy nu dooruwaadaana. Xoossaa Qaalay: “Merinaa de7uwaa naagiiddi, intte huuphiyaa Xoossaa siiquwan wottite” yaagidi nuna minttettees. (Yihudaa 21) ‘Intte huuphiyaa wottite’ yaagiya qofay, Xoossaa siiquwan deˈanau nuuni nu huuphe oottana koshshiyaabi deˈiyoogaa bessees. Nuuni a siiquwau qoncce gidida ogetun zaaruwaa immana koshshees. Yaatiyo gishshau, nuuni qoppana bessiya keehi koshshiya oyshay, ‘Xoossaa siiqiyoogaa waatada bessana danddayiyaanaa?’ yaagiyaagaa. Kiitettida Yohaannisi geeshsha ayyaanay kaalettin: “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagidi xaafidoogan hegaa zaaroy deˈees. (1 Yohaannisa 5:3)  Nu Xoossaa keehi siiqiyoogaa nuuni bessana koyiyo gishshau, ha qaalatu birshshettaa akeekan pilggana koshshees.

4, 5. Yihoowa siiqiyoogee ne wozanan dicciyoogaa waani doommidaakko qonccissa.

⁴ ‘Xoossaa siiqiyoogaa’—kiitettida Yohaannisi ba qofan ay wottidi hagaa xaafidee? Nuuni nu huuphe xekkan Xoossaayyo wozanappe bessiyo siiquwaabaa yootees. Ne wozanan Yihoowa siiqiyoogee dicciyoogaa doommidoy awudekko hassayana danddayay?

⁵ Neeni Yihoowabaanne a halchuwaabaa tumaa tamaarido wodiyaanne ammanuwaa oosuwan bessiyoogaa doommido wodiyaa, ane issi kutti qoppa ekka. Neeni nagarancha gidada Xoossaappe haakkada yelettidaba gidikkonne, Addaameppe halida polotettaa demmanaadaaninne merinaa deˈuwaa laattanaadan, Yihooway Kiristtoosa baggaara ogiyaa dooyidoogaa akeekadasa. (Maatiyoosa 20:28; Roome 5:12, 18) Ne gishshau ba alˈˈo Naˈay hayqqanaadan kiittidi, Yihooway ayba gita yarshsho yarshshidaakko akeekiyoogaa doommadasa. Hegee ne wozanaa denttettin, neeyyo hegaa mala gita siiquwaa bessida Xoossaa siiqiyoogaa doommadasa.—1 Yohaannisa 4:9, 10.

6. Wozanappe gidida siiqoy ayba ogiyan qonccii? Xoossaa siiqiyoogee ay oottanaadan nena denttettidee?

⁶ Gidikkonne, neeyyo hegaadan siyettidoogee Yihoowa wozanappe siiqiyoogau doometta xalla. Siiqoy wozanan siyettiyaaba woykko doonan haasayiyooba xalla gidenna. Tumuppe Xoossaa siiqiyoogee, coo “Yihoowa siiqays” giyoogaappe aadhiyaabaa gujjees. Ammanuwaagaadan, wozanappe gidida siiqoy qoncciyoy he siiqoy denttettin oottiyoobaana. (Yaaqooba 2:26) Nuuni nu siiquwaa bessiyoy, he siiqiyo ura ufayssiyaabaa oottiyoogaana. Yaatiyo gishshau, Yihoowa siiqiyoogee ne wozanan xaphuwaa yeddiyo wode, saluwan deˈiya ne Aawaa ufayssiya ogiyan deˈanaadan ne wozanay nena denttettiis. Neeni xammaqettida Markkee? Hegaadan gidikko,  he wolqqaama siiqoynne Yihoowau aqiyoogee neeni ne deˈuwan aybippenne aadhiya kuushshaa kuuyanaadan oottiis. Yihoowa sheniyaa oottanau ne huuphiyaa geppadasa; qassi neeni geppidoogau malaata gidanaadan xammaqettadasa. (Roome 14:7, 8) Neeni Yihoowayyo wozanappe gelido qaalaa poliyoogee, kiitettida Yohaannisi kaallidi yootidoogaa gujjees.

7. Xoossaa azazotuppe amaridaageeti awugeetee? Hegeeta naagiyoogee ay gujjii?

⁷ Yohaannisi, Xoossaa siiqiyoogee: “A azazuwaa naagiyoogaa” yaagidi qonccissiis. Xoossaa azazoti awugeetee? Yihooway ba Qaalaa Geeshsha Maxaafaa baggaara qoncce gidida daro azazota nuussi immiis. Leemisuwau, mattottiyoogaa, sharamuxiyoogaa, eeqau goynniyoogaa, wuuqqiyoogaanne worddotiyoogaa malatiya oosota Yihooway diggees. (1 Qoronttoosa 5:11; 6:18; 10:14; Efisoona 4:28; Qolasiyaasa 3:9) Xoossaa azazota naagiyoogee Geeshsha Maxaafay geeshshidi yootiyo kandduwaa maaratuura moggottidi deˈiyoogaa gujjees.

8, 9. Geeshsha Maxaafan qoncce gidida higgee imettibeennabatunkka, Yihoowa ufayssiyaabi aybakko waatidi erana danddayiyoo? Leemisuwaa yoota.

⁸ Gidikkonne, Yihoowa ufayssanaayyo i qoncciyan yootido azazota azazettiyoogaappe aadhiyaaba oottana koshshees. Nuuni galla galla oottiyo ubbabaa xeelliyaagan Yihooway yaanne haanne qaaxxennaadan diggiya higgiyaa kessibeenna. Yaatiyo gishshau, Geeshsha Maxaafan qoncce gidida higgee imettibeenna daro hanotati, galla galla oottiyooban nuna gakkana danddayoosona. Hegaa mala hanotatun, Yihoowa ufayssiyaabi aybakko waati erana danddayiyoo? Geeshsha Maxaafay, Xoossaa qofaa qonccissidi bessiyaabata oyqqiis. Nuuni Geeshsha Maxaafaa xannaˈiyo wode, Yihooway dosiyoobaanne ixxiyoobaa eroos. (Mazamure 97:10; Leemiso 6:16-19) I xoqqa sohuwaa immiyo eeshshatanne oosota shaakkidi eroos. Nuuni Yihoowa eeshshatanne a ogeta loyttidi eriyoogee, oottiyoobaaninne kuuyiyooban kaseegaappe aaruwan a  qofaa kaallanaadan oottees. Yaatiyo gishshau, Geeshsha Maxaafan qoncce gidida higgee imettibeenna hanotatunkka, “Godai koyiyoobai aibakko” ubbatoo akeekana danddayoos.—Efisoona 5:17.

⁹ Leemisuwau, hanttaarabaa woykko shori baynna inddaa gaytotettaa bessiya pilimeta woykko televizhiiniyaa progiraameta beˈennaadan diggiya qoncce gidida higgee Geeshsha Maxaafan deˈenna. SHin hageeta malatiyaabata beˈennaadan diggiya qoncce higgee tumuppe nuussi koshshii? Yihooway ha allaalleta waatidi xeelliyaakko eroos. A Qaalay nuuyyo qoncciyan: “Iitatanne hanttaarabaa siiqiyaageeta i [Yihooway] keehippe ixxees” yaagidi yootees. (Mazamure 11:5) Geeshsha Maxaafay: “Xoossai shaaramuxanau qaaqqatiyaageetanne shaaramuxiyaageeta pirddana” yaagidikka yootees. (Ibraawe 13:4) Geeshsha ayyaanay kaalettin xaafettida ha qaalatun qoppiyoogan Yihoowa shenee aybakko loyttidi akeekanau danddayoos. Yaatiyo gishshau, nu Xoossay ixxiyo oosota qoncciyan bessiyaabata xeelliyoogan wodiyaa aattanau doorokko. Wodiyaa aattiyooban, ha alamee qohennabadan qoncciyan bessiyo, kandduwaa mooriyaabaappe haakkiyoogee Yihoowa ufayssiyoogaa eroos. *

10, 11. Yihoowayyo azazettanau nuuni dooriyoy aybissee? Nuuni ayyo ay mala hanotan azazettana koshshii?

¹⁰ Nuuni Xoossaa azazota naagiyo waanna gaasoy aybee? Xoossaa xeela gidiyoogaa akeekidoobaara moggottidi, galla galla deˈanau koyiyoy aybissee? Nuuni hagaa mala dooruwaa oottiyoy qixaatiyaappe attana gishsha xallassa woykko Xoossaa sheniyaa xaasayidi xeelliyaageeta gakkiya qohuwaappe haakkana xalaalaassa gidenna. (Galaatiyaa 6:7) Hegaappe, Yihoowayyo azazettiyoogaa, a siiqiyoogaa bessiyo alˈˈo injjedan xeelloos. Issi naˈay ba aawaappe sabaa demmanau yeemottiyoogaadan, nuunikka Yihoowan sabettanau  koyoos. (Mazamure 5:12) I nuuyyo Aawaa; nuuni a siiqoos. Nuuni ‘GODAAPPE sabaa demmiyo’ ogiyan deˈiyoogaa eriyoogan demmiyoogaappe aadhiya ufayssaanne woppatettaa demissiyaabi aybinne baawa.—Leemiso 12:2.

¹¹ Hegaa gishshau, nuuni azazettiyoy undduudiiddi woykko azazettanau koyiyoobaa xalla dooridi gidenna. * Hagaa azazettana hagaa aggana giidi, azazettanau injjetiya woykko metenna azazotu xallaa doorokko. Hegaappe dumma ogiyan, nuuni ‘kumetta wozanaappe azazettoos.’ (Roome 6:17) “Taani ne azazota siiqiyo gishshau, etan ufaittais” giidi xaafida Geeshsha Maxaafaa yettanchaagaadan nuussi siyettees. (Mazamure 119:47) Ee, nuuni Yihoowa azazota siiqidi azazettoos. Nuuni ubbaban wozanappe ayyo azazettiyoogee, bessiyaabanne i koyiyooba gidiyoogaa eroos. (Zaarettido Wogaa 12:32) Noha xeelliyaagan a Qaalay giyoogaadan Yihooway nuuyyokka gaanaadan koyoos. Daro tammu layttatussi azazettidi deˈiyoogan Xoossaa siiqiyoogaa bessida, ba soo asau huuphe gidida, ammanettida Noha xeelliyaagan Geeshsha Maxaafay: “Nohee ubbabaakka Xoossai azazidoogaadan oottiis” yaagees.—Doomettaabaa 6:22.

12. Nuuni azazettiyoogee Yihoowa wozanaa ufayssiyoy awudee?

¹² Nuuni eeno giidi azazettiyo wode Yihoowau aybi siyettii? Hegan nuuni a wozanay ‘ufayttanaadan’ oottiyoogaa a Qaalay yootees. (Leemiso 27:11) Nuuni azazettiyoogee Ubbaappe Boollaara Haariya Godaa wozanaa tumuppe ufayssii? Ufayssiyoogee erettidaba—Yihooway ufayttanaadan oottiya loˈˈo gaasoy deˈees! Yihooway nuna kandduwan laˈatettay deˈanaadan oottidi medhiis. Hegaa giyoogee, nuuyyo dooriyo laˈatettay deˈees giyoogaa; nuuni Xoossaayyo azazettanau woykko agganau doorana danddayoos. (Zaarettido Wogaa 30:15, 16, 19, 20)  Nuuni Yihoowayyo azazettanau eeno giidi dooriyo wodenne wozanappe Xoossaa siiqiyoogee denttettin hegaa kuuyiyo wode, saluwan deˈiya nu Aaway keehi ufayttanaadan oottoos. (Leemiso 11:20) Hegaa oottiyoogan nuuni aybippenne aadhiya deˈo ogiyaa dooroos.

13, 14. Xoossaa ‘azazoy deexo gidenna’ gaana danddayiyoy aybissee? Hegaa waatada leemisuwan yootana danddayay?

¹³ Kiitettida Yohaannisi Yihooway nuuppe koyiyoobaa xeelliyaagan: “A azazoikka deexo gidenna” giidi keehi minttettiyaabaa yootees. Hara Geeshsha Maxaafaa birshshettay he sohuwan: “A azazoti nuna huqqunnokkona” yaagees. (New English Translation) Yihooway koyiyoobati nu wolqqaappe dariyaageeta woykko huqqunniyaageeta gidokkona. * A higgeti polo gidenna asaa naati azazettanau danddayennabata gidokkona.

¹⁴ Hegaa kaalliyaagaadan leemisuwan yootana danddayoos. Mata lagge gidida issi uri, deˈiyo keettaa laammiiddi neeni a maaddanaadan oychees. Tookkidi efaana koshshiya daro saaxineti deˈoosona. Etappe issooti issooti issi uri metootennan barkka efaana danddayiyoogaa keena kawushsha; shin harati naaˈˈu uray tookkana koshshiyaagaa keena deexxiyaageeta. Ne laggee neeni tookkanaadan koyiyo saaxineta doorees. Neeni tookkanau danddayenna saaxineta i eriiddi tookka gaanee? CHii, geenna. Neeni nerkka tookkanau malaydda qohettanaadan i koyenna. Hegaadankka, nuna siiqiyaanne keha Xoossay nuuni polanau keehi deexxiya azazota naaganaadan oychenna. (Zaarettido Wogaa 30:11-14) I nuuni hegaa mala deexo toohuwaa tookkanaadan mulekka oychenna. “Nuuni aibippe  merettidaakkonne i erees; nuuni biitta gidiyoogaa i akeekees;” hegaa gishshau, Yihooway nu abbee guutta gidiyoogaa erees.—Mazamure 103:14.

15. Yihoowa azazoti aybippenne aadhidi nuna maaddiyaabata gidiyoogaa ammanettana danddayiyoy aybissee?

¹⁵ Yihoowa azazoti mulekka deexo gidokkona; eti nuna keehippe maaddiyaabata. (Isiyaasa 48:17) Hegaa gishshau, Muusee beni wode Israaˈeeletussi: “Hachchi be7iyoogaadan, nuuyyo ubba wodekka lo77o gidana malanne nuuni de7uwan de7ana mala, GODAI nuna ha awaajota ubbaa naaganaadaaninne GODAASSI, nu Xoossaassi, yayyanaadan azaziis.” (Zaarettido Wogaa 6:24) Nuunikka, Yihooway aybippenne aaruwan maaddiya—nuna addussa wodiyau, merinau goˈˈiyaabaa wozanan wottidi ba higgeta immidoogaa ammanettana danddayoos. I tumuppe hegaappe dummatiyaabaa waanidi oottana danddayii? Yihooway zaway baynna aadhida eratettay deˈiyo Xoossa. (Roome 11:33) Yaatiyo gishshau, nuuyyo aybippenne aadhiya loˈˈobaa i erees. Qassi Yihooway siiquwau waanna leemiso. (1 Yohaannisa 4:8) I haasayiyoobaaninne oottiyooban a denttettiya waanna eeshshay siiquwaa. I ba ashkkaratuyyo immiyo azazuwaa ubbau baasoy siiquwaa.

16. Moorettida alamiyaa sugettaynne polotettay paccido ashuwaa sugettay deˈishinkka, ubbatoo azazettana danddayiyoy aybissee?

¹⁶ Hegaa giyoogee, Xoossaayyo azazettiyoogee metennaba giyoogaa gidenna. Nuuni ‘xalahe halaqan haarettiya,’ moorettida ha alamee gattiyo sugettaa eqettana bessees. (1 Yohaannisa 5:19) Nuuni Xoossaa higgiyaa menttanaadan sugiya polotettaa pacaarakka baaxetana bessees. (Roome 7:21-25) SHin nuuni Xooossaa siiqiyoogee hegaa xoonanaadan oottana danddayees. Ayyo azazettiyoogan bantta siiquwaa bessanau koyiyaageeta Yihooway anjjees. I “baassi azazettiyaageetussi” ba geeshsha ayyaanaa immees. (Oosuwaa 5:32) He ayyaanay nuuni loˈˈo ayfiyaa, hegeekka Yihoowayyo azazettiyo ogiyaa kaallanaadan nuna maaddana danddayiya alˈˈo eeshshata dichanaadan oottees.—Galaatiyaa 5:22, 23.

17, 18. (a) Nuuni ha maxaafan pilgganabay aybee? Hegaadan oottiyo wode nu wozanan wottana koshshiyaabay aybee? (b) Kaalliya shemppuwan tobbanabay aybee?

 ¹⁷ Ha maxaafan, nuuni Yihoowa baaso siraatatanne kandduwaa maarata, qassi a sheniyaa qonccissiya hara darobata pilggana. Nuuni hegaadan oottiyo wode, koshshiya keehi darobata nu wozanan wottana bessees. A higgetanne a baaso siraatata azazettanaadan Yihooway nuna wolqqanttennaagaa akeekiyaageeta gidoos; i koyiyoy nu wozanay denttettin eeno giidi azazettiyoogaa. Nuuni ha wodiyan daro anjjuwaa demmanaadaaninne sinttappekka merinaa deˈuwaa demmanaadan oottiya ogiyan deˈanaadan Yihooway koyiyoogaa dogana bessenna. Nuuni kumetta wozanaappe azazettiyoogee Yihoowa keehippe siiqiyoogaa bessiyo alˈˈo injje oottidi xeelliyaageeta gidoos.

¹⁸ Iitaa kehaappe shaakkanaadan nuna maaddanau, Yihooway siiquwan nuussi zoriya wozanaa immiis. Gidikkokka, nu zoriya wozanay immiyo kaaletoy ammanttiyaagaa gidanaadan loohissoy koshshiyoogaa kaalliya shemppuwan tobbana.