1, 2. Nuuni ammanettiyaageeta gidanawu baaxetiyoogaa beꞌiyo wode Yihoowayyo aybi siyettii?

 ISSI gallassi issi naꞌay timirtte keettaappe soo yiyo wode, miishshay kumido miishsha borssaa demmiis. I waatanee? I hegaa ekkana danddayees. SHin I borssaa A godawu zaariis. Naꞌaa ayyiyaa I oottidobaa siyada hegan keehi ufayttawusu.

² Daro aawatinne aayoti bantta naati ammanettiyo wode ufayttoosona. Saluwan deꞌiya nu Aaway Yihooway ‘tumaa Xoossaa,’ qassi nuuni ammanettiyo wode I ufayttees. (Mazamure 31:5) Nuuni A ufayssanawunne “ubbaban ammanettanawu” koyoos. (Ibraawe 13:18, NW) Ammanettiyoogee metiyaaba gidana danddayiyo oyddu ogeta ane beꞌoos. Hegaappe simmidi, nuuni he metuwaa xooniyo wode demmiyo issi issi goꞌꞌata pilggana.

3-5. (a) Nuuni nuna waati cimmana danddayiyoo? (b) Nuuni nuussi ammanettiyaageeta gidanaadan nuna aybi maaddanee?

³ Nuuni haratuyyo ammanettiyaageeta gidanawu, koyro nuussi ammanettiyaageeta gidana bessees. Hegee issi issitoo metana danddayees. Koyro xeetu layttan, Lodooqiyaa gubaaꞌiyan deꞌiya ishantti Xoossaa ufayssokkona; shin Xoossaa ufayssiyaabadan qoppiyoogan banttana cimmidosona. (Ajjuutaa 3:17) Tumuppe nuuni  ay mala asakko nuunikka nuna cimmana danddayoos.

⁴ Erissiyo ashkkaraa Yaaqoobi hagaadan giis: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela.” (Yaaqooba 1:26) Nuuni iita asata woy harata toochchiyaageeta woy worddotiyaageeta gidikkokka, nuuni amarida loꞌꞌobaa oottikko Xoossaa nubay qofissenna giidi qoppikko nuna cimmoos. Nuuni nuna cimmennaadan naagettana mala nuna aybi maaddana danddayii?

⁵ Nuuni heregaa xeelliyo wode, nu meray ay malakko beꞌana danddayoos. Nuuni Geeshsha Maxaafaa nabbabiyo wode, nu garssa oonatettaa beꞌana danddayoos. Nuuni mino gididobaakka shugo gididobaakka eranaadan Geeshsha Maxaafay nuna maaddana danddayees. Yaatiyo wode, nuuni qoppiyooban, oottiyoobaaninne haasayiyooban ay laammana koshshiyaakko tamaaroos. (Yaaqooba 1:23-25 nabbaba.) SHin nuuni nu bolli ayba balikka baa giidi qoppikko, koshshiyaaban laamettennan aggana danddayoos. Hegaa gishshawu, nuuni wozanappe nuna qoranawu Geeshsha Maxaafaa goꞌettana koshshees. (Ermmaasa Zilaassaa 3:40; Hagga 1:5) Nu oonatettaa beꞌanaadan woosaykka nuna maaddees. Nuna qoranaadaaninne nu balaa akeekidi giigissana mala maaddanaadan woosan Yihoowa oychchana danddayoos. (Mazamure 139:23, 24) “GODAI iitaa oottiyaageeta ixxees; shin suuretuyyo i ulottees” giya qofaa nuuni hassayoos.—Leemiso 3:32.

6. Azinaynne machchiyaa issoy issuwawu ammanettana koshshiyoy aybissee?

⁶ Ammanettiyoogee son keehi koshshiyaaba. Azinaynne machchiyaa issoy issuwaara qoncciyan haasayiyo  wode, eti hirggokkona, qassi issoy issuwawu wozanappe ammanettana danddayoosona. Ammanettennaagee aqo deꞌuwan dumma dumma ogiyan qonccees. Leemisuwawu, aqo oyqqida uri lambbeechchana woy pornograafiyaa beꞌana, woy mattuman dummatiya ura geeman siiqana danddayees. Mazamurawee hagaadan giidoogaa akeeka: “Taani cimmiya asatuura issippe uttikke; lo77o milatiya iitatu maabaran gelikke.” (Mazamure 26:4) Neeni qoppiyoobankka ne aqo laggiyawu ammanettana xayikko, hegee ne aqo deꞌuwaa qohana.

7, 8. Naati ammanettiyoogaa goꞌꞌaa akeekanaadan tamaarissanawu neeni Geeshsha Maxaafaa waata goꞌettana danddayay?

⁷ Ammanettiyoogee keehi koshshiyaaba gidiyoogaa  naatikka tamaarana bessees. Yelidaageeti hegaa eta tamaarissanawu Geeshsha Maxaafaa goꞌettana danddayoosona. Ammanettibeenna asatubaa, hegeetikka kayso gidida Akkaanabaa, miishshaa demmanawu worddotida Gehaazabaa, qassi miishshaa wuuqqidanne guyyeppe 30 biraa gishshawu Yesuusa kaddida Yihudaabaa Geeshsha Maxaafay yootees.—Yaasa 6:17-19; 7:11-25; 2 Kawotu Maxaafaa 5:14-16, 20-27; Maatiyoosa 26:14, 15; Yohaannisa 12:6.

⁸ Ammanettida daro asatubaakka, hegeetikka ba attuma naati demmido miishshaa zaaranaadan zorida Yaaqoobabaa, Xoossaayyo gelido qaalaa polida Yofttaahebaanne A naꞌeebaa, qassi metiya wodiyankka ammanettida Yesuusabaa Geeshsha Maxaafay yootees. (Doomettaabaa 43:12; Daannata 11:30-40; Yohaannisa 18:3-11) Naati ammanettiyoogaa goꞌꞌaa akeekanaadan ha taariketi maaddana danddayoosona.

9. Aawaynne aayyiyaa ammanettikko, hegee naata waati maaddii?

⁹ “Yaatin, neeni harata tamaarissiyaagee nena ne huuphen aissi tamaarissikkii? Neeni, ‘Wuuqqoppa’ yaagada qaalaa yootaasa; shin neeni ne huuphen wuuqqaiyye?” giya, Geeshsha Maxaafay yootiyo keehi koshshiya maaraappe yelidaageeti tamaarana danddayoosona. (Roome 2:21) Yelidaageeti haasayiyoobaappe eti oottiyoobay dummatiyo wode naati akeekoosona. Nuuni nu naati ammanettiyaageeta gidanaadan yootikkonne, nuuni ammanettiyaageeta gidana xayikko, eti ammanettanawu metootana. Aawaynne aayyiyaa guuttabankka worddotiyoogaa naati akeekikko, etikka hegaadan oottana danddayoosona. (Luqaasa 16:10 nabbaba.) Hara baggaara qassi, naati bantta aawaynne aayyiyaa ammanettiyoogaa akeekikko, hegee eti naata yeliyo wode ammanettiya  aawanne aayo gidanaadan maaddana danddayees.—Leemiso 22:6; Efisoona 6:4.

10. Nuuni nu mala Kiristtaanetuura haasayiyo wode ammanettiyaageeta waani gidana danddayiyoo?

¹⁰ Nuuni Kiristtaane ishanttuyyoonne michchonttuyyookka ammanettana koshshees. Galla galla haasayiyoobay zigirssawu, ubba qassi sunttaa mooriyoogawu akeekennan laamettana danddayees. Issibay tumakkonne erennan zaarettidi haasayikko, nuuni wordduwaa aassana danddayoos. ‘Nu doonaa shiishshi ekkiyoogee’ keehi loꞌꞌo. (Leemiso 10:19) Ammanettiyoogaa giyoogee nuuni qoppiyo, eriyo woy siyido ubbabaa haasayana koshshees giyoogaa gidenna. Nuuni haasayanabay tuma gidikkokka, hegaa zaarettidi haasayiyoogee nuna gattennaba woy koshshennabanne nuuni keha gidiyoogaa bessennaba gidana danddayees. (1 Tasalonqqe 4:11) Issi issi asay iitabaa haasayidi, “Taani tumabaa haasayaas” giidi gaasoyees. SHin nuuni Yihoowa asa gidiyo gishshawu, nu haasayay ubbatoo siyanawu kehiyaagaanne ufayssiyaagaa gidanaadan koyoos.—Qolasiyaasa 4:6 nabbaba.

11, 12. (a) Nagara oottida uri ammanettennan aggiyoogan hanotay yaa iitanaadan waati oottana danddayii? (b) Nu lagge gidida uri gita nagaraa oottidoogaa nuuni eridaba gidikko, ay qoppiyoogaappe nuuni naagettana bessii, qassi aybissi? (c) Yihoowa dirijjitiyawu waani ammanettiyaageeta gidana danddayiyoo?

¹¹ Gubaaꞌiyaa maaddanawu Yihooway cimata sunttiis. Nuuni cimatuyyo ammanettikko, eti metoottennan nuna maaddoosona. Aybissi? Neeni sahettada maaduwaa demmanawu dottoriyaakko biikko, nena sakkiyaabaappe amaridaagaa qottuutee? Neeni qottikko, I nena waati maaddana danddayii? Hegaadan, nuuni gita nagaraa oottikko, hegaa xeelliyaagan worddotana bessenna.  Nuuni cimatukko biidi hegaabaa tumaa yootana bessees. (Mazamure 12:2; Oosuwaa 5:1-11) Ane hegaappe dumma hanotaa qoppa: Ne laggee gita nagaraa oottidoogaa neeni eridaba gidikko shin? (Wogaabaa 5:1) “Taani A lagge gidiyo gishshawu, hegaa genttana” gayiyye, cimati awu koshshiya maaduwaa immin, I Yihoowaara dabbotaa zaarettidi minttana danddayiyoogaa hassayay?—Ibraawe 13:17; Yaaqooba 5:14, 15.

¹² Nuuni haggaazuwaa irpporttiyaa kunttiyo wodekka, Yihoowa dirijjitiyawu ammanettiyaageeta gidana koshshees. Qassi aqinye gidanawu woy hara ogiyankka haggaazanawu qitsiyaa kunttiyo wode nuuni tumanchcha gidana bessees.—Leemiso 6:16-19 nabbaba.

13. Nuuni nu mala Kiristtaaniyaara oottikko, ammanettiyaageeta waani gidana danddayiyoo?

¹³ Kiristtaane ishanttinne michchontti oosuwaa goynuwaara walakkana bessenna. Leemisuwawu, nuuni SHiiquwaa Addaraashan woy haggaaziyo wode zalꞌꞌokko. Qassi oosuwaara gayttidaagan nu ishantti woy nu michchontti goꞌettana bessiyoobaa nuuni goꞌettana bessenna. Neeni Yihoowa Markkata qaxarikko, ne oosanchchatuyyo wodiyan qanxxa, neeni qaalaa gelido miishshaa etawu imma, qassi higgiyan koyettiyaagaadan bessiya ubbabaa kuntta. Hegee Akkamuwaa inshshuranssiyaara woy oosuwaappe shemppiyo gallassaara gayttidaba gidana danddayees. (1 Ximootiyoosa 5:18; Yaaqooba 5:1-4) Qassi nena qaxaridi ootissiyay Yihoowa Markka gidikko, dumma hanotan oyqqees gaada naagoppa. (Efisoona 6:5-8) Neeni oosuwaa oottanawu maayettido wodiyaa keenanne neeyyo qanxxettiyaagaa keena oosuwaa ootta.—2 Tasalonqqe 3:10.

14. Kiristtaaneti issippe zalꞌꞌiyoogaa doommanaappe kase ay oottana bessii?

 ¹⁴ Nuuni issi ishaara woy michcheera zalꞌꞌanawu qofaa qachchikko shin? Hegee issibawu miishshaa kessiyoogaara woy talꞌꞌiyoogaara gayttidaba gidana danddayees. Hegaa mala hanotawu keehi maaddiya Geeshsha Maxaafay yootiyo maaray deꞌees: Ubbabaa xaafa wotta! Hananabaa yootiya Ermmaasi gadiyaa shammido wode, I shamaa paramaa naaꞌꞌu koppiyaa giigissiis, issi koppiyan markkati paramidosona, sinttappe koshshiyo wode goꞌettanawu naaꞌꞌu koppetakka wottiis. (Ermmaasa 32:9-12; Doomettaabaa 23:16-20kka xeella.) Maayettidobaa xaafi wottiyoogee ba ishaa ammanennaagaa bessiyaaba milatana danddayees giidi issoti issoti qoppoosona. SHin, maayettidobaa xaafi wottiyoogee issibaa bala ogiyan akeekennaadan, azzanennaadaaninne palamettennaadan oottana danddayees. Zalꞌꞌiyaara gayttida aybippenne gubaaꞌiyaa sarotettay aadhdhiyoogaa hassaya.—1 Qoronttoosa 6:1-8; Wurssetta Qofaa 30 xeella.

15. Zalꞌꞌiyan ammanettennaagaa xeelliyaagan Yihoowawu aybi siyettii?

¹⁵ Yihoowa Markka gidennaageeta gujjin, nuuni asa ubbaayyo ammanettiyaageeta gidana bessees. Nuuni ammanettiyoogaa Yihooway xoqqu ootti xeellees. “GODAI worddo meezaanaa ixxees; shin likke meezaanan ufaittees.” (Leemiso 11:1; 20:10, 23) Beni wode, asay zalꞌꞌiyawu meezaanaa darotoo goꞌettees. SHin issi issi zalꞌꞌanchchati maayettidobaappe guuttaa immiyoogan woy qanxxissana bessiyaagaappe daruwaa qanxxissiyoogan banttappe shammiyaageeta cimmoosona. Ha wodiyan, beni wodiyaagaadan zalꞌꞌiyan ammanettennaagee keehi meeze gididaba. Ammanettennaagaa Yihooway he  wode ixxidoogaadan, I hegaa ha wodiyankka ixxees.

16, 17. Ammanettennaagaa bessiya nuuni naagettana koshshiyo meeze gididabati aybee?

¹⁶ Oosuwawu malkkachchaa gelissiyo wode, kawotettay koyiyo qitsiyaa kunttiyo wode, woy timirtte keettaa paaciyaa wodenne hegaa mala hara wodetun ammanettennaadan oottana danddayiyaabay nuna ubbaa gakkees. Worddotiyoogee, baynnabaa gujjiyoogee, woy likke gidennabaa zaariyoogee bala gidenna giidi daroti qoppoosona. Hegee nuna garamissenna. Ha wurssetta gallassan asati “banttana siiqiyaageeta, miishshaa siiqiyaageeta, . . . lo77obaa dosennaageeta” gidanaagaa Geeshsha Maxaafay kasetidi yootiis.—2 Ximootiyoosa 3:1-5.

¹⁷ Ammanettenna asatuyyo ha alamiyan ushachchidaba nuuyyo issi issitoo milatana danddayees. (Mazamure 73:1-8) Issi Kiristtaanee ammanettiyaagaa gidiyo gishshawu oosuwaappe yedetettana, miishshaa metootana, woy ooso sohuwan asay A maara oyqqennan aggana danddayees. SHin ammanettanawu nu goꞌꞌa ubbaa aggibayiyoogee bessiyaaba. Aybissi?

18. Loꞌꞌo sunttay keehi koshshiyoy aybissee?

¹⁸ Ammanettiya, bonchchettiyaanne tumanchcha asa gididi erettiyoogee ha alamiyan alꞌꞌobanne darin baynnaba. Nuuni ubbay hegaa mala sunttay deꞌiyoogeeta gidana danddayoos. (Mikiyaasa 7:2) Neeni ammanettada deꞌiyo gishshawu issi issi asay ne bolli qilliiccananne nena eeyya gaana danddayees. SHin harati neeni ammanettiyo gishshawu nena nashshananne nenan ammanettana danddayoosona. Kumetta saꞌan, Yihoowa Markkati ammanettiyoogan erettoosona. Yihoowa Markkati ammanettiyoogaa eriyo gishshawu ootissiya amaridaageeti eta qaxaranawu  koyoosona. Qassi hara oosanchchati ammanettibeenna gishshawu oosuwaappe yedetettiyo wode, Yihoowa Markkati bantta oosuwaappe darotoo yedetettokkona.

19. Ammanettada deꞌiyoogee Yihoowaara dabbotido ne dabbotawu waati maaddii?

¹⁹ Ubbaban ammanettidi deꞌiyoogee neeyyo loꞌꞌo kahaynne sarotettay deꞌanaadan oottana. “Nuna zoriya lo77o wozanai nuuyyo de7ees” giida PHawuloosadan, nuunikka gaana danddayoos. (Ibraawe 13:18) Ubbaappe aaruwan, neeni ubbaban ammanettiyaagaa gidanawu baaxetiyo baaxiyaa ne siiqo Aaway, Yihooway akeekananne nashshana.—Mazamure 15:1, 2; Leemiso 22:1 nabbaba.