1, 2. Nuuni wodiyaa aattiyoobaa dooriyo wode akeekanchcha gidana koshshiyoy aybissee?

 ISSI mittaa ayfiyaa teeraa neeni saxxana hanaydda issi baggay wooqqidoogaa beꞌidabadan qoppa. Yaatin neeni waatanee? Hegaa muutee? Neeni hegaa oluutee? Woy qassi wooqqida baggaa qanxxa olada wooqqibeennaagaa muutee?

² Amarida ogiyan, wodiyaa aattiyoobay he mittaa ayfiyaa teeraa mala. Wodiyaa aattiyo issi issibay ufayssiyaaba gidana danddayees; shin dariya baggay pokkobaa, danobaa woy iita ayyaana oosuwaa bessiyaaba gidiyo  gishshawu wooqa. Hegaa gishshawu, neeni wodiyaa aattiyoobaa dooriyo wode, “Hegee ta aawatetta. Taani wodiyaa aattanawu koyidobaa doorana danddayays” gay? Woy qassi, “Wodiyaa aattiyo ubbabay iita” gay? Woykko neeni wodiyaa aattiyoobaa akeekan dooray, qassi wodiyaa aattiyo iitabaappe naagettada loꞌꞌoban ufayttay?

3. Nuuni wodiyaa aattiyoobaa dooriyo wode ay qoppana bessii?

³ Nuussi ubbawu allaxxiyoobaynne wodiyaa aattiyoobay koshshees; qassi nuuni hegaa akeekan doorana koyoos. Nuuni wodiyaa aattanawu dooriyoobay Yihoowawu goynniyoogaara waanidi gayttana danddayiyaakko nuna oychchana koshshees.

4. Nuuni wodiyaa aattiyoobaa dooranaadan maaddana danddayiya Geeshsha Maxaafay yootiyo maaray awugee?

⁴ Nuuni nuna Yihoowawu sheedhdhiyo wode, nu deꞌuwan ayyo haggaazanawu qaalaa geloos. (Eranchchaa 5:4 nabbaba.) Nuuni “ubbabaa Xoossaa bonchchuwaassi” oottanawu qaalaa geloos. (1 Qoronttoosa 10:31) Hegaa giyoogee nuuni shiiquwaa shiiqiyo wode woy haggaaziyo wode xalla gidennan, allaxxiyo wode woy wodiyaa aattiyo wodekka Xoossaayyo nuna sheedhdhida giyoogaa.

5. Nuuni Yihoowawu ay mala goynuwaa goynnana bessii?

⁵ Nuuni oottiyo ubbabay Yihoowa goynuwaara gayttidaba. PHawuloosi, “Intte intte asatettaa Xoossaa ufaissiya de7onne geeshsha yarshsho oottidi, Xoossau [shiishshite]” yaagido wode hegaa qonccissiis. (Roome 12:1) Yesuusi hagaadan giis: “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite.”  (Marqqoosa 12:30) Nuuni nuuyyo deꞌiyaabaappe loꞌꞌobaa Yihoowawu ubbatoo immana koyoos. Beni Israaꞌeelan, asay mehiyaa yarshshuwaa yarshshiyo wode, eti payya mehiyaa immana koshshees. Yarshshiyo mehiyaa bollay tilla gidana xayikko, Xoossay hegaa ekkenna. (Wogaabaa 22:18-20) Hegaadankka, nu goynoy Yihoowa sinttan ekettennaagaa gidana danddayees. Waanidi?

6, 7. Nuuni wodiyaa aattiyoobay Yihoowawu goynniyoogaara waani gayttana danddayii?

⁶ Yihooway, “Taani geeshsha gidiyo gishshau inttekka geeshsha gidite” yaagiis. (1 PHeexiroosa 1:14-16; 2 PHeexiroosa 3:11) Yihooway nu goynuwaa ekkanay nu goynoy geeshsha gidiyo wode xallaana. (Zaarettido Wogaa 15:21) Nuuni Yihooway ixxiyoobaa, hegeekka pokkobaa, danobaa, woy iita ayyaana oosuwaa oottikko, nu goynoy geeshsha gidana danddayenna. (Roome 6:12-14; 8:13) Qassi hegaa malabatun nuuni wodiyaa aattikko, Yihooway ufayttenna. Hegee nu goynoy Yihoowa sinttan geeshsha gidennaadaaninne ekettennaadan oottana danddayees; qassi aara nuuyyo dabbotay moorettanaadan oottana danddayees.

⁷ Hegaa gishshawu, nuuni wodiyaa aattiyoobaa akeekan waati doorana danddayiyoo? Wodiyaa aattiyoobaa xeelliyaagan awugee loꞌꞌokko awugee iitakko shaakki eranawu nuna maaddiya maarati awugeetee?

8, 9. Nuuni haakkana bessiya, wodiyaa aattiyoobay awugee? Qassi aybissi?

⁸ Wodiyaa aattiyo dumma dumma darobay ha wodiyan deꞌees. Hegeetuppe amaridaageeti Kiristtaanetussi bessiyaaba; shin dariya baggay bessennaba. Koyruwan,  nuuni haakkana koshshiyo, wodiyaa aattiyoobati awugeetakko ane pilggoos.

⁹ Daro pilimetun, Intternneetiyaa prograametun, televizhiine prograametun, biiduwaa kaassatuuninne yettatun pokkobay kumiis; qassi hegeeti danobaara woy iita ayyaana oosuwaara gayttidaageeta. Iitabay qohennabanne ufayssiyaaba milatidi darotoo giigees. SHin, Yihooway kessido geeshsha maaraara maayenna, wodiyaa aattiyoobaappe Kiristtaaneti haakkoosona. (Oosuwaa 15:28, 29; 1 Qoronttoosa 6:9, 10) Nuuni wodiyaa aattiyo hegaa malabaappe haakkiyo wode, iitabaa ixxiyoogaa Yihoowa bessoos.—Mazamure 34:14; Roome 12:9.

10. Iitaban wodiyaa aattiyoogee ay kaalettana danddayii?

¹⁰ SHin issoti issoti shori baynnaban, danoban woy iita ayyaana oosuwaara gayttidaban wodiyaa aattiyoogee qohenna giidi qoppoosona. Eti hagaadan goosona: ‘Aybin qohii? Taani hegaa malabaa mule oottikke.’ Nuuni hegaadan qoppikko, eeyya gidoos. Geeshsha Maxaafay, “Asa wozanai ubbabaappe aadhdhi cimmiyaabaanne keehi daro iita” yaagees. (Ermmaasa 17:9) Nuuni Yihoowa ufayssennaban wodiyaa aattikko, hegaa malabaa waani ixxoos gaana danddayiyoo? Nuuni hegaa malaban keehi wodiyaa aattikko, hegee bessiyaaba giidi qoppiyoogaa doommana. Guyyeppe, nu kahay kaseegaadan oottenna, qassi nuuni balabaa kuuyiyo wode yootenna.—Mazamure 119:70; 1 Ximootiyoosa 4:1, 2.

11. Galaatiyaa 6:7y nuuni wodiyaa aattiyoobaa dooranaadan nuna waati maaddana danddayii?

¹¹ Xoossaa Qaalay, “Asi ba zeriyoogaa zaarettidi cakkana” yaagees. (Galaatiyaa 6:7) Nuuni iitaban wodiyaa aattikko, guyyeppe hegaa malabaa oottana danddayoos. Leemisuwawu, issi issi Kiristtaaneti pokkoban wodiyaa  aattiyoogaappe denddidaagan pokkobaa oottidosona. SHin, Yihooway nuuni wodiyaa aattiyoobaa akeekan dooranaadan koshshiya maaduwaa nuussi immees.

12. Nuuni wodiyaa aattiyoobaara gayttidaagan loꞌꞌobaa kuuyanaadan nuna aybi maaddanee?

¹² Wodiyaa aattiyo issi issibay Yihoowa ufayssennaba gidiyoogee qoncce; qassi nuuni hegaa malabaappe haakkana koshshiyoogaa eroos. SHin haakkana bessiyaaba gidiyoogee qoncce gidana xayikko shin? Nuuni ay beꞌana, siyana woy nabbabana bessiyaakkonne bessennaakko yaatite yaatoppite giya higgiyaa Yihooway nuussi immenna. SHin nuuni Geeshsha Maxaafan loohida nu kahaa goꞌettanaadan I koyees. (Galaatiyaa 6:5 nabbaba.) Yihooway nuussi maarata immees, qassi hegeeti I issi issibaa waati xeelliyaakko nuna tamaarissoosona. He maarati nu kahaa loohissanawu maaddoosona. Nuuni “Godai koyiyoobai aibakko” eridi, Yihoowa ufayssiyaabaa dooranaadan he maarati nuna maaddoosona.—Efisoona 5:17.

13. Wodiyaa aattiyoobaa xeelliyaagan Kiristtaaneti dumma dummabaa kuuyiyoy aybissee? SHin ubba Kiristtaanetussi koshshiyaabay aybee?

¹³ Issi Kiristtaanee wodiyaa aattanawu dooriyoobay hara Kiristtaanee dooriyoobaappe darotoo dummatees. Aybissi? Nuuni ubbay dumma dummabaa dosoos. Qassi issi uraa ufayssana danddayiyaabay hara uraa ufayssennaba gidana danddayees. Gidikkonne, loꞌꞌobaa kuuyanawu ubba Kiristtaaneti Geeshsha Maxaafay yootiyo maarata kaallana koshshees. (Piliphphisiyuusa 1:9) Wodiyaa aattiyoobaa dooriyo wode Xoossaa ufayssiyaabaa  dooranaadan hegee nuna maaddana.—Mazamure 119:11, 129; 1 PHeexiroosa 2:16.

14. (a) Nuuni wodiyaa goꞌettiyoogaa xeelliyaagan qoppana koshshiyaabay aybee? (b) PHawuloosi Kiristtaaneta zoridobay aybee?

¹⁴ Qassi nuuni allaxxiyooban ay keena wodiyaa aattiyaakko qoppana koshshees. Hegee wodiyaa aattiyoobay nuuni ay keena xoqqu oottidi xeelliyaakko qonccissiyaaba gidana danddayees. Nuuni Kiristtaane gidiyo gishshawu, Yihoowawu haggaaziyoogee nu deꞌuwan aybippenne aadhdhiyaaba. (Maatiyoosa 6:33 nabbaba.) SHin hegaa akeekana xayikko, nuuni wodiyaa aattiyooban keehi daro wodiyaa wurssana danddayoos. PHawuloosi Kiristtaaneta hagaadan zoriis: “Aadhdhida eratettaara de7iya asadan de7iteppe attin, aadhdhida eratetti  bainna asadan de7oppite. . . . Intte lo77o wodiyaa coo xaissoppite.” (Efisoona 5:15, 16) Hegaa gishshawu, nuuni allaxxiyooban ay keena wodiyaa aattanaakko kuuyana bessees; qassi Xoossawu haggaaziyoogaa nu deꞌuwan ubbatoo kaseyoos.—Piliphphisiyuusa 1:10.

15. Yihoowaara dabbotaa moorana danddayiya, wodiyaa aattiyoobaappe nuna waati naagiyoo?

¹⁵ Yihoowa ufayssennaba gidiyoogaa nuuni eriyo, wodiyaa aattiyoobaappe haakkana koshshiyoogee qoncce. SHin wodiyaa aattiyoobay nuuni siriyooba gidikko shin? He wodekka nuuni naagettana koshshii? Ane hagaa qoppa. Neeni deriyaa kiyiyo wode, ogiyaappe gaxi kiyay? Kiyakka. Neeni ne deꞌuwaa xoqqu oottada xeellikko, qohiyaabaappe haakkaasa. Wodiyaa aattiyoobaa dooriyoogeekka hegaa mala. Xoossaa Qaalay, “Ne tohoi iitasaa beennaadan naaga” yaagees. (Leemiso 4:25-27) Hegaa gishshawu, iita gidiyoogaa nuuni eriyo, wodiyaa aattiyoobaa xallaappe gidennan, nuussi loꞌꞌo gidenna giidi, qassi nuuyyo Yihoowaara dabbotaa moorana danddayees giidi nuuni siriyo, wodiyaa aattiyoobaappekka haakkoos.

16. (a) Yihooway ixxiyo issi issibay aybee? (b) Yihooway ixxiyoobaa nuuni ixxiyoogaa waati bessiyoo?

¹⁶ PHawuloosi, “Iitabaa ixxite; lo77obaa minttidi oiqqite” yaagiis. (Roome 12:9) Yihoowa qofaanne awu siyettiyaabaa Geeshsha Maxaafay yootees. Neeni tamaariyoobay issibaa Yihooway xeelliyoogaadan neeni xeellanaadan waati maaddana danddayiyaakko nena oychcha. Leemisuwawu, Yihooway “worddotiya inxxarssaa, ashkke asata woriya kushiyaa, iitabaa maqqiya wozanaa, iitabaakko eesotidi woxxiya tohuwaa” ixxiyoogaa nuuni Geeshsha Maxaafaappe akeekoos. (Leemiso  6:16-19) Qassi ‘shaaramuxiyoogaappe, eeqawu goynniyoogaappe, bitiyoogaappe, qanaatiyoogaappe, hanqquwaappe, miqqaynniyoogaappe, mattottiyoogaappe, yettanchcha kiyiyoogaappenne hageeta milatiyaageetuppe’ haakkana bessiyoogaa tamaaroos. (Galaatiyaa 5:19-21) Neeni wodiyaa aattiyoobaa dooranaadan Geeshsha Maxaafay yootiyo ha maarati nena waati maaddana danddayiyaakko akeekadii? Nuuni hara asaara deꞌiyo wodekka nurkka deꞌiyo wodekka, nu deꞌo ubban Yihooway kessido maaraa kaallanawu koyoos. (2 Qoronttoosa 3:18) Nuuni nurkka deꞌiyo wode dooriyoobay darotoo nuuni ay mala asakko qonccissiyaaba.—Mazamure 11:4; 16:8.

17. Wodiyaa aattiyoobaa dooranaappe kase, nuuni nuna oychchana oyshati awugeetee?

¹⁷ Yaatiyo gishshawu, wodiyaa aattiyoobaa dooriyo wode, hagaadan nena oychcha: ‘Taani dooriyoobay Yihoowaara dabbotido dabbotaa waatii? Hegee ta kahaa maaddiiyye qohii?’ Wodiyaa aattiyoobaa dooriyo wode nuna maaddana danddayiya hara maarata ane pilggoos.

18, 19. (a) PHawuloosi Kiristtaanetussi yootido zoree aybee? (b) Wodiyaa aattiyoobaa dooranawu nuna maaddana danddayiya maarati awugeetee?

¹⁸ Nuuni wodiyaa aattiyoobaa dooriyo wode, nu qoppanabaa dooroos. PHawuloosi hagaadan giis: “Intte wozanan lo77obaanne galatissiyaabaa qoppite; tuma gidiyaabaa ubbaa, bonchchissiyaabaa ubbaa, mooro gidennabaa ubbaa, geeshshabaa ubbaa, siiqobaa ubbaa, lo77o haasaya gidiyaabaa ubbaa qoppite.” (Piliphphisiyuusa 4:8) Hegaa mala loꞌꞌobaa qoppiyo wode, hagaadan gaana danddayoos: “Abeet GODAU, . . . ta doonaappe kiyiya qaalainne ta wozanaa qofai nena ufaissiyaabaa gido.”—Mazamure 19:14.

 ¹⁹ Nena hagaadan oychcha: ‘Taani qoppiyoobay aybee? Issi biiduwaa woy televizhiine prograamiyaa beꞌa simmada, taani ufayssiyaabaa qoppiyaanaa? Tawu sarotettaynne loꞌꞌo kahay deꞌiyaabadan siyettii? (Efisoona 5:5; 1 Ximootiyoosa 1:5, 19) Taani mammottennan Yihoowa woossiyaanaayye, woy qassi woossanawu mammottiyaanaa? Wodiyaa aattiyoobay taani danobaa woy pokkobaa qoppanaadan oottii? (Maatiyoosa 12:33; Marqqoosa 7:20-23) Taani dooriyo, wodiyaa aattiyooban ‘ha saꞌaa asaa milataydda deꞌiyaanaa’?’ (Roome 12:2) Nuuni zaariyoobay Yihoowaara nu dabbotaa minttanawu koshshiyaabaa akeekanaadan maaddana danddayees. Nuuni, “Pattennabaa xeellenna mala, ta aifeta teqqa” yaagida mazamuraawiyaagaadan woossanawu koyoos. a—Mazamure 119:37.

20, 21. Nuuni wodiyaa aattiyoobaa dooriyo wode, haratussi siyettiyaabaa qoppana koshshiyoy aybissee?

²⁰ Hassayana koshshiya hara maaray hagaa: “Ubbabaa oottanau diggiyaabi baawa; shin ubbabai maaddenna. Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.” (1 Qoronttoosa 10:23, 24) Issibaa oottanawu nuuyyo laꞌatettay deꞌiyo gishsha xallawu hegaa oottana koshshenna. Nuuni kuuyiyoobay nu ishanttanne michchontta waati maaddiyaakko woy qohiyaakko nuuni akeekan qoppana bessees.

²¹ Ubba asaa kahay issi mala gidenna. Leemisuwawu,  issi televizhiine prograamiyaa neeni beꞌanaadan ne kahay eeno gaana danddayees. SHin he prograamee ne ishaa woy ne michchee kahaa qohiyoogaa neeni guyyeppe akeekaasa. Yaatin neeni waatuutee? Hegaa beꞌanawu neessi maatay deꞌikkonne, beꞌennan agganawu kuuyana danddayaasa. Ayssi? Neeni ‘ne ishantta qohana,’ ubba qassi ‘Kiristtoosa bolli nagaraa oottana’ koyenna gishshataassa. (1 Qoronttoosa 8:12) Nuuni nu mala Kiristtaaneta xubbiyaabaa aybanne oottana koyokko.—Roome 14:1; 15:1; 1 Qoronttoosa 10:32.

22. Hara Kiristtaaneti dooriyoobaa xeelliyaagan nuuni bessiyaabaa qoppiyoogaa waati bessiyoo?

²² Hara baggaara qassi, hara uri bessiyaaba gi beꞌiyoobaa, siyiyoobaa woy oottiyoobaa ne kahay nena diggikko shin? Neeni ne ishaa siiqiyo gishshawunne bonchchiyo gishshawu, I neegaadan dooranaadan A giddakka. Kaamiyaa laaggiya issi uri harati loytti laaggikkokka, baagaappe eesuwan woy loddan laaggana danddayiyoogaa erees. Hegaadan, neenikka hara ishaykka Geeshsha Maxaafay yootiyo maarata kaallikkonne, wodiyaa aattiyoobaa xeelliyaagan awugee likkekko intte qofay dumma dumma gidana danddayees.—Eranchchaa 7:16; Piliphphisiyuusa 4:5.

23. Nuuni wodiyaa aattiyoobaa akeekan dooranaadan nuna aybi maaddanee?

²³ Yaatiyo gishshawu, nuuni wodiyaa aattiyoobaa akeekan dooranaadan nuna aybi maaddanee? Nuuni Geeshsha Maxaafay yootiyo maaran loohida nu kahaa goꞌettiyo wodenne nu ishanttuyyoonne michchonttuyyo tumuppe qoppiyo wode, nuuni akeekan doorana. Qassi nuuni “ubbabaa Xoossaa bonchchuwaassi” oottiyoogan ufayttana.