1-3. (a) Issi aayyiyaa ba guutta naꞌay geeshsha gidanaadan koyiyoy aybissee? (b) Yihooway ba asay geeshsha gidanaadan koyiyoy aybissee?

 ISSI siiqiya aayyiyaa ba guutta naꞌay timirtte keetti baanaadan giigissiyoogaa qoppa. A ba naꞌaa meeccada giiganne geeshsha maayuwaa mayzzawusu. Hegee I payya gididi deꞌanaadan oottees; qassi A aawaynne aayyiyaa A loytti oyqqiyoogaa harati akeekanaadan oottees.

² Nu Aaway Yihooway nuuni keehi geeshsha gidanaadan koyees. (Mazamure 18:26) Geeshsha gidiyoogee nuna maaddiyoogaa I erees. Qassi nuuni geeshsha gidiyo wode A bonchchissoos.—Hizqqeela 36:22; 1 PHeexiroosa 2:12 nabbaba.

 ³ Geeshsha gidiyoogaa giyoogee woygiyoogee? Geeshsha gidiyoogee nuussi loꞌꞌo gidiyoy aybissee? Nuuni ha oyshata pilggiyo wode, issi issiban laamettana koshshiyoogaa akeekana danddayoos.

4, 5. (a) Nuuni geeshsha gidana koshshiyoy aybissee? (b) Yihooway geeshshatettaa waati xeelliyaakko I medhdhidobatuppe nuuni ay tamaariyoo?

⁴ Nuuni Yihoowappe tamaaridi keehi geeshsha gidoos. (Wogaabaa 11:44, 45) Hegaa gishshawu nuuni geeshsha gidana koyiyo waanna gaasoy ‘Xoossaa milatanawu’ koshshiyo gishshataassa.—Efisoona 5:1.

⁵ Yihooway medhdhidobaappe geeshshatettaa I waati xeelliyaakko darobaa tamaaroos. Yihooway carkkoynne haattay geeshsha gididi deꞌanaadan maaddiya simmi simmi haniyaabata (nachural saykils) giigisissiis. (Ermmaasa 10:12) Asay saꞌaa hambbalaashinkka saꞌay bana barkka geeshshiyo daro ogetubaa qoppa. Leemisuwawu, maykiroskoppe xallan beꞌana danddayiyo deꞌuwan deꞌiya, ayfiyan beettennabata Yihooway medhdhiis. Ayfiyan beettennabati marzzeyiyaabaa qohennabawu laammana danddayoosona. He hanotay keehi maalaalissiyaaba. Saynttistteti hambbalaashettidabaa zaarettidi loyttanawu issi issi ayfiyan beettennabata goꞌettoosona.—Roome 1:20.

6, 7. Yihoowayyo goynniyaageeti geeshsha gidana koshshiyoogaa Muuse Higgee waati bessii?

⁶ Yihooway Muuse baggaara Israaꞌeelatuyyo immido Higgiyaappekka geeshsha gidiyoogee keehi koshshiyoogaa nuuni akeekoos. Leemisuwawu, Yihooway asaa goynuwaa ekkanaadan eti asatettan geeshsha gidana koshshees. Nagaraa Atto Giissiyo Gallassi, qeese ubbatu halaqay ba bollaa naaꞌꞌutoo meecettana koshshees.  (Wogaabaa 16:4, 23, 24) Hara qeeseti yarshshuwaa yarshshanaappe kase, eti bantta kushiyaanne tohuwaa meecettana bessees. (Kessaabaa 30:17-21; 2 Hanidabaa Odiya 4:6) Issi issi hanotatun, geeshshatettaara gayttida higgeta azazettennaagee hayquwan qaxxayettanaadan oottees.—Wogaabaa 15:31; Qoodaabaa 19:17-20.

⁷ Ha wodiyan shin? Nuuni Higgiyaappe Yihooway kessido maarata xeelliyaagan darobaa tamaarana danddayoos. (Milkkiyaasa 3:6) Yihoowayyo goynniyaageeti geeshsha gidana koshshiyoogee Higgiyan qoncciis. Yihooway kessido maarati laamettibookkona. Ha wodiyan, Yihooway bawu goynniyaageeti keehi geeshsha gidanaadan koyees.—Yaaqooba 1:27.

8. Nuuni aybin geeshsha gidana bessii?

⁸ Yihoowa xeelan geeshsha gididi deꞌanawu nu bollaa, nu maayuwaanne nu keettaa geeshshatettan oyqqiyoogaa xallay gidenna. Nuuni nu deꞌo ubban geeshsha gidana bessees. Nuuni goynuwan, kandduwaaninne qoppiyooban geeshsha gidana koshshees. Yihooway nuna geeshshadan xeellana mala nuuni nu deꞌo ubban keehi geeshsha gidana koshshees.

9, 10. Nu goynuwan geeshsha gidiyoogaa giyoogee woygiyoogee?

⁹ Geeshsha goynuwaa. Nuuni ayba ogiyankka worddo haymaanootiyan walahettana koshshenna. Israaꞌeelati Baabiloonen omoodettido wode, pokko eeqaa goynniya asaara deꞌidosona. Israaꞌeelati bantta biitti Israaꞌeela simmanaagaanne tumu goynuwaa zaarettidi essanaagaa Isiyaasi hiraagaa yootiis. Yihooway etawu hagaadan giis: “Yaappe kiyite. Tunabaa bochchoppite; a giddoppe kiyiichchite. Intte huuphiyaukka geeyite.” Eti Xoossawu  goynniyo goynoy Baabiloone worddo haymaanootiyaa timirttiyaara, meeziyaara woy wogaara walahettana danddayenna.—Isiyaasa 52:11.

¹⁰ Ha wodiyankka tumu Kiristtaaneti worddo haymaanootiyaappe naagettoosona. (1 Qoronttoosa 10:21 nabbaba.) Kumetta saꞌan asay dosiyo daro wogatuyyo, meezetuyyoonne ammanotuyyo denddoy worddo haymaanoote timirtte. Leemisuwawu, daro wogatun, nuuni hayqqin hayqqennan deꞌiyaabay nu giddon deꞌees giidi asay ammanees; qassi he ammanoy denddo gidido daro wogati deꞌoosona. (Eranchchaa 9:5, 6, 10) Kiristtaaneti hegaa mala wogatuppe naagettana koshshees. Nu soo asay nuuni hegaa kaallanaadan oottana danddayees. SHin nuuni Yihooway nuna geeshshadan xeellanaadan koyiyo gishshawu, hegaa malabaa oottokko.—Oosuwaa 5:29.

11. Kandduwan geeshsha gidiyoogaa giyoogee woygiyoogee?

¹¹ Geeshsha kandduwaa. Yihooway nuna geeshshadan xeellanaadan, nuuni pokkoba gidida aybippenne naagettana bessees. (Efisoona 5:5 nabbaba.) Geeshsha Maxaafan, nuuni ‘shaaramuxappe baqatanaadan’ Yihooway yootees. SHaaramuxiyaageetinne bantta nagaraappe simmennaageeti ‘Xoossaa Kawotettaa laattennaagaa’ I qonccissiis.—1 Qoronttoosa 6:9, 10, 18; Wurssetta Qofaa 22 xeella.

12, 13. Nuuni qoppiyooban geeshsha gidana koshshiyoy aybissee?

¹² Geeshsha qofaa. Qoppiyoobay darotoo oosuwawu kaalettees. (Maatiyoosa 5:28; 15:18, 19) Geeshsha qofay nuuni geeshshabaa oottanaadan denttettana. Nuuni nagaranchcha gidiyo gishshawu, issi issitoo balabaa qoppoos. Nuuni hegaa malabaa qoppiyo wode, sohuwaara eqettana bessees. Nuuni eqettana xayikko, wurssettan nu wozanay geeshsha gidennaagaa akeekana danddayoos. Nuuni ubbatoo qoppiyoobaa oottanawu koyana  danddayoos. Nuuni nu guuggiyan geeshsha qofaa kunttana bessees. (Piliphphisiyuusa 4:8 nabbaba.) Hegaa gishshawu, pokkoban woy danoban wodiyaa aattiyoogaappe nuuni naagettana bessees. Nuuni nabbabiyoobaa, beꞌiyoobaanne haasayiyoobaa akeekan dooroos.—Mazamure 19:8, 9.

¹³ Xoossaa siiquwan deꞌanawu, nuuni nu goynuwan, nu kandduwaaninne nu qofan geeshsha gidana bessees. SHin asatettan geeshsha gidiyoogeekka Yihooway keehi xoqqu ootti xeelliyooba.

14. Nuuni asatettan geeshsha gidiyoogee keehi koshshiyoy aybissee?

¹⁴ Nuuni nu bollaanne nu heeraa geeshshikko, nunakka nunaara deꞌiya asaakka maaddiyaabaa oottoos. Nuuni ufayttana, qassi harati nunaara deꞌanawu koyana. SHin nuuni asatettan geeshsha gidana koshshiyo hara gaasoy deꞌees. Nuuni geeshsha gididi deꞌiyoogee Yihoowa bonchchissees. Hagaa qoppa: Neeni ubbatoo qitattida naꞌa beꞌikko, A yelidaageetubaa loꞌꞌo gidennabaa qoppana danddayaasa. Hegaadan, nuuni nuna loytti oyqqananne geeshsha gididi deꞌana xayikko, asay Yihoowabaa loꞌꞌo gidennabaa qoppana danddayees. PHawuloosi hagaadan giis: “Nuuni nu oosuwaa ooninne boranaagaa koyokko; qassi oonanne xubbanaagaa koyokko. SHin ubbaban nuuni Xoossaa ashkkarata gidiyoogaa nu huuphen bessida.”—2 Qoronttoosa 6:3, 4.

15, 16. Nuuni geeshsha gididi deꞌanawu ay oottana danddayiyoo?

¹⁵ Nu bollaanne maayuwaa. Nuuni galla galla nuna geeshshiyoogaa meezetana koshshees. Leemisuwawu, danddayettikko, ubba galla nu bollaa meecettana bessees.  Nuuni qumaa kattanaappe woy maanaappe kase, qassi sheeshsha keetti bi simmidi woy qitattidabaa bochchi simmidi nu kushiyaa saamunan meecettana koshshees. Nu kushiyaa meecettiyoogee maaddennaba milatana danddayees; shin hegee bakiteereenne harggee aakkennaadan keehi koshshiyaaba. Hegee ubba qassi shemppuwaa ashshana danddayees. Nuussi sheeshsha keetti baynnaba gidikkokka, moorettidabaa diggiyo loꞌꞌo ogiyaa koyana danddayoos. Beni Israaꞌeelatuyyo sheeshsha keetti baynna gishshawu, eti asaa keettaappenne haattay deꞌiyo sohuwaappe haahuwan bantta sheeshsha utettaa moogoosona.—Zaarettido Wogaa 23:12, 13.

¹⁶ Nu maayoy shacciyaagaa, alꞌꞌo, woy wodiyaa paashine gidana koshshenna. SHin nu maayoy giiganne geeshsha gidana koshshees. (1 Ximootiyoosa 2:9, 10 nabbaba.)  Nuuni nu meray Yihoowa bonchchissiyaagaa gidanaadan ubbatoo koyoos.—Tiitu 2:10.

17. Nuuni nu keettaanne heeraa geeshshi oyqqana koyiyoy aybissee?

¹⁷ Nu keettaanne nu heeraa. Nuuni awan deꞌikkokka, nu keettaa ubbatoo geeshshi oyqqana koshshees. Nuuni nu kaamiyaa, motoriyaa, bishkkiliitiyaa woy nuuyyo deꞌiya hegaa malabaa aybanne geeshshi oyqqana bessees; qassi nuuni shiiquwaa biyo wode woy haggaazuwaa biyo wode hegaa goꞌettikko loytti geeshshana koshshees. Qassi, sabbakiyo wode, saꞌan geeshsha gannatiyan deꞌiyo deꞌuwaa xeelliyaagan haratuyyo yootoos. (Luqaasa 23:43; Ajjuutaa 11:18) Nu keettaanne nu heeraa hanotay nuuni geeshsha gidida ooratta alamiyan deꞌanawu haꞌꞌi giigettiyoogaa bessiyaaba gidana danddayees.

18. Nuuni nu goyno sohoy geeshsha gidanaadan koyiyoy aybissee?

¹⁸ Nu goyno sohuwaa. SHiiquwaa Addaraashaa gidin, woy gita shiiquwaa shiiqiyo sohuwaa gidin, nu goyno sohuwaa geeshshi oyqqiyoogan geeshshatettaa nuuni xoqqu oottidi xeelliyoogaa bessoos. Asay SHiiquwaa Addaraashaa koyro yiyo wode, hegee keehi geeshsha gidiyoogaa eti darotoo akeekoosona. Hegee Yihoowa bonchchissees. Gubaaꞌiyaa yame gidiyo gishshawu, nuuni ubbay nu SHiiquwaa Addaraashay geeshsha gididi deꞌanaadan maaddananne moorettennaadan naagana danddayoos.—2 Hanidabaa Odiya 34:10.

19. Nuuni naagettana koshshiyaabay aybee?

¹⁹ Nuuni aggana koshshiyo iita meeze ubbaa Geeshsha Maxaafay yootana xayikkonne, hegaa xeelliyaagan Yihoowawu aybi siyettiyaakko nuuni akeekanaadan maaddiya maarata yootees. Nuuni sijaaraa sarbbanaadan, ushshaa likkiyaappe aattidi uyanaadan woy jallissiya  xaliyaa goꞌettanaadan I koyenna. Nuuni Xoossaa dabbo gidikko, hegeetuppe naagettoos. Aybissi? Nuuni deꞌuwaa imotaa keehi bonchchiyo gishshataassa. He meezeti nu bariyaa qanttana, nu payyatettaanne nunaara deꞌiya asaa qohana danddayoosona. Daro asay he iita meezeta agganawu maliyoy ba payyatettaa gishshataassa. Gidoppe attin, nuuni Yihoowa dabbo gidiyo gishshawu, nu Xoossaa siiqiyoogee hegeeta agganaadan oottiya waanna gaaso. Issi yelaga maccaasiyaa hagaadan gaasu: “Yihooway maaddin, ta deꞌuwaa geeshshaas; qassi tawu amale gididabaa aggaas. . . . Taani tarkka hegaadan laamettana mule danddayikke gaada qoppays.” Issi uri iita meezeta agganaadan maaddiya, Geeshsha Maxaafay yootiyo maarata ichchashata ane pilggoos.

20, 21. Nuuni haakkanaadan Yihooway koyiyo meezeti awugeetee?

²⁰ “Ta siiqotoo, Xoossai ha ubbabaa nuuyyo immana giidoogaappe hini baggan, nu ashuwaanne nu shemppuwaa tunissiya ubbabaappe nu huuphiyaa ane geeshshoos; qassi Xoossaayyo yayyiyoogan muleera geeyidi de7oos.” (2 Qoronttoosa 7:1) Nuuni nu guuggiyaa woy bollaa qohana danddayiya iita meezeta agganaadan Yihooway koyees.

²¹ Nuuni ‘tunissiya ubbabaappe nu huuphiyaa geeshshanaadan’ oottiya waanna gaasoy 2 Qoronttoosa 6:17, 18n qoncciis. Yihooway nuna, “Tunabaakka bochchoppite” yaagees. I hegaa yooti simmidi hagaadan giis: “Taani inttena mokka ekkana. Qassi taani intteyyo aawa gidana; inttekka taayyo attuma naatanne macca naata gidana.” Ee, Yihoowa sinttan nuna tunissana danddayiya aybippenne nuuni naagettikko, aaway ba naata siiqiyoogaadan Yihoowaykka nuna siiqana.

22-25. Iita meezeta agganaadan nuna maaddana danddayiya Geeshsha Maxaafay yootiyo maarati awugeetee?

 ²² “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa.” (Maatiyoosa 22:37) Hegee azazo ubbaappe aadhdhiya azazo. (Maatiyoosa 22:38) Nuuni Yihoowa wozanappe siiqiyoogee bessiyaaba. Nuuni nu baree qaammanaadan oottiyaabaa woy nu guuggiyaa qohiyaabaa doorikko, nuuni Yihoowa kumetta wozanappe waati siiqana danddayiyoo? I nuussi immido deꞌuwaa bonchchiyoogaa bessanawu nuuyyo danddayettida ubbabaa oottoos.

²³ “[Yihooway] de7uwaa shemppuwaanne ubbabaa asa ubbaassi immees.” (Oosuwaa 17:24, 25) Issi laggee neeyyo dumma imota immikko, neeni hegaa olanee, woy xayssanee? Deꞌoy Yihooway immido maalaalissiya imota. Nuuni he imotaa wozanappe nashshoos. Hegaa gishshawu, nuuni nu deꞌuwaa A bonchchissiya ogiyan goꞌettana koyoos.—Mazamure 36:9.

²⁴ “Neeni ne shooruwaa ne huuphedan siiqa.” (Maatiyoosa 22:39) Iita meezee qohiyoy nu xalla gidenna. Hegee nunaara deꞌiya, nuuni keehi siiqiyo asaakka qohana danddayees. Leemisuwawu, issi uri sijaaraa sarbbiya uraara issi keettan deꞌikko, sarbbiyaagaappe kiyiya cuwaa sarbbiyoogee I keehi sahettanaadan oottana danddayees. SHin nuuni iita meezeta aggiyo wode, nunaara deꞌiyaageeta siiqiyoogaa bessoos.—1 Yohaannisa 4:20, 21.

²⁵ ‘Eti deriyaa haariyaageetussinne godatettay deꞌiyoogeetussi haarettanaadaaninne azazettanaadan eta hassayissa.’ (Tiitu 3:1) Issi issi jallissiya xaliyaa oyqqiyoogee woy goꞌettiyoogee daro biittan higgiyaa kanttiyooba. Nuuni kawotettata bonchchanaadan Yihooway azazido gishshawu, nuuni he higgeta azazettoos.—Roome 13:1.

26. (a) Yihooway nu goynuwaa ekkanaadan nuuni ay oottana koshshii? (b) Nuuni keehi geeshsha gididi deꞌanawu nuuyyo danddayettida ubbabaa oottana koyiyoy aybissee?

 ²⁶ Nuuni Yihoowa dabbo gidana koyikko, nuuni issi issiban laamettana koshshiyoogaa akeekana danddayoos. Yaanikko, nuuni sohuwaara doommana bessees. Iita meeziyaa aggiyoogee issi issitoo deexxana danddayees; shin nuuni hegaa aggana danddayoos! Yihooway nuna maaddanawu qaalaa geliis. I hagaadan gees: “Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana.” (Isiyaasa 48:17) Nuuni keehi geeshsha gididi deꞌanawu nuuyyo danddayettida ubbabaa oottiyo wode, Xoossaa bonchchissiyaageeta gidana danddayoos.