ASAY DAROBAN DUMMA—NUUNI XAAFOOS, MISILIYAA MEDHOOS, ISSI ISSIBAA GIIGISSOOSINNE DEˈUWAA XEELLIYAAGAN DENTTIYO KEEHI KOSHSHIYA OYSHATUBAA QOPPOOS: Salotinne saˈay merettidoy aybissee? Nuuni waani merettidoo? Deˈuwawu halchchidobi aybee? Sinttappe aybi hananee?

Issi issi asay he oyshata zaariyoogee keehi deexxiyaaba gi qoppidi he oyshata oychchenna. Harati qassi deˈoy lodda laamiyan yiido gishshawu he oyshati pattennaba goosona. Taarikiyaanne bayoloojiyaa profeeseree Wiliyam Proovini, “Xoossa giyoobi baawa; halchchoykka baawa” yaagiis. I gujjidi, “Kandduwaa maarawu denddoy baawa; deˈuwawu halchchidobi baawa” yaagiis.

SHin, issi issi asay he iita qofay bessennaba gees. Eti salotinne saˈay suurenne likke gidida saynisiyaa higgiyaa kaalliyoogaa akeekoosona. Eti meretan qonccida maalaalissiya diizayiniyan keehi garamettoosona; hegaappe amaridaagaa malatissidi medhdhanawu asay malees. Qassi muttumurettida diizayinee hegaa giigissidaagee deˈiyoogaa bessiyoogaa eta galla galla gakkiyaabay qonccissees.

Lodda laamiyan ammaniya issoti issoti bantta qofaa wotti yeggi qoppanaadan he naqaashay denttettiis. Kaallidi deˈiya naaˈˈu leemisuwaa akeeka.

NARBBIYAA AKKAMIYA ALEKSE MARNOVA GIYO DOTTORIYAA. I hagaadan giis: “Taani tamaarido timirtte keettatun Xoossay baawa giyoogaabaanne lodda laamiyaabaa tamaaraas. Xoossan ammaniya ooninne eri baynnabadan qofettees.” SHin 1990n, I ba qofaa laammiyoogaa doommiis.

I hagaadan giis: “Asaa guuggiyaa gujjin, merettidabawu ammanttiya naqaashaa akeekanawu ubbatoo malaas. Maalaalissiya guuggee saluwaaninne saˈan erettidaban keehi muttumurettidaba gidiyoogee bessiyaaba. SHin guuggee merettidoy issi asi eraanne akeekaa demmi simmin hayqqanaassee? Hegee hadanne bessennaba milatees. Hegaa gishshawu, taani hagaadan oychchiyoogaa doommaas: ‘Nuuni merettidoy aybissee? Deˈuwawu halchchidobi aybee?’ Taani loytta wotta dentta qoppa simmada, Medhdhidaagee deˈana bessees gaada qofaa qachchaas.”

Deˈuwawu halchchidobaa xeelliyaagan Alekse eranawu koyidoogee I Geeshsha Maxaafaa pilgganaadan oottiis. Guyyeppe, dottorenne Xoossay baawa ga ammaniya A machchiyaa Geeshsha Maxaafaa xannaˈiyoogaa doommaasu; qassi A xannaˈiyoogaa koyro doommidoy ba azinay baliis gaada A ammanttanaassa! SHin haˈˈi naaˈˈaykka Xoossaa mintti ammanoosona; qassi I asawu halchchidobaa xeelliyaagan Geeshsha Maxaafay yootiyoobaa akeekoosona.

SAYNTTISTTE GIDIDA HIWABI YINO GIYO DOTTORIYAA. Hiwabi Yina piziksiyaa xannaˈaasu, qassi daro layttawu, awaabaa pilggaasu. Hiwaba hagaadan gaasu: “Nuuni saynttistteti meretan haniyaabaa xannaˈiyo wode ubban, keehi xoqqa maaray deˈiyoogaa ubbatoo akeekoos; hegee laamettenna higgee deˈiyoogaa bessiyaaba. Taani hagaadan oychchaas: ‘Ha higgeti waani doommidoonaa? Qumaa kattiyo tamaa loytti naagana koshshikko, awa ayfiyaa kaalettiya higgetussi aawatiyay oonee?’ ‘Xoossai salotanne sa7aa koiro medhdhiis’ giya Geeshsha Maxaafaa doometta qofay hegawu bessiya zaaro gidiyoogaa guyyeppe taani akeekaas.”—Doomettaabaa 1:1.

Guuggiyaa seeleti waati oottiyoonaa? Qassi awa ayfiyaappe hoˈˈoynne pooˈoy waati kiyii? giyo oyshata gujjin, “waati” giidi oychchiyo daro oyshatu zaaruwaa akeekanaadan saynisee maaddiyoogee qoncce. Aleksenne Hiwaba akeekidoogaadan, “aybissi” giyo keehi koshshiya oyshata Geeshsha Maxaafay zaarees: Salotinne saˈay merettidoy aybissee? Eti higgeta kaalliyoy aybissee? Nuuni merettidoy aybissee?

Geeshsha Maxaafay saˈaa xeelliyaagan hagaadan gees: ‘Xoossay asi deˈanaadaanappe attin, biittaa coo medhdhibeenna.’ (Isiyaasa 45:18) Ee, Xoossay saˈawu halchchidobi deˈees; qassi he halchchoy nuuni sinttappe demmanawu hidootan naagiyoobaara keehi gayttidaba gidiyoogaa kaalliya huuphe yohoy qonccissees.