Kawotettatu Issippetettay ubba asay issoy issuwaara hashetanaadan, asaa maataa bonchchanaadaaninne heeray moorettennaadan naaganaadan minttettees. Aybissi? Yu En Kornikil giyo maxeetiyan Maher Naaseri yootidoogaadan “Carkkuwaa hanotay laamettiyoogee, darajjayettidi danobaa oottiyoogee, naaqoy yaa dariyoogee, ooyettidi sigettennaagee, wolqqanttin daro asay ba deˈiyoosaappe aggidi biyoogee, kumetta saˈan deˈiya shabbirssay, asappe asa oyqqiya harggeenne hegaa malabay” ubba biittan deˈiya asaa qohees.

Harati hegaappe aadhdhiyaabaa oottidosona; eti kumetta alamiyaa ayssiya haaroy koshshees goosona. Xaaliyaa biittaa eranchay, danttuwaa xaafiyaanne polotikaa asa gidida Danteenne (1265-1321) piizikisiyaa eranchchay Albert Anesttayni (1879-1955) hegeetuppe amaridaageeta. Dantee polotikan shaahettida alamiyan sarotettay deˈana danddayenna giidi ammanees. I, “Ba giddon shaakettiya kawotetta ubbai xayana” giidi, Yesuus Kiristtoosi odido qofaa yootiis.—Luqaasa 11:17.

Naaˈˈu atome bombeti xuuqqido Naaˈˈantto Alamiyaa Olaappe simmin takkennan, Albert Anesttayni Kawotettatu Issippetettaa Jeneral Asembliyawu dabddaabbiyaa xaafiis. I, “Kawotettatu Issippetettay kumetta alamiyaa ayssiya haaruwaa essanawu koshshiya ubbabaa oottiyoogan ubbasan woppaa ehaanawu eesuwaara oottana bessees” yaagiis.

SHin ha wolqqaama kawotettaa yame gidana polotikaa asati mule iitabaa oottennaageeta, danddayiyaageetanne mule naaqqennaageeta gidana giidi nuuni ammanettana danddayiyoo? Woy qassi eti haariya haratuugaadan iita gidanee? Ha oyshati Birttaaniyaa biittaa taarikiyaa eranchchay Lord Akteni, “Maatay moorobaa ootissees; zawi baynna maatay zawi baynna mooruwaa ootissees” yaagidi yootido qofaa nuna hassayissoosona.

Gidikkokka, asay tumu sarotettan maayettidi deˈanawu, nuuyyo issippetettay deˈana bessees. SHin hegaa waatidi demmana danddayettii? Hegee hanana danddayiyaabee? Issippetettan deˈanaagaa Geeshsha Maxaafa yootees. Hegee demmana danddayiyooba. Waatidi? Iitabaa oottiya polotikaa asati essido kawotettan gidenna. SHin, Xoossay essiyo kawotettan hegee hanana. Xoossawu A mereta ubbaa haariyo maatay deˈiyoogaa he kawotettay bessana. He kawotettay aybee? Geeshsha Maxaafay I “Xoossaa kawotettaa” gidiyoogaa yootees.—Luqaasa 4:43.

Yesuus Kiristtoosi, “Ne kawotettai yo; ne shenee . . . sa7ankka hano” giidi, tamaarissanawu woossido wode I Xoossaa Kawotettaa qoppiis. (Maatiyoosa 6:9, 10) Ee, Xoossaa Kawotettay maataa demmanawu keehi amottiyaanne bantta xallaa siiqiyaageetu sheniyaa gidennan, Xoossaa shenee saˈan hananaadan oottana.

Xoossaa Kawotettay ‘saluwaa kawotettaakka’ geetettees. (Maatiyoosa 5:3) Waanidi? Saˈan uttidi gidennan, saluwan uttidi saˈaa haariyo gishshataassa. I saˈaa haarana. Hegee woygiyoogaakko qoppa. He kawotettay giiraa malabawu miishsha oychchana koshshenna. Ayyo haarettiya asay keehi woppu gaana!

“Kawotettaa” giyo qaalay Xoossaa Kawotettay kawuwan haarettiyoogaa qonccissees. A Kawoy Xoossaappe maataa ekkida Yesuus Kiristtoosa. Yesuusa xeelliyaagan Geeshsha Maxaafay hagaadan gees:

• “Kawotettai a hashiyan wodhdhana; . . . A kawotettaa daruwaunne a sarotettau zawai de7enna.”—Isiyaasa 9:6, 7.

• “Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis. A maatai . . . shaarettenna maataa.”—Daaneela 7:14.

• “Sa7aa kawotettai ha77i nu Godaassanne [Xoossaassanne] a Kiristtoosassa.”—Ajjuutaa 11:15.

Yesuusi tamaarissido woosay polettiyo wode, Xoossaa Kawotettay Xoossaa shenee saˈan muleera polettanaadan oottana. Xoossaa Kawotettaa haaruwan, ubba asay ha saˈaa waati oyqqanaakko tamaariyo gishshawu, I geeshshanne deˈuwan deˈiyaabay kumido soho gidana.

Ubbaappe aaruwan, Xoossaa Kawotettay assi haarettiyaageeta tamaarissana. Ubbay issi mala maaraa tamaarana. Yan ooshshay woy shaahotettay deˈenna. Isiyaasa 11:9y, “Ooninne qohettenna, woikko bayenna; aissi giikko, abbai haattan kumiyoogaadan, sa7ai GODAA eriyoogan kumana” yaagees.

Kawotettatu issippetettay poletana mala koyiyoogaadan, kumetta saˈan deˈiya asay issuwaa gidananne issoy issuwaara sarotettan deˈana. Mazamure 37:11, “Eti sarotettaaninne duretettaani ufaittidi daana” yaagees. He wode, “danuwaa,” “hambbalaashuwaa,” “hiyyeesatettaa,” qassi “olaa” giyoogaa mala qaalati xayana. SHin hegee awude hananee? Xoossaa Kawotettay kumetta saˈaa haariyoogaa doommiyoy awudee? I waatidi haaranee? Qassi neeni A haaruwan waata goˈettana danddayay? Ane beˈoos.