Geeshsha Maxaafaa timirttee issi ura deˈoy laamettanaadan oottiyo maalaalissiya wolqqay deˈiyoogaa. Hegaa xeelliyaagan naaˈˈu leemisota ane beˈa: Rikardanne Andresa.

RIKARDA: Taayyo layttay 15 gidin, taani makkalabaa oottiyaageetu yame gidaas. Ta ooratta laggeti taani iitabaa oottanaadan denttettidosona. Taani tammu laytta qashettanawu halchchaas! Hegee eeyyatetta milatana danddayees. SHin, qashettidi kiyida ta shoorota asay nashsheesinne bonchchees. Qassi taani eta mala gidanawu koyaas.

Taani jallissiyaabaa goˈettiyoogaa, mattumaa gayttiyoogaanne danobaa oottiyoogaa gujjin, makkalabaa oottiyaageeti oottiyo ubbabaa oottaas. Issi galla qammi issoy issuwaa bolli massaariyaa tokkosidaageetuppe taani issuwaa. Taani hayqqays gaada qoppaas; shin qohettennan baqataas. Hegaappe simmin, taani ta deˈuwaabaanne ta halchchuwaabaa loytta qoppiyoogaa doommaas; qassi taani laamettanawu qofaa qachchaas. SHin waatada? Taani maaduwaa awuppe demmana danddayiyaanaa?

Ta dabbotuppe daroti ufayttokkona. Eta deˈuwan metoy kumiis. SHin ta aaye kaalo ishaa so asaa deˈoy hegaa mala gidenna. Taani eti loˈˈo asa gidiyoogaa erays; qassi eti Geeshsha Maxaafay yootiyo maaraa kaalliyoogaa erays. Xoossaa sunttay Yihoowa gidiyoogaa taani etappe issi wode tamaaraas. Hegaa gishshawu, massaariyaa issoy issuwaa bolli tokkosido wodeppe daro takkennan, taani Yihoowa A sunttaa xeesada woossaas; qassi I tana maaddanaadan oychchaas. Maalaalissiyaabay, wonttetta gallassi issi Yihoowa Markkay ta soo yiis! I tana Geeshsha Maxaafaa tamaarissiyaagaa gidiis.

Takkennan tana gita paacee gakkiis. Ta kase laggeti taani etaara wodiyaa attanaadan darotoo dawalidi oychchoosona. Hegee metiyaaba gidikkokka, taani chii gaas. Taani aggennan Geeshsha Maxaafaa xannaˈanawu murttaas, qassi yaatidoogan keehi ufayttays! Ta deˈoy keehi laamettiis; qassi taani tumu ufayssaa demmaas.

Makkalanchchatu yame gidada bonchchettanawu tammu laytta qashettana mala kase koyidoogaa woosan Xoossawu yootidoogaa taani hassayays. Hegaa gishshawu, tana harati maaddidoogaadan, taani harata maaddanawu baa giishin tammu layttawu ubba wode haggaaziyaagaa gidada awu oottana mala I eeno gaanaadan oychchaas. Xoossay ta woosaa zaarido gishshawu, taani 17 layttawu ubba wode haggaaziyaagaa gidada oottaas! Qassi taani mule qashettabeykke.

SHin, ta kase laggetuppe daroti, daro layttawu qashettidosona. Harati hayqqidosona. Taani kasebaa qoppiyo wode, Yihoowa Markka gidida ta dabbota keehi galatays. Eti Geeshsha Maxaafay yootiyoobaa kaalliyoogan dumma gididi deˈidosona. Taani makkalanchchatu yame gidida oonanne bonchchiyoogaappe aaruwan ta dabbota keehi bonchchays. Ubbaappe aaruwan, aybippenne aadhdhiya deˈo ogiyaa tana tamaarissido gishshawu, taani Xoossaa galatays.

 ANDRESA: Jallissiyaabaa goˈettiyoogee, boggiyoogee, woriyoogeenne shaaramuxiyoogee meeze gidido hiyyeesa heeran taani yelettada diccaas. Ta aaway ushshaa likkiyaappe attidi uyeesinne kokeyn giyo jallissiyaabay ayyo amale. Inne ta aayyiyaa muletoo cayettoosonanne warettoosona.

Taani naatettan ushshaa uyiyoogaanne jallissiyaabaa goˈettiyoogaa doommaas. Taani daro wodiyaa ogiyan aattays, he wode wuuqqays, qassi wuuqqidobaa bayzzays. Taani gitaa gidin, ta aaway taakko shiiqanawu maliis; shin I hegaadan oottidoy bala ogiyaana. I jallissiyaabaanne higgiyan digettida harabata waatada nu biitti gelissanaakkonne hegaa waatada bayzzanaakko tana tamaarissiis. Taani eesuwan daro miishshaa demmaas. Guyyeppe, issi galla poliseti ta soo yiidosona. Eti tana oyqqidosona, qassi asa woranawu maliis gin, ichchashu laytta qashettanaadan ta bolli pirddettiis.

Qashettidaageeti Yihoowa Markkatuura Geeshsha Maxaafaa tobbanaadan cenggurssaa xoqqissiya miishshan issi galla maallado erissoy odettiis. Taani shiiqanawu qofaa qachchaas. Siyidobaa taani akeekido gishshawu, Yihoowa Markkatuura Geeshsha Maxaafaa xannaˈiyoogaa doommaas. Eti harati siyanawu dosiyooba xallaa Geeshsha Maxaafaappe yootibookkona, shin Xoossay kessido kandduwaa maarata taassi qonccissidosona.

Taani, ubba qassi ta oottiyoobaa dosenna tanaara qashettidaageeti tana yashissiyo wode, maado demmennan taani koshshiyaaban laamettana danddayennagaa sohuwaara akeekaas. Yaatiyo gishshawu, minotettaanne aadhdhida eratettaa demmanawu woossaas; qassi Yihooway tana maaddiis. Eta yayyada aggiyoogaappe Geeshsha Maxaafaabaa qashettidaageetuyyo xalada yootaas.

Taani birshshettiyo wodee gakkin, keehi yayyido gishshawu, qasho keettan takkana koyaas! Taani kiyiyo wode, qashettida daroti kushiyaa denttidi tana sarotidosona. Ubba qassi amaridaageeti siiquwan, “Guutta henttanchchawu, soo baa” yaagidosona.

Xoossay tana tamaarissanaadan taani eeno geennaakko, ta bolli aybi gakkanaakko qoppiyoogee tana yashshees. Xoossay tana siiqiyo gishshawunne simmennabadan tana xeellibeenna gishshawu keehippe galatays. *