“Hiyyeesata maaddanau, ba kushiyan lo77obaa oottiiddi daafuro.”—EFISOONA 4:28.

Nuna Medhdhidaagee nuuni oosuwaa bessiyaagaadan xeellanaadan koyees. Aybissi? Minnidi oottiya uri baassinne ba soo asawu koshshiyaabaa kunttiyo gishshawu ufayttees. Maadoy koshshiyo uraakka I maaddana danddayees. A ootissiyaagee A nashshana. Yaatiyo gishshawu, mino oosanchchi ba oosuwaappe yedetettennan aggana danddayees. Geeshsha Maxaafay minni oottiyoogee “Xoossaappe imettida imota” yaagees.—Eranchchaa 3:13.

“Nuuni ubba wode lo77obaa oottanau koyiyo gishshau, nuna zoriya lo77o wozanai nuuyyo de7ees.”—IBRAAWE 13:18.

Nuuni ammanettiyaageeta gidikko, bonchchettoos, woppu goosinne qammi saro xiskkuwaa xiskkoos. Qassi harati nuna ammanettananne bonchchana. Ammanettenna asatuppe hegaa mala loˈˈobay halees. Hegaa bollikka, eti ubbatoo banttana mooranchchadan xeelloosonanne harati eti oottiyoobaa erana giidi hirggoosona.

“Miishsha siiqoppe inttena naagite; intteyyo de7iyaagee intteyyo gido.”—IBRAAWE 13:5.

Miyoobaanne koshshiya harabata shammanawu nuussi miishshay koshshees. Gidoppe attin, ‘miishshaa siiqiyoogee’ keehi qohees. Miishshaa siiqiya uri ba wodiyaappenne wolqqaappe dariya baggaa daro miishshaa demmanawu goˈettees. I daro miishshaa demmanawu keehi baaxetiyo gishshawu, A machcheera deˈiya dabbotay awu moorettana, qassi I ba naatuura gidiya wodiyaa aattennan aggananne sahettanakka danddayees. (1 Ximootiyoosa 6:9, 10) Qassi miishshaa siiqiya uri ammanettennaagaa bessiya issi issibaa oottanawu paacettana danddayees. Eranchcha bitanee hagaadan giis: “Ammanettida urai daro anjjettana; shin duretanau jaamiyaagee qaxxayettennan attenna” woy ba geeshshatettaa moorennan aggenna.—Leemiso 28:20.

“Lo77o aadhdhida eratettaanne adussi qoppiyoogaa naaga.”—LEEMISO 3:21.

Loˈˈo timirttee nuuni ammanettiyaageetanne loˈˈo aawa woy aayo gidanaadan maaddees. SHin xoqqa timirtte xallay nuussi koshshiya ubbabaa kunttana, qassi nuuni ufayttanaadan oottana danddayenna. Nuuni oottiyo ubbabay nuuyyo injjetana mala koyikko, Xoossay tamaarissiyo timirttee nuussi koshshees. Geeshsha Maxaafay Xoossay yootiyoobaa siyiya uraa hagaadan gees: “I oottiyo ubbai au hanees.”—Mazamure 1:1-3.