Mino oosanchchati ooso ixxokkona. Eti banttawu koshshiyaabaa kunttanawunne harata maaddanawu ay oosokka, ubba asay ziqqi ootti xeelliyo oosuwaakka, minnidi oottoosona.

Oottanaadan nuuppe koyettiya darobay deˈiyoogee erettidaagaa. Daro asay minnidi oottiyoogaa dosenna ha alamiyan, mino oosanchcha gidiyoogee goˈˈees.—Eranchchaa 3:13.

“Minni oottiyoogee keehi ufayssiyoogaanne woppissiyoogaa akeekaas. Hegee taani oosuwaa dosanaadan denttettiis. Ubbatoo minnidi oottiya uraa asay bonchchees.”—Reyona.

GEESHSHA MAXAAFAY YOOTIYO MAARAA: “Minnidi oottidoban ubban go77ai de7ees.”—Leemiso 14:23.

Kaallidi deˈiyaabaa oosuwan peeshshiyoogan oosuwan ufayttana danddayaasa.

Loytta oottiyoogaa meezetiyoogan ufaytta. So giddon oottiyo oosuwaa gidin, timirtte keettan immettida oosuwaa gidin woy ooso keettan oottiyoobaa gidin wozanappe ootta. Issi oosuwaa oottiyoogaa meezetiyo wode, hegaappekka loyttada woy eesotada oottanawu baaxeta. Oosuwaa oottiyoogaa loytta meezetikko, neeni oosuwan keehi ufayttana.

GEESHSHA MAXAAFAY YOOTIYO MAARAA: “Ba oosuwaa cinccatettan oottiya asa be7adii? Kawotussi ootteesippe attin, coo asatussi oottenna.”—Leemiso 22:29.

Haratuyyokka qoppa. Darotoo, neeni neeppe koyettiyaabaa loytta oottiyo wode, hegee haratakka maaddees. Leemisuwawu, neeni so giddo oosuwaa minnada oottiyo wode, son deˈiya haratuyyo oosoy darennaadan oottaasa.

GEESHSHA MAXAAFAY YOOTIYO MAARAA: “Ekkiyaagaappe immiyaagee anjjettidaagaa.”—Oosuwaa 20:35.

Koyettiyaabaappe gujjada ootta. Neeppe koyettiyaabaa xallaa oottiyoogaappe, gujjada oottanawu mala. Yaatiyoogan, asi giddin gidennan, ufayttaydda gujja oottiyoogan ne deˈuwaa giiga oottaasa.—Maatiyoosa 5:41.

GEESHSHA MAXAAFAY YOOTIYO MAARAA: ‘Neeni ne shenedan oottappe attin, wolqqan aynne oottoppa.’—Pilimoona 14.

Bessiyaagaadan ootta. Mino oosanchchati azalla gidokkona, qassi ooso xallawu aqidaageetakka gidokkona. Eti minnidi oottiyoogaaninne koshshiyo wode shemppiyoogan ufayttoosona.

GEESHSHA MAXAAFAY YOOTIYO MAARAA: “Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.”—Eranchchaa 4:6.