Saluwawunne saˈawu doomettay deˈii?

Doomettaabaa 1:1y hagaadan gees: “Xoossai salotanne sa7aa koiro medhdhiis.”

Erettida daro saynttistteti 1950 heeraappe kase, saluwawu saˈawu doomettay baa giidi qoppoosona. SHin mata wode kiyida xinaatetuppe denddidaagan, daro saynttistteti saluwawu saˈawu doomettay deˈiyoogaa akeekidosona.

Saˈay doomettan ay milatii?

Saˈay koyro merettido wode, haattaa maayida “aibinne bainna mela” soho gidiyoogaa Doomettaabaa 1:2, 9y yootees.

Saynttistteti he qofaa maayoosona. Patrik SHi giyo eranchchay yootiyoogaadan, saˈay merettido koyro heeran shemppanawu oksijiinee baawa; qassi keehi booddila soho. Asttironoomii giyo maxeetee hagaadan gees: “Mata wode kiyida xinaatee yootiyoogaadan, saˈay koyro merettido wode, haattay saˈaa muleera maayido gishshawu beettiya mela sohoy he keena.”

 Saˈaa yuushuwan deˈiya carkkoy loddan loddan waani laamettidee?

Doomettaabaa 1:3-5y, pooˈoy saˈaa yuushuwan deˈiya carkkuwaa kanttidi saˈaa gakkibeennaagaa yootees. Awaynne aginay saˈan loytti beettiyoogaa guyyeppe doommiis.—Doomettaabaa 1:14-18.

Simitisooniyan Invaromental Riserch Senter giyo dirijjitee yootiyoogaadan, saˈaa yuushuwan deˈiya carkkoy, saˈan koyro heeran keehi guutta pooˈoy pooˈanaadan oottiis. He dirijjitee hagaadan gees: “Mitteen giyo shaanoochcha malabay koyro heeran saˈaa ubbaa kammiis.” Guyyeppe, “he shaanoochcha malabay qaarettin saluwaa meray geeyidi beettiis.”

Saˈan deˈoy deˈiyoogaa doommido kasiyaa kaaluwaa.

Doomettaabaa 1:20-27y molee, kafoy, saˈan deˈiya mehee doˈaynne wurssettan asay merettidoogaa yootees. Moleti xanttiya mehetuppe daro layttaa kasetidi merettidoogaanne, hegaappe simmin takkidi asay merettidoogaa saynttistteti ammanoosona.

Saynttistteti mata wode pilggidi demmidobaara Geeshsha Maxaafay maayettenna giidi issoti issoti yootoosona. SHin eti hegaadan giyoy, Geeshsha Maxaafay yootiyoobaa bala ogiyan akeekido gishshataassa.

Saloynne saˈay merettoosappe 6,000 laytta xalla giidi Geeshsha Maxaafay yootenna. SHin, Geeshsha Maxaafay saloynne saˈay “koyro” merettidoogaa yootees. (Doomettaabaa 1:1) Gidoppe attin, saloynne saˈay merettoosappe ay keena wodee aadhdhidaakko yootenna.

Saˈan deˈiya ubbabay 24-saate deˈiyo usuppun gallassatun merettiis giidi Geeshsha Maxaafay yootenna.

SHin Geeshsha Maxaafay he wodiyaa qonccissanawu, ‘gallassaa’ giya qaalaa goˈettees. Leemisuwawu, Doomettaabaa shemppo 1n odettida, meretay merettido usuppun gallassata gujjin, saloy saˈay merettido wodiyaabaa Geeshsha Maxaafay, ‘Xoossaa Yihooway * saˈaanne salota medhdhido gallassaa’ giidi qonccissees. (Doomettaabaa 2:4) Yaatiyo gishshawu, Xoossay saˈaanne deˈon deˈiya mereta ubbaa medhdhido usuppun ‘gallassaa’ geetettida wodee keehi adussa wodiyaa qonccissiyaaba gidana danddayees.

Deˈuwan deˈiyaabati loddan loddan bantta meraa laammokkona giidi Geeshsha Maxaafay yootenna.

Mehetinne doˈati “bantta qommuwan qommuwan” merettidoogaa Doomettaabaa maxaafay yootees. (Doomettaabaa 1:24, 25) Geeshsha Maxaafay deˈuwan deˈiya dumma dumma daro meretata qonccissanawu “qommuwan qommuwan” giya qaalaa goˈettees. Hegaa gishshawu, “qommuwan” geetettida qaalay daro qommo meretata qonccissana danddayees. Ha qofaa maaraadan “qommuwan” giya qaalay issi heeran deˈiya dumma dumma meretati loddan loddan bantta meraa laammana danddayiyoogaa qonccissiyaaba gidennan waayi aggana.

 Ne qofay aybee?

Qommoora beˈidoogaadan, saloy saˈay waani merettidaakko, saˈay kase ay milatiyaakko, qassi saˈan deˈoy waani doommidaakko Geeshsha Maxaafay akeekanawu waayissenna ogiyan qonccissees. Yaatin Geeshsha Maxaafay he ubbabata Medhdhidaagaabaakka qonccissidi yootii? Insaykilooppiidiya Britaanika giyo maxaafay hagaadan gees: “Asaagaappe aadhdhiya wolqqay deˈiyoogee deˈon deˈiya meretata medhdhiis giya qofay saynttistteti mata wode xannaˈidi demmidobaara maayettees.” *