Saluwaa meretati maara darajjayettidosona. Asttironoomii giyo maxeetiyan kiyida issi huuphe yohoy hagaadan gees: “Gaalakiseti coo laalettidi gidennan, maaraa mankkaa naagidi yuuyoosona.” Hegee waani hanana danddayii? Hegee hananaadan oottiday asawu beettenna xuura gidida wolqqaa giidi saynttistteti ammanoosona. Xuura gidida he wolqqay, “gaalakiseti, kilasttere geetettiya citan deˈiya gaalakisetinne superkilastter geetettiya citan deˈiya gaalakiseti bantta ziiriyaa naagidi yuuyanaadan oottiya ayfiyan beettenna gayye malaba.”

Saloy hegaadan waani darajjayettidee? Medhdhidaagee baynnan coo hegaadan darajjayettidee? Alan Sandij giyo eranchchay yootidobaa akeeka. I “aadhdhida xeetu layttawu saluwaa meretatubaa loytti xannaˈida asatuppe issuwaa.” Qassi I Xoossan ammaniis.

 I hagaadan giis: “Maaran mankkan darajjayettidabay coo haniis giyoogee tawu ammananawu metiyaaba. Hegaa darajjayidabay deˈana bessees.”

Saluwaa meretati saˈan deˈoy giiga gidanaadan oottoosona. Awaa ayfee ubbatoo issi mala hanotan michchiyoogaabaa ane qoppa. Away issi mala hanotan michchanaadan oottiya wolqqay keehi guuxxikko, awaa ayfee mule merettenna; qassi he wolqqay keehi darikko awaa ayfee xuugetti xayana.

Deˈon deˈiyaabati saˈan paxa deˈanaadan maaddiya daro meretaa higgeti saluwan deˈoosona. Saynisiyaa eranchchay Anel Anantaswame yootidoogaadan, he higgetuppe issoy dummatiyaakko “xoolintteti, pilaaneetetinne gaalakiseti merettokkona. Qassi deˈon deˈiyaabati mule deˈana danddayokkona.”

Saˈay asay deˈanawu injje soho. Saˈaassi giiga carkkoy, gidiyaagaa keena haattaynne I ba sohuwaappe deshennaadan maaddiya giiga yesoy deˈiyo aginay deˈees. Naashinal Joograpik giyo maxeetee hagaadan gees: “Saˈaa qottaa, mehiyaa doˈaa, mokkiyaabata, heeraa qassi deˈon deˈiyaabata xannaˈiya saynttistteti, asay deˈanawu injje sohoy [saˈaa] xalla gidiyoogaa akeekidosona.” *

Issi eranchchay giidoogaadan awa ayfeenne A yuushuwan yuuyiyaabati gaalakisiya giddon deˈiya hara xoolinttetuppe keehi haakkoosona. SHin hegaadan eti issoy issuwaappe haakkidoogee saˈan deˈoy deˈanaadan oottiis. Nuuni galaakisiyawu giddo ginan woy gaxan hara xoolinttetukko shiiqidi deˈiyaakko, mishuwaa woraajjoy (radiation) keehi darana. SHin saˈay gaalakisiya giddon giiga sohuwan deˈiyo gishshawu, deˈuwawu injjetiya soho.

Pol Deviisa giyo eranchchay bawu deˈiya saluwaanne saˈaa higgiyaa eraappe denddidi hagaadan giis: “Ha keehi aaho gidida maalaaliya saˈan nuuni deˈana danddayidoy coo qaadadaana, woy wodiyaa daruwan bawu hanidabaana gaada ammananawu tawu deexxees. . . . Nuuni hagan deˈanawu merettida.” Deviisi saluwaanne saˈaa qassi asaa medhdhiday Xoossaa giidi tamaarissenna. SHin ne qofay aybee? Saˈay deˈon deˈiyaabati an deˈanaadan injjetidi merettiis. Saˈay hegaadan merettidoy Medhdhidaagee deˈiyo gishshataassee?