Saynttistteti saluwaanne saˈaa, qassi deˈuwaa doomettaabaa yootana danddayiyoonaa? Danddayokkona. Saluwaanne saˈaabaa xannaˈiya saynttistteti A doomettaabaa qonccissana danddayoosona giidi issoti issoti yootoosona. Gidoppe attin, Darttimawuz Kolloojjiyan awa ayfiyaabaanne xoolinttiyaabaa xannaˈiya, qassi Xoossay deˈiyoogaa siriya, Marssello Gilazeri giyo profeeseree, “Nuuni saluwaanne saˈaa doomettaabaa aybanne qonccissibookko” yaagiis.

Hegaadankka, Saynis Niwus giyo maxeetee issi huuphe yohuwan deˈuwaa doomettaabaa xeelliyaagan hagaadan giis: “Ha saˈan deˈoy tumuppe waani doommidaakko erana danddayettennaba milatees; ayssi giikko, saˈay koyro merettido wode hanidabay aybakko bessiya zaallatinne A giddon deˈiyaabati xayiichchidosona.” Saloynne saˈay, qassi deˈoy waani doommidee? giya oyshawu hanno gakkanawu saynisee zaaro demmibeennaagaa ha qofaappe akeekana danddayoos.

SHin, saˈan deˈiyaabay merettidaba gidikko, medhdhiday oonee? gaada qoppana danddayaasa. Kaallidi deˈiya oyshatakka oychchennan aggakka: Aadhdhida eranchchanne siiqiya Medhdhidaagee deˈikko, ba medhdhido asay tuggatanaadan I paqqadidoy aybissee? Dumma dumma gidida daro haymaanooteti deˈiyoy aybissee? Xoossaayyo goynnays giyaageeti iita gidida keehi darobaa oottiyoy aybissee?

Saynisee ha oyshata zaarana danddayenna. SHin hegee neeni aliya zaaruwaa demmana danddayakka giyoogaa gidenna. Ubba, daro asay Geeshsha Maxaafaappe aliya zaaruwaa demmiis.

Geeshsha Maxaafaa xannaˈida issi issi saynttistteti Medhdhidaagan ammaniyoy aybissakko eranawu koyikko jw.org websaytiyaa xomoosa. “Meretaa doomettaabaa qoppiyoobaa” (Amaarattuwaa) giyaagaa koya.