Hanenna Giyo Qofaa Eqettana Danddayaasa

METIYAABAY gakkiyo wode hegaa waata xeellay? Pilggiya daroti yootiyoogaadan gidikko, neeni ha oyshawu immiyo zaaroy issibaa hanees woy hanenna gaada qoppiya asa gidiyoogaa bessees. Nu ubbaa bollikka metoy gakkees, ubba amarida asatuugee keehi wolqqaama. Yaatin, issoti issoti bantta metuwaa xoonidi halchchidobaa polanawu zaarettidi baaxetiyo wode, harati guutta metuwaa gaasuwan hidootaa qanxxiyoy aybissee?

Leemisuwawu, ane neeni ooso koyiyaabadan qoppoos. Oyshaa zaaruwawu xeegin baadasa, shin nena qaxarana koyibookkona. Qaxarettabeenna gishshawu neessi aybi siyettii? Eti nena haratuppe dummayi ixxidi qaxarennan aggidabadan, qassi neeyyo mule ushachchennabadan hirggada, ‘Ta mala uraa qaxariyay baawa. Taani ooso mule demmikke’ gaada qoppana danddayaasa. Ubba hegaappekka iitabay, ha issibaa gaasuwan, ne deˈo macara ubban hidootaa qanxxada, ‘Tawu aybikka ushachchenna. Taani pattenna asa’ gaada qoppana danddayaasa. Hegaa mala xeelay issi uri hanenna giyo qofay deˈiyo asa gidiyoogaa bessees.

Hanenna Giyo Qofaa Eqettiyoogaa

Hanenna giyo qofaa waata eqettana danddayay? Hegaa mala iita qofaa shaakki eriyoogee nu oottana bessiyo koyro tanggo. Kaallidi oottana bessiyaabay hegaa eqettiyoogaa. Eti nena qaxaribeenna hara gaasoy aybakko eranawu mala. Leemisuwawu, neeni koyro paaciyan kunddidoy ooninne nena qaxarana koyenna gishshataasseeyye, woy qaxariya uri neegaappe dumma eray deˈiyo asa qaxarana koyido gishshataassee?

Neeni tuma gididabaa qoppiyo wode, hanenna giyoogan qoppidobay ubbay bessennaba gidiyoogaa akeekaasa. Neessi issibay ushachchibeenna gishshawu, ubbabay hanenna giyoogee? Neeyyo amarida hanotan ushachchidabata, leemisuwawu, neeni ayyaanaaban oottiyoobata, so asaaranne laggetuura deˈiya gaytotettaabaa qoppiyaakko shin? Neeni “poora” giidoobay coo hirggappe attin haraba gidennaagaa qoppiyoogaa meezeta. SHin neeni ooso mule demmana danddayennaagaa tumuppe erana danddayay? Neeni iita qofaa agganawu oottana danddayiyo harabaykka deˈees.

Hoolliyawu Gakkanawu Maaddiya Loˈˈo Qofaa

Mata wodeppe doommidi, pilggiyaageeti hidootaa xeelliyaagan, aaho qofa gidana xayikkonne garamiyaabaa yootoosona. Hidootay neeni kessido hoolliyawu gakkanaagaa ammaniyoogaakka xaaxi waaxiyaaba gidiyoogaa yootoosona. Kaalliya huuppe yohuwan beˈanaagaadan, hidootay hegaappekka darobaa xaaxi waaxees; shin ha qonccissoy unddenna ogiyan goˈˈiyaaba milatees. Hegaa mala nu buzo hidootaa qoppiyoogee nu hoolliyawu gakkanawu maaddiya loˈˈo qofaa qoppanaadan maaddees.

Nuuni kessiyo hoolleta gakkanaagaa ammananawu, aadhdhida wodetun hoolliyaa kessidi hegaa gakkiyoogaa meeze oottidaageeta gidana bessees. Neeni kase hegaa meezetabeennabadan qoppikko, kessiyo hoolleta xeelliyaagan loytti qoppiyoogee maaddana danddayees. Neeni kessido hoollee deˈii? Keehi koshshiyaabay tumuppe aybakko takki giidi qoppennan, galla galla duussaara gayttidaagan nu deˈoy unddugaalettana danddayees. Sinttayanabaa kasiyaa kaaluwan qoppiyoogaa xeelliyaagan Geeshsha Maxaafay, “Keehi koshshiyaabay aybakko shaakki erite” yaagidi daro wodiyaappe kase zoriis.—Piliphphisiyuusa 1:10 NW.

Nuuni sinttayanabaa kuyikko, ayyaanaabaara, so asaara woy harabaara gayttidaagan keehi koshshiya hoolliyaa kessanawu metenna. SHin koyro keehi daro hoolliyaa kessennaagee, qassi kessido hoolleti gakkana danddayiyoogeeta gidiyoogaa eriyoogee koshshiyaaba. Issi hoollee gakkana danddayettennaagaa gidikko, nuuni hirgganaadaaninne hidootaa qanxxanaadan oottana danddayees. Yaatiyo gishshawu, darotoo adussa wode hoolleta mata wode gakkiyo qantta hoollettun shaakki wottiyoogee loˈˈo.

“Wozanappe yeekkikko, afuti metenna” giyoobay amarida ogiyan tuma. Nuuni issi gita hoolliyaa kessikko, he hoolliyawu gakkanaassi baaxetanawu wozanappe murttana koshshees. Nuuni kessido hoolletu goˈˈaanne hegawu gakkiyoogan demmiyo anjjwaa loytti qoppiyoogan nu murttiyaa minttana danddayoos. Metoy gakkana danddayees, shin nuuni he metuwaappe kessi ekkanawu danddayennabadan gidennan, genccidi xoonana danddayiyabadan qoppana bessees.

SHin nuuni nu hoolliyawu gakkanawu maaddiya ogetakka qoppana koshshees. Hidootaa goˈˈaa xeelliyaagan darobaa xannaˈida, Rik Sinder giyo xaafee, issi hoolliyawu gakkanawu maaddiya daro ogeta qoppana bessiyoogaa yootiis. Yaatidi, issi ogee ushachchennan ixxikko, naaˈˈanttuwaa, hegee ixxikko hezzanttuwaa, hegeekka ixxikko haraa malana danddayoos.

Sinderi issi hoolliyaa haran laammiyoogaa meezetanaadankka zoriis. Nuuni issi hoolliyawu gakkanawu metootikko, hegan azzaniyoogee hidootaa qanxxanaadan oottiyoogaappe attin aynne goˈenna. Hara baggaara, he hoolliyaa hara giiga hoolliyan laammiyoogee nuuni hidootan naagiyoobay deˈanaadan oottees.

Hegaa xeelliyaagan Geeshsha Maxaafan issi loˈˈo leemisoy deˈees. Kawuwaa Daawiti ba Xoossaa Yihoowayyo beeta maqidasiyaa keexxanawu gitabaa halchchiis. SHin Xoossay he maatay A naˈaa Solomonawu imettanaagaa Daawitawu yootiis. Daawiti he hanotan azzaniyoogaappe woy ‘ta oottana bessees’ giidi eqettiyoogaappe ba halchchuwaa laammiis. A naˈay he oosuwaa polana mala maaddanawu I miishshaanne koshshiya harabaa shiishshanawu bawu deˈiya wolqqaa goˈettiis.—1 Kawotu 8:17-19; 1 Hananabaa Odiya 29:3-7.

Hanenna giyo qofaa eqettiyoogaaninne hoolliyawu gakkanawu maaddiya loˈˈo qofaa qoppiyoogan nuuni kaseegaappe hidootiya asa gidana danddayikkokka, issi issitoo hidootaa qanxxana danddayoos. Waanidi? Ha alamiyan nuuni hidootaa qanxxanaadan oottiya daro gaasoti nu abbiyaappe bolla gididabata. Asay tugatanaadan ottiya hiyyeesatettaa, olaa, pirdda pacaa, qassi harggiyaanne hayquwaa mala oossinne attenna keehi hirggissiyaabay deˈishin, nuuni loˈˈobaa hidootiyaageeta waani gidana danddayiyoo?

[Misiliyaa]

Neeni koyido oosuwaa demmana xayikko, ooso mule demmana danddayennabadan qoppay?

[Misiliyaa]

Hoolliyaara gayttidaagan Kawuwaa Daawiti koshshiyaagaadan ba hanotaa laammiis