Sinttappe mata wodiyan, saluwan deˈiya Xoossaa kawotettay kumetta saˈan deˈiya asaa haarana; he wode saˈay asa ubbay issippetettan, loˈˈonne ufayssiya oosuwaa oottiyoogan ufayttiyo soho gidana. Xoossay kumetta saˈaa haaranaadan Yesuus Kiristtoosa sunttiis. Ha wodiyan deˈiya haariyaageeti asawu tumuppe qoppokkona. SHin, Yesuusi ubbatoo asawu loˈˈobaa qoppiyo gishshawu etappe dumma; ayssi giikko, A haaroy siiquwan baasettidaagaa; qassi I keha, qarettiyaagaanne suure haariya Kawo.—Isiyaasa 11:4.

Ooratta alamiyan deˈiya asay, qommuwaaninne zariyan shaahettenna. Asa ubbay issuwaa gidana. (Ajjuutaa 7:9, 10) Saˈan deˈana asa ubbay Xoossaanne ba shooruwaa siiqiyaagaa, qassi Xoossay koyro asawu halchchidoogaadan saˈaa naaganawu sarotettan issippe oottana.—Mazamure 115:16.

Xoossaa Kawotettay haariyo wode, Xoossay wottiyoobi baynna ogiyan ubbatoo carkkuwaa hanotaa giigissana. (Mazamure 24:1, 2) Yesuusi wolqqaama gotiyaa coˈˈu oottido wode, I Xoossaa wolqqan oottana danddayiyoobaa bessiis. (Marqqoosa 4:39, 41) Kiristtoosi haariyo wode, meretaa daafay gakkana giidi ooninne yayyenna. Xoossaa Kawotettay haariyo wode, nuuni mehiyaa doˈaarakka sarotettan deˈana; qassi nu deˈiyo heeraa moorokko.—Hoose7a 2:18.

Asa ubbawu wottiyoobi baynna payyatettay deˈana. Harggee, cimatettay, woy hayqoy deˈenna. (Isiyaasa 35:5, 6) Koyro azinaynne machchiyaa Edene gannatiyan ufayttidoogaadan, asay keehi loˈˈonne geeshsha heeran ufayttidi deˈana. Edene gannatiyaagaadan, ooratta alamiyan biitta ubban daro kattay mokkana; qassi saˈan deˈiya asaa ubbawu qumay gidi palahana. (Doomettaabaa 2:9) Xoossaa asa gidida beni Israaˈeelatuugaadan, Gannatiyan daana ooninne “kallana gakkanaashin qumaa maana.”—Wogaabaa 26:4, 5. 

Xoossay ehaana ooratta alamiyan, asa ubbay sarotettan ufayttana; qassi issoy issuwaa kehatettaaninne suure oyqqana. Eti olettokkona; wolqqaa coo wurssokkona; qassi eta ubbawu koshshiyaabay deˈana. Geeshsha Maxaafay hagaadan gees: “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—Mikiyaasa 4:3, 4. 

Ubba asawu xayana giidi hirggenna keettay daana; qassi nuuni oottanabay ubbay woytuwaa demissiyaagaa gidana. Geeshsha Maxaafay yootiyoogaadan, Xoossay ehaana ooratta alamiyan deˈiyaageeti “coo daafurokkona.”—Isiyaasa 65:21-23.

Geeshsha Maxaafay ‘saˈay Yihoowa eriyoogan kumana’ yaagees. (Isiyaasa 11:9) Xoossaa Kawotettaa haaruwan deˈana asay banttana Medhdhida Yihoowappe keehi daro aadhdhida eratettaanne I medhdhidobata xeelliyaagan keehi darobaa tamaarana. Eti bantta eraa hara asaa qohiya miishshaa medhdhanawu goˈettokkona. (Isiyaasa 2:4) Yaatiyoogaappe, eti issoy issuwaara sarotettan waani deˈanaakkonne saˈaa waati naaganaakko tamaarana.—Mazamure 37:11.

Nuuni ubba gallassi deˈuwan ufayttanaadan, Xoossay saˈaa naaganawu darobaa oottana. I asay saˈan merinawu deˈanaadan halchchiis. (Mazamure 37:29; Isiyaasa 45:18) Hegee polettanaadan, Xoossay ‘hayquwaa merinawu mittana.’ (Isiyaasa 25:8) Geeshsha Maxaafay “Hagaappe sinttanau haiqoinne kayyoi woi waasoinne sahoi de7enna,” giidi yootees. (Ajjuutaa 21:4) Xoossay asa ubbawu, hegeekka ha iita alamiyaa bashshaappe I ashshanaageetussinne sinttappe yaana ooratta alamiyan hayquwaappe I denttana qooday baynna asatussi merinaa deˈuwaa immana.—Yohaannisa 5:28, 29; Oosuwaa 24:15.

 Miilooniyan qoodettiya asay, keehi matida Xoossaa Kawotettan deˈanawu giigettiiddi dees. Eti nagaranchchata gidikkokka, ooratta alamiyan deˈanaadan Xoossay koyiyo asatu mala gidanawu baaxetoosona. Waanidi? Eti Xoossaa Yihoowabaanne I kiittido Yesuus Kiristtoosabaa tamaariyoogaana.—Yohaannisa 17:3.

Ha alamiyaa bashshaappe waanada attana danddayiyaakkonne keehi matida loˈˈiya alamiyan waanada deˈana danddayiyaakko gujjada tamaara. Merinawu Ufayttada Deˈa! giyo maxaafaa goˈettada, miishsha qanxxennan issi Yihoowa Markkaara Geeshsha Maxaafaa xannaˈa.