“Simmi taani, Asa Na7ai, yaana gallassaa woi saatiyaa intte erenna gishshau, naagi uttite.”—MAATIYOOSA 25:13.

“He wodee aude gidanaakko, intte erenna gishshau, naagettite; minnite.”—MARQQOOSA 13:33.

Yaatiyo gishshawu, ha alamiyaa wurssettay awude gidanaakko ha saˈan deˈiya ooninne erenna. SHin, alamee xayiyo ‘gallassaanne saatiyaa’ Xoossay keeri wottiis. (Maatiyoosa 24:36) Hegaa giyoogee ha iita alamee xayiyo wodiyaa eriyo ogee tumuppe baawa giyoogee? Hegaadaana gidenna. Wodiyaa wurssettay matidoogaa erissiya daro malaatati deˈiyoogaa Yesuusi ba erissiyo ashkkaratussi yootiis.

He malaatati ‘wodiyaa wurssetta’ bessiyaaba. Yesuusi hagaadan giis: “Aissi giikko, issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana.” (Maatiyoosa 24:3, 7) I “wurssiya harggee” denddanaagaakka yootiis. (Luqaasa 21:11) Yesuusi yootido hiraagay polettishin neeni beˈaydda deˈay?

Ha wodiyan asay olan, namisaaninne, biittaa qaattaa mala bolli bollan denddiya harggiyaa gaasuwan waayettees. Leemisuwawu 2004n, Hindde ano abbaa heeran denddida wolqqaama biittaa qaattay sunaamiya denttin 225,000 gidiya asay hayqqiis. Ubbasaa gakkiya Koronaa (COVID-19) harggiyaa gaasuwan heezzu layttaa giddon 6.9 miiloone gidiya asay hayqqiis. Ha malaatati ha iita alamiyaa wurssettay matidoogaa bessiyaaba gididoogaa Yesuusi yootiis.

Geeshsha Maxaafay wurssettaappe kase deˈiya wodiyaa, ‘wodiyaa wurssettaa’ giidi qonccissees. (2 PHeexiroosa 3:3, 4) Naaˈˈantto Ximootiyoosa 3:1-5y yootiyoogaadan wurssettaa wodiyan deˈiya asay loˈˈo kandduwaa ixxiis gaana. (“ Alamiyaa Wurssettaappe Kase” giya saaxiniyaa xeella.) Ha wodiyan asay bana siiqiyaagaa, yaaretiyaagaa, makkalanchchanne issoy issuwaa siiqennaagaa gidiyoogaa akeekabeykkii? Hegee nuuni ha alamiyaa wurssettay matido wodiyan deˈiyoogaa bessiya naqaasha.

Wurssettaa gallassay ay keena wodiyawu takkanee? Geeshsha Maxaafay ‘guutta wode’ gidiyoogaa yootees. Hegaappe simmin, Xoossay ‘saˈaa xayssiyaageeta’ xayssana.—Ajjuutaa 11:15-18, 12:12.

Xoossay ha iita alamiyaa xayssana gallassaanne saatiyaa keeri wottiis. (Maatiyoosa 24:36) Qassi, hegaappe aaruwan ufayssiyaabay Xoossay ‘ooninne xayana mala koyennaagaa.’ (2 PHeexiroosa 3:9) I nuuni A sheniyaabaa tamaariyoonne hegawu azazettiyo injjiyaa nuussi immiis. Aybissi? Nuuni ha alamee xayiyo wode attidi gannate gidana ooratta saˈan deˈanaadan I koyiyo gishshataassa.

Xoossay ba Kawotettan ooratta alamiyan deˈanawu koshshiyaabaa asa ubbay tamaaranaadan hanotaa giigissiis. Yesuusi Xoossaa Kawotettaabaa yootiya mishiraachchoy “sa7a ubban” sabbakettanaagaa yootiis. (Maatiyoosa 24:14) Kumetta saˈan deˈiya Yihoowa Markkati biilooniyan qoodettiya saatiyawu Geeshsha Maxaafaa hidootaabaa asawu yootoosonanne tamaarissoosona. Ha sabbakiyo zamachay wurssettay yaanaappe kasetidi kumetta saˈan oosettanaagaa Yesuusi yootiis.

Asaa haaroy xayana wodee matattiis. SHin, ha alamiyaa xayuwaappe attada Xoossay qaalaa gelido Gannate saˈan neeni deˈana danddayiyoogee mishiraachcho. Kaalliya huuphe yohoy he ooratta alamiyan neeni waanada deˈana danddayiyaakko qonccissana.