1. Addaameenne Hewaana nagaraa ootti simmin darin takkennan Yihooway waatidee? (Doomettaabaa 3:15)

 ADDAAMEENNE Hewaana nagaraa ootti simmin darin takkennan, Yihooway eta zaretuyyo hidootay deˈanaadan oottiya keehi koshshiya hiraagaa yootiis. He hiraagay Doomettaabaa 3:15n deˈees.—Nabbaba.

2. Ha hiraagay keehi koshshiyoy aybissee?

² He hiraagay Geeshsha Maxaafaa koyro maxaafan deˈees. SHin he hiraagay Geeshsha Maxaafan deˈiya ubba maxaafatuura gayttees. Eettanawu mixido mittay sussan qashettiyoogaadan, Xoossay Dabloosanne A kaalliyaageeta xayssanawu, ashshiyaagaa kiittanaagaa yootiya Doomettaabaa 3:15n deˈiya qofay Geeshsha Maxaafan deˈiya ubba maxaafatu qofaa qachchees. b Yihoowa siiqiyaageeti keehi ufayttana!

3. Ha huuphe yohuwan ay beˈanee?

³ Ha huuphe yohuwan Doomettaabaa 3:15n deˈiya hiraagaara gayttidaagan kaallidi deˈiya oyshatu zaaruwaa beˈana: He hiraagan odettidaageeti oonee? He hiraagay waani polettii? He hiraagay nuna waati maaddii?

4. ‘SHooshshay’ oonee, qassi nuuni hegaa waati eriyoo?

⁴ Doomettaabaa 3:14, 15n odettidaageeti “shooshshaa,” shooshshaa “zerettaa,” ‘maccaasiyoonne’ maccaasee “zerettaa.” Hegeeti ubbay oona oonakko nuuni shaakki eranaadan  Geeshsha Maxaafay maaddees. c ‘SHooshshay’ oonakko ane koyro beˈoos. Tumu shooshshay Yihooway Edene gannatiyan yootidobaa akeekana danddayenna. Yaatiyo gishshawu, Yihooway pirddaa yootidoy qoppana danddayiya meretaassa. Yaatin he shooshshay oonee? Ajjuutaa 12:9y he shooshshay oonakko loytti qonccissees. He xiqisee “beni shooshshai” Seexaanaa Dabloosa gidiyoogaa yootees. SHin shooshshaa zerettay oonee?

5. SHooshshaa zerettati oonee?

⁵ Issi uraa keehi milatanawu baaxetiyo gishshawu ayyo naata geetettana danddayiyaageeta Geeshsha Maxaafay issi issitoo zerettaa yaagees. Yaatiyo gishshawu, Seexaanaagaadan Xoossaa Yihoowanne A asaa eqettiya kiitanchchatinne asay shooshshaa zerettata. Nohe wode saluwan deˈiyo sohuwaa aggidi yiida kiitanchchata gujjin bantta aawaa Dabloosaagaa mala eeshshay deˈiyo iita asatikka shooshshaa zeretta.—Doo. 6:1, 2; Yoh. 8:44; 1 Yoh. 5:19; Yih. 6.

6. “Maccaasiyaa” Hewaano gidana danddayennay aybissee?

⁶ “Maccaasiyaa” oonakko ane haˈˈi beˈoos. Maccaasiyaa Hewaano gidukku. Aybissi? Hegaadan giyo issi gaasuwaa ane beˈoos. He hiraagay maccaasee zerettay shooshshaa huuphiyaa ‘qoxxanaagaa’ yootees. Qommoora beˈidoogaadan, shooshshay iita kiitanchchaa Seexaanaa gidiyo gishshawu, Hewaani zeretta gidida ay asinne A qoxxana danddayenna. Yaatin Seexaanay waani xayanee?

7. Ajjuutaa 12:1, 2, 5, 10y qonccissiyoogaadan, Doomettaabaa 3:15n odettida maccaasiyaa oonee?

⁷ Geeshsha Maxaafan deˈiya wurssetta  Ajjuutaa maxaafay maccaasiyaa oonakko loytti qonccissees. (Ajjuutaa 12:1, 2, 5, 10 nabbaba.) A saˈan deˈiya maccaasa gidukku. A aginaa bolli eqqada, tammanne naaˈˈu xoolintte akiliiliyaa ba huuphiyan wottaasu. He maccaasiyaa keehi dumma naˈaa, hegeekka Xoossaa Kawotettaa yelaasu. He Kawotettay saluwan deˈiyo gishshawu, akka saluwan deˈawusu. He maccaasiyaa ammanettida kiitanchchati deˈiyo Xoossaa dirijjitiyawu saluwaa baggaa bessiyaaro.—Gal. 4:26.

8. Maccaasee zerettawu waannatiyaagee oonee, qassi hegee hanidoy awudee? (Doomettaabaa 22:15-18)

⁸ Xoossaa Qaalay maccaasee zerettawu waannatiyaagee oonakko eranaadan maaddees. He zerettay Abrahaama zeretta. (Doomettaabaa 22:15-18 nabbaba.) Hiraagan kasetidi odettidoogaadan, Yesuusi ammanettida he bitaniyaa zerettaappe yelettiis. (Luq. 3:23, 34) SHin he zerettay Seexaanaa Dabloosa xayssanaagaa gidiyo gishshawu, asappe wolqqaama gidana koshshees. Yaatiyo gishshawu, Yesuusawu layttay 30 gidido wode, I geeshsha ayyaanan tiyettiis. Yesuusi geeshsha ayyaanan tiyettido wode, maccaasee zerettawu waannatiyaagaa gidiis. (Gal. 3:16) Yesuusi hayquwaappe denddi simmin, Xoossay ‘A huuphiyan bonchchonne saba akiliiliyaa wottiis.’ Qassi, ‘maata ubbaa saluwaaninne saˈan’ ayyo immiis. He maataappe issoy, ‘xalahe halaqaa oosuwaa xayssiyoogaa.’—Ibr. 2:7; Maa. 28:18; 1 Yoh. 3:8.

9-10. (a) Maccaasee zerettawu naaˈˈantto shaahoti oonee, qassi eti hegaadan haniyoy awudee? (b) Hagaappe kaallidi ay beˈanee?

⁹ Kiitettida PHawuloosi ayyaanan tiyettida Kiristtaane gidida Ayhudatuyyoonne Ayhuda gidennaageetuyyo he zerettawu naaˈˈantto shaahoy oonakko qonccissiis. I hagaadan giis: “Intte Kiristtoosabaa gidikko, simmi intte Abrahaama zare; qassi Xoossai sinttappe immana giidi haasayidoogaa laattiyaageeta.” (Gal. 3:28, 29) Yihooway issi Kiristtaaniyaa ayyaanan tiyiyo wode, he uri maccaasee zeretta gidees. Yesuus Kiristtoosinne aara haariya 144,000ti he zeretta. (Ajj. 14:1) Eti ubbay bantta Aawaa Yihoowagaadan qoppanawunne oottanawu baaxetoosona.

¹⁰ Doomettaabaa 3:15n qonccidaageeti oonakko erida. Haˈˈi qassi Yihooway he hiraagaa polanawu ay oottidaakkonne hegee ha wodiyan nuna waati maaddiyaakko beˈana.

11. Maccaasee zerettaa ‘qirbbee’ waani masunxxidee?

¹¹ Doomettaabaa 3:15n deˈiya hiraagay qonccissiyoogaadan, shooshshay maccaasee zerettaa “qirbbiyaa dukkana.” Seexaanay Xoossaa Naˈaa woranaadan Ayhudatanne Roomata denttettido wode he hiraagay polettiis. (Luq. 23:13, 20-24) Issi uraa qirbbee masunxxiyo wode he uri hemettana danddayennaagaadan, Yesuusikka hayqqidi heezzu gallassa gidiyaagaa duufuwan deˈiyo wode aybanne oottanawu danddayibeenna.—Maa. 16:21.

12. SHooshshaa huuphee qoxettanay awudee, qassi waani qoxettanee?

¹² Doomettaabaa 3:15n deˈiya hiraagay Yesuusi duufuwan attennaagaa bessees. Ayssi giikko, he hiraagaa maaraadan maccaasee zerettay shooshshaa huuphiyaa qoxxana. Hegaa giyoogee Yesuusi hayquwaappe denddana koshshees giyoogaa. Qassi I hayquwaappe denddiis! Yesuusi heezzantto gallassan hayquwaappe denddidi, hayqqenna ayyaana mereta gidiis. Xoossay keerido wodiyan, Yesuusi Seexaanaa muleera xayssana. (Ibr. 2:14) Kiristtoosinne aara haaranaageeti  Xoossaa morkketa woykko shooshshaa zerettaa saˈaappe muleera xayssana.—Ajj. 17:14; 20:4, 10. d

13. Ha hiraagay polettiyoogan nuuni waani goˈettiyoo?

¹³ Neeni Xoossawu haggaaziya ura gidikko, ha hiraagay polettiyoogan goˈettaydda deˈaasa. Yesuusi saˈan deˈiyo wode ba Aawaa eeshshaa wottiyoobi baynna ogiyan bessiis. (Yoh. 14:9) Yaatiyo gishshawu, nuuni Yesuusabaa tamaariyoogan Xoossaa Yihoowa eroosinne siiqoos. Hegaa bollikka, Yesuusa timirtteenne I ha wodiyan Kiristtaane gubaaˈiyaa kaalettiyoogee nuna keehi maaddees. Nuuni Yihoowa ufayssiya ogiyan waani deˈana danddayiyaakkokka I nuna tamaarissiis. Qassi Yesuusa qirbbee masunxxido woykko I hayqqido gishshawu nuuni ubbay goˈettida. Waanidi? Yesuusi hayqqi simmin, Yihooway A denttidi, ‘nagara ubbaappe nuna ashshiya’ wottiyoobi baynna ba Naˈaa yarshshuwaa ekkiis.—1 Yoh. 1:7.

14. Yihooway Edenen yootido hiraagay he wode polettibeennaagaa aybin eriyoo? Qonccissa.

¹⁴ Yihooway Edenen yootidobay he hiraagay he wode polettibeennaagaa loytti qonccissees. Ayssi giikko, maccaasiyaa odettida zerettaa yeliyoogee, Dabloosi bana kaalliyaageeta shiishshiyoogee, qassi naaˈˈu citay issoy issuwaa morkkanaagee (woy ixxanaagee) gamˈˈidi polettiyaaba. Yaatiyo gishshawu, he hiraagaa akeekiyoogee nuna maaddees. Ayssi giikko, Seexaanaa alamee Yihoowayyo goynniyaageeta ixxanaagaa he hiraagay yootees. Yesuusikka bana kaalliyaageetuyyo hegaara issi malabaa yootiis. (Mar. 13:13; Yoh. 17:14) He hiraagay aadhdhida 100 layttan polettidoogaa nuuni loytti akeekoos. Waani polettidee?

15. Seexaanaa alamee awudeegaappenne aaruwan nuna ixxiyoy aybissee, shin nuuni Seexaanaa yayyana koshshennay aybissee?

¹⁵ Yesuusi 1914n Mase Kawo gididi haariyoogaa doommidi darin takkennan, Seexaanaa saluwaappe duge saˈawu oliis. Seexaanay saluwaa haˈˈi simmana danddayenna; qassi xayana wodiyaa naagiiddi deˈees. (Ajj. 12:9, 12) SHin I hanno gakkanawu coo uttiigibeenna. Seexaanay keehi hanqqettido gishshawu, Xoossaa asaa qohiiddi deˈees. (Ajj. 12:13, 17) Seexaanaa alamee awudeegaappekka aaruwan nuna ixxiyoy hegaassa. SHin Seexaanaassinne A kaalliyaageetussi nuuni yayyana koshshenna. Nuunikka kiitettida PHawuloosaagaadan ammanoos. I hagaadan giis: “Xoossai nu bagga gidikko, nuna oonee qohanai?” (Roo. 8:31) Doomettaabaa 3:15n deˈiya hiraagaappe dariya baggay polettidoogaa nuuni beˈido gishshawu, nu kumetta wozanaappe Yihoowa ammanoos.

16-18. Karttasi, Ursulanne Jesika Doomettaabaa 3:15n deˈiya hiraagaa akeekidoogee eta waati maaddidee?

¹⁶ Doomettaabaa 3:15n Yihooway qaalaa gelidobay nu deˈuwan ayba paacee gakkikkokka nuuni genccanaadan maaddana danddayees. Guwaman misoonaawe gididi haggaaziya Karttas giyo ishay hagaadan giis: “Taani ta deˈuwan Yihoowawu ammanettada deˈanawu metootanaadan oottiyaabay gakkiis. SHin Doomettaabaa 3:15n deˈiya hiraagaa wotta dentta qoppidoogee saluwan deˈiya ta Aawaa mintta ammananaadan tana maaddiis.” Nuna metiyaabaa ubbaa Yihooway xayssana wodiyaa Karttasi yeemuwan naagees.

¹⁷ Bavariyan deˈiya Ursulo giyo michchiyaa  Doomettaabaa 3:15n deˈiya hiraagaa akeekidoogee Geeshsha Maxaafay Xoossaa ayyaanay kaalettin xaafettidoogaa ammanettanaadan O maaddiis. Hara ubba hiraagati ha hiraagaara waani gayttiyaakko akeekido wode, A keehi maalaalettaasu. A hagaadan gaada harabaakka yootaasu: “Nuuyyo hidootay deˈanaadan Yihooway sohuwaara issibaa giigissidoogaa taani tamaaridoogee kaseegaappe aaruwan A siiqanaadan oottiis.”

¹⁸ Maykronezhiyan deˈiya Jesiko giyo michchiyaa hagaadan gaasu: “Taani tumaa eridoogaa koyro akeekido wode tawu siyettidabaa haˈˈikka hassayays! Doomettaabaa 3:15y polettiiddi deˈiyoogaa akeekaas. He hiraagay, nuuni waayettanaadan Yihooway halchchibeennaagaa taani akeekanaadan maaddiis. Hegaa bollikka, he hiraagay taani Yihoowawu haggaaziyoogan ha wodiyan ufayssiya deˈuwaa, qassi sinttappe hagaappekka aaruwan ufayssiya deˈuwaa deˈanaagaa mintta ammananaadan maaddiis.”

19. He hiraagawu wurssetta shaahoy polettanaagaa nuuni ammanettana danddayiyoy aybissee?

¹⁹ Nuuni hanno gakkanawu beˈidoogaadan, Doomettaabaa 3:15n deˈiya hiraagay polettiiddi deˈees. Maccaasee zerettaynne shooshshaa zerettay oonakko loytti qoncciis. Maccaasee waanna zeretta gidida Yesuusawu masunttay paxin, I haˈˈi hayqqenna wolqqaama Kawo gididi haariiddi deˈees. Yihooway ba Naˈaara haarana ubbatakka dooriichchiis gaana danddayettees. He hiraagawu koyro shaahoy polettido gishshawu, wurssetta shaahoykka polettanaagaa, hegeekka shooshshaa huuphee qoxettanaagaa nuuni ammanettoos. Seexaanay muleera xayiyo wode Xoossaa asay keehi ufayttana. Nu Xoossay ammanettiyaagaa gidiyo gishshawu, he wode gakkanaassi hidootaa qanxxokko. Yihooway maccaasee zerettaa baggaara ‘saˈaa kawotetta ubbawu’ keehi daro anjjuwaa immana.—Doo. 22:18.