1. Issi yelagay 1935n shiiqido gita shiiquwan siyido haasayay waananaadan A oottidee?

GEESHSHA MAXAAFAA tamaareta geetetti xeesettiya issi soo asay deˈees; hegee Yihoowa Markkati beni xeesettiyo sunttaa. Etassi heezzu attuma naatinne naaˈˈu macca naati deˈoosona; qassi eti bantta naati Xoossaa Yihoowawu haggaazanaadaaninne Yesuus Kiristtoosa leemisuwaa kaallanaadan tamaarissidosona. Eta attuma naatuppe issoy 1926n xammaqettiyo wode, awu layttay 18. He wode deˈida Geeshsha Maxaafaa tamaaretu ubbaagaadan, ha ammanettida yelaga naˈaykka layttan layttan Godaa kahuwaa bonchchiyo wode ubban oyttaappe meesinne woyniyaappe uyees. SHin, “Zaway Baynna Daro Asaa” giya haasayaa I siyido wode A sinttanaa hidootay laamettiis. Amarkkan Washingten D.S giyo kataman 1935n shiiqido gita shiiquwan Razerforddi he haasayaa haasayiis. He gita shiiquwan Geeshsha Maxaafaa tamaareti akeekidobay aybee?

2. Ishaa Razerforddi ba haasayan qonccissido ufayssiya tumay aybee?

² Ajjuutaa 7:9n odettida ‘zaway baynna daro asay’ oonakko Ishaa Razerforddi ba haasayan qonccissiis. He wode gakkanaashin, Geeshsha Maxaafaa tamaareti zaway baynna daro asay saluwaa biikkonne eti tiyettidaageetuppe ammanuwan guuxxoosona giidi qoppidosona. Ishaa Razerforddi zaway baynna daro asay saluwan deˈanawu doorettibeennaba gidikkonne, eti ‘gita waayiyaappe’ paxa attidi saˈan merinawu deˈana Kiristtoosa hara dorssata gidiyoogaa Geeshsha Maxaafaappe qonccissiis. *  (Ajj. 7:14) Yesuusi hagaadan giis: “Ha wudiyan bainna hara dorssatikka tau de7oosona. Taani etakka ehaanau bessees. Qassi eti ta qaalaa siyana; issi wudee de7ana; heemmiyaageekka issuwaa gidana.” (Yoh. 10:16) Ha xiqisiyan hara dorssata geetettidaageeti gannate gidiya saˈan merinawu deˈanawu hidootiya Yihoowa Markkata qonccissoosona. (Maa. 25:31-33, 46) Geeshsha Maxaafaappe akeekido he ooratta tumay, layttay 18 gidido he yelaga ishaa gujjin Yihoowa Markkatuppe darotu deˈuwaa waati laammidaakko ane beˈoos.—Maz. 97:11; Lee. 4:18.

3-4. SHaˈan qoodettiyaageeti 1935n shiiqido gita shiiquwan bantta hidootaabaa akeekidobay aybee, qassi aybissi?

³ He gita shiiquwan haasayaa haasayiyaagee ezggiyaageeta, “Merinawu saˈan deˈanawu hidootiya ubbay hayyanintta dendduuteetii?” giidi oychchido wode eti keehi ufayttidosona! He shiiquwaa shiiqida issi ishay yan shiiqida asaappe dariya baggay denddin beˈidoogaa yootiis. He wode Ishaa Razerforddi, “Zaway baynna daro asaa beˈite!” yaagiis. Hegaappe simmin, shiiqida ubbay ufayssan hombbociis. He denddida ubbay saluwan deˈanaadan Yihooway eta dooribeennaagaa akeekidosona. Eti Xoossaa ayyaanan tiyettibeennaagaa akeekidosona. He shiiquwan kaalliya gallassi, 840ti xammaqettidi Yihoowa Markka gididosona; etappe daroti hara dorssatu yarata.

⁴ He haasayaappe simmin, qommoora odettida yelaga naˈaynne shaˈan qoodettiya harati Godaa Kahuwaa wode oyttaappe miyoogaanne woyniyaappe uyiyoogaa aggidosona. Issi ashkke ishay kaallidi giidoogaadan darotuyyo siyettees. I hagaadan giis: “Taani saluwan deˈanawu hidootanaadan oottanawu Yihooway ba geeshsha ayyaanaa goˈettibeennaagaa erido gishshawu, Godaa Kahuwaa bonchchiyo wode oyttaa miyoogaanne woyniyaa uyiyoogaa 1935⁠ppe simmin aggaas. SHin taassi saˈan deˈiyo hidootay deˈiyo gishshawu, saˈay gannate gidanaadan oottiyo oosuwan maaddana.” (Roo. 8:16, 17; 2 Qor. 1:21, 22) He wodeppe doommidi zaway baynna daro asay qoodan gujjiis; qassi eti tiyettidaageetuppe attidaageetuura issippe hashetidi oottiiddi deˈoosona.

5. Godaa Kahuwaa bonchchiyo wode, oyttaappe miyoogaanne woyniyaappe uyiyoogaa aggidaageeta Yihooway waati xeellii?

⁵ Godaa Kahuwaa bonchchiyo wode, oyttaa miyoogaanne woyniyaa uyiyoogaa 1935⁠ppe simmin aggidaageeta Yihooway waati xeellii? Qassi Godaa Kahuwaa bonchchiyo wode oyttaa maananne woyniyaa uyana bessiyaabadan qoppikkonne guyyeppe geeshsha ayyaanan tiyettibeennaagaa akeekida Yihoowa Markkaa xeelliyaagan Yihoowawu aybi siyettii? (1 Qor. 11:28) Issoti issoti bantta hidootaa bala ogiyan akeekido gishshawu, Godaa Kahuwaa baalaa bonchchiyo wode oyttaa miidosonanne woyniyaappe uyidosona. SHin eti balidoogaa ammanidi, oyttaa miyoogaanne woyniyaa uyiyoogaa aggiyaabanne ubbatoo ammanettidi Yihoowawu haggaaziyaaba gidikko, I eta hara dorssatu yara oottidi ekkana. Eti oyttaa meennabanne woyniyaappe uyennaba gidikkonne, Yihoowaynne Yesuusi etawu oottidobaa keehi galatiyo gishshawu Godaa Kahuwaa bonchchanawu shiiqoosona.

6. Kiitanchchati ay oottanaadan Yesuusi azazidee?

⁶ Gita waayee matan doommiyo gishshawu, tiyettida Kiristtaanetanne zaway baynna hara dorssata xeelliyaagan Ajjuutaa maxaafay shemppo 7y yootiyo harabaa xannaˈiyoogee minttettiyaaba. Kiitanchchati oyddu bashshaa carkkoy carkkennaadan teqqi uttanaadan Yesuusi eta azaziis. Saˈan deˈiya tiyettida ubba Kiristtaanetu bolli maatafay wodhdhana gakkanaashin, hegeekka eti ammanettidaageeta gidiyoogaa Yihooway kuuyana gakkanaashin kiitanchchati he carkkoy carkkanaadan oottana koshshenna. (Ajj. 7:1-4) Tiyettida Kiristtoosa ishantti aara saluwan kawonne qeese gidiyoogan bantta ammanuwaa gishshawu woytettana. (Ajj. 20:6) Tiyettida 144,000ti bantta saluwaa woytuwaa ekkiyo wode Yihooway, Yesuusinne kiitanchchati eta beˈiyoogan keehi ufayttana.

7. Ajjuutaa 7:9, 10y yootiyoogan, Yohaannisi ajjuutan beˈidoogeeti oonee, qassi eti ay oottiyoonaa? (Koyro sinttan deˈiya misiliyaa xeella.)

⁷ Yohaannisi 144,000u kawotubaanne qeesetubaa yooti simmidi, ufayssiya issibaa, hegeekka Armmageedoonappe attida “zaway baynna daro asaa” beˈiis. Koyro citaappe dumma hanotan naaˈˈantto citay keehi daro; qassi eta qooday ay keenakko erettenna. (Ajjuutaa 7:9, 10 nabbaba.) Eti ‘bootta maayuwaa maayidosona.’ Hegee eti Seexaanaa alamiyaa “qitaappe” banttana naagidi Xoossawunne Kiristtoosawu ammanettidi deˈidoogaa bessees. (Yaaq. 1:27) Eti Yihoowaynne Xoossaa dorssaa gidida Yesuusi etawu oottidoban attido gishshawu ililoosona. Qassi Yihooway Yesuusa kawo oottidi sunttido gishshawu, eti ufayttidoogaa bessanawu zambbaa hayttaakka oyqqidosona.—Yohaannisa 12:12, 13⁠ra gatta xeella.

8. Saluwan deˈiya Yihoowa so asaa xeelliyaagan Ajjuutaa 7:11, 12y yootiyoobay aybee?

⁸ Ajjuutaa 7:11, 12 nabbaba. Saluwan deˈiyaageeti zaway baynna daro asaa beˈido wode waanidonaa? Saluwan deˈiya ubbay zaway baynna daro asaa beˈido wode, keehi ufayttidoogaanne Xoossaa sabbidoogaa Yohaannisi beˈiis. Zaway baynna daro asay gita waayiyaappe attiyo wode, saluwan deˈiya Yihoowa so asay ha ajjuutay polettidoogaa beˈidi keehi ufayttana.

9. Ajjuutaa 7:13-15y yootiyoogaadan, zaway baynna daro asay ha wodiyan ay oottii?

⁹ Ajjuutaa 7:13-15 nabbaba. Zaway baynna daro asay “bantta maayuwaa Dorssaa suuttan meeccidi [booxissidoogaa]” Yohaannisi yootiis. Hegaa giyoogee etawu geeshsha kahay deˈeesinne etan Yihooway ufayttees giyoogaa. (Isi. 1:18) Eti Yesuusa yarshshuwaa mintti ammaniyaanne Yihoowaara mino dabbotaa dabbotida banttana sheedhdhidi xammaqettida Kiristtaaneta. (Yoh. 3:36; 1 PHe. 3:21) Xoossay etan ufayttiyoynne eti saˈan “qamminne gallassi” assi geeshsha oosuwaa oottana danddayidoy hegaassa. Eti Xoossaa Kawotettaa aybippenne aaruwan kaseyiyo gishshawu, ha wodiyan Kawotettaabaanne erissiyo ashkkara oottiyo oosuwaappe dariya baggaa minnidi oottoosona.—Maa. 6:33; 24:14; 28:19, 20.

10. Zaway baynna daro asay ay ammanettii, qassi polettin eti beˈana qaalaa gelidobay aybee?

¹⁰ Gita waayiyaappe paxa attana zaway baynna daro asay Xoossay etawu koshshiyaabaa kunttanaagaa ammanettees, ayssi giikko, “ba kawotaa araatan uttidaagee eta gidduwan de7ana.” Qaalaa gelidobay wurssettan polettin beˈanawu hara dorssati yeemuwan naagoosona: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis” yaagiis.—Ajj. 21:3, 4.

11-12. (a) Ajjuutaa 7:16, 17y yootiyoogaadan, zaway baynna daro asay sinttappe demmana anjjoti aybee? (b) Godaa Kahuwaa wode hara dorssati ay oottana danddayiyoonaa, qassi hegaadan oottanaadan eta denttettiyaabay aybee?

 ¹¹ Ajjuutaa 7:16, 17 nabbaba. Ha wodiyan, Yihoowa asaappe amaridaageeti banttawu koshshiya qumaa shammanawu etawu gidiya miishshi baynna gishshawu, woy olay gattiyo metuwaappe denddidaagan namisettoosona. Harati bantta ammanuwaa gaasuwan qashettidosona. SHin zaway baynna daro asay ha iita alamiyaa xayuwaappe aattiyoogaa eriyo gishshawu keehi ufayttees; eti asatettaabaaninne ayyaanaaban gidi palahiya qumaa ubbatoo demmana. Yihooway Seexaanaa iita alamiyaa xayssiyo wode, zaway baynna daro asaa ‘awaa’ mala gidida ba hanqquwaappe ashshana. Gita waayiyaappe simmin, Yesuusi saˈan attidaageeta ‘merinaa deˈuwaa haattaakko’ kaalettana. Hagaa qoppa: Zaway baynna daro asawu maalaalissiya hidootay deˈees. Biilooniyan qoodettiya asay mule hayqqenna!—Yoh. 11:26.

¹² Hara dorssati Yihoowanne Yesuusa galatiyo maalaalissiya hidootay etawu deˈees! Eti saluwan deˈanaadan Yihooway eta dooribeennaba gidikkonne, tiyettidaageeta siiqiyoogaa keena etakka siiqees. Tiyettidaageetikka hara dorssatikka Xoossaanne Kiristtoosa sabbanawu danddayoosona. Eti hegaadan oottiyo issi ogee Godaa Kahuwaa baalaa bonchchanawu shiiqiyoogaana.

13-14. Tiyettidaageetuppe attidaageetinne hara dorssati Kiristtoosa hayquwaa hassayiyo baalaa bonchchanawu shiiqana koshshiyoy aybissee?

¹³ Mata layttatun, Godaa Kahuwaa wode oyttaa miyaanne woyniyaappe uyiya asaa qooday 1,000⁠ppe 1 keena. Daro gubaaˈetun Godaa Kahuwaa bonchchiyo wode oyttaa miyaanne woyniyaa uyiya uri baawa. Godaa Kahuwaa bonchchanawu shiiqiya daroti saˈan deˈanawu hidootoosona. Yaatin eti Godaa Kahuwaa bonchchanawu shiiqiyoy aybissee? Eti shiiqiyo gaasoy asay ba laggiyaa bullachchaa shiiqiyoogaara issi mala. He laggeti bullachchaa yiyoy aqo oyqqiyaageeta kaafiyoogaanne siiqiyoogaa bessanaassa. Hegaadankka, hara dorssati Kiristtoosanne tiyettidaageeta siiqiyoogaanne kaafiyoogaa bessanawu koyiyo gishshawu Godaa Kahuwaa bonchchanawu shiiqoosona.  Hara dorssati Kiristtoosa yarshshuwaa gishshawu keehi galatiyoogaa bessanawukka shiiqoosona; he yarshshoy eti saˈan merinawu deˈanaadan oottees.

¹⁴ Hara dorssati Godaa Kahuwaa bonchchanawu shiiqiyo keehi koshshiya hara gaasoy Yesuusi azazido azazuwawu azazettanaassa. Yesuusi ammanettida ba kiittidoogeetuura he dumma baalaa essido wode, “Hagan tana hassayite” giidi etawu yootiis. (1 Qor. 11:23-26) Hegaa gishshawu, amarida tiyettidaageeti ha saˈan deˈido wode ubban, hara dorssati Godaa Kahuwaa baalaa bonchchanawu shiiqoosona. Qassi hara dorssati banttanaara harati Godaa Kahuwaa baalaa bonchchanaadan shoobboosona.

15. Godaa Kahuwaa baalaa bonchchiyo wode Xoossaanne Kiristtoosa sabbanawu ay oottana danddayiyoo?

¹⁵ Godaa Kahuwaa baalaa bonchchiyo wode, nuuni Xoossaanne Kiristtoosa mazamuriyaaninne woosan sabboos. Ha laytti shiiqana haasayay, “Xoossaynne Kiristtoosi Inttessi Oottidobaa Nashshite!” giyaagaa. He haasayay nuuni Yihoowanne Kiristtoosa kaseegaappe aaruwan nashshanaadan oottana. Yaatiyo gishshawu, oyttaanne woyniyaa yuushshiyo wode, hegee Yesuusa ashuwawunne suuttawu leemiso gidiyoogaa nuuni hassayana. Nuuni deˈuwaa demmanaadan Yihooway ba Naˈay nu gishshawu hayqqanaadan eeno giidoogaa nuuni hassayana. (Maa. 20:28) Saluwan deˈiya nu Aawaanne A Naˈaa siiqiya ubbay Godaa Kahuwaa baalaa bonchchanawu shiiqana.

16. Tiyettidaageetinne hara dorssati issi mala gidiyoy ayba ogiyaanee?

¹⁶ Tiyettidaageetinne hara dorssati amarida ogetun issi mala. Yihooway issi citaa hankkuwaappe aattidi siiqenna. Xoossay tiyettidaageetakka hara dorssatakka xoqqu ootti xeellees. Naaˈˈu citaakka I issi lagge siiqees. I tiyettidaageetanne hara dorssata ba siiqiyo Naˈaa deˈuwan wozido gishshawu nuuni hegaa eroos. Naaˈˈu citatu giddon deˈiya dummatettay eta hidootay dumma dumma gidiyoogaa. SHin naaˈˈu citaykka Xoossawunne Kiristtoosawu ammanettidi deˈana bessees. (Maz. 31:23) Xoossaa ayyaanay nu ubbawu issi mala wolqqaa immiyoogaa hassayoos. Hegaa giyoogee Yihooway ba geeshsha ayyaanay koshshiyo ubbawu immees giyoogaa.

17. Attida tiyettidaageeti yeemuwan naagiyoobay aybee?

¹⁷ Tiyettida Kiristtaaneti saluwaa hidootaara yelettibookkona. He hidootaa etawu Xoossay immees. Eti bantta hidootaabaa qoppoosona, hegaabaa woossoosonanne saluwan bantta woytuwaa ekkanawu yeemuwan naagoosona. Eti saluwan bantta bollay ay mala gidanaakko erokkona. (Pili. 3:20, 21; 1 Yoh. 3:2) Gidikkonne, eti Yihoowaara, Yesuusaara,  kiitanchchatuuranne tiyettidaageetuppe attidaageetuura gayttanawu yeemuwan naagoosona. Eti saluwaa Kawotettan etaara gidanawu laamotan naagoosona.

18. Hara dorssati yeemuwan naagiyoobay aybee?

¹⁸ Hara dorssati saˈan merinawu deˈanwawu yeemuwan naagoosona. Hegee ubba asay koyiyooba. (Era. 3:11) Eti kumetta saˈaa gannate oottiyoogan maaddana danddayiyo wodiyaa yeemuwan naagoosona. Eti keettaa keexxiyo, mittaa ayfiyaa tokkiyo, qassi wottiyoobi baynna payya gidida bantta naata dichchiyo wodiyaa yeemuwan naagoosona. (Isi. 65:21-23) Eti daro sohota manddariyoogan, deriyaa, woraanne abbaa beˈanawu, qassi Yihooway medhdhido ubbabaa pilgganawu laamotan naagoosona. Ubbaappe aaruwan, eti Yihoowaara dabbotido dabbotay kaseegaappe aaruwan minnanaagaanne akko shiiqanaagaa eriyoogan keehi ufayttoosona.

19. Godaa Kahuwaa bonchchiyo baalay nuuni ubbay ay oottanaadan denttettii, qassi Godaa Kahuwaa baalay ha laytti awude bonchchettanee?

¹⁹ Yihooway banttana sheedhdhida ba ashkkaratu ubbaayyo sinttappe demmana maalaalissiya hidootaa immiis. (Erm. 29:11) Nuuni merinaa deˈuwaa demmanaadan Xoossaynne Kiristtoosi nuuyyo oottidobaa gishshawu eta sabbanaadan Kiristtoosa hayquwaa hassayiyo baalay tiyettidaageetussinne hara dorssatussi dumma gallassa. Godaa Kahuwaa baalay tumu Kiristtaaneti kumetta layttan shiiqiyo ay shiiquwaappenne aadhdhees. He shiiquwaa Qeeraa galla Laappune 27n, 2021n away wulli simmin shiiqana. Ha laytti daroti ha keehi koshshiya shiiquwaa laˈatettan shiiqiyo sohuwan deˈana danddayoosona. Harati yedetay deˈishinkka shiiqana. Amaridaageeti Godaa Kahuwaa qasho keettan bonchchana. Nu hanotay ayba gidinkka, Yihooway, Yesuusinne saluwan deˈiya Xoossaa keettaa asay beˈiyoogaa nuuni ubbay hassayiyaageeta gidoos. Gubaaˈiyan gidin, citan gidin, buzuwan buzuwan gidin, ubbaykka Godaa Kahuwaa ufayssiya ogiyan bonchchiyaageeta gidoos!