Ha taarikiyaa eesuwan nabbabiya amaridaageeti hegaadan oychchana danddayoosona. SHin he xiqisetun Mafibosheeta giyo sunttan xeesettida naaˈˈu dumma dumma asati deˈoosona; qassi nuuni he taarikiyaa pilggiyoogan tamaarana danddayoos.

Israaˈeela Kawuwaa Saaˈoolawu laappun attuma naatinne naaˈˈu macca naati deˈoosona. Saaˈoolawu bayra naˈay Yonaataana. Guyyeppe kawuwaa Saaˈooli, Rixifo geetettiya kaadumateppe Mafibosheeta giyo naˈaa yeliis. Yonaataanawukka Mafibosheeta giyo naˈay deˈiyoogee maalaalissiyaaba. Yaatiyo gishshawu, Kawuwaa Saaˈoola naˈaykka A naˈaa naˈaykka Mafibosheeta geetettidi xeesettoosona.

Kawuwaa Saaˈooli Israaˈeelatuura issippe deˈiya Gabaaˈoona asata ixxido gishshawu eta muleera xayssanawu issi wode maliis. He wode amarida Gabaaˈoona asati hayqqidoogee qoncce. Hegee balaba. Aybissi? Yaasu wode, Israaˈeela halaqati Gabaaˈoona asatuura sarotettaa maachchaa maacettido gishshataassa.—Yaas. 9:3-27.

He maachchay Kawuwaa Saaˈoola wodekka oottees. Kawoy he maachchaa naagennan aggidi Gabaaˈoona asata xayssanawu maliis. Hegee ‘Saaˈoolinne A asati suuttaa gussidoogawu oyshettanadan’ oottiis. (2 Sam. 21:1) Wurssettan, Daawiti kawotiis. Paxa attida Gabaaˈoona asati banttana gakkida gita naaquwaa assi yootidosona. Saaˈooli oottido gita nagaray atto geetettanaadaaninne Yihooway biittaa anjjanaadan waatana koshshiyaakko Daawiti eta oychchiis. Gabaaˈoona asati miishshaa oychchibookkona; shin eti ‘paxa attennaadan maqettida’ bitaniyaa laappun attuma naati banttassi imettanaadan oychchidosona. (Qoo. 35:30, 31) Eti oychchidobaa Daawiti poliis.—2 Sam. 21:2-6.

He wode, Saaˈoolinne Yonaataani olan hayqqichchidosona, shin, Yonaataana naˈay Mafibosheeti paxa deˈees. Naatettan A daafabay gakkidoogaa gaasuwan I sila gidiyo gishshawu A aawaa aaway Gabaaˈoona asata qohiyo wode hashetibeenna. Daawiti Yonaataanaara dabbotaa maachchaa maacettiis, hegee Yonaataana naˈaa Mafibosheeta gujjin, Yonaataana zareta maaddees. (1 Sam. 18:1; 20:42) Taarikee hagaadan gees: “GODAA sinttan caaqqido caaquwaa gishshau, Saa7oola na7aa Yonaataana na7aa Mafibosheeta kawoi [Daawiti] ashshiis.”—2 Sam. 21:7.

Gidikkonne, Gabaaˈoona asati oychchidobaa Daawiti poliis. I Saaˈoola attuma naata naaˈˈata, issuwaa sunttay Mafibosheeta, qassi Saaˈoola naˈee naata ichchashata aattidi immiis. (2 Sam. 21:8, 9) Daawiti oottidobay suuttaa gussidoogaa acuwaappe biittay laˈa kiyanaadan oottiis.

Ha hanotay taarike xalla gidenna, nuuni appe tamaarana danddayoos. Xoossaa higgee yootiyoobay qoncce. Hagaadan gees: ‘Aawati oottido nagaraa gishshawu naata woranawu bessenna.’ (Zaa. 24:16) Saaˈoola naati naaˈˈatinne A naˈee naati ichchashati iitabaa oottana xayiyaakko, Yihooway eti hayqqanaadan oottenna. He higge gujjidi hagaadan gees: “Asai ubbai ba oottido nagaran nagaran haiqqanau bessees.” Saaˈoola zaretuppe hayqqida laappunati Saaˈooli Gabaaˈoona asata buttidi xayssanawu malido wode iitabaa oottennan waayi aggana. Yaatiyo gishshawu, he laappun naati oottido iita oosoy eta bolli gakkiis.

Issi uri kaaletuwaadan oottaas giidi qoppiyoogan woy haasayiyoogan ba oottido balabawu gaaso shiishshana danddayennaagaa ha taarikee qonccissees. Leemiso maxaafay hagaadan gees: “Ne gediyaassi ogiyaa salallissa; suure oge xalaalan hemetta.”—Lee. 4:24-27; Efi. 5:15.