1-2. (a) Yesuusi kiittido heezzati ay oottanaadan azazettidonaa, qassi eti waatidonaa? (b) Nuuni ha huuphe yohuwan ay pilgganee?

KIITETTIDA PHeexiroosi, Yaaqoobinne Yohaannisi 32 M.Ln Paasikaa Baalaappe simmin, keehi maalaalissiya ajjuutaa beˈidosona. Issi gita deriyaa bolli Yesuusi eta sinttan laamettiis; hegee Hermmoone Deriyaa gidennan waayi aggana. “A som77oi awa aifiyaadan poo7iis; a maayoikka poo7uwaadan booxxiis.” (Maa. 17:1-4) Ajjuutay wurana haniyo wode Xoossay hagaadan giishin kiitettidaageeti siyidosona: “Hagee taani siiqiyo tana ufaissiya ta Na7aa; i giyoogaa siyite.” (Maa. 17:5) He heezzu kiitettidaageeti Yesuusi yootiyoobaa siyidoogaa bantta deˈuwan bessidosona. Nuuni eta leemisuwaa kaallanawu koyoos.

² Yesuusi tamaarissiyoobaa siyiyoogaa giyoogee issi issibata oottiyoogaa aggiyoogaa gidiyoogaa hagaappe kasetiya huuphe yohuwan nuuni tamaarida. Ha huuphe yohuwan nuuni oottana koshshiya Yesuusi yootido naaˈˈubata nuuni pilggana.

3. Maatiyoosa 7:13, 14y yootiyoogaadan, nuuni waatana koshshii?

³ Maatiyoosa 7:13, 14 nabbaba. Yesuusi naaˈˈu dumma dumma ogiyawu efiya naaˈˈu penggeti deˈiyoogaa yootidoogaa akeeka, hegeekka “aaho” ogiyaanne “xuntta” ogiyaa. Heezzantto ogee baawa. Nuuni baana ogiyaa doorana bessees. Merinaa deˈuwawu efiya ogee issuwaa xalaalaa gidiyo gishshawu,  nuuni hegaadan kuuyiyoogee keehippe koshshiyaaba.

4. “Aaho” ogiyaa neeni waata qonccissuutee?

⁴ Naaˈˈu ogetu giddon deˈiya dummatettaa nuuni hassayana koshshees. “Aaho” ogee baanawu metenna gishshawu, daro asay he ogiyaara bees. Daroti he ogiyaara biyoogeenne hegaara biyaageeti oottiyoobaa qulliyoogee keehi azzanttiyaaba. Seexaanay asay he ogiyaara baanaadan oottanawu maliiddi deˈiyoogaa eti akeekokkona; qassi he ogiyaara biyoogee hayquwaa kaalettees.—1 Qor. 6:9, 10; 1 Yoh. 5:19.

5. Issoti issoti “xuntta” ogiyaa demmanawunne hegan baanawu waati baaxetidonaa?

⁵ “Aaho” ogiyaappe dummatiya hara ogee “xuntta” oge; qassi he ogiyaara biyaageeti amaridaageeta gidiyoogaa Yesuusi yootiis. Aybissi? Yesuusi bana kaalliyaageeti wordduwaa hananabaa yootiyaageetuppe naagettanaadan kaalliya payduwan yootiis. (Maa. 7:15) Amarida asay shaˈan qoodettiya haymaanooteti deˈiyoogaanne etappe daroti tumaa tamaarissiyaabadan yootees. Keehi daro haymaanooteti deˈiyo gishshawu daro asawu haniyoobay kirqqi giis; qassi eti deˈuwawu efiya ogiyaa koyanawukka malokkona. SHin eti koyiyaakko he ogiyaa demmana danddayoosona. Yesuusi hagaadan giis: “Intte taani tamaarissiyoogau azazettikko, tumu tana kaalliyaageeta. Intte tumatettaakka erana; qassi tumatettai inttena ailletettaappe kessana.” (Yoh. 8:31, 32) Neeni hara daroti oottiyoobaa kaalliyoogaappe tumaa koyiyoogee loˈˈoba. Xoossay nuuppe koyiyoobaa eranawu A Qaalaa loytta xannaˈiyoogaaninne Yesuusi tamaarissidobaa azazettiyoogan yaatiyoogaa doomma. Qassi nuuni worddo haymaanootee tamaarissiyo timirtteta eqettanaadaaninne worddo haymaanootiyaara gayttida baalata bonchchennaadan Yihooway nuuppe koyiyoogaa neeni eradasa. Yihooway koyiyoobaa oottiyoogeenne A ufayssenna meezetuppe laˈa kiyiyoogee metana danddayiyaabaa gidiyoogaakka eradasa. (Maa. 10:34-36) Hegaa mala meezeta aggiyoogee nena deexxana danddayiyoogee qoncce. Gidoppe attin, neeni saluwan deˈiya ne Aawaa siiqiyo gishshawunne A ufayssanawu koyiyo gishshawu laamettanawu ubbatoo baaxetaasa. I nenan keehi ufayttees!—Lee. 27:11.

6. Mazamure 119:9, 10ynne 133y yootiyoogaadan, xuntta ogiyaappe kiyennaadan nuna aybi maaddana danddayii?

⁶ Nuuni xuntta ogiyan biyoogaa doommikko, hegaappe kiyennaadan nuna aybi maaddana danddayii? Ha leemisuwaa qoppa. Issi issi biittatun, deriyaa lanqqiyan deˈiya xuntta ogiyaa doonan dirssaa ziqqissidi diroosona. He dirssay asay ogiyaa gaxaakko keehi shiiqennaadan woy ogiyaappe wora beennaadan naagees. He dirssay banttana ogiyaappe gaxi kiyennaadan diggees, qassi qohettennaadan woy hayqqennaadan teqqees giidi ooninne amassalenna. Yihooway kessido Geeshsha Maxaafay yootiyo maarati he dirssaa mala. Nuuni xuntta ogiyaappe kiyennaadan A maarati nuna maaddoosona.—Mazamure 119:9, 10, 133 nabbaba.

7. Yelagati xuntta ogiyaabaa waati qoppanaadan Yihooway koyii?

⁷ Yelagatoo, Yihooway kessido maarati intte oottanawu koyiyoobaa issi issitoo oottennaadan diggiyaabadan intteyyo siyettii? Seexaanay intte hegaadan qoppanaadan koyees. Aaho ogiyan biyaageeti ufayssiya deˈo deˈiyaaba milatiyo gishshawu intte eti oottiyoobaa qoppanaadan Seexaanay koyees.  Intte inttenaara tamaariyaageetudan woy interneetiyan inttenaara gayttiya asatudan deˈuwan ufayttiiddi deˈennabadan qoppanaadan I koyees. Seexaanay Yihooway kessido maarati intte intte deˈuwan ufayttiyoogaa diggiyaabadan intte qoppanaadan koyees. * SHin, hagaa hassayite: Seexaanay A ogiyan hemettiyaageeti he ogee eta awu efiyaakko eti akeekanaadan koyenna. SHin intte deˈuwawu efiya ogiyaappe kiyana xayikko, intte deˈoy keehi ufayssiyaagaa gidanaagaa intte eranaadan Yihooway koyees.—Maz. 37:29; Isi. 35:5, 6; 65:21-23.

8. Yelagati Olafa gakkidabaappe ay tamaarana danddayiyoonaa?

⁸ Olafa giyo yelaga ishaa gakkidabaappe intte tamaarana danddayiyoobaa qoppite. * Aara tamaariyaageeti I mattuma gayttanaadan  oottanawu malidosona. Yihoowa Markkati Geeshsha Maxaafay yootiyo kandduwaa maaraadan deˈiyoogaa I qonccissido wode, A kifiliyan deˈiya amarida macca naati I banttanaara mattuma gayttanaadan iisettidosona. SHin Olafi likkebaa oottanawu murttiis. Qassi A gakkidabay hegaa xalla gidenna. Olafi hagaadan giis: “Yuniversttiyan tamaariyoogee hayttatanaadan oottiyo gishshawu, taani yan tamaaranaadan ammanttanawu ta asttamaareti malidosona. Taani yuniversttiyaa gelana xayikko, loˈˈo ooso demmennaagaa woy ufayssiya deˈo deˈennaagaa eti tawu yootidosona.” Olafi hegaa mala paaciyaa eqettanaadan A aybi maaddidee? I hagaadan giis: “Ta gubaaˈiyan deˈiyaageetuura taani laggetettaa minttaas. Eti taayyo so asa mala gididosona. Qassi taani Geeshsha Maxaafaa loytta xannaˈaas. Taani loytta xannaˈido paydo ubban, ta xannaˈidobay tuma gidiyoogaa mintta ammanaas. Hegaappe denddidaagan, taani Yihoowayyo haggaazanawu murttaas.”

9. Xuntta ogiyaappe kiyanawu koyennaageeti waatana bessii?

⁹ Seexaanay neeni deˈuwawu efiya ogiyaappe kiyanaadan koyees. “Bashshau efiya” aaho ogiyan biya daro asay oottiyoobaa neeni oottanaadaaninne he ogiyan baanaadan I koyees. (Maa. 7:13) Gidoppe attin, nuuni Yesuusi tamaarissiyoobaa ubbatoo siyikko, qassi he ogee nuna naagiyaabadan qoppikko he xuntta ogiyaappe kiyokko. Yesuusi yootido nuuni oottana koshshiyo harabaa ane haˈˈi beˈoos.

10. Maatiyoosa 5:23, 24 maaran, nuuni oottana koshshiyaabaa Yesuusi ay yootidee?

¹⁰ Maatiyoosa 5:23, 24 nabbaba. Yesuusi I yootiyoobaa siyiya Ayhudatuyyo keehi koshshiya issi hanotaabaa ha xiqisiyan yootiis. Beeta maqidasiyan mehiyaa yarshshuwaa issi qeesiyawu immana haniya uraa qoppa. He bitanee I ba ishaa naaqqidobaa he wode hassayikko, I he yarshshuwaa aggibayidi ‘baana’ koshshees. Aybissi? Yihoowayyo yarshshuwaa yarshshiyoogaappe keehi aadhdhiyaabay ayba gidana danddayii? Yesuusi hagaadan giis: “Kasetada ne ishaara sigettaichcha.”

11. Yaaqoobi Eesawaara sigettanawu waatidee?

¹¹ Sigettiyoogaa xeelliyaagan Yaaqoobappe keehi koshshiyaabaa tamaarana danddayoos. Yaaqoobi ba yelettido biittaappe baqatidi 20 laytta gidiyaagaa harasan deˈi simmin, Xoossay issi kiitanchchaa baggaara I ba biitti simmanaadan azaziis. (Doo. 31:11, 13, 38) SHin he wode metiyaabay deˈees. A bayra ishay Eesawi A woranawu koyees. (Doo. 27:41) Yaaqoobi ba ishay ba bolli haˈˈikka hanqqettennan aggenna giidi “yayyidi batibatiis.” (Doo. 32:7) Yaaqoobi ba ishaara sigettanawu waatidee? Koyro, he allaalliyaa xeelliyaagan I Yihoowa mintti woossiis. Yaatidi I Eesawawu imotaa kiittiis. (Doo. 32:9-15) Wurssettan, Yaaqoobi Eesawa beˈido wode, A bonchchiyoogaa bessiis. I Eesawawu issitoo woy naaˈˈutoo xalla gidennan, laapputoo ziggiis. Yaaqoobi bana ziqqi oottidi Eesawa bonchchiis, qassi ba ishaara sigettiis.—Doo. 33:3, 4.

12. Nuuni Yaaqooba hanotaappe ay tamaariyoo?

¹² Yaaqoobi ba ishaara gayttanawu oottidobaappenne ba ishaara gayttido hanotaappe nuuni issibaa tamaaroos. Yaaqoobi bana ziqqi oottidi Yihooway maaddanaadan oychchiis. Yaatidi, I ba ishaara sigettanawu baassi danddayettida ubbabaa oottiyoogan ba woosaara maayettiyaabaa oottiyoogaa bessiis. He ishantti gayttido wode, Yaaqoobi ooni likke, qassi ooni balee giidi ba ishaa Eesawaara palamettibeenna. Yaaqooba halchchoy ba ishaara sigettiyoogaa. Nuuni Yaaqooba waani milatana danddayiyoo?

13-14. Nuuni nu mala Kiristtaaniyaa naaqqidoogaa akeekikko, waatana koshshii?

¹³ Nuuni deˈuwawu efiya ogiyan baanawu koyikko, nu ishanttuura sarotettan deˈana koshshees. (Roo. 12:18) Nuuni nu mala Kiristtaaniyaa naaqqidobi deˈiyoogaa akeekikko, waatana koshshii? Nuuni Yaaqoobaagaadan Yihoowa mintti woossana bessees. Nuuni nu ishaara sigettanaadan I nuna maaddana mala oychchana danddayoos.

¹⁴ Nuuni oottanabaakka takki giidi qoppana koshshees. Hagaa mala oyshata nuna oychchana danddayoos: ‘Taani balaas gaanawu, tana ziqqi oottada maarotaa oychchanawunne sigettanawu eeno giyaanaa? Taani ta ishaara woy ta michcheera sigettanawu koyiyoogaa yootikko, Yihoowawunne Yesuusawu aybi siyettii?’ Ha oyshatussi nu zaariyoobay nuuni Yesuusi yootiyoobaa siyanaadaaninne nuna ziqqi oottidi nu mala Kiristtaaniyaara sigettanaadan oottana danddayees. Hegaara gayttidaagan, nuuni Yaaqoobi oottidobaa kaallana danddayoos.

15. Efisoona 4:2, 3n deˈiya maaraa oosuwan peeshshiyoogee nu ishaara sigettanaadan nuna waati maaddii?

¹⁵ Yaaqoobi ooni likke, qassi ooni balee giidi ba ishaa Eesawaara palamettidaba gidiyaakko, aybi hanana danddayiyaakko qoppa! Eti sigettennan aggana danddayoosona. Nuuni nu ishaara sigettanawu biyo wode, nuna ziqqi oottana bessees. (Efisoona 4:2, 3 nabbaba.) Leemiso 18:19y hagaadan gees: “Naaqettida ishaara giiganaagee gimbbettida katamaa omooddanaagaappekka aadhdhi waayissees; penggiyaa gorddiyo birata hiraquwaadan, palamai dabbota shaakkees.” Nuuni he ura maarotaa oychchiyoogee I sigettanawu eeno gaanaadan maaddana danddayees.

16. Nuuni qoppana koshshiya harabay aybee, qassi aybissi?

¹⁶ Nuuni haasayanabaanne hegaa haasayiyo ogiyaakka loytti qoppana koshshees. Nuuni giigettiyo wode, qohettida uraara haasayananne I zaarettidi nunaara dabbotanaadan maaddana koshshees. I nuna ufayssennabaa koyro haasayana danddayees. Hanqqettiyoogee woy nuuni oottidobawu gaasuwaa yootiyoogee metennaba gidikkonne, hegaadan oottiyoogee sigettanawu maaddenna. Ne ishaara sigettiyoogee ooni likkekko, qassi ooni balakko eriyoogaappe aadhdhiyaaba gidiyoogaa hassaya.—1 Qor. 6:7.

17. ZHilbera hanotaappe ay tamaarana danddayay?

 ¹⁷ ZHilber giyo ishay sigettanawu mintti baaxetiis. I hagaadan giis: “Taaninne ta naˈiyaa keehi ooyettida. Nuuni kaseegaadan saruwan deˈanawu taani iira he allaalliyaa woppu gaada haasayanawu naaˈˈu layttappe dariya wodiyawu malaas.” ZHilberi harabaa ay oottidee? “Nuuni haasayanaappe kase ubba wode taani woossays, qassi A ta bolli iitabaa haasayikko, taani yiillotana koshshennaagaa tana hassayissays. Taani atto gaana koshshiis. Taani likke gidiyoogaa qonccissanawu malana koshshennaagaanne sigettanawu baaxetana koshshiyoogee ta aawatetta gidiyoogaa akeekaas.” Hegee ayba ayfe demissidee? ZHilberi hagaadan giis: “Taani ta soo asa ubbaara sigan deˈiyo gishshawu haˈˈi woppu gaas.”

18-19. Nuuni issi uraa naaqqikko, waatanawu murttana koshshii, qassi aybissi?

¹⁸ Yaatikko, neeni ne mala Kiristtaaniyaa naaqqidoogaa akeekikko, waatanawu murttana koshshii? Sigettanawu Yesuusi yootido azazuwaa kaalla. He allaalliyaabaa Yihoowawu yoota; qassi neeni sigettanaadan A geeshsha ayyaanay nena maaddanaagaa ammanetta. Neeni yaatikko, ufayttana, qassi Yesuusi yootiyoobaa siyana.—Maa. 5:9.

¹⁹ “Woosa keettaayyo huuphe” gidida Yesuus Kiristtoosa baggaara Yihooway nuuyyo siiquwan immiyo kaaletuwaa gishshawu A galatoos. (Efi. 5:23) Kiitettida PHeexiroosa, Yaaqoobanne Yohaannisaagaadan nuuni ‘I giyoogaa siyanawu’ murttidaageeta gidoos. (Maa. 17:5) Nuuni naaqqido nu mala Kiristtaaniyaara sigettiyoogan hegaadan waati oottana danddayiyaakko beˈida. Hegaadan oottiyoogaaninne deˈuwawu efiya xuntta ogiyaappe kiyennan aggiyoogan, nuuni haˈˈi daro anjjuwaa demmana, qassi sinttappe merinawu ufayttana.