1. PHeexiroosi Kiristtaaneti waananaadan yootidee, qassi he zoree nuussi azazettanawu danddayettennaba milatiyoy aybissee?

NU HIDOOTAY saluwan woy saˈan gidin, kiitettida PHeexiroosi koyro xeetu layttan deˈida tiyettida Kiristtaanetuyyo immido zoriyaa xannaˈiyoogan nuuni goˈettana danddayoos. PHeexiroosi hagaadan giis: “Inttena xeesida Xoossai geeshsha gididoogaadan, inttekka intte ooso ubban geeshsha gidite. Xoossaa maxaafan, ‘Taani geeshsha gidiyo gishshau, inttekka geeshsha gidite’ geetettidi xaafettiis.” (1 PHe. 1:15, 16) Nuuni ha xiqisiyaappe geeshshatettan ooppenne aadhdhiya leemiso gidida Yihoowa milatana danddayiyoogaa tamaaroos. Nuuni nu oosuwan geeshsha gidana bessees, qassi yaatana danddayoos. Nuuni nagaranchcha gidiyo gishshawu hegee nuussi danddayettennaba milatana danddayees. PHeexiroosi darotoo balidaba gidikkonne, A hanotay nuuni ‘geeshsha gidana’ danddayiyoogaa qonccissees.

2. Nuuni ha huuphe yohuwan beˈana oyshati awugeetee?

² Ha huuphe yohuwan, nuuni kaallidi deˈiya oyshata pilggana: Geeshshatettay aybee? Geeshsha Maxaafay Yihoowa geeshshatettaabaa nuna ay tamaarissii? Nuuni nu oosuwan waanidi geeshsha gidana danddayiyoo? Qassi geeshshatettaynne nuuni Yihoowaara dabbotido dabbotay waani gayttii?

3. Geeshshatettaa xeelliyaagan daro asay qoppiyoobay aybee, shin nuuni likkebaa awuppe erana danddayiyoo?

³ Geeshsha giyo uraabaa daro asay qoppiyo wode, eti mule noocu geenna uraa, haymaanootiyaa kaalettiyaageetu maayuwaa maayiyaanne mule pashkki geenna uraa qoppoosona. SHin hegee likke gidenna. Geeshsha gidida Yihooway ufayttiya woy ‘anjjettida Xoossaa’ geetettees. (1 Xim. 1:11) Awu goynniyaageeti “anjjettidaageeta” woy ufayttiyaageeta geetettoosona. (Maz. 144:15) Yesuusi dumma maayuwaa maayiyaageetanne asay  banttana beˈana mala asaa sinttan loˈˈobaa oottiyaageeta seeriis. (Maa. 6:1; Mar. 12:38) Geeshsha Maxaafay geeshshatettaabaa yootiyo gishshawu tumu Kiristtaaneti geeshshatettay aybakko eroosona. Xoossay nuna siiqiyoogaanne nuuni oottana danddayennabaa oottanaadan I nuna mule azazennaagaa eroos. Yaatiyo gishshawu Yihooway ‘intte geeshsha gidite’ giidi nuuyyo yootiyo wode, hegee danddayettiyaaba gidiyoogaa nuuni ammanettoos. Nuuni nu oosuwan geeshsha gidanaappe kasetidi geeshshatettay aybakko erana koshshees.

4. “Geeshshatettay” aybee?

⁴ Geeshshatettay aybee? Geeshsha Maxaafan “geeshshatettaa” geetettida qaalay kandduwaaninne haymaanootiyaara gayttidaban geeshsha gidiyoogaa qonccissees. Xoossawu haggaazanawu dummatiyoogaakka he qaalay qonccissana danddayees. Qassi nuuni kandduwan geeshsha gidikko, Yihoowa ufayssiya ogiyan goynnikko, qassi awu mata dabbo gididi deˈikko nuuni geeshsha. Nuuni nagaranchcha gidikkonne, keehi geeshsha gidida Yihooway nuuni ayyo mata dabbo gidanaadan I koyiyoogan maalaalettoos.

5. Ammanettida kiitanchchatuppe Yihoowabaa ay tamaarana danddayiyoo?

⁵ Yihooway ubbaban geeshsha. Yihoowa araataa matan deˈiya suraafeelati woy kiitanchchati yootidobay hegaa qonccissees. Etappe amaridaageeti hagaadan giidosona: “Geeshshai, geeshshai, geeshshai Ubbaappe Wolqqaama GODAATTENNEE!” (Isi. 6:3) He kiitanchchatussi geeshsha gidida Xoossaara mino dabbotettay deˈiyo gishshawu eti geeshsha. Kiitanchchati yiidi saˈan kiitaa yootiyo sohoy geeshsha gididoy hegaassa. Buuray eexxiyaagaa matan Muusee eqqido wode hegaadan haniis.—Kes. 3:2-5; Yaas. 5:15.

6-7. (a) Kessaabaa 15:1, 11 yootiyoogaadan, Muusee Xoossaa geeshshatettaa waati qonccissidee? (b) Xoossay geeshsha gidiyoogaa Israaˈeelati hassayanaadan oottiyaabay aybee? (Koyro sinttan deˈiya misiliyaa xeella.)

⁶ Muusee Israaˈeelata kaalettidi zoˈo abbaa pintti simmidi eta Xoossay Yihooway geeshsha gidiyoogaa etawu loytti yootiis. (Kessaabaa 15:1, 11 nabbaba.) Worddo xoossatuyyo goynniya Gibxxeti geeshsha gidennaagee qoncce. Worddo xoossatussi goynniya Kanaanetikka geeshsha gidokkona. Eta goynuwan naata yarshshiyoogeenne pokkobaa oottiyoogee deˈees. (Wog. 18:3, 4, 21-24; Zaa. 18:9, 10) SHin, Yihooway he worddo xoossatuppe dummatees. Awu goynniyaageeti geeshsha gidennabaa aybanne oottanaadan I mule yootenna. I keehi geeshsha. Qeese ubbatu halaqay huuphiyan qaciyo shaashiya bollan deˈiya worqqaappe medhdhido alleequwan wooci xaafidobay hegaa qonccissees. Ha alleequwaa bollan “GODAASSI GEESHSHA GIDIDI DUMMATIIS” yaagiya qaalay deˈees.—Kes. 28:36-38.

⁷ He alleequwaa bolli xaafettidabay hegaa beˈiya ooninne Yihooway tumuppe geeshsha gidiyoogaa akeekanaadan oottees. SHin issi Israaˈeela asi qeese ubbatu halaqaakko shiiqana danddayenna gishshawu, he alleequwaa beˈennan aggana danddayees. Yaatin I Yihooway geeshsha gidiyoogaa erii? Ee! Attuma asaa, maccaasaanne naatu sinttan Higgee nabbabettiyo wode, Ubba Israaˈeelati siyidosona. (Zaa. 31:9-12) Neeni he sohuwan deˈiyaakko ha qaalata siyana: “Taani, GODAI, intte Xoossaattennee. Taani geeshsha gidiyo gishshau, . . . inttekka geeshsha gidite.” ‘Taani GODAI geeshsha gidiyo gishshawu inttekka taayyo geeshsha gidite.’—Wog. 11:44, 45; 20:7, 26.

8. Wogaabaa 19:2ninne 1 PHeexiroosa 1:14-16n deˈiya qofaappe nuuni ay tamaariyoo?

⁸ Ubba Israaˈeelatussi nabbabettiya Wogaabaa 19:2n deˈiya qofa ane beˈoos. Yihooway Muuseyyo hagaadan giis: “Israa7eela asau ubbau hagaadan yaagada yoota; ‘Taani GODAI,  intte Xoossai geeshsha gidiyo gishshau, inttekka geeshsha gidite.’” PHeexiroosi Kiristtaaneti ‘geeshsha gidanaadan’ zorido wode ha xiqisiyaa qofaa ekkennan waayi aggana. (1 PHeexiroosa 1:14-16 nabbaba.) Ha wodiyan nuuni Muuse Higgiyaa azazettana koshshenna. SHin Yihooway geeshsha gidiyo gishshawu, A siiqiyaageeti geeshsha gidanawu baaxetana koshshiyoogaa xeelliyaagan, Wogaabaa 19:2ppe nuuni ay tamaariyaakko PHeexiroosi xaafidobay qonccissees. Nuuni deˈanawu hidootiyoy saluwaana woy gannate gidida saˈaana gidin hegee tuma.—1 PHe. 1:4; 2 PHe. 3:13.

9. Wogaabaa shemppo 19 pilggiyoogan nuuni waani goˈettiyoo?

⁹ Nuuni geeshsha gidida nu Xoossaa ufayssanawu koyiyo gishshawu, waani geeshsha gidana danddayiyaakko tamaarana koyoos. Yihooway nuna zoriyo gishshawu nuuni hegaadan waati oottana danddayiyaakko eroos. Nuuni he zoriyaa Wogaabaa shemppo 19ppe demmana danddayoos. Ibraawetto doonaa eranchchay Markes Kaalishi hagaadan giis: “Ha shemppoy Wogaabaa maxaafan deˈiya shemppotuuninne Geeshsha Maxaafan koyro ichchashu maxaafatun keehi xoqqu ootti xeelliyooba gidennan waayi aggana.” Wogaabaa 19y ‘intte geeshsha gidite’ giidi doommiyoogaa hassayite. Nuuni galla galla deˈuwan geeshsha gidana danddayiyo dumma dumma ogiyaa nuna tamaarissiya ha shemppuwaappe amarida paydota ane haˈˈi beˈoos.

10-11. Wogaabaa 19:3y nuuni waatana koshshiyoogaa yootii, qassi hegee keehi koshshiyoy aybissee?

¹⁰ Yihooway Israaˈeelati geeshsha gidana koshshiyoogaa yooti simmidi gujjidi hagaadan giis: “Intteppe Issoinne attennan ba aawaanne ba aayyiyo bonchcho; . . . Taani, GODAI, intte Xoossaa.”—Wog. 19:2, 3.

¹¹ Nuna yelidaageeta bonchchanaadan Xoossay immido azazuwaa nuuni azazettiyoogee keehi koshshiyaaba gidiyoogee qoncce. “Taani merinaa de7uwaa demmanau loo77obaa ai oottoo?” giidi issi bitanee Yesuusa oychchido wode I woygidaakko hassayite. Yesuusi zaaridobaa giddon he bitanee ba aawaanne ba aayyiyo bonchchana koshshiyoogaa yootiyaabay deˈees. (Maa. 19:16-19) Qassi Parisaawetinne higgiyaa tamaarissiyaageeti banttana yelidaageeta bonchchennan agganawu banttawu danddayettida  ubbabaa oottido gishshawu Yesuusi eta seeriis. Yaatiyoogan eti ‘Xoossaa qaalaa xayssidosona.’ (Maa. 15:3-6) ‘Xoossaa qaalay’ Tammu Azazotuppe ichchashanttaagaanne Wogaabaa 19:3n deˈiya qofaa xaaxi waaxees. (Kes. 20:12) “Taani GODAI, intte Xoossai geeshsha gidiyo gishshau, inttekka geeshsha gidite” yaagiya qofaappe simmin issi uri ba aawaanne ba aayyiyo bonchchanaadan yootiya azazoy Wogaabaa 19:3n deˈiyoogaakka hassayite.

12. Wogaabaa 19:3n deˈiya azazuwaa nuuni waatidi oosuwan peeshshana danddayiyoo?

¹² Nuuni nuna yelidaageeta bonchchanaadan Yihooway nuuyyo immido azazuwaa qoppiyo wode nuna hagaadan oychchana danddayoos: ‘Taani tana yelidaageeta bonchchiyaanaa?’ Neeni kase bessiyaagaa keenaa bonchchabeennabadan neeyyo siyettikko, hegaa giigissanawu haˈˈi murttana danddayaasa. Neeni kasebaa laammana danddayakka. SHin nena yelidaageetuura wodiyaa aattanawunne eta loytta maaddanawu neeyyo danddayettida ubbabaa haˈˈi oottana danddayaasa. Neeni etaara wodiyaa loytta aattanawu hanotaa giigissiyoogee koshshana danddayees. Woy qassi eti koshshiyaabaa shammanaadan woy Yihoowaara mata dabbo gididi deˈanaadaaninne ayyo ubbatoo haggaazanaadan maaddanawu neeni darobaa oottana danddayaasa. Woykko neeni eta loytta minttettana danddayaasa. Neeni yaatikko Wogaabaa 19:3n deˈiya azazuwaa azazettaasa.

13. (a) Wogaabaa 19:3n deˈiya hara zoree aybee? (b) Luqaasa 4:16-18n odettida Yesuusa leemisuwaa nuuni ha wodiyan waati kaallana danddayiyoo?

¹³ Geeshsha gidiyoogaabaa Wogaabaa 19:3y nuna harabaakka tamaarissees. Hegee Sambbataa bonchchiyoogaabaa yootees. Kiristtaaneti Higgiyaa azazettana koshshenna gishshawu, nuuni saaminttaa Sambbataa bonchchokko. Gidikkonne, Israaˈeelati Sambbataa bonchchido ogiyaappenne yaatiyoogan eti goˈettido ogiyaappe nuuni darobaa tamaarana danddayoos. Sambbatay oosuwaappe shemppiyo wodenne Xoossaayyo goynniyo wode. * Sambbata gallassan Yesuusi ba yelettido kataman deˈiya Ayhuda woosa keetti biidoynne Xoossaa Qaalaappe nabbabidoy hegaassa. (Kes. 31:12-15; Luqaasa 4:16-18 nabbaba.) Wogaabaa 19:3n deˈiya “ta Sambbatatakka bonchchite” yaagidi Xoossay yootido azazoy nu galla galla deˈuwan Xoossaayyo goynnanawu nuuni wodiyaa bazzanaadan nuna denttettana koshshees. He azazuwaa naaganawu issi issibaa giigissana koshshiyaabadan neeyyo siyettii? Yihoowayyo goynnanawu neeni ubbatoo wodiyaa bazzikko, Yihoowaara neeni dabbotido dabbotay minnana; hegee qassi geeshsha gidanawu keehi koshshiyaaba.

14. Wogaabaa shemppo 19n zaari zaaridi odettida tumay aybee?

¹⁴ Geeshsha gididi nuuni deˈanaadan maaddana danddayiya tuma gidida issibay Wogaabaa shemppo 19n zaari zaaridi odettiis. Paydo 4y wurssettan hagaadan gees: “Taani, GODAI, intte Xoossaa.” Hagaa mala qofay ha shemppuwan 16 sohuwan deˈees. Hagee nuna koyro azazuwaa hassayissees. “GODAI ne Xoossai tanattennee. Taappe attin, hara xoossassi goinnoppa.” (Kes. 20:2, 3) Geeshsha gidanawu koyiya ubba Kiristtaaneti eti Xoossaara dabbotido dabbotaappe aybinne woy ooninne aadhdhennaagaa akeekana bessees. Nuuni Yihoowa Markkata gidiyo gishshawu, A geeshsha sunttaa moorana danddayiya aybanne oottennan agganawu murttana koshshees.—Wog. 19:12; Isi. 57:15.

15. Wogaabaa shemppo 19n deˈiya yarshshuwaabaa yootiya paydoti nuuni waatanaadan denttettana koshshii?

¹⁵ Israaˈeelati Yihoowa bantta Xoossadan  ekkidoogaa A higgeta azazettiyoogan bessidosona. Wogaabaa 18:4y hagaadan gees: “Intte ta azazuwaa oottite; ta wogaakka naagite; qassi an biite. Taani, GODAI, intte Xoossaa.” SHemppo 19y Israaˈeelatussi imettida ‘wogatuppe’ amaridaageetubaa yootees. Leemisuwawu, paydo 5-8, 21, 22y mehiyaa yarshshuwaabaa yootees. Israaˈeelati he yarshshota ‘Yihoowassi geeshsha gididabaa tunissenna’ ogiyan yarshshana koshshees. He xiqiseta nabbabiyoogee nuuni Yihoowa ufayssanawu koyanaadaaninne Ibraawe 13:15y nuuni oottanaadan yootiyoogaadan, A ufayssiya sabaa yarshshuwaa nuuni yarshshanaadan nuna denttettana koshshees.

16. Xoossaayyo haggaaziyaageetu giddooninne haggaazennaageetu giddon deˈiya dummatettaa Wogaabaa 19n deˈiya maaray nuna A hassayissii?

¹⁶ Nuuni geeshsha gidanawu haratuppe dummatanawu eeno gaana bessees. Hegee metiyaaba gidana danddayees. Nunaara tamaariyaageeti, oottiyaageeti, ammanenna nu dabbotinne harati Yihooway koyiyo ogiyan ayyo goynnennaadan diggiyaabaa oottanaadan issi issitoo nuna denttettana danddayoosona. Eti hegaadan oottiyo wode, nuuni keehi koshshiyaabaa kuuyana bessees. Likkebaa kuuyanaadan nuna aybi maaddana danddayii? Wogaabaa 19:19n deˈiya ufayssiya maaray hagaadan giyoogaa akeeka: “Naa77u qommobaappe dadettida maayo maayoppa.” He higgee Israaˈeelati bantta yuushuwan deˈiya deretuppe dummatanaadan maaddiis. Nuuni Muuse Higgiyaa kaallenna gishshawu, puuttuwaa, carqqiyaa woy suufiyaanne qacina malabaappe walakkidi giigissido maayuwaa issi Kiristtaanee maayiyoogee bala gidenna. SHin eti nunaara tamaariyaageeta nunaara oottiyaageeta woy nu dabbota gidikkonne, eti ammaniyoobaynne oottiyoobay Geeshsha Maxaafay tamaarissiyoobaara maayettennaba gidikko, nuuni he asata milatanawu koyokko. Nuuni nu dabbotanne hara asaa siiqoos. SHin, nuuni nu deˈuwan kuuyiyoobay nu heeran deˈiya asaappe nuuni dummatanaadan oottiyaaba gidikkonne, hegee nuuni Yihoowawu azazettiyoogaa bessees. Nuuni geeshsha gidanawu koyikko, Xoossawu dummatana bessiyo gishshawu hegee keehi koshshiyaaba.—2 Qor. 6:14-16; 1 PHe. 4:3, 4.

17-18. Wogaabaa 19:23-25n deˈiya qofaappe nuuni tamaarana danddayiyo keehi koshshiyaabay aybee?

¹⁷ “Taani GODAI intte Xoossaa” giya qofay Israaˈeelati Yihoowaara dabbotido dabbotaa eti bantta deˈuwan aybippenne kaseyana koshshiyoogaa eta hassayissiis. Eti hegaa waati oottana danddayiyoonaa? Wogaabaa 19:23-25y hegaadan oottiyo issi ogiyaa bessees. (Nabbaba.) Israaˈeelati Hidootaa Biittaa geli simmin ha qaalati eta waati maaddanaakko qoppa. Ayfiyaa miyo mittaa issi uri tokkikko, heezzu layttay  wuranaashin he mittaa ayfiyaa meenna. Oyddantta laytti he mittaa ayfee geeshsha sohuwan Xoossaassi yarshshanawu dummatees. He mittaa goday A ayfiyaa maana danddayiyo ichchashantta laytta xallaana. Ha higgee Israaˈeelati banttassi koshshiyaabaa kaseyana bessennaagaa akeekanaadan maaddiis. Yihooway etassi koshshiyaabaa kunttanaagaa eti ammanettanaadaaninne bantta deˈuwan eti A goynuwaa kaseyanaadan I koyees. Etassi maanawu gidiyaabay deˈanaadan I oottana. Qassi Xoossay eti ayyo goynniyo sohuwan kehatettan immanaadan eta minttettees.

¹⁸ Wogaabaa shemppo 19:23-25n deˈiya higgee Yesuusi Maatiyoosa shemppo 5-7 tamaarissidobaa nuna hassayissees. I hagaadan giis: “Intte paxa de7anau maanabaassinne uyanabaassi, woi intte bollau maayanabaassi hirggoppite.” Yesuusi gujjidi hagaadan giis: “He ubbai inttena koshshiyoogaa saluwan de7iya intte Aawai erees.” Xoossay kafotussi koshshiyaabaa kunttiyoogaadan, nuuyyookka koshshiyaabaa kunttana. (Maa. 6:25, 26, 32) Nuuni Yihooway nuussi koshshiyaabaa kunttanaagaa ammanettoos. Metootidaageeta maaddanawu nuuni ‘immiyoobaa’ geeman immoos. Gubaaˈiyaa miishshan maaddanawu nu danddayiyoobaa immiyoogankka ufayttoos. Yihooway nuuni A goynuwaa kaafanawu kehatettan immiyo wode beˈees; qassi I nuuyyo kushiyaa zaarana. (Maa. 6:2-4) Nuuni kehatettan immikko, Wogaabaa 19:23-25n deˈiya qofaa akeekidoogaa bessoos.

19. Wogaaban nuuni xannaˈido amaridabaappe ne waana goˈettadii?

¹⁹ Nuuni Wogaabaa shemppo 19ppe amarida paydo xallaa pilggida, qassi geeshsha gidida nu Xoossaa nuuni waani milatana danddayiyaakko akeekanaadan he paydoti nuna maaddidosona. Nuuni A milatiyo wode ‘nu ooso ubban geeshsha gidanawu’ baaxetiyoogaa bessoos. (1 PHe. 1:15) Yihoowayyo goynnenna daroti he loˈˈo oosuwaa akeekoosona. Hegee amaridaageeti Yihoowa galatanaadan denttettiis. (1 PHe. 2:12) SHin, Wogaabaa shemppo 19ppe nuuni tamaarana danddayiyo hara darobay deˈees. Kaalliya huuphe yohuwan ha shemppuwan hara paydota beˈana; PHeexiroosi yootidoogaadan, nuuni ‘geeshsha gidana’ danddayiyo hara ogeta akeekanaadan hegee nuna maaddana.