Eray?
Wolwoluwaa medhdhanawu asay beni wode ceeccaa goˈettii?
Ceeccaa
CEECCAY beni wode Gibxxen xuufiyaa xaafanawu goˈettiyo hiraysoba gidiyoogan erettees. Giriiketuugaadan Roomatikka ceeccaa bolli xaafoosona. * Ceeccay xaafanawu goˈettiyoogan eretteesippe attin, wolwoluwaa medhdhanawu goˈettiyoogan darin erettenna.
Ceeccaappe medhdhido naaˈˈu wolwoloti Gibxxe biittaa bitaniyaa duufuwan beettidosona
“Toophphiyaa shaafatuppe hefintta baggaara de7iya” asati ‘kiitettiyaageeta shombboquwaa woy ceeccaa wolwoluwan wottidi’ kiittanaagaa hananabaa yootiya Isiyaasi 2,500ppe dariya layttappe kase yootiis. Guyyeppe, Meedoonatinne Parsseti Baabiloona katamaa woraajjido wode, Baabilooneti baqatennaadan digganawu eti “ceeccaappe medhdhido wolwolota” xuugganaagaa hananabaa yootiya Ermmaasi yootiis.—Isi. 18:1, 2; Erm. 51:32, NW.
Geeshsha Maxaafay Xoossaa ayyaanay kaalettin xaafettido gishshawu, beni wode asay wolwoluwaa medhdhanawu ceeccaa goˈettiyoogaa biittaa bookkidi xannaˈiyaageeti demmanaagee Geeshsha Maxaafaa tamaareta garamissenna. (2 Xim. 3:16) Eti demmidobay aybee? Gibxxeti ceeccaappe wolwoluwaa medhdhiyoogaa qonccissiya darobaa biittaa bookkidi xannaˈiyaageeti demmidosona.
ASAY CEECCAAPPE WOLWOLUWAA WAATI MEDHDHII?
Gibxxetu duufuwaa bolli deˈiya misiletinne woocidi giigissiyoobati asay ceeccaa waatidi buucciyaakkonne wolwoluwaa waatidi medhdhiyaakko bessoosona. Attumaageeti ceeccaa gomˈˈiya buuccidi issippe gattidi qachchoosona, yaatidi he qashota qassi issippe gatti qachchoosona. Ceeccaa gomˈˈiyawu heezzu zooze deˈees. Yaatiyo gishshawu gomˈˈeta issippe gattidi mintti qachchiyo wode, qashoy keehi minnees. Ceeccaappe medhdhiyo wolwoloti 17 meetire adussa gidana danddayiyoogaanne hegaa shaariyo mittay 10 woy 12 gidana danddayiyoogaa Gibxxe biittaa taarikiyaabaa yootiya maxaafay qonccissees.
Ceeccaappe wolwoluwaa waati medhdhiyaakko Gibxxe biittaa asay woocidi giigissidobay bessees
WOLWOLUWAA MEDHDHIYAAGEETI CEECCAA GOˈETTIYOY AYBISSEE?
Gibxxen, Nayle shaafay goggiyo heeran daro ceeccay mokkees. Harabay qassi ceeccaappe wolwoluwaa medhdhiyoogee wayssenna. Asay wolwoluwaa medhdhanawu mittaa goˈettiyoogaa doommikkonne, moliyaa oyqqiyaageetinne shankkanchchati guutta wolwolotanne haattaa pinnanawu maaddiyaabata ceeccaappe medhdhiyoogaa aggibeennaba milatoosona.
Keehi daro wodiyawu, ceeccaappe medhdhiyo wolwolota asay goˈettiiddi takkiis. Kiitettidaageetu wode deˈida, Pilutark giyo Giriike biittaa xaafee amarida asay he wodekka ceeccaappe medhdhido wolwoluwaa goˈettiyoogaa yootiis.
^ MENT. 3 Ceeccay caretuuninne loddan goggiya shaafatun mokkees. Ceeccay 5 meetire gidiyaagaa aduqqeesinne garssa baggan 15 santtimeetire gidiyaagaa orddana danddayees.
