XANNAꞌIYO HUUPHE YOHUWA 6
MAZAMURE 18 Wozuwaa Gishshawu Galatiyoogaa
Yihooway Nuussi Atto Giidoogaa Nuuni Keehi Nashshiyoy Aybissee?
“Xoossay saꞌan deꞌiya asaa keehi siiqido gishshawu, ba dumma Naꞌaa immiis.”—YOH. 3:16.
TAMAARANABAA
Yihooway nuussi atto giidoogaa nuuni wozanappe nashshanawu koyoos. Nuuni yaatanawu, Yihooway nu nagaraa atto gaanawu ay oottidaakko tamaarana.
1-2. Asaa hanotay mentto 1n odettida yelagaa hanotaa mala gidiyoy ayba ogiyanee?
DURE keettan diccida issi yelagaa qoppa. Issi gallassi keehi iitabay haniis; A yelidaageeti daafaban hayqqidosona. Hegan I keehi azzaniis. Shin he yelagaa azzanttiya harabaykka deꞌees. A yelidaageeti daro miishshaa wurssidi A keehi daro acuwan yeggidoogaa I akeekiis. I eta duretettaa gidennan, acuwa laattidoogaanne talꞌꞌidaageeti miishshaa I zaaranaadan oychchiyogaa qoppa. I he acuwa qanxxi wurssana danddayenna.
2 Nu hanotay amarida ogiyan he yelagaa hanotaara issi mala. Nu koyro aawaynne aayyiya, Addaamenne Hewana wottiyobi baynnaageeta gididi loꞌꞌiya gannatiyan deꞌidosona. (Doo. 1:27; 2:7-9) Eti ufayttiiddi merinawu deꞌana danddayoosona. Shin ubbabay laamettiis. Gannatiyan merinawu deꞌiyo hidootay etappe haliis. Eta naati etappe laattidobay aybee? Geeshsha Maxaafay hagaadan gees: “Issi asa [Addaame] gaasuwan nagaray saꞌaa yiidoogaadaaninne nagaraa gaasuwan hayqoy yiidoogaadan, asay ubbay nagaraa oottido gishshawu hayqoy eta ubbaa gakkiis.” (Roo. 5:12) Addaamee hayquwa kaalettiya nagaraa nuna laatissiis. Nuuni laattido nagaray nuuppe ooninne muleera qanxxana danddayenna keehi daro aco mala.—Maz. 49:8.
3. Nu nagaray acuwan leemisettana danddayiyoy aybissee?
3 Yesuusi nagaraa ‘acuwan’ leemisiis. (Mat. 6:12, tohossa qofaa; Luq. 11:4) Nuuni nagaraa oottiyo wode Yihoowawu acotoos giyogaa mala. Nuuni oottido nagarawu acuwa qanxxana koshshees. He acoy qanxxettennaakko, hegee attiyoy nuuni hayqqiyo wode xallaana.—Roo. 6:7, 23.
4. (a) Maaddiyabi baynnaakko nagaranchchati ubbay waananee? (Mazamure 49:7-9) (b) Geeshsha Maxaafan “nagaraa” giya qaalay ay qonccissii? (“ Nagaraa” giya saaxiniya xeella.)
4 Addaameppenne Hewanippe halida ubbabaa nuuni demmana danddayiyoo? Nu wolqqan demmana danddayokko. (Mazamure 49:7-9 nabbaba.) Maaddiyabi baynnan merinaa deꞌuwa demmiyo woy hayquwappe denddiyo hidooti nuussi baawa. Qassi nu hayqqoy mehiya doꞌaagaa mala gidana.—Era. 3:19; 2 PHe. 2:12.
5. Nu siiqo Aaway nuuni laattido nagaraa acuwa qanxxiyogan nuna waati maaddidee? (Misiliya xeella.)
5 Ha huuphe yohuwa doomettan odettida yelagaabaa qoppa. Issi dure bitanee A aco ubbaa qanxxanawu gidiya miishshaa immiyakko awu aybi siyettanee? He yelagay keehi nashshanaageenne kehatettan immido he imotaa ekkanaagee qoncce. Hegaadankka, nu siiqo Aaway Yihooway nuuni Addaameppe laattido nagaraa acuwa qanxxanawu nuussi imotaa immiis. Hegaa Yesuusi hagaadan qonccissiis: “Xoossay saꞌan deꞌiya asaa keehi siiqido gishshawu, ba dumma Naꞌaa immiis; A Naꞌaa ammaniya ubbay merinaa deꞌuwa demmanaappe attin, xayenna mala I hegaadan oottiis.” (Yoh. 3:16) Ha imotay nuuni Yihoowara loytti dabbotanaadankka oottiis.
Wozuwa yarshshuwa baggaara qonccida Yihoowa maarotaabaa yootiya mishiraachchuwa Yesuusi sabbakiis. (Yoh. 3:16) Yaatidi, I wozoy qanxxettanaadan ba deꞌuwa ba dosan aatti immiis (Mentto 5 xeella)
6. Nuuni ha huuphe yohuwan ay beꞌanee, qassi aybissi?
6 Nu nagaray atto geetettanaadan oottiya ha maalaalissiya imotaappe nuuni waani goꞌettana danddayiyoo? He oyshaa zaaranawu Geeshsha Maxaafan odettida, dumma dumma qaalatanne eta birshshettaa beꞌana. Yihooway nuussi atto gaanawu oottidobaa nuuni wotti dentti qoppiyo wode, A wozanappe nashshoos.
YIHOOWAY NUUNI AARA SIGETTANAADAN KOYEES
7. (a) Addaameppenne Hewanippe halida harabay aybee? (b) Nuuni Addaamenne Hewani naata gidiyo gishshawu waanana koshshii? (Roome 5:10, 11)
7 Addaameppenne Hewanippe merinawu deꞌiyo hidootay haliyogaa xalla gidennan, eti bantta Aawaa Yihoowara dabbotido dabbotaykka moorettiis. Addaamenne Hewana nagaraa oottanaappe kase Xoossaa so asa. (Luq. 3:38) Shin eti Yihoowawu azazettennan aggido wode, naata yelanaappe kasetidi Yihoowa so asaappe yedetettidosona. (Doo. 3:23, 24; 4:1) Nuuni eta naata gidiyo gishshawu Yihoowara sigettana koshshees. (Roome 5:10, 11 nabbaba.) Hegaa giyogee nuuni aara dabbotana koshshees giyogaa. Issi xuufee yootiyogaadan, “sigettite” giyagawu ha sohuwan goꞌettido Giriiketto qaalay “morkke gidiyogaa aggidi laggetiyogaa” qonccissana danddayees. Kasetidi hegaadan oottiday Yihoowa gidiyogee malaalissiyaba. Waanidi?
XOOSSAY NUUNI AARA DABBOTIYO OGIYA GIIGISSIIS
8. Yihooway giigissidobay aybee?
8 Yihooway nagaranchcha asay banaara dabbotanaadan ogiya giigissiis. Addaameppe halidabaara bixe gidiyabaa zaarettidi nu demmanaadan I ogiya giigissiis. Giriikettuwan xaafettida Geeshsha Maxaafaykka Yihooway asaara dabbotanawu ogiya giigissidoogaa yootees.—Roo. 3:25.
9. Yihooway Israaꞌeelatu nagaraa atto gaanawu amarida wodiyawu giigissidobay aybee?
9 Yihooway Israaꞌeelatu nagaraa atto gaanawunne etaara dabbotanawu hanotaa giigissiis. Israaꞌeelati nagaraa Atto Giissiyo Gallassaa layttan layttan bonchchoosona. He gallassan gita kahinee asaa nagaraa gishshawu mehiya yarshshees. Mehee asappe laafa gidiyo gishshawu, mehiya yarshshoy asa nagaraa muleera atto giissana danddayibeennaagee qoncce. Shin bantta nagaran zilꞌꞌetti laamettida Israaꞌeelati Yihooway koyiyogaadan mehiya yarshshuwa yarshshido wode ubban I eta nagaraa atto giis. (Ibr. 10:1-4) Nagaraa Atto Giissiyo Gallassaaninne hara wodetun Israaꞌeelati yarshshiyo yarshshoy eti nagaranchcha gidiyogaanne eta nagaraa muleera atto gaanawu hegaappe aarobay koshshiyogaa eti akeekanaadan maaddiis.
10. Yihooway asaa nagaraa atto gaanawu ay oottidee?
10 Yihooway asaa nagaraa atto gaanawu ay oottidee? I ba dumma Naꞌay “daro asaa nagaraa xaissanau issitoo” yarshshettanaadan oottiis. (Ibr. 9:28) Yesuusi “darota wozanawu qanxxiyoba oottidi ba shemppuwa” immiis. (Mat. 20:28) Wozoy aybee?
NUUNI XOOSSAARA DABBOTANAADAN QANXXETTIDA WAAGAA
11. (a) Geeshsha Maxaafay yootiyogaadan wozoy aybee? (b) Wozuwa qanxxana danddayiyay oonee?
11 Geeshsha Maxaafay yootiyogaadan, Yihooway nu nagaray atto geetettin nuuni aara dabbotana mala wozuwa waagay qanxxettanaadan kuuyiis. Addaameppe halidabaa asay demmanaadan qanxxettana koshshiya wozuwa waagay aybee? Wottiyobi baynna deꞌoynne merinaa deꞌuwa hidootay Addaameppenne Hewanippe halidoogaa hassaya. Yaatiyo gishshawu, wozuwa waagay halidabaara bixe gidana koshshees. (1 Xim. 2:6) Hegaa qanxxana danddayiyay (1) wottiyobi baynna, (2) saꞌan merinawu deꞌana danddayiyanne (3) ba deꞌuwa nuussi immanawu woy yarshshanawu koyiya gastta ura xalaala. He ura deꞌoy halidabawu qanxxettana danddayees.
12. Yesuusi wozuwa waagaa qanxxana danddayiyoy aybissee?
12 Yesuusi wozuwa waagaa qanxxana danddayiyo heezzu gaasota ane beꞌoos. (1) I wottiyobi baynnaagaa, qassi “nagara . . . oottibeenna.” (1 PHe. 2:22) (2) I saꞌan merinawu deꞌana danddayiyo gishshataassa. (3) I nu gishshawu hayqqanawunne ba deꞌuwa nuussi aatti immanawu eeno giis. (Ibr. 10:9, 10) Koyro bitanee Addaamee nagaraa oottanaappe kase wottiyobi baynna asa gidiyogaadan Yesuusikka wottiyobi baynna asa. (1 Qor. 15:45) Yesuusi nuuyyo hayqqido gishshawu, Addaameppe halidabaa zaarettidi demmanawu koshshiya waagaa qanxxiis. (Roo. 5:19) Yaatiyo gishshawu, Yesuusi ‘wurssetta Addaama’ geetettiis. Addaameppe halidabaa zaaretti demmanawu, wottiyobi baynna hara uri qanxxiyobay hegaappe simmin koshshenna. Yesuusi “naa77anttennan issitoo” hayqqiis.—Ibr. 7:27; 10:12.
13. Nuuni Yihoowara dabbotanaadan oottiyabay aybee?
13 Nuuni Yihoowara dabbotanaadan oottiyabay aybee? Yihooway nu nagaray atto geetettanaadan ogiya giigissiis. Yesuusi nu nagaraa waagaa qanxxanawu wottiyobi baynna ba deꞌuwa yarshshiis.—Efi. 1:7; Ibr. 9:14.
YIHOOWAY NAGARAANNE HAYQUWA AYLLETETTAAPPE NUNA KESSIDI XILLODAN QOODIIS
14. Nuuni haꞌꞌi ay beꞌanee, qassi aybissi?
14 Yihooway nuussi oottidobaappe nuuni waani goꞌettiyoo? He oyshaa zaaranawu, Yihooway nuussi atto giidoogan nuuni waani goꞌettiyakko akeekana mala Geeshsha Maxaafan odettida naaꞌꞌu qaalatu birshshettaa beꞌana.
15-16. (a) Geeshsha Maxaafay yootiyogaadan, ‘wozettiyogaa’ giyogee woygiyogee? (b) Nagaraappenne hayquwappe laꞌa kiyiyogee nuuni waananaadan oottii?
15 Wozoy qanxxettido gishshawu nuuni nagaraappe laꞌa kiyidoogaa Geeshsha Maxaafay yootees. Hegaa kiitettida Pheexiroosi hagaadan qonccissiis: “Intte intte aawatuppe laattido pattenna de7uwaappe wozettidoogee, [laꞌa kiyidoogee] xayiya bira woi worqqa malaana gidennaagaa ereeta; borssoi woi qiti bainna dorssa suuttadan, al77o Kiristtoosa suuttan intte wozettideta.”—1 PHe. 1:18, 19.
16 Wozuwa yarshshuwappe denddidaagan, nuuni keehi tuggatanaadan oottiya nagaraappenne hayquwappe laꞌa kiyana danddayoos. (Roo. 5:21) Nuuni Yesuusa alꞌꞌo suuttan wozettido gishshawu, Yihoowanne Yesuusa wozanappe galatoos.—1 Qor. 15:22.
17-18. (a) Xillo geetettiyogaa giyogee woygiyogee? (b) Yihooway nuna xillo giidoogan waani goꞌettiyoo?
17 Yihoowa ashkkarati xillo geetettidoogaa Geeshsha Maxaafay yootees. Hegaa giyogee nu oottido nagaraa gishshawu acuwa qanxxanaadan I koyenna giyogaa. Yihooway hegaadan oottikkokka, suure pirddawu kessido ba maarata naagees. Nuuni xillo geetettidoy hegee nuussi bessiyo gishshawu gidenna. Qassi Yihooway nagaran ufayttenna. Shin Yihoowaynne Yesuusi wozuwa giigissanawu oottidoban nuuni ammaniyo gishshawu I nu nagaraa atto gaanawu koyees.—Roo. 3:24; Gal. 2:16.
18 Yihooway nuna xillo giidoogan waani goꞌettiyoo? Yesuusaara saluwan haaranawu doorettidaageeti Xoossaa naata gidiyogan xillo geetettidosona. (Tii. 3:6-7; 1 Yoh. 3:1) I eta nagaraa atto gees. Hegaa giyogee eti nagara mule oottibookkona giyogaa mala gidiyo gishshawu, Xoossaa Kawotettaa laattana danddayoosona. (Roo. 8:1, 2, 30) Xillo geetettida harati saꞌan merinawu deꞌana. Yihooway eta nagaraa atto giido gishshawu eti A dabbo gididosona. (Yaaq. 2:21-23) Armmageedoona olaappe attiya zawi baynna asay mule hayqqennan deꞌana. (Yoh. 11:26) ‘Xillotinne xillo gidennaageeti’ hayquwappe denddana. (Oos. 24:15; Yoh. 5:28, 29) Wurssettan, Yihoowawu azazettiya saꞌan deꞌiya A ashkkarati ubbay “Xoossaa naatu gita laꞌatettaa demmana.” (Roo. 8:21) Nuuni nu Aawaa Yihoowara hegaadan dabbotiyo wodiya yeemuwan naagoos!
19. Yihoowaynne Yesuusi nuussi oottidoban nu hanotay waani giigidee? (“ Yihoowa Maarotaa” giya saaxiniyakka xeella.)
19 Nuussi hidooti baynnaakko, nu hanotay ubbabaa xayidanne qanxxi wurssana danddayenna acuwa laattida qommoora abay odettido yelagaa hanotaa mala gidiyogee tuma. Shin Yihooway nuna maaddiis. Yihooway nu nagaray atto geetettanaadan ogiya giigissidonne Yesuusi wozuwa qanxxido gishshawu, nu hanotay laamettiis. Nuuni Yesuus Kiristtoosan ammanido gishshawu, nagaraappenne hayquwappe wozettida, woy laꞌa kiyida. Yihooway nu nagaraa atto giyo wode nuuni nagaraa mule oottibeennabadan qoppees. Shin ubbaappe aaruwan saluwan deꞌiya siiqiya nu Aawaa Yihoowara haꞌꞌi loytti dabbotana danddayoos.
20. Nuuni kaalliya huuphe yohuwan ay beꞌanee?
20 Nuuni Yihoowaynne Yesuusi nuussi oottidobaa wotti dentti qoppiyo wode wozanappe eta nashshoos. (2 Qor. 5:15) Eti nuna maaddennaakko hidooti nuussi mule baawa! Wozoy nuna waati goꞌꞌiyakko qonccissiya leemisota kaalliya huuphe yohuwan beꞌana.
MAZAMURE 10 Nu Xoossaa, Yihoowa Sabbite!
