Taani Yihoowa siiqiyo siiqoy panttatettaa layttan irxxidoogee azzanttiyaaba. Tanaara tamaariyaageeti zawi baynna laˈatettan deˈiyaaba milatiyo gishshawu, tawukka hegaa mala laˈatettay deˈanaadan koyaas. Tana yelidaageetu higgiyaanne Kiristtaaneti kaalliyo maaraa toohodan xeellaas, qassi Yihoowawu goynniyoogee tawu wolqqaa wurssiya ooso milatiis. Yihooway deˈiyoogaa taani sirennaba gidikkonne, aara dabbotidabadan tawu siyettenna.

Taani sabbakiyoogaa aggana xayikkonne, guuttaa guuttaa sabbakays. Taani haggaazuwaa kiyiyo wode mule giigettenna gishshawu, asaa haasayissiyoogaa doommanawunne haasayissaydda takkanawu daro metootays. Yaatiyo gishshawu, haggaazuwan ayfe demmabeykke, qassi ufayttikke; hegee qassi ta qofaa mooriis. Hagaadan gaada tana oychchaas: ‘Issi uri saaminttan saaminttaaninne aginan aginan waanidi hagaa oottana danddayii?’

Tawu 17 laytta gidin, laˈa kiyanawu keehi koyaas. Yaatiyo gishshawu, tawu deˈiyaabaa borssan yeggada, sooppe kiyada Awusttiraaliyaa  baas. Taani etappe shaahettada biyoogee ta aawaanne aayyiyo keehi azzanttiis. Eti hirggikkonne, ayyaanaaban ba meeziyaa aggukku giidi qoppidosona.

Awusttiraaliyan ayyaanaaban yaa shuggaas. SHiiquwaa issi issitoo shiiqays. Issi omarssi shiiqidi, kaalliyaagan taagaadan durssawunne ushshawu durssa keetti biya yelagatuura zuppetaas. He wodiyaa qoppiyo wode, taani tumankka alamiyankka deˈidoogaa akeekays, shin naaˈˈankka ufayttabeykke.

Naaˈˈa gidiya layttappe guyyiyan issi michcheera gayttaas; taani waanaydda deˈiyaakko qoppanaadan A erennan maaddaasu. He wode taani azina gelibeenna ichchashu michchonttuura issi keettan deˈays, qassi nuuni woradaa xomoosiya ishaanne A machchiyo, Tamaaro issi saaminttawu nu son imattatettan mokkida. Tamaara I azinay gubaaˈiyaa allaalliyaa xeelliyo wode, nunaara haasayayddanne miiccaydda takkawusu. Taani hegaa keehi dosaas. A oonanne pashkki gaada haasayissiya ashkke asa. Ayyaanaaban I mala mino asi kaassaa eriya asa gidiyoogee tana maalaaliis.

Tamaara keehi yeemottada haggaazawusu. A tumaanne haggaazuwaa siiqiyo siiqoy haratakka denttettees. A ba kumetta wolqqan ufayttaydda Yihoowawu oottawusu; shin taani Yihoowawu guuttabaa oottiyo gishshawu ufayttikke. I loˈˈo qofaynne tumu ufayssay tana keehi maaddiis. A loˈˈo leemiso gididoogee Geeshsha Maxaafay yootiyo ha tumaa ta qoppanaadan oottiis: Yihooway nuuni ubbay “ufaissan,” qassi ‘ufayttidi yexxiiddi’ ayyo haggaazanaadan koyees.—Maz. 100:2.

Taani Tamaaridan ufayttanawu koyikkonne, issi issiban keehi laamettana koshshiis. Heezzu laytta gidiya wodiyaa takkikkonne, guyyeppe amaridabaa oottaas. Haggaazuwawu giigettiyoogaa doommaas, qassi issi issitoo kaafiya aqinye gidaas. Taani yayyiyoogaa agganaadan hegee maaddiis. Haggaazuwan Geeshsha Maxaafaa loytta goˈettiyo wode, wozanappe ufayttaas. Daro  takkennan, aginan aginan kaafiya aqinye gidada haggaazaas.

Tuman minni eqqidanne Yihoowawu haggaaziyoogan ufayttiya yelagatuuranne cimatuura laggetiyoogaa doommaas. Taani nashshiyoobaa zaarettada yigga xeellanaadaaninne ayyaanaaban loˈˈobaa meeze oottanaadan eti loˈˈo leemiso gididoogee tana maaddiis. Haggaazuwan keehi ufayttiyoogaa doommaas, yaatada guyyeppe ubba wode aqinye gidaas. Daro layttappe guyyiyan keehi ufayttaasinne gubaaˈiyan woppaa demmaas.

Yihoowa siiqiyaanne haggaazuwaa dosiya kehanne suure asa gidida Alekisaara issi layttappe guyyiyan taani erettaas. He wode I gubaaˈiyawu oottiyaagaa, qassi usuppun layttawu aqinye gididi haggaaziis. Alekisi aassiyaageeti keehi koshshiyoosaa Maalaawe biidikka amarida wodiyawu haggaaziis. Yan I misoonaawetuura takkiis; eti ayyo loˈˈo leemiso gididosona, qassi Kawotettabaa oottiyoogaa awudenne sinttayanaadan A minttettidosona.

Taani 2003n Alekisa gelaas; qassi he wodeppe doommidi nuuni issippe ubba wode haggaazuwan takkida. Nuuni daro loˈˈobaa tamaarida, qassi Yihooway nuna keehi daro ogetun anjjiis.

Nuuni Indoneezhiyaa haruurotuppe issuwaa gidida Timor-Lestte giyo biittan misoonaawe gididi haggaazanaadan 2009n shoobettida. He wode nuuni keehi garamettida, ufayttidanne yayyida. Usuppun aginappe guyyiyan, waanna katamaa Dili biida.

He ooratta sohuwan nu deˈoy kaseegaappe keehi laamettiis. Nuuni ooratta wogaa, doonaa, qumaanne duussaa maaraa meezetana koshshiis. Hiyyeesa, guuttaa tamaarida woy mule tamaaribeennanne huqqunettida asaa gakkiyaabaa haggaazuwan darotoo beˈoos. Qassi olaynne kobabay  qofaaninne asatettan qohido daro asaa beˈoos. *

Haggaazoy keehi ufayssees! Leemisuwawu, layttay 13 gidido Mariyo * giyo azzanida naˈeera taani issi wode gayttaas. I aayyiyaa amarida layttappe kase hayqqaasu, qassi A ba aawaara issi issitoo gayttawusu. Mariya ba keena naatu darotuugaadan deˈuwan kaaleto demmabeykku. A bawu siyettiyaabaa yeekkaydda tawu issi wode yootidoogaa hassayays. SHin he wode taani I doonaa loytta haasayenna gishshawu, A woygiyaakko erabeykke. O minttettanawu Yihooway tana maaddanaadan woossaas, yaatada minttettiya xiqiseta iyyo nabbabaas. Hegaappe simmin, Maree qofay, A maayiyo maayoynne alleeqettiyo hanotay, qassi I deˈoy amarida layttaa giddon laamettishin beˈaas. A xammaqettada haˈˈi harata Geeshsha Maxaafaa xannaˈissawusu. Ha wodiyan Mariya bana siiqiya, ayyaanaaban gita keettaa asaa giddon deˈiyoogaa akeekawusu.

Yihooway Timor-Lestten oosuwaa anjjiiddi deˈees. Aassiyaageetuppe daroti xammaqettidoy aadhdhida tammu layttatu giddoona gidikkonne, daroti aqinye, gubaaˈiyawu oottiyaageeta woy cimata gididi haggaazoosona. Harati xuufiyaa birshshiyo biiruwan ayyaanaabaa qumaa he biittaa doonan giigissiyo oosuwan maaddoosona. Eti shiiquwan mazamuriyaa yexxiyoogaa, noocu giyoogaanne ayyaanaaban dicciyoogaa beˈiyoogee tana keehi ufayssees.

Nuuni Timor-Lestten haggaaziyo wode deˈoy Awusttiraaliyaagaappe keehi dummatees, shin hagaappe aaruwan ufayssiya deˈo qoppana danddayikke. Cora asay, qassi heeraa giyaappe shamettida melida moleenne ataakilttee keehi caanettido minibaasiyan issi issitoo boos. Issi issi galla kuttoti woxerettishin, baanattiya wuygiyan uttidi hombbiya guutta keettan harata Geeshsha Maxaafaa xannaˈissoos. SHin hegaadan metishinkka, taani darotoo, ‘Hagee ufayssiyaaba!’ gaada qoppays.

Kasebaa qoppiyo wode, taayyo Yihoowaara dabbotay shuggidaashinkka, ta aawaynne aayyiyaa tana Yihoowa ogiyaa tamaarissido gishshawunne maaddido gishshawu keehi ufayttays. Leemiso 22:6y yootiyoobay ta deˈuwan polettiis. Ta aawaynne aayyiyaa tanaaninne Alekisan keehi ufayttidosona; nuuni Yihoowayyo oottiyoogaa beˈiyoogee eta keehi ufayssees. Nuuni 2016ppe doommidi Awusttiraaliyaa macara biiruwaa moottan woradaa oosuwaa oottiiddi deˈoos.

Sabbakiyo oosuwaa taani issi wode coo meezedan oottidoogee qoppanawu metiyaaba. Haˈˈi taani haggaazuwaa keehi dosays! Deˈuwan aybi gakkikkonne, tumu ufayssaa demissiyay Yihoowayyo wozanappe haggaaziyoogaa gidiyoogaa taani akeekaas. Alekisaara issippe Yihoowawu haggaazido aadhdhida 18 layttatuugaa keenaa ta deˈuwan ufaytta erikke. Daawiti Yihoowayyo yootidobay tuma gidiyoogaa haˈˈi akeekaas. I hagaadan giis: “Neekko baqati qosetti attiya ubbai ufaittona; eti ubbaton ufaissan yexxona. . . . Ne sunttaa siiqiya ubbati nenan keehi ufaittona.”—Maz. 5:11.