Ha maxeetiyan hanno gakkanawu Xoossay oonakko eranaadan maaddiyaabaa beꞌida. Koyruwan, A sunttay Yihoowa gidiyoogaanne A eeshshatuppe waannatiyay siiquwaa gidiyoogaa tamaarida. I asawu giidi oottidobaanne biron sinttappe oottanabaa beꞌida. Xoossaabaa erana danddayiyo darobay deꞌikkokka, abaa gujjidi eriyoogee waati maaddiyaakko qoppana danddayaasa.

“Neeni a koyikko, i neeyyo [beettanawu]” Yihooway qaalaa geliis. (1 Hanidabaa Odiya 28:9) Neeni Xoossaa koyiyo wodenne eriyo wode demmana gitabaa qoppa; neeni I ‘ba xuuraa shaakkiyo’ ura gidaasa. (Mazamure 25:14) Yihoowaara hegaadan dabbotiyoogee nena waati maaddii?

Tumu ufayssaa. Yihooway ‘ufayttiya Xoossa.’ (1 Ximootiyoosa 1:11, NW) Akko shiiqiyoogeenne A leemisuwaa kaalliyoogee neeni tumuppe ufayttanaadan oottees; hegee nena qofaaninne asatettan maaddana danddayees. (Mazamure 33:12) Qassi nena qohiyaabaappe haakkiyoogan, ubbatoo loꞌꞌobaa oottiyoogaaninne haratuura saruwan deꞌiyoogan neeni ufayssiya deꞌuwaakka deꞌana danddayaasa. “Taani Xoossaa matan de7iyoogee taayyo loꞌꞌo” giida mazamuraawiyaa qofaa neenikka maayana.—Mazamure 73:28.

Neessi qoppees. Yihooway ba ashkkarata, “Taani nena zorananne naagana” yaagiis. (Mazamure 32:8) Yihooway ba ashkkaratuyyo huuphiyan huuphiyan qoppeesinne koshshiyaabaa kunttees. (Mazamure 139:1, 2) Neeni Yihoowaara mata dabbotaa medhdhikko, I ubbatoo nena maaddanawu ne miyyiyan deꞌiyoogaa akeekaasa.

Maalaalissiya sinttanaa deꞌuwaa. Yihooway neeni ha wodiyan ufayssiyaanne woppissiya deꞌuwaa deꞌanaadan maaddiyoogaa xalla gidennan, sinttappekka maalaalissiyaabaa demmanaadan maaddana. (Isiyaasa 48:17, 18) Geeshsha Maxaafay, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagees. (Yohaannisa 17:3) Xoossay nuussi immiyo hidootay, markkabee qaaxxennaadan oyqqiya birataadan ha metiya wodiyan nuuni ammanettanaadaaninne ‘minnanaadan’ oottees.—Ibraawe 6:19.

Xoossaa loytti erananne aara mata dabbo gidana bessiyo daro gaasotuppe hageeti amaridaageeta. Hegaabaa gujjada eranawu Yihoowa Markkatuppe issuwaa haasayissanaadan woy jw.org saytiyaa xomoosanaadan minttettoos.