1-2. (a) Efisoona 6:16y yootiyoogaadan, ‘wogga gonddalliyaa mala gidida ammanoy’ nuuyyo koshshiyoy aybissee? (b) Nuuni pilggana oyshati awugeetee?

NEEYYO ‘wogga gonddalliyaa mala gidida ammanoy’ deˈii? (Efisoona 6:16 nabbaba.) Deˈiyoogee erettidaagaa. Bollaappe dariya baggaa naagiya gonddalliyaadan, ne ammanoy ha alamiyan deˈiya iitabaappe, hegeekka pokkobaappe, makkalabaappe, qassi Xoossay kessido maaraara maayettenna hara ubbabaappekka nena naagees.

² SHin, nuuni deˈiyo ha ‘wurssetta gallassatun’ nu ammanoy ubbatoo paacettana. (2 Xim. 3:1) Ne gonddalliyaa mala ammanoy mino gidiyoogaa eranawu waata qorana danddayay? Qassi ne ammanoy mino gididi deˈanaadan waatana danddayay? Ane ha oyshatu zaaruwaa pilggoos.

3. Wotaaddarati bantta gonddalliyaa waatiyoonaa, qassi aybissi?

³ Beni wode, wotaaddarati darotoo galbbaa mayzzido gonddalliyaa oyqqoosona. Galbbay moorettennaadaaninne biratay shiyennaadan wotaaddarati looxigissoosona. Issi wotaaddaray ba gonddallee moorettidoogaa akeekikko, I hara olawu ubbatoo giigetti uttanawu moorettida gonddalliyaa giigissees. Ha leemisoy ne ammanuwaara waani gayttii?

4. Neeni gonddalle mala gidida ne ammanuwaa qorana koshshiyoy aybissee, qassi waatada qorana bessii?

⁴ Beni wotaaddaratudan, neeni olawu ubbatoo giigettana mala gonddalle mala gidida ne ammanuwaa muletoo qorananne  giigissana bessees. Nuuni Kiristtaaneti iita ayyaanatuura olettoos. (Efi. 6:10-12) Gonddalle mala gidida ne ammanuwaa neessi hara asi giigissana danddayenna. Ne ammanoy neeni paacettiyo wodekka minokkonne waata erana danddayay? Koyruwan, Xoossay maaddanaadan woossana bessees. Yaata simmada, ne ammanoy Xoossaa sheniyaara maayiyaakkonne, Xoossaa Qaalan qorana koshshees. (Ibr. 4:12) Geeshsha Maxaafay hagaadan gees: “Ne polo wozanan GODAA ammanetta; ne akeekan zemppoppa.” (Lee. 3:5, 6) Ne deˈuwan mata wode hanidabaanne hegaa xeelliyaagan neeni oottidobaa qoppa. Leemisuwawu, miishshay nena keehi metidee? Neeni he metuwaa xoonanawu baaxetido wode Ibraawe 13:5n, “Taani nena mulekka yeggikke woikko aggikke” giidi Yihooway qaalaa gelidobaa qoppadii? Yihooway gelido qaalay I nena maaddanaagaa neeni ammanettanaadan oottidee? Yaatikko, hegee gonddalle mala gidida ne ammanoy loˈˈo hanotan deˈiyoogaa bessees.

5. Neeni ne ammanuwaa qoriyo wode ay akeekana danddayay?

⁵ Neeni ne ammanuwaa loytta qoriyo wode demmiyooban maalaalettana danddayaasa. Neeni erabeenna, ne shuggiyo ginaa akeekana danddayaasa. Leemisuwawu, hirggay, worddoy, qassi hidootaa qanxxiyoogee ne ammanuwaa shugissidoogaa neeni akeekana danddayaasa. Hegaa malabay nena gakkikko, ne ammanuwaa gujjidi qohennaadan waata naagana danddayay?

6. Hirggana koshshiyo issi issibati aybee?

⁶ Issi issibawu hirggiyoogee loˈˈo. Leemisuwawu, nuuni Yihoowanne Yesuusa ufayssanawu hirggiyoogee nuuyyo loˈˈo. (1 Qor. 7:32) Nuuni gita nagara oottikko, Xoossaara zaarettidi dabbotanawu keehi qoppoos. (Maz. 38:18) Nuuni nu aqo laggiyaa, nu soo asatanne nu mala Kiristtaaneta maaddanawukka qoppoos.—1 Qor. 7:33; 2 Qor. 11:28.

7. Leemiso 29:25y yootiyoogaadan, nuuni asa yayyana koshshennay aybissee?

⁷ Hara baggaara qassi, keehi hirggiyoogee nu ammanuwaa shugissana danddayees. Leemisuwawu, nuussi gidiya qumaynne maayoy deˈanaadan nuuni ubbatoo hirggana danddayoos. (Maa. 6:31, 32) Hegaa gishshawu, nuuni aqo demmanawu bichchaarana danddayoos. Miishshaa siiqiyoogaakka doommana danddayoos. Hegee hananaadan oottikko, nuuni Yihoowa ammaniyo ammanoy shuggana, qassi aara dabbotido dabbotay moorettana. (Mar. 4:19; 1 Xim. 6:10) Woy hara asay nubaa ay qoppiyaakko keehi hirggana danddayoos. Nuuni Yihoowa ufayssennabaa oottennaadan yayyiyoogaappe aaruwan asay nuna qilliiccennaadan woy yedettennaadan yayyana danddayoos. Hegaa mala qohuwaappe nuna naaganawu, nuuyyo ammanuwaanne asaa yayyennaadan nuussi koshshiya xalatettaa Yihooway immanaadan woossana koshshees.—Leemiso 29:25 nabbaba; Luq. 17:5.

8. Wordduwaa nuuni waatana bessii?

⁸ ‘Wordduwaa aawa’ gidida Seexaanay Yihoowabaa qassi nu ishanttubaanne michchenttubaa wordduwaa aassanawu ba haariyo asata goˈettees. (Yoh. 8:44) Leemisuwawu, kaddidaageeti websaytetun, televizhiiniyaaninne hara ogetun Yihoowa dirijjitiyaabaa worddobaanne tumaa geellayidi yootoosona. Hageeti Seexaanay ‘dafidi yeddiyo wonddafiyaa tamatuppe’ amaridaageeta. (Efi. 6:16) Hegaa mala wordduwaa issi uri nunaara haasayiyoogaa doommikko, nuuni waatana koshshii? Siyana koshshenna! Aybissi? Nuuni Yihoowa ammaniyoonne nu ishantta ammanettiyo gishshataassa. Nuuni kaddidaageetuura mule haasayokko. Nuuni eti yootiyoobaa coo eranawu  koyidi gidikkokka, etaara aybanne woy ayba gaasuwankka mule haasayokko.

9. Hidootaa qanxxiyoogee nuna waati qohana danddayii?

⁹ Hidootaa qanxxiyoogee nu ammanuwaa shugissana oottdanddayees. Nuna metiyaabay deˈiyo gishshawu issi issitoo hidootaa qanxxoos. He metota nuuni sheneho gaana bessennaagee qoncce. SHin nuuni ubba wode nu metuwaabaa qoppana koshshenna. Nuuni hegaa qoppikko, Yihooway nuussi qaalaa gelido loˈˈobaa ubbaa dogana danddayoos. (Ajj. 21:3, 4) Nuuni keehi hidootaa qanxxidi, shuggananne Yihoowawu haggaaziyoogaa aggana danddayoos. (Lee. 24:10) SHin hegee nuna gakkana bessenna.

10. Issi michchiyaa xaafido dabddaabbiyaappe neeni ay tamaaray?

¹⁰ Amarkkan deˈiya issi michiyaa keehi sahettiya ba azinawu koshshiyaabaa kunttaydda ba ammanuwaa waata naagada deˈidaakko beˈa. A waanna biiruwawu xaafido dabddaabbiyan hagaadan gaasu: “Issi issitoo nu hanotay nuuni unˈˈettanaadaaninne hidootaa qanxxanaadan oottees; shin nu hidootay mino. Nu ammanuwaa minttanawunne nuna minttettanawu Yihooway nuussi immiyo ubbabawu keehi galatays. Ha zoreenne minttettoy nuussi koshshees. Hegee nuuni aggennan Yihoowawu haggaazanaadaaninne nuna shugissanawu Seexaanay ehiyo metuwaa genccanaadan maaddees.” Ha michchiyaa yootidobaappe nuuni hidootaa qanxxissiyaabaa xoonana danddayiyoogaa tamaaroos! Waanidi? Nena gakkiya metoy Seexaanaappe yiyoogaa hassaya. Yihooway nena minttanaagaa ammanetta. Qassi I immiyo ayyaana qumaa nashsha.

11. Nu ammanoy minokkonne eranawu, nuuni ayba oyshata nuna oychchana koshshii?

¹¹ Neeni ne ammanoy mino gidana koshshiyoogaa akeekadii? Aadhdhida amarida aginatun, hirggiyoogaappe naagettana danddayadii? Kaddidaageeti aassiyo wordduwaa siyennaaninne etaara palamettennan ixxadii? Hidootaa qanxxanaadan oottiyaabaa genccadii? Yaatikko, ne ammanoy loˈˈo hanotan deˈees. Seexaanay nuna qohanawu maliyo hara olaa miishshati deˈiyo gishshawu nuuni beegottana koshshees. Ane hegeetuppe issuwaa beˈoos.

12. Nuuni miishshaa siiqikko, aybi hanana danddayii?

¹² Nuuni Miishshaa siiqikko, nu ammanoy shuggana, qassi Yihoowawu nuuni guuttabaa oottana. Kiitettida PHawuloosi hagaadan giis: “Olaa biya wotaaddarai ba halaqaa ufaissanau, wotaaddara gidenna asai oottiyo oosuwan walahettenna.” (2 Xim. 2:4) Rooma wotaaddarati hara oosuwaa oottokkona. Issi wotaaddaray ha azazuwaa kaallana xayikko, aybi hanana danddayii?

13. Issi wotaaddaray zalˈˈana bessennay aybissee?

¹³ Ane ha hanotaa qoppa. Amarida wotaaddarati olawu meezetiiddi deˈoosona, shin issi wotaaddaray etaara deˈenna. I giyan qumaa bayzziyo oosuwan sheekkiis. Omarssi, wotaaddarati bantta olaa miishshaa qoriyoogaaninne bantta bisuwaa qarayiyoogan wodiyaa aattoosona. SHin qumaa bayzziyaagee wonttetta gallassi bayzzana qumaa giigissiyoogan ba wodiyaa aattees. Gidoppe attin, wonttetta gallassi maallado, morkkee I qoppennan qohuwaa gattees. Wotaaddaratuppe olawu giigettanaagee awugee, qassi olaa gadaawaa ufayssanaagee oonee? Neeni olaa olettiyaakko, giigettida wotaaddaratu matan eqquuteeyye, woy qofay shaahettido wotaaddara matan eqquutee?

14. Nuussi Kiristtoosa wotaaddaratussi ubbabaappe aadhdhiyaabay aybee?

¹⁴ Nuuni he gooba wotaaddaratu mala. Nuussi ubbabaappe aadhdhiyaagee nu olaa gadaawata gidida Yihoowanne Kiristtoosa ufayssiyoogaa. Nuuni Seexaana alamiyan demmana danddayiyo aybippenne hegee keehi aadhdhees. Yihoowawu haggaazanawunne gonddalle mala gidida nu ammanuwaanne nu ayyaana ola miishshata harata loˈˈo hanotan naaganawu koshshiya wodeenne wolqqay nuussi deˈiyaakkonne, nuuni shaakki erana bessees.

15. PHawuloosi nuussi ay yootidee, qassi aybissi?

¹⁵ Nuuni ubbatoo beegottidaageeta gidana koshshees! Aybissi? Kiitettida PHawuloosi “duretanau koyiyaageeti . . . ammanuwaappe balettidi” kiyanaagaa yootiis. (1 Xim. 6:9, 10) “Balettidi” giya qofay koshshenna aquwaa demmanawu baaxetiyoogan qofay shaahettana danddayiyoogaa bessiyaaba. He wode nuuni “daro eeyyanne qohiya” amuwaa amottana  danddayoos. SHin, Seexaanay nu ammanuwaa shugissanawu he amota ola miishshadan goˈettiiddi deˈiyoogaa nuuni hassayana koshshees.

16. Marqqoosa 10:17-22n deˈiya qofay, ayba oyshata qoppanaadan nuna denttettana bessii?

¹⁶ Nuuyyo darobaa shammanawu gidiya miishshay deˈiyaabadan qoppa. Nuussi keehi koshshana xayikkonne, nu koyiyoobaa shammikko, hegee balee? Bala gidennan aggana danddayees. SHin ha oyshata qoppa: Nuuni issi issibaa shammana danddayikkonne, hegaa goˈettanawunne moorettikko giigissanawu nuussi wodeenne wolqqay deˈii? Qassi nu aquwaa keehi siiqiyoogaa doommana danddayiyoo? Miishshaa siiqiyoogee Xoossawu kaseegaappe aaruwan haggaazanaadan Yesuusi shoobbin ixxida yelaga bitaniyaadan nuna oottana danddayii? (Marqqoosa 10:17-22 nabbaba.) Sima deˈuwaa deˈiyoogaaninne Xoossaa sheniyaa poliyoogan nu alˈˈo wodiyaanne wolqqaa goˈettiyoogee keehi loˈˈo!

17. Nuuni mule dogana bessennabay aybee?

¹⁷ Nuuni olettiiddi deˈiyoogaa mule dogana bessenna; qassi galla galla olaa olettanawu giigetti uttana koshshees. (Ajj. 12:17) Nu ishanttinne michchontti gonddalle mala gidida nu ammanuwaa nu gishshaa tokkana danddayokkona.  Nuuni nu ammanuwaa minttidi deˈana bessees.

18. Beni wode, wotaaddarati bantta gonddalliyaa mintti oyqqiyoy aybissee?

¹⁸ Beni wode, issi wotaaddaray olan xala gidiyo wode, I bonchchettees. SHin, I gonddallee baynnan soo simmikko, yeellatees. Beni Roomatu taarikiyaa xaafee Tasitesi, “Issi wotaaddaray ba gonddalliyaa aggidi yiikko, hegee keehi kawushshiyaaba” yaagiis. Wotaaddarati bantta gonddalliyaa mintti oyqqidaakkonne shaakki eriyo issi gaasoy hegaa.

19. Nu gonddalle mala ammanoy minnidi deˈanaadan waatana danddayiyoo?

¹⁹ Ubbatoo shiiquwaa shiiqiyoogaaninne haratuyyo Yihoowa sunttaabaanne A Kawotettaabaa yootiyoogan gonddalle mala gidida nu ammanoy minnidi deˈanaadan oottoos. (Ibr. 10:23-25) Qassi galla galla Xoossaa Qaalaa nabbaboosinne I yootiyo ubbabaa oosuwan peeshshanaadan maaddana mala Yihoowa woossoos. (2 Xim. 3:16, 17) Yaatiyo wode, Seexaanay nuna qohanawu goˈettiyo ay miishshinne nuna qohiiddi deˈenna. (Isi. 54:17) Nu ‘wogga gonddalliyaa mala gidida ammanoy’ nuna naagana. Nu ishanttuuranne michchonttuura issippe xalatettan oottana. Nu ammanoy mino gididi deˈanaadan galla galla olettiyo olan nuuni xoonana. Qassi ubbabaappe aaruwan, Yesuusi Seexaanaanne I kaalettiyoogeeta xooniyo wode, aara hashetiyo bonchcho maataa nuuni demmana.—Ajj. 17:14; 20:10.