Gidoshin, kaallidi deˈiya yohoti nuuni qofaa suure akeekanaadan maaddoosona:

1. He mazamuriyan deˈiya hara qofaa akeeka. Paydo 12n (Ooratta Alamiyaa Birshshettan) “yaanin” giya qaalaa goˈettiyoogee, paydo 12⁠ppe 14 gakkanaashin deˈiya anjjoti iitatuppe banttana ‘ashshanaadan’ woossiya geeshshatu hanotaa qonccissiyoogaa akeekanaadan oottees (paydo 11). Maayettiya naaˈˈu yohota yootiya paydo 15⁠ykka he qofaa qonccissees. Hegaa giyoogee, naaˈˈusan “anjjettidaageeta” (‘ufayttiyaageeta,’ NW) giya qofay issi asaabaa—‘eta Xoossay Yihoowa’ gidido asatubaa yootees.

2. He qofay Geeshsha Maxaafan deˈiya, Xoossay baassi ammanettida asata anjjanaagaa yootiya hara qofatuura maayees. Ha mazamuree Xoossay Israaˈeelata eta morkketuppe ashshi simmidi, asay ufayttanaadaaninne duretanaadan oottidi eta anjjanawu gelido, mino naqaashay deˈiyo qaalaa Daawiti ufayssan naagiyoogaa qonccissees. (Wog. 26:9, 10; Zaa. 7:13; Maz. 128:1-6) Leemisuwawu, Zaarettido Wogaa 28:4y hagaadan gees: “Ne uluwaa aifee, ne shooqaa aifee, ne mehiyaa maratinne ne dorssaanne ne deeshshaa wudiyaa marati corattidi anjjettidaageeta gidana.” Daawita naˈaa Solomona haaruwaa wode, Israaˈeelati laggetiyaabi baynna sarotettaaninne duretettan deˈidosona.—1 Kaw. 4: 20, 21; Maz. 72:1-20.

Qofaa kuuyanawu, Mazamure 144 hegaadan akeekiyoogee Yihoowa ashkkarati daro wodiyawu xoqqu ootti xeellido hidootaa, hegeekka Xoossay iitata xayssanaagaanne hegaappe simmin xillotuyyo merinaa sarotettaanne duretettaa immanaagaa he mazamuree kumettay loytti qonccissanaadan oottees.—Maz. 37:10, 11.