1. Xoossaa ashkkarati ubbay ay oottanawu koyiyoonaa, qassi aybissi? (Koyro sinttan deˈiya misiliyaa xeella.)

KIRISTTOOS YESUUSI, “Biidi, asa ubbaa tana kaalliyaageeta oottite” giidi ba erissiyo ashkkarata azaziis. (Maa. 28:19) Xoossawu ammanettidi oottiya ashkkarati ubbay banttassi imettida he oosuwaa waatidi loytti oottidi ‘polanaakko’ tamaaranawu koyoosona. (2 Xim. 4:5) Qassi, ha oosoy keehi koshshiyaaba, keehi maaddiyaabanne, hara ay oosoppenne eesuwan oosettana koshshees. Gidoppe attin, nuuni haggaazuwaa dosikkonne danddayettida keenan daro saatiyaa oottanaagee metiyaaba gidana danddayees.

2. Nuuni haggaaziyo wode nuna gakkiya metoti aybee?

² Nu wodiyaanne wolqqaa goˈettana bessiyo, keehi koshshiya hara oosoti deˈoosona. Nuuyyoonne nu soo asawu koshshiyaabaa kunttanawu galla galla daro saatiyawu oottiyaageeta gidana danddayoos. Nuuni so asaa aawatettaara, sahuwaara, unˈˈissiyaabaara, woy cimatettaa gaasuwan gakkiya metuwaara baaxetiiddi deˈennan aggokko. Hagaa mala metotun gencciiddi nuuni haggaazuwaa waatidi loytti polana danddayiyoo?

3. Yesuusi Maatiyoosa 13:23n yootido qofaappe nuuni ay kuuyana danddayiyoo?

³ Nu hanotay nuuni koyiyoogaa keenaa Yihoowawu haggaazennaadan diggikko, hidootaa qanxxana koshshenna. Kawotettaa ayfiyaa nuuni ubbay issi malaa ayfana danddayennaagaa Yesuusi erees. (Maatiyoosa 13:23 nabbaba.) Nuuni ayyo haggaazanawu nuuyyo danddayettidabaa oottiyo ubbabaa Yihooway keehi nashshees. (Ibr. 6:10-12) SHin, nuuni darissidi oottanawu nu hanotay injje giidi qoppennan aggokko. Nuuni nu deˈuwan haggaazuwaa waatidi kaseyana danddayiyaakko, nu qofay shaahettennaadan waatana danddayiyaakkonne sabbakiyoogaaninne tamaarissiyoogan kaseegaappe waani qara gidana  danddayiyaakko ha huuphe yohuwan pilggana. SHin, koyruwan, nu haggaazuwaa loytti poliyoogaa giyoogee woygiyoogee?

4. Nu haggaazuwaa loyttidi poliyoogaa giyoogee woygiyoogee?

⁴ Nu haggaazuwaa loyttidi polanawu nuuyyo danddayettida ubban sabbakananne tamaarissana koshshees. SHin, nu haggaazuwaa loytti poliyoogee daro saatiyaa sabbakiyoogaa xallaa bessiyaaba gidenna. Nuuni sabbakanaadan oottiya gaasuwaa Yihooway xoqqu oottidi xeellees. Nuuni Yihoowanne nu shooruwaa siiqiyo gishshawu, kumetta shemppuwaappe haggaazoos. * (Mar. 12:30, 31; Qol. 3:23) Kumetta shemppuwaappe Xoossawu haggaaziyoogee, nu wolqqaa goˈettidi nuuyyo danddayettida ubban ayyo haggaaziyoogaa giyoogaa. Sabbakiyoogee maata gidiyoogaa nuuni akeekikko, nuussi danddayettida keenan mishiraachchuwaa daro asawu yootoos.

5-6. Daro wodee baynna uri haggaazuwaa waatidi kaseyana danddayiyaakko leemisuwan yoota.

⁵ Gitaariyaa kaaˈiyoogee ufayssiyo issi yelagaa ane qoppa. I danddayiyo wode awudenne muuziqaa kaaˈiyoogaa dosees. Wurssettan, I bantta heeran deˈiya quma keettan Qeeraanne Woggaa gallassi gitaariyaa kaaˈiyo oosuwaa demmiis. SHin, I demmiyo miishshay ayyo koshshiyaabawu gidenna. Hegaa gishshawu, I Saynnoppe Arbba gakkanaassi issi gita suuqiyan miishshaa ekkiyaagaa gididi oottees. I he gita suuqiyan daro saatiyaa oottiyaaba gidikkonne, aybippenne aaruwan muuziqaa dosees. I kaaˈiyoogan kaseegaappe aaruwan qara gidanawunne ubba wode muuziqaa kaaˈiyaagaa gidanawu yeemottees. SHin, I baassi injjetido wode ubban guutta wodiyawukka muuziqaa kaaˈiyoogan ufayttees.

⁶ Hegaadan, neeni koyiyoogaa keena wodiyawu haggaazennan aggana danddayaasa. Gidikkonne, hegee neeni oottanawu dosiyooba. Asaa wozanaa denttettiya ogiyan mishiraachchuwaa yootanawu kaseegaappe aaruwan qara gidanawu baaxetaasa. Neeni darobaa oottana koshshiyo gishshawu, ‘Taani sabbakiyo  oosuwaa waatada kaseyana danddayiyaanaa?’ gaada qoppennan waaya aggana.

7-8. Yesuusi ba haggaazuwaa xeelliyo ogiyaa nuuni waati kaallana danddayiyoo?

⁷ Yesuusi ba haggaazuwaa xeelliyo ogiyan nuussi daro loˈˈo leemiso. Xoossaa Kawotettaabaa yootiyoogee I ba deˈuwan aybippenne aaruwan xoqqu oottidi xeelliyooba. (Yoh. 4:34, 35) I danddayido keenan daro asawu sabbakanawu xeetan qoodettiya kilo meetiriyaa tohuwan hemettiis. I asawu eta son woy hara sohuwan yootiyo ogiyaa ubbatoo koyees. Yesuusi ba deˈo ubban haggaazuwaa kaseyiis.

⁸ Nuuni danddayettiyo ay wodekka, qassi awankka asawu mishiraachchuwaa yootiyo oge koyiyoogan, Kiristtoosa leemisuwaa kaallana danddayoos. Nuuni sabbakanawu, nuna ufayssiyaabaa nu dosan aggi bayoos. (Mar. 6:31-34; 1 PHe. 2:21) Gubaaˈiyan issoti issoti dumma aqinye, ubba wode aqinye, woy kaafiya aqinye gididi oottoosona. Harati qassi hara qaalaa tamaaridosona woy sabbakiyaageeti keehi koshshiyo heeran deˈanawu biidosona. Gidoppe attin, etaagaadan oottana danddayennaba gidikkonne banttawu danddayettiya ubbabaa oottiya aassiyaageeti sabbakiyo oosuwaappe dariya baggaa oottoosona. Nuuni haggaazana danddayiyoy daro gidin woy guutta gidin, nuuni oottana danddayiyoogaappe aaruwaa Yihooway nuuppe koyenna. I nuuni ubbay ufayttiya ‘Xoossaa bonchcho wonggeliyaa’ ufayttiiddi awaajjanaadan koyees.—1 Xim. 1:11; Zaa. 30:11.

9. (a) PHawuloosawu hara oosoy deˈikkonne, I sabbakiyo oosuwaa waati aatti xeellidee? (b) Oosuwaa 28:16, 30, 31 haggaazuwaara gayttidaagan PHawuloosa xeelaa waati qonccissii?

⁹ Kiitettida PHawuloosi ba deˈuwan sabbakiyo oosuwaa kaseyiyoogan loˈˈo leemiso. I naaˈˈantto misoonaawe oosuwawu Qoronttoosa katamaa biido wode, ayyo keehi guutta miishshay deˈiyo gishshawu, dunkkaaniyaa sikkiyo oosuwaa oottana koshshiis. SHin, dunkkaaniyaa sikkiyoogee PHawuloosawu ubbaappe aadhdhiya ooso gidenna. I Qoronttoosa asatuyyo mishiraachchuwaa “coo” yootana mala, ha oosuwaa bawu koshshiyaabaa kunttanawu oottiis. (2 Qor. 11:7) PHawuloosi amarida oosuwaa oottana koshshikkonne, I haggaazuwaa ubbatoo kaseyiis; qassi Sambbata ubban sabbakiis. PHawuloosi ba hanotay kaseegaappe injjetin, sabbakiyo oosuwaa kaseppe aaruwan oottiis. I “Aihudatussi Yesuusi ba huuphen Kiristtoosa gididoogau qaalaa yootuwaa toliis.” (Oos. 18:3-5; 2 Qor. 11:9) Guyyeppe, I Roome kataman ba son naaˈˈu laytta qashettido wode, bana oychchanawu yiidaageetussi markkattiisinne dabddaabbeta xaafiis. (Oosuwaa 28:16, 30, 31 nabbaba.) PHawuloosi ba qofaa haggaazuwaappe aybinne shaakkennaadan murttiis. I, “Xoossai nuuyyo ha oosuwaa . . . immido gishshau, nuuni salettokko” yaagiis. (2 Qor. 4:1) PHawuloosadan, nuuni hara oosuwaa daro saatiyawu oottikkonne, Kawotettaabaa oosoy nu deˈuwan aybippenne aadhdhanaadan oottana danddayoos.

10-11. Nuuni sahettikko, haggaazuwaa waati loytti polana danddayiyoo?

¹⁰ Cimatettaa gaasuwan woy sahuwaa gaasuwan sooppe soo biidi nuuni koyiyoogaadan sabbakana xayikko, hara ogetun sabbakana danddayoos. Koyro xeetu layttan deˈida Kiristtaaneti asaa demmido ubbasan sabbakidosona. Eti sooppe soo biidi, dabaabaaninne haggaazuwaa kiyennan markkattiyoogan asay ‘banttanaara gayttiyo’ soho ubban tumaa yootidosona. (Oos. 17:17; 20:20) Nuuni keehi hemetti danddayennaageeta gidikko, daro asay kanttiyo heeran uttidi sabbakana danddayoos. Woy qassi haggaazuwaa kiyennan, dabddaabbeta xaafiyoogan woy silkkiyaa dawalidi markkattana  danddayoos. Payyatettaa pacaa gaasuwan woy hara metuwaa gaasuwan sooppe soo biidi sabbakana danddayenna aassiya daroti qommoora qonccida ogetun sabbakiyoogan daro ufayssaa demmana danddayoosona.

¹¹ Payyatettaa pacay deˈishinkka haggaazuwaa loytta polana danddayaasa. Kiitettida PHawuloosabaa zaarettada ane qoppa. I, ‘Ubbaappe aadhdhiya wolqqay Xoossaagaa gidiyoogaappe attin, nuugaa gidenna’ yaagiis. (2 Qor. 4:7) PHawuloosi issi wode misoonaawe oosuwawu biido wode sahettido gishshawu, ayyo ha wolqqay koshshiis. I Galaatiyan deˈiya Kiristtaanetussi, “Taani koiro intteyyo wonggeliyaa yootidoogee tana harggissishiina” giidi qonccissiis. (Gal. 4:13) Hegaadan, ne payyatettaa pacay neeni dottoretussi, narssetussinne nena maaddiya haratussi mishiraachchuwaa yootanaadan oottana danddayees. Ha asatuppe daroti aassiyaageeti eta soo biyo wode ooso keetti biichchoosona.

12. ‘Issiban xeelaa wottiyoogaa’ giyoogee woygiyoogee?

¹² Yesuusi, “Bollaa xomppee aifiyaa; hegaa gishshau, ne aifee payya gidikko [‘issiban xeelaa wottikko,’NW], ne bolla ubbai poo7o gidana” yaagiis. (Maa. 6:22) I woyganawu koyidee? I nuuni nu qofay shaahettennan woy wora simmennan issi halchchuwan xeelaa wottana koshshiyoogaa yootiis. Ba haggaazuwan xeelaa wottiyoogan Yesuusi leemiso gidees; qassi I erissiyo ashkkaratikka Yihoowayyo haggaaziyoogaaninne A Kawotettan bantta xeelaa wottanaadan tamaarissiis. Nu deˈuwan sabbakiyo oosuwan xeelaa wottiyoogan ‘kasetidi, Xoossaa Kawotettaanne A xillotettaa koyiyoogan’  Yesuusa leemisuwaa kaalloos.—Maa. 6:33.

13. Nu haggaazuwaa harabaappe aattidi xeellanawu aybi maaddana danddayii?

¹³ Nuuni haggaazuwaa harabaappe aattidi xeelliyo ogiyaappe issoy daro wodiyaa bazzidi asay Yihoowa eranaadaaninne siiqanaadan maaddana mala, keehi koshshennabawu guutta wodiyaa bazziyoogaa. * Leemisuwawu, saaminttaa giddon daro wodiyaa haggaazanawu hara oosuwaa saatiyaa giigissana danddayiyoo? Daro wodiyaa wurssiya allaxxiyoobatuppe amaridaageeta poxxana danddayiyoo?

14. Haggaazuwawu kaseegaappe aaro wodiyaa demmanawu issi azinaynne machchiyaa giigissidobay aybee?

¹⁴ Eelaasa giyo cimaynne A keettaayyiyaa hegaadan oottidosona. I hagaadan giis: “Nuuni sohuwaara aqinye gidana danddayibookko; shin daro wodiyaa sabbakanawu oottana bessiyaabay deˈees. Hegaa gishshawu, haggaaziyo wodiyaa kaseegaappe gujjanawu issi issibaa oottida. Leemisuwawu, nuuni kessiyo miishshaa poxxida. Qassi allaxxiyoogan daro wodiyaa aattiyoogaa akeekidi hegaappe poxxida. Nuuni sabbakanawu kaseegaappe daro wodiyaa demmana mala oosuwaa prograamiyaa laammanaadan nuna ootissiyaageeta oychchida. Hegaappe denddidaagan, omarssi haggaazana danddayida, kaseegaappe daro Geeshsha Maxaafaa xinaateta xannaˈissida, ubba qassi saaminttaa gidduwan aginan aginan naaˈˈutoo haggaazida. Hegan nuuni keehi ufayttida!”

15-16. Koyro Ximootiyoosa 4:13, 15y yootiyoogaadan, sabbakiyoogan nuuni kaseegaappe aaruwan waani qara gidana danddayiyoo? (“ Haggaazuwaa Loytta Polanawu Tana Maaddiya Halchchota” giya saaxiniyaakka xeella.)

¹⁵ Nu haggaazuwaa loytti poliyo hara ogee sabbakiyoogan kaseegaappe aaruwan qara gidiyoogaa. Issi issi qommo oosuwaa oottiya  asati bantta eraanne hiillaa gujjanawu ubbatoo loohana bessees. Kawotettaabaa sabbakiyaageetuura gayttidaagankka hegaadaana. Nuuni haggaazuwan qara gidanawu ubbatoo tamaarana koshshees.—Lee. 1:5; 1 Ximootiyoosa 4:13, 15 nabbaba.

¹⁶ SHin, nuuni haggaazuwan ubbatoo waani qara gidana danddayiyoo? Saaminttan saaminttan Kiristtaanetu Deˈuwaanne Haggaazuwaa SHiiquwan imettiya kaaletuwaa loyttidi ezggiyoogaana. Nuuni haggaazuwan loddan loddan kaseegaappe aaruwan qara gidanaadan maaddiya loohissuwaa ha shiiquwan demmoos. Leemisuwawu, shiiquwaa liqambbaree kifiliyaa shiishshida tamaareta zoriyo wode, haggaazuwan qara gidanaadan nuna maaddana danddayiyaabaa tamaarana danddayoos. Haroode mishiraachchuwaa issi urawu yootiyo wode he zoreta nuuni oosuwan peeshshana danddayoos. Nu haggaazuwaa citaa xomoosiyaagee maaddanaadan oychchana danddayoos woy aara issippe woykko hara kayma aassiyaagaara, issi aqinyiyaara, woy woradaa xomoosiyaagaara haggaazana danddayoos. Nuuni Tamaarissiyo Miishshata loyttidi goˈettiyo wode, sabbakiyoogaaninne tamaarissiyoogan nuuni kaseegaappe aaruwan ufayttana.

17. Neeni haggaazuwaa loyttada poliyo wode ay demmay?

¹⁷ Nuuni Yihoowaara ‘issippe oottiyaageeta’ gidanaadan I eeno giidoogee gita bonchcho! (1 Qor. 3:9) Neeni “lo77obai aibakko” woy keehi koshshiyaabay aybakko shaakkada eriyo wodenne sabbakiyoogan xeelaa wottiyo wode, ‘Yihoowayyo ufayssan goynnana.’ (Pili. 1:10; Maz. 100:2) Nena gakkiya metoy woy ne abbiyaa pacay ayba gidikkonne, neeni Xoossaa ashkkara gidiyoogaadan, ne haggaazuwaa loytta haggaazanawu neeyyo koshshiya wolqqaa I immanaagaa ammanettana danddayaasa. (2 Qor. 4:1, 7; 6:4) Ne hanotay neeni daro sabbakanaadan oottin woy guuttaa sabbakanaadan oottinkka, neeni kumetta shemppuwaappe haggaaziyaaba gidikko, ‘ceeqettana’ woy ufayttana danddayaasa. (Gal. 6:4) Neeni haggaazuwaa loyttada poliyo wode, Yihoowanne hara asaa siiqiyoogaa bessaasa. “Neeni hegaa oottikko nenanne neeni giyoogaa siyiyaageeta [ashshana].”—1 Xim. 4:16.