1. Yelida Kiristtaaneti bantta naati xammaqettanaappe kase ay shaakki eranawu koyiyoonaa?

“TAANI xammaqettanawu koyiyoogaa ta aawaassinne ta aayeessi daro aginawu yootaas, qassi eti darotoo hegaa denttidi tana haasayissidosona. Taani gitabaa kuuyiyoogaa akeekidaakkonne eti shaakki eranawu koyidosona. Ta deˈuwan he gitabay hanido gallassay, Tisaase 31, 1934n gakkiis.” Blaasam Branta A xammaqettanawu kuuyido wode hanidabaa hegaadan qonccissaasu. Ha wodiyan, yelida Kiristtaaneti bantta naati aadhdhida eratettan kuuyanaadan hegaadan maaddanawu koyoosona. Xammaqettanawu marssiyoogee woy coo haganaa sugiyoogee ayyaanaaban metuwan yeggana danddayees. (Yaaq. 4:17) SHin, yelidaageeti bantta naati xammaqettanaappe kase Kiristtaane erissiyo ashkkara gididi qambbaraa tookkanawu giigettidaakkonne shaakkidi eranawu koyoosona.

2. (a) Woradaa xomoosiya issi issi ishati akeekido metoy aybee? (b) Ha huuphe yohuwan nuuni ay beˈanee?

² Woradaa xomoosiya issi issi ishati Kiristtaanetu keettan diccida,  layttay 20 heera gidido amarida yelagati biron xammaqettibeennaageeta beˈiyoogee banttana qofissidoogaa yootidosona. He yelagatuppe daroti gubaaˈe shiiquwaa shiiqoosonanne haggaazoosona. Eti Yihoowa Markka gididabadan qoppoosona. SHin eti banttana Yihoowawu geppanawunne xammaqettanawu aybissakko mammottoosona. Hegawu gaasoy aybeeshsha? Issota issota yelidaageeti xammaqettanaagaa marssissidosona. Ha huuphe yohuwan, yelida amarida Kiristtaaneti bantta naati xammaqettanawu diccanaadan maaddenna mala eta qofissiya oyddubaa beˈana.

3. Blaasami aawaanne aayyiyoo qofissidabay aybee?

³ Ha huuphe yohuwaa doomettan denttido Blaasami aawaynne aayyiyaa xammaqettiyoogee gitabanne keehi koshshiyaaba gidiyoogaa bantta naˈiyaa akeekidaakko akeekabeennaakko qoppidoogee erettidaagaa. Issi naˈi bessiyaagaadan bana Yihoowawu geppana danddayiyaakkonne yelidaageeti waatidi erana danddayiyoonaa?

4. Yesuusi azazido, Maatiyoosa 28:19, 20n deˈiya qofay yelidaageeti ha wodiyan bantta naata tamaarissiyo wode waati maaddana danddayii?

⁴ Maatiyoosa 28:19, 20 nabbaba. Hagaappe kasetiya huuphe yohuwan beˈidoogaadan, issi uri xammaqettanawu gakkiyo laytti awudekko Geeshsha Maxaafay yootenna. SHin erissiyo ashkkara oottiyoogee woygiyoogaakko loytti qoppiyoogee yelidaageeta maaddana danddayees. Maatiyoosa 28:19n “kaalliyaageeta oottite” geetettidi birshshettida qaalay Kiristtoosi erissiyo ashkkara oottanawu halchchidi tamaarissiyoogaa bessiyaaba. Erissiyo ashkkari Yesuusi tamaarissidobaa tamaariyaanne akeekiya, qassi hegaa polanawu murttida asa. Yaatiyo gishshawu, yelida Kiristtaaneti ubbay bantta naati Kiristtoosi erissiyo, xammaqettida ashkkarata gidana mala, guutta naatettaappe doommidi maaddanawu halchchana koshshees. Gacino naˈi xammaqettana danddayennaagee tuma. SHin, yelaga naatikka Geeshsha Maxaafaa tumaa akeekananne nashshana danddayiyoogaa Xoossaa Qaalay bessees.

5, 6. (a) Geeshsha Maxaafay Ximootiyoosabaa yootiyoobay nuuni xinqqatiyaabaa woygidi kuuyanaadan oottii? (b) Akeekanchcha aawaynne aayyiyaa bantta naata waatidi loytti maaddana danddayiyoonaa?

⁵ Ximootiyoosi naatettan tumaa mintti oyqqida erissiyo ashkkara. Ximootiyoosi guutta naatettaasappe doommidi Geeshsha Maxaafaa tumaa tamaaridoogaa kiitettida PHawuloosi yootiis. Ximootiyoosi haymaanootiyaaban phalqqettay deˈiyo keettan diccikkonne, Ayhuda gidida A aayyiyaanne A aayee aayyiyaa I Geeshsha Maxaafaa nashshanaadan tamaarissidosona. Hegaappe denddidaagan, A ammanoy yeeqennaagaa gidiis. (2 Xim. 1:5; 3:14, 15) Ximootiyoosi bawu layttay 20 heera gidido wode, gubaaˈiyan dumma maataa ekkana danddayiya asa gidiis.—Oos. 16:1-3.

⁶ Naati ubbay dumma dumma gidiyoogee tuma; eti ubbay issi likke woy issi wodiyan wozannaamokkona. Amaridaageeti naatettan qofankka eeshshankka wozannaama gididi, xammaqettanawu koyiyoogaa yootoosona. Harati hegaappe guuttaa gasttana gakkanaashin xammaqettanawu giigettennan aggana danddayoosona. Hegaa gishshawu, yelida akeekanchchati bantta naati xammaqettanaadan iisettokkona. SHin eti naati ubbay bantta hanotaadan ayyaanaaban diccanaadan maaddoosona. Naˈi aadhdhida eranchcha gidiyoogaa bessiyo wode yelidaageeti ufayttana danddayoosona. (Leemiso 27:11 nabbaba.) Gidoppe attin, eti bantta naata Kiristtaane erissiyo ashkkara oottanawu halchchidoogaa mule dogana koshshenna. Yelidaageeti hegaa hassayidi,  ‘Ta naˈay bana Xoossawu geppanawunne xammaqettanawu danddayiyo eraa demmidee?’ yaagidi banttana oychchana danddayoosona.

7. Issi uri xammaqettanaappe kase Geeshsha Maxaafay tamaarissiyo ubbabaa erana koshshii? Qonccissa.

⁷ Yelidaageeti bantta son asttamaare gidiyo gishshawu, naati Yihoowawu muleera aqidi banttana ayyo geppanawu baaso gidiya eraa demmanaadan eti koyiyoogee bessiyaaba. Gidikkokka, issi uri bana Xoossawu geppidi xammaqettanaappe kase Geeshsha Maxaafay tamaarissiyo ubbabaa erana koshshenna. Erissiyo ashkkarati ubbay xammaqetti simmidikka suure eran ubbatoo diccana koshshees. (Qolasiyaasa 1:9, 10 nabbaba.) Yaatin, kasetidi ay keenaa erana koshshii?

8, 9. PHawuloosabaanne qasho keettaa naagiyaagaabaa yootiya taarikiyaappe nuuni ay tamaarana danddayiyoo?

⁸ Koyro xeetu layttan deˈida issi keettaa asaa hanotay aawatussinne aayotussi akeekaa gujjees. (Oos. 16:25-33) PHawuloosi 50 M.Ln, misoonaawetettan naaˈˈantto buussan Piliphphisiyuusa katamaakka biis. Inne A laggee Sillaasi yan deˈishin eta wordduwan mootidi qasho keettan yeggidosona. Qammi denddida biittaa qaattay qasho keettawu xaphuwaa qaattidi, penggeta ubbaa dooyi aggiis. Qasho keettaa naagiyaagee qashuwaasay ubbay kessi ekkidi biichchiis gi hirggidi bana worana hanishin, PHawuloosi A xeesiis. PHawuloosinne Sillaasi qasho keettaa naagiyaagaassinne A keetta asawu loytti markkattidosona. He keettaa asay Yesuusabaa tamaarido tumaa loytti akeekidoogeenne nashshidoogee ay oottanaadan denttettidee? Eti sohuwaara xammaqettidosona. Ha taarikiyaappe ay tamaariyoo?

⁹ Biittaa wogaadan, qasho keettaa naagiyaagee xurataa kiyida wotaaddara gidennan aggenna. I Geeshsha Maxaafaa erenna. Yaatiyo gishshawu, Geeshsha Maxaafaappe baaso gidiya eraa demmanawu, I ayfettiya Geeshsha Maxaafaa timirtteta tamaarana, Xoossaa ashkkara gidiyoogee woygiyoogaakko akeekananne Yesuusi tamaarissidobaa azazettanawu murttana koshshees. I qantta wodiyan Geeshsha Maxaafaappe erido tumaynne hegaa nashshidoogee xammaqettanaadan A denttettiis. I xammaqetti simmidi eraa gujji gujji biidoogee qoncce. He hanotaa hassayidi, intte naˈi bana Yihoowawu geppiyoogeenne xammaqettiyoogee koshshiyoogaa gujjin, Geeshsha Maxaafaappe baaso gidiyaabaa tamaaridi hegaa nashshiyo wode intte ay oottana danddayeetii? Yelida Kiristtaanetoo, gubaaˈe cimati xammaqettana danddayiyaakkonne kuuyana mala, I etawu yootana danddayiyoogaa intte kuuyennan aggekketa. * Hara erissiyo ashkkaratudan, ikka ba deˈo ubban, ubbakka merinawu Yihoowa halchchuwaa gujji gujji erana.—Roo. 11:33, 34.

10, 11. (a) Yelida amaridaageeti kuuyidobay aybee? (b) Yelida ura qofissana koshshiya waannabay aybee?

¹⁰ Yelida issoti issoti bantta naˈi kasetidi amarida xoqqa timirtte tamaaridi loˈˈo ooso oyqqana gakkanaashin xammaqettanaagaa marssissiyoogee ayyo woy iyyo loˈˈo giidi qoppoosona. Eti loˈˈobaa halchchidi hegaadan giikkonne, eta naˈawu tumuppe ushachchanaadan hegee maaddanee? Hegaappekka aaruwan, he qofay Geeshsha Maxaafaara  maayiyaabee? Yihoowa Qaalay minttettiyoobay aybee?—Eranchchaa 12:1 nabbaba.

¹¹ Ha alameenne an deˈiyaabay Yihoowa sheniyaaranne A qofaara maayennaba gidiyoogaa hassayiyoogee keehi koshshiyaaba. (Yaaq. 4:7, 8; 1 Yoh. 2:15-17; 5:19) Seexaanaa, A alamiyaanne Xoossay ixxiyo A qofaa eqettanawu issi naˈa keehi maaddiyaabay Yihoowayyo mata dabbo gidiyoogaa. Aawu woy aaya oosuwaa ayyaanaabaappe sinttayikko, naˈi suurebaa shaakki eranawu metootananne qohettana danddayees. Bantta naˈaa siiqiya Kiristtaaneti naˈi ha alamiyaa qofaadan bawu ushachchanaadan qoppana mala tumu koyanee? Nuuni tumuppe ufayttidinne nuussi ushachchin deˈana danddayiyoy nu deˈuwan Yihoowa sinttayiyoogaa xalaalaana.—Mazamure 1:2, 3 nabbaba.

12. Yelida issoti issoti bantta naˈay xammaqettanawu marssanaadan koyidoy aybissee?

¹² Issi Kiristtaane aayyiyaa ba naˈiyaa xammaqettennaadan ayssi minttettidaakko qonccissaydda, “Tawu waanna gaasoy bohiyogaara gayttidaba gidiyoogee tana yeellayees” yaagaasu. He michcheegaadan, yelida amaridaageeti naatetta eeyyatettaa layttay aadhdhana gakkanaashin xammaqettanawu marssiyoogee bantta naˈawu loˈˈo giidi qoppidosona. (Doo. 8:21; Lee. 22:15) Eti, ‘Ta naˈay xammaqettana xayikko, bohettenna’ giidi qoppana danddayoosona. Hegaadan qoppiyoogee bala gididoy aybissee?—Yaaq. 1:22.

13. Xammaqettanawu marssiyoogee issi uri Yihoowan oyshettennaadan oottii? Qonccissa.

¹³ Kiristtaane aawatinne aayoti bantta naˈi bessiyaagaadan bana Yihoowawu geppiya wozannaama gidana gakkanaashin xammaqettanaadan koyennaagee qoncce. SHin, naˈi xammaqettana xayikko, Yihooway A oychchenna giidi qoppiyoogee bala. Aybissi balee? Yihooway oychchiyoogeeti xammaqettidaageetu xalla gidokkona. Ubbakka, Yihoowa sinttan likkebaynne likke gidennabay aybakko naˈi erikko, Xoossan oyshettees. (Yaaqooba 4:17 nabbaba.) Hegaa gishshawu, aadhdhida eranchcha aawatinne aayoti bantta naˈay xammaqettennaadan minttettiyoogaappe, ayyo loˈˈo leemiso gidanawu baaxetoosona. Naˈay guutta naatettaappe doommidi Yihooway kandduwawu kessido xoqqa maaraa wozanappe nashshanaadan eti loohissanawu koyoosona. (Luq. 6:40) Hegaadan nashshiyoogee intte naˈay Yihooway kessido geeshshatettaa maaraa mintti kaallanaadan oottiyo gishshawu, ayyo gita naago gidees.—Isi. 35:8.

14. Xammaqettanawu dicciya naata maaddiya aawatunne aayotu oosuwaa cimati waatidi yaa minttana danddayiyoonaa?

¹⁴ Ayyaanaaban heemmiya gubaaˈe cimati ayyaanaabaa halchchuwaabaa loˈˈobaa yootiyoogan yelidaageeti oottiyoobaa bolli gujjidi yaa minttoosona. Aqinye gidada 70⁠ppe daro laytti haggaazida issi michchiyaa Ishaa CHarles Tez Raasilaara haasayidobaa goˈˈaa hassayawusu; he wode A usuppun laytta naˈa. A, “I 15 daqiiqawu taani ayyaanaaban halchchiyoobaa tana haasayissiis” yaagaasu. Minttettiya qaalay daro wodiyawu goˈˈana danddayees. (Lee. 25:11) Cimati SHiiquwaa Addaraashaa keexuwankka naatussi eta abbiyaadan oosuwaa immidi, eta yelidaageetuura ootissana danddayoosona.

15. Gubaaˈiyan deˈiya harati naata minttettana danddayiyo amarida ogeti awugeetee?

¹⁵ Gubaaˈiyan deˈiyaageeti naatussi qoppiyoogaa bessiyoogan maaddana danddayoosona. Naati ayyaanaaban dicciyoogaa akeekiyoogee yaatiyo issi oge. Issi yelagay loytti qoppidi zaaridee, woy qassi saaminttawu gidduwan shiiqiyo shiiquwan  kifiliyaa shiishshidee? Issi yelagay ammanettennaadan paacciyaabaa xoonidee, woykko timirtte keettan merettida injjetiya hanotan markkattidee? Hegaa mala wodiyan sohuwaara wozanappe galatite. Qassi shiiquwaappe kasetidi woy shiiqoy wurin, issi yelagawu qoppiyoogaa bessiyaabaa haasayanawu halchchiyoogeekka loˈˈo. Hegeetinne hegaa mala harabati naati etikka ‘shiiqida cora asaa’ yame gidiyoogaa akeekanaadan maaddana danddayoosona.—Maz. 35:18.

16, 17. (a) Xammaqettiyoogee issi uri sinttappe hidootiyoobaara waani gayttii? (b) Yelida Kiristtaaneti ubbay demmanawu baaxetiyo ufayssay aybee? (Doomettan deˈiya misiliyaa xeella.)

¹⁶ Yelida Kiristtaanee ba naˈa Yihoowa “seeraaninne zoriyan” dichchiyoogee I demmiyo gita maatatuppe issuwaa. (Efi. 6:4; Maz. 127:3) Yelida Kiristtaanetu naati beni Israaˈeela deriyaagaadan yeletan Yihoowawu aqida asaa yara gidokkona. Hegaa bollikka, Xoossaanne tumaa siiqiyoogee laatan demmiyooba gidenna. Yelidaageeti bantta naˈi Yihoowawu bana geppidi xammaqettanaadan maaddiyoogan, A erissiyo ashkkara oottanawu yelettoosappe doommidi halchchana koshshees. Hegaappe aadhidi koshshiyaabi aybi deˈii? Matattida gita waayiyaa wode attiyo malaatay issi ura bolli wodhdhanaadan oottiyaabay, I Yihoowawu bana geppi xammaqettidi, ammanettidi ayyo oottiyoogaa.—Maa. 24:13.

¹⁷ Blaasam Branta xammaqettanawu koyiyoogaa kuuyido wode, O yelida, Xoossawu yayyiyaageeti A ba deˈuwan aybippenne aadhdhiyaabaa oottanawu giigettidaakkonne shaakki eranawu koyidosona. Eti A giigettidoogaa eridi, kuuyidoban O kaafidosona. A xammaqettanaappe kasetiya qammi, I aaway daro loˈˈobaa oottiis. Blaasama hagaadan gaasu: “I nuuni ubbay gulbbatanaadan yootidi woossiis. I ba guutta naˈiyaa bana ayyo geppanawu kuuyidoogan keehi ufayttidoogaa Yihoowawu yootiis.” Blaasama 60⁠ppe dariya layttappe guyyiyan, “Yiya laytta ubban he qammaa taani mule dogikke!” yaagaasu. Yelidaageetoo, intte naati banttana Yihoowawu geppidi xammaqettiyoogaa beˈiyoogan intte ufayttanaadan amottoos.