1. Eranchchaa 3:7⁠ppe nuuni ay tamaariyoo?

NUUPPE amaridaageeti daro haasayiyoogaa dosoos. Harati coˈˈu giyoogaa dosoosona. Ha huuphe yohuwawu denddo gidida xiqisiyan qonccidaagaadan, haasayanawukka coˈˈu gaanawukka wodee deˈees. (Eranchchaa 3:1, 7 nabbaba.) Nu ishanttuppenne michchonttuppe amaridaageeti loytti haasayanaadan amottennan aggokko. Qassi etappe amaridaageeti guuttaa haasayanaadan koyennan aggokko.

2. Nuuni awude, qassi waati haasayana koshshiyaakko maarata kessiyo maatay deˈiyoy oossee?

² Haasayiyoogee Yihooway immido imota. (Kes. 4:10, 11; Ajj. 4:11) I nuuni ha imotaa bessiyaagaadan waati goˈettanaakko akeekanaadan nuna ba Qaalaa baggaara maaddees. Nuuni awude haasayanaakkonne awude coˈˈu gaanaakko eranaadan maaddiya Geeshsha Maxaafaa taariketa ha huuphe yohuwan beˈana. Qassi nuuni haratuyyo haasayiyoobaa xeelliyaagan Yihoowa qofay aybakko beˈana. Koyruwan, nuuni awude haasayana koshshiyaakko ane xannaˈoos.

3. Roome 10:14 maaran, nuuni Yihoowabaanne A Kawotettaabaa haasayanawu giigettidaageeta gidana koshshiyoy awudee?

³ Nuuni Yihoowabaanne A Kawotettaabaa haasayanawu ubbatoo giigettidaageeta gidana koshshees. (Maa. 24:14; Roome 10:14 nabbaba.) Nuuni hegaadan oottiyo wode, Yesuusa leemisuwaa kaalloos. Yesuusi saˈaa yiido waanna gaasotuppe issoy ba Aawaabaa tumaa haratussi yootanaassa. (Yoh. 18:37) Gidoppe attin, nuuni haasayiyo ogee ay keena koshshiyaabakkokka hassayana bessees. Hegaa gishshawu, nuuni Yihoowabaa haratuyyo yootiyo  wode, “ashkketettaaninne yashshatettan [“bonchchuwan,” NW]” yootana bessees, qassi haratuyyo siyettiyaabaanne eti ammaniyoobaa qoppana koshshees. (1 PHe. 3:15) He wode nuuni issi urawu yootiyoogaa xalla gidennan, A tamaarissoos, qassi A wozanaa denttettana danddayoos.

4. Leemiso 9:9y yootiyoogaadan, cimati haasayiyoobay harata waati maaddana danddayii?

⁴ Cimati issi ishaa woy issi michchiyo zorana koshshiyoogaa akeekikko, zoranawu mammottana koshshenna. Eti he uraa yeellayennaadan, haasayana bessiya wodiyaa dooroosona. Hara asi baynnasan A zoranawu eti naagana koshshees. Zoriyo uraa bonchchiyoogaa bessiya ogiyan haasayanawu cimati ubbatoo baaxetoosona. SHin, harati loˈˈobaa oottanaadan maaddiya Geeshsha Maxaafaa maarata etawu yootoosona. (Leemiso 9:9 nabbaba.) Koshshiyo wode haasayanawu nuuyyo xalatettay koshshiyoy aybissee? Issoy haraappe dummatiya naaˈˈu hanotata qoppa. Issi hanotan, issi bitanee ba naata seerana koshshiyoobay merettiis, qassi hara hanotan, issi maccaasiyaa sinttappe kawo gidana uri balan kuuyidobaa awu yootana koshshiis.

5. Qeese Ubbatu Halaqaa Eeli ba naaˈˈu attuma naata bessiyaagaadan seeribeennay awudee?

⁵ Qeese Ubbatu Halaqaa Eelassi I keehi siiqiyo naaˈˈu attuma naati deˈoosona. SHin, he naati Yihoowa bonchchokkona. Etayyo gita aawatettay deˈees. Eti Xoossaa dunkkaaniyan qeese gididi oottoosona. Gidoppe attin, eti bantta maataa bessenna ogiyan goˈettidosona, Yihoowayyo shiiqiya yarshshota keehi kariyoogaa bessidosona, qassi macca asaara zinˈˈidosona. (1 Sam. 2:12-17, 22) Muuse Higgiyaa maaran Eela naati hayqqana koshshees, shin Eeli eta mintti seeribeenna, qassi eti Xoossaa dunkkaaniyan oottiyoogaa agganaadan diggibeenna. (Zaa. 21:18-21) Eeli ha hanotan oottidoban Yihoowawu aybi siyettidee? I Eelawu hagaadan giis: “Neeni ne naata taappe aattada aissi bonchchadii?” He wode Yihooway he naaˈˈu iita asati hayqqanaadan kuuyiis.—1 Sam. 2:29, 34.

6. Nuuni Eelabaappe ay tamaariyoo?

⁶ Nuuni Eelabaappe keehi koshshiyaabaa tamaaroos. Issi laggee woy dabboy Xoossaa higgiyaa kanttidoogaa nuuni akeekikko, Yihooway kessido maarata I hassayanaadan ayyo yootana bessees. Yaatidi, Yihooway sunttidoogeetuppe koshshiya maaduwaa I demmanaadan nuuni odana koshshees. (Yaaq. 5:14) Nuuni laggiyaa woy dabbuwaa Yihoowappe aattidi bonchchiyoogan, Eela mala gidanawu mule koyokko. Seeray koshshiyo urawu yootanawu xalana koshshikkonne, yaatiyoogee loˈˈo ayfiyaa  demissana danddayees. Eela hanotaa giddooninne Abigaalo giyo Israaˈeela biittaa maccaasee hanotaa giddon deˈiya dummatettaa akeeka.

7. Abigaala Daawita haasayissidoy aybissee?

⁷ Abigaala issi dure bitaniyaa Naabaala machcho. Daawitinne A asati Kawuwaa Saaˈoolappe baqatido wode, eti Naabaala dorssaa heemmiyaageetuura amarida wodiyaa takkidosona, qassi bonqqiyaageetuppe Naabaala wudiyaa naagidosona. Maaddido gishshawu Naabaali eta galatidee? CHii. Daawiti ba asawu amarida qumaanne haattaa immanaadan Naabaala oychchido wode, Naabaali keehi hanqqettidi eta cayiis. (1 Sam. 25:5-8, 10-12, 14) Hegaappe denddidaagan, Daawiti Naabaala son deˈiya attuma asa ubbaa woranawu kuuyiis. (1 Sam. 25:13, 22) He daafabay gakkennan waani attana danddayii? Abigaala hegee haasayana koshshiyo wode gidiyoogaa akeekido gishshawu, keehi namisettida, olaa miishshaa gixxidanne hanqqettida 400 attuma asaara gayttanawu xalada baada, Daawita haasayissaasu.

8. Nuuni Abigaali hanotaappe ay tamaariyoo?

⁸ Abigaala Daawitaara gayttido wode, A xala gidiyoogaa bessiyaanne Daawiti A yootidobaa oottanaadan denttettiya ogiyan yootaasu. He metuwawu gaaso gididay Abigaalo gidana xayikkonne, Daawiti atto gaanaadan A oychchaasu. A Daawiti loˈˈo asa gidiyoogaanne I suurebaa oottiyoogaa eriyoogaa yootaasu, qassi Yihooway O maaddanaagaa ammanettaasu. (1 Sam. 25:24, 26, 28, 33, 34) Issi uri gita mooro mooranaadan gaaso gidiyaabaa oottiyoogaa nuuni akeekikko, Abigaaliigaadan xalidi yootana koshshees. (Maz. 141:5) Nuuni bonchchuwan yootiyaaba gidikkonne, xala gidana bessees. Nuuni issi uraa zorana bessiyaabaa siiquwan zoriyo wode, ayyo tumu lagge gidiyoogaa qonccissoos.—Lee. 27:17.

9-10. Cimati harata zoriyo wode ay hassayana koshshii?

⁹ Gubaaˈiyaa yameti moorobaa oottiyo wode, etawu yootanawu cimati xala gidana bessees.  (Gal. 6:1) Cimati etikka nagaranchcha gidiyoogaanne issi wode zoree etawu koshshana danddayiyoogaa akeekiyoogan banttana ziqqi oottoosona. Gidoppe attin, cimati seeray koshshiyoogeeta hegaa gaasuwan zorennan aggokkona. (2 Xim. 4:2; Tii. 1:9) Eti issi uraa hiillaaninne danddayan zoridi tamaarissanawu, haasayiyo imotaa goˈettanawu baaxetoosona. Eti bantta ishaa siiqoosona, qassi hegee A maaddanaadan eta denttettees. (Lee. 13:24) SHin, eti keehi xoqqu ootti xeelliyoobay Yihooway kessido maarata kaalliyoogaaninne gubaaˈiyaa qohuwaappe naagiyoogan Yihooway bonchchettanaadan oottiyoogaa.—Oos. 20:28.

¹⁰ Hanno gakkanaashin, nuuni awude haasayana koshshiyaakko beˈida. Gidoppe attin, nuuni aynne haasayennan aggiyoogee loˈˈo gidiyo wodee deˈees. Nuuni awude haasayana koshshennaakko kaalliya menttotun tamaarana.

11. Yaaqoobi ayba leemisuwaa goˈettidee, qassi hegee haasayiyoobawu waani hanii?

¹¹ Nu haasayiyooban naagettiyoogee metiyaaba gidana danddayees. Geeshsha Maxaafaa xaafidaageetuppe issuwaa gidida Yaaqoobi hegaa loˈˈo leemisuwan qonccissiis. I hagaadan giis: “Issi urai ba haasayan mulekka balana xayikko, i bana naaganau danddayiya bali bainna asa. Parati nuuyyo azazettana mala, bixaalaa barssidi, nuuni koyiyoosaa ubbaa eta efeettees.” (Yaaq. 3:2, 3) Toggida uri loohaa dafidi paraa ba koyosaa efaana woy essana danddayees. Toggidaagee loohaa mintti oyqqana xayikko, paray simmennan ixxidi bawu qohettananne toggidaagaakka qohana danddayees. Hegaadan, nuuni haasayiyooban naagettana xayikko, hegee daro metuwaa gattana danddayees. Nuuni haasayiyooban naagettidi awude coˈˈu gaana koshshiyaakko amarida hanotata ane beˈoos.

12. Nuuni haasayiyooban naagettidi coˈˈu gaana koshshiyoy awudee?

 ¹² Issi ishay woy issi michchiyaa eti hara asawu yootana koshshennabaa erikko, neeni waatuutee? Leemisuwawu, nu oosoy muleera teqettido biittan deˈiya issi uraara neeni gayttikko, nu oosoy he biittan waani oosettiyaakko ubbabaa oychchanawu maluutee? Neeni eta qohanawu koyada oychchennaagee qoncce. Nuuni nu ishantta siiqiyo gishshawu, eta gakkiyaabaa eranawu koyoos. Qassi nuuni etawu woossiyo wode, shaakki eridobaa woossanawu koyoos. SHin, hegaa mala wodiyan nuuni haasayiyooban naagettidi coˈˈu gaana koshshees. Nuuni he ishay xuurabaa odanaadan iisettikko, A siiqennaagaa bessoos. Nuuni he biittan deˈiya ishanttanne michchontta siiqennaagaakka bessoos; ayssi giikko, he ishay yootiyoobay eti qohettanaadan oottana danddayees. Nu oosoy muleera teqettido biittan deˈiya ishanttunne michchonttu metoy yaa daranaadan koyiya uri nu giddon baynnaagee qoncce. Qassi, nuuni hegaa mala biittatun haggaazikko, yan deˈiya Yihoowa Markkatu haggaazuwaa woy ayyaanaabaa oosuwaa xeelliyaagan ubbabaa yootanawu koyokko.

13. Leemiso 11:13y yootiyoogaadan, cimati ay oottana bessii, qassi aybissi?

¹³ Cimati Leemiso 11:13n deˈiya maaraa oosuwan peeshshiyoogee keehi koshshiyaaba. (Nabbaba.) Eti xuurabaa erana bessenna urawu yootokkona. Hegee aqo oyqqida cimawu paacciyaaba gidana danddayees. Aqo oyqqidaageeti bantta qofaa, banttawu siyettiyaabaanne banttana unˈˈissiyaabaa darotoo issoy issuwaara haasayiyoogee eta aqo deˈoy minnanaadan oottees. SHin issi cimay gubaaˈiyan deˈiyaageetu “xuuraa” yootana bessennaagaa akeekees. I yootikko, harati an ammanettokkona, qassi A loˈˈo sunttay moorettana. Gubaaˈiyan aawatettay deˈiyoogeeti “naa77a haasayennaageeta” woy cimmennaageeta gidana koshshees. (1 Xim. 3:8) Hegaa giyoogee eti cimmana woy zigirana koshshenna giyoogaa. Issi cimay ba keettayiyo siiqikko, A erana koshshennabaa iyyo yootenna.

14. Gubaaˈiyaa cimaa machchiyaa I ba loˈˈo sunttaa naagidi deˈanaadan waata maaddana danddayay?

¹⁴ Issi machchiyaa ba keettaaway xuurabaa bawu yootanaadan isettennan aggiyoogan ba keettaawawu loˈˈo sunttay deˈanaadan maaddana danddayawusu. Issi machchiyaa ha zoriyaa oosuwan peeshshiyo wode, ba azinaa kaafiyoogaa xalla gidennan, xuurabaa ba azinawu yootidaageeta bonchchiyoogaakka bessawusu. Ubbaappe aaruwan, A gubaaˈiyan sarotettaynne issippetettay deˈanaadan maaddiyo gishshawu, Yihoowa ufayssawusu.—Roo. 14:19.

15. Iyyooba heezzu laggeta xeelliyaagan Yihoowawu aybi siyettidee, qassi aybissi?

¹⁵ Nuuni waatidi, qassi awude haasayanaakko Geeshsha Maxaafan deˈiya Iyyooba maxaafaappe darobaa tamaarana danddayoos. Iyyoobi keehi azzananaadan oottiya daro metoy A gakki simmin, oyddu asati A minttettanawunne zoranawu yiidosona. He asati daro wodiyaa coˈˈu giidi aattidosona. He heezzu asati Elifaaza, Bilddaadanne Xoofaara geetettoosona. Eti he wodiyan Iyyooba waati maaddana danddayiyaakko qoppibeennaagaa guyyeppe eti haasayidobay bessees. Eti Iyyoobi oottido moorobaa waatidi awu qonccissana danddayiyaakko qoppiiddi takkidosona. Eti haasayidoban amaridabay likke gidikkonne, Iyyoobanne Yihoowa xeelliyaagan qareti baynnabaa woy tuma gidennabaa darobaa haasayidosona. (Iyy. 32:1-3) Eti Iyyoobi iita asa giidi A mootidosona. Hegaa xeelliyaagan Yihooway waatidee? I ha heezzu asatu bolli keehi hanqqettiis. I eta eeyyadan qoodiis, qassi etawu Iyyoobi woossana mala eti oychchanaadan oottiis.—Iyy. 42:7-9.

16. Elifaazi, Bilddaadinne Xoofaari oottido iitabaappe nuuni ay tamaarana danddayiyoo?

 ¹⁶ Elifaazi, Bilddaadinne Xoofaari oottido iitabaappe nuuni darobaa tamaaroos. Koyruwan, nuuni nu ishanttu bolli pirddana koshshenna. (Maa. 7:1-5) Nuuni haasayanaappe kase etabaa loytti ezggana koshshees. Eti genccidobaa nuuni akeekana danddayiyoy yaatiyoogaa xallaana. (1 PHe. 3:8) Naaˈˈanttuwan, nuuni haasayiyo wode, nu haasayiyoobay kehanne likke gidiyoogaa akeekana bessees. (Efi. 4:25) Qassi heezzanttuwan, nuuni issoy issuwawu haasayiyoobay Yihoowa keehi qofissees.

17. Eelihu hanotaappe nuuni ay tamaarana danddayiyoo?

¹⁷ Iyyooba oychchanawu yiida oyddantto bitanee Abrahaama dabbuwaa Eeliha. Iyyoobinne hara heezzu asati haasayiyo wode I ezggiis. I Iyyooba kehatettan tumu zoriyaa zoridi Iyyoobi ba qofaa suurissanaadan maaddanawu, odettiyaabaa loyttidi ezggana koshshidoogee qoncce. (Iyy. 33:1, 6, 17) Eelihu xoqqu oottidi xeellidobay bana woy hara asaa sabbiyoogaa gidennan, Yihoowa sabbiyoogaa. (Iyy. 32:21, 22; 37:23, 24) Nuuni coˈˈu gaanawu, qassi siyanawu wodee deˈiyoogaa Eelihu hanotaappe tamaaroos. (Yaaq. 1:19) Nuuni zoriyo wode nu xoqqu ootti xeellana koshshiyaabay nu bonchchuwaa gidennan, Yihoowa bonchchissiyoogaa gidiyoogaakka tamaaroos.

18. Haasayiyo imotaa gishshawu galatiyoogaa waati bessana danddayiyoo?

¹⁸ Nuuni awude, qassi waati haasayanaakko Geeshsha Maxaafay yootiyo zoriyaa kaalliyoogan, haasayiyo imotaa xoqqu ootti xeelliyoogaa bessana danddayoos. Eranchcha Kawuwaa Solomoni ayyaanay denttettin hagaadan giis: “Koshshiyo wodiyan haasayettida likke qaalai biraa bolli tigido worqqaa alleequwaa mala.” (Lee. 25:11) Nuuni harati haasayiyoobaa loytti ezggikkonne haasayanaappe kase qoppikko, nu haasayiyoobay loˈˈiyaanne alˈˈoba gidida biraa bolli tigido worqqaa alleequwaa mala gidana danddayees. He wode nuuni guuttaa woy daruwaa haasayikkokka, nu haasayiyoobay harati minnanaadan oottana, qassi nunan Yihooway ufayttana. (Lee. 23:15; Efi. 4:29) Hegee ha imotaa immida Xoossaa nuuni galatiyoogaa bessiya aybippenne aadhdhiya oge!