1, 2. (a) Yelidaageeta gakkiya paacee aybee, qassi eti he paaciyaa waati xoonana danddayiyoonaa? (b) Nuuni xannaˈana oyddubati aybee?

PARANSAAYE biittan deˈiya issi azinaynne machiyaa, “Nuuni Yihoowan ammanoos; shin hegee nu naati ammananaagaa bessenna” yaagidosona. Eti gujjidikka, “Ammanoy issi uri laattiyooba gidenna. Nu naati loddan loddan ammanoosona” yaagidosona. Awusttiraaliyaa biittan deˈiya issi ishay hagaadan giis: “Intte naati ammanuwan minnanaadan maaddiyoogee inttena gakkana danddayiya ay paaceppekka wolqqaama gidana danddayees. Naata maaddiya ubbabaa intte goˈettana koshshees. Intte naˈay oychido oyshawu likke zaaruwaa zaaridabadan inttessi siyettana danddayees. SHin guuttaa takkidi he oyshaa i zaaretti oychiyoogaa intte akeekeeta! Eranawu koyiya intte naˈawu intte zaariyoobay a hachi ufayssikkokka, wontto ufayssennan aggana danddayees. Intte issi issibaa darotoo zaaretti tamaarissana koshshennan aggenna.”

² Neeni aawa woy aayo gidikko, ne naati ammanuwan mino asa gidanaadan tamaarissanawu danddayennabadan issi issitoo qoppay? Nuuppe ooninne ba eran hegaa oottana danddayenna! (Erm.  10:23) SHin nuuni Xoossay kaalettanaadan oychiyo wode hegaa oottidi polana danddayoos. Ne naati ammanuwan minnanaadan tamaarissanawu nena maaddana danddayiya kaallidi deˈiya oyddubata akeeka: (1) Eta loytta era. (2) Ne tamaarissiyooban ne wozanaa wotta. (3) Leemisuwaa goˈetta. (4) Danddayanne woossa.

3. Yelidaageeti tamaarissiyo wode Yesuusa leemisuwaa waati kaallana danddayiyoonaa?

³ Yesuusi darotoo bana kaalliyaageeti woygi ammaniyaakko oychees. (Maa. 16:13-15) A leemisuwaa kaalla. Neeni ne naatuura haasayiyo woy issibaa oottiyo wode, eti ay qoppiyaakko oycha; qassi eti banttawu siyettiyaabaa neeyyo yootanaadan ootta. Eti siriyoobi deˈii? Layttay 15 gidido, Awusttiraaliyaa biittan deˈiya issi ishay hagaadan giis: “Ta aaway darotoo ta ammanuwaabaa tanaara haasayeesinne taani yuushsha qoppada ammananaadan maaddees. I hagaadan oychees: ‘Geeshsha Maxaafay woygii?’ ‘Geeshsha Maxaafay yootiyoobaa neeni ammanay?’ ‘Hegaa neeni ammaniyoy aybissee?’ Taani i woy ta aayyiyaa giyoobaa zaarettiyoogaappe ta qaalan zaaranaadan koyees. Taani gitaa gidada loytta qonccissada zaarays.”

4. Ne naati oychiyoobaa loytta akeekana koshshiyoy aybissee? Leemisuwaa yoota.

⁴ Ne naati Geeshsha Maxaafay tamaarissiyo issibaa sohuwaara ammanana xayikko, danddaya. Eti bantta oyshawu zaaruwaa demmanaadan maadda. Issi aaway hagaadan giis: “Ne naˈi oychiyoobaa loytta akeeka. Koshshennaba gaada i oychiyoobaa karoppa, qassi i oychiyoobay nena ufayssennaba gidiyo gishshawu hegaa coo aggabayoppa.” Ne naˈay wozanappe oychiyo oyshaa i qoppiyoogaanne akeekanawu koyiyoogaa bessiyaabadan xeelliyoogee maaddiyaaba. Yesuusi baayyo layttay 12 gidido wodekka deexo oyshaa oychiis. (Luqaasa 2:46 nabbaba.) Denmarkke biittan deˈiya, layttay 15 gidido naˈay hagaadan giis: “Nu haymaanootee tumeeshsha gaada taani oychiyo wode tabay eta hirggissana danddayikkonne, ta aawaynne ta aayyiyaa woppu giidi zaaridosona. Eti ta oysha ubbaa Geeshsha Maxaafaappe zaaridosona.”

5. Naati Yihoowa ammaniyaabaa milatikkokka, aawaynne aayyiyaa ay oottana koshshii?

⁵ Ne naata loytta era; yaatanawu eti qoppiyoobaa etawu siyettiyaabaanne eta qofissiyaabaa erana koshshees. Eti gubaaˈiyaa shiiquwaa shiiqiyo gishshawunne haggaaziyo gishshawu ammanoosona gaada mule qoppoppa. Galla galla etaara ayyaanaabaa tobba. Ne naatuura issippe, qassi nerkka etawu woossa. Eta ammanuwaa paacciyaabaa akeekada eti hegaa xoonanaadan maadda.

6. Aawaynne aayyiyaa Geeshsha Maxaafaa tumaa bantta wozanan wottiyoogee tamaarissanawu eta waati maaddii?

⁶ Yesuusi Yihoowa siiqiyo gishshawunne Geeshsha Maxaafaa loytti eriyo gishshawu, asay i tamaarissiyoobaa ufayttidi siyees. Eti Yesuusi banttana siiqiyoogaakka akeekidosona. Hegaa gishshawu, eti i tamaarissiyo wode akeekan siyidosona. (Luq. 24:32; Yoh. 7:46) Hegaadan, neeni Yihoowa siiqiyoogaa ne naati akeekiyoogee etikka a siiqanaadan maaddees. (Zaarettido Wogaa 6:5-8; Luqaasa 6:45 nabbaba.) Hegaa gishshawu, yelidaageetoo, Geeshsha Maxaafaanne xannaˈanawu maaddiyaabata loytti tamaarite. Meretaabaanne nu xuufetun hegaabaa yootiya qofaa eranawu baaxetite. (Maa. 6:26, 28) Yaatiyoogee intte intte eraa gujjanaadan, Yihoowa kaseegaappe aaruwan nashshanaadaaninne intte naata tamaarissanawu loytti giigettanaadan maaddees.—Luq. 6:40.

7, 8. Yelida uraa wozanay Geeshsha Maxaafaa tuman kumiyo wode, i waatii? Leemisuwaa yoota.

⁷ Geeshsha Maxaafaa tumay ne wozanan kumiyo wode hegaa ne soo asaara tobbanawu koyaasa. Gubaaˈe shiiquwawu giigettiyo wode woy so asaa goynuwaa wode xalla gidennan, ubbatookka hegaadan ootta. Hegaa bollikka, hegaa mala  haasayay ubba galla haasayiyoogaa mala gidana koshshees. Amarkkaa biittan deˈiya azinaynne machiyaa so asay issippe meretaa beˈiyo wode woy qumaa miyo wode, Yihoowabaa wotti dentti qoppoosona. Eti, “Nuuni Yihoowa siiquwaanne i ubbabaa waati medhidaakko nu naati hassayanaadan oottoos” yaagidosona. Tohossa Afirkkan deˈiya azinaynne machiyaa bantta naaˈˈu macca naatuura gaden oottiyo wode zerettay mokkiyoonne dicciyo maalaalissiya hanotaabaa etawu yootoosona. He azinaynne machiyaa, “Nu macca naati deˈuwaa keehi bonchanaadaaninne deˈoy keehi muttumurettidoogaa akeekanaadan baaxetoos” yaagidosona.

⁸ Awusttiraaliyaa biittan deˈiya issi aaway ba naˈawu layttay tammaa heera gidiyo wode, ba naˈay Xoossaa, qassi meretaa i medhidoogaa mintti ammananaadan maaddanawu muuzemiyaa bessanawu efiis. Aaway ammonoydenne trilobayte giyo abbaa giddon beni deˈiya meretata bessiyaabaa beˈidoogaa yootiis. I hagaadan giis: “Beni xayida ha meretati ha wodiyan nuuni beˈana danddayiyoogeetu mala keehi loˈˈiya, muttumurettidanne kumetta mereta gidiyoogee nuna keehi garamissiis. Hegaa gishshawu, deˈoy laafabaappe keehi muttumurettidabawu laamettidaba gidikko, beni wode deˈida ha meretati hegaa keena keehi muttumurettidaageeta gididoy aybissee? Hegaappe tana keehi maalaalissidabaa tamaaraas; qassi ta naˈawu hegaa yootaas.”

9. Leemisoti maaddiyoy aybissee, qassi issi aayyiyaa hegaa waata bessadee?

⁹ Yesuusi darotoo leemisuwaa goˈettees; hegee qofaanne wozanaa denttettees, qassi hassayanawu maaddees. (Maa. 13:34, 35) Naati loytti qoppana danddayoosona. Yaatiyo gishshawu, yelidaageetoo, tamaarissiyo wode leemisuwaa goˈettite. Jaappaanen deˈiya issi aayyiyaa hegaadan oottaasu. I naaˈˈu attuma naatu layttay hosppunanne tamma gidido wode, a eta salo gufanttuwan deˈiya carkkuwaabaanne Yihooway hegaa medhidoogee i nuussi qoppiyoogaa bessiyoogaa tamaarissaasu. Yaatanawu a he attuma naatuyyo maattaa, sukkaariyaanne tukkiyaa immaasu. Yaatada a baayyo tukkiyaa essanaadan he attuma naatussi huuphiyan huuphiyan yootaasu. A hagaadan gaasu: “Eti loytti qoppidi essidosona. Eti aybissi hegaadan qoppidaakko taani oychin, tukkee taani dosiyoogaa mala gidanaadan koyidoogaa yootidosona. Xoossay salo gufanttuwan deˈiya gaazeti nuussi giiga gidanaadan hegaadan qoppidi walakkidoogaa taani qonccissaas.” He leemisoy naatussi haniyaaba; qassi eti siyiyoogaappe aaruwan bantta huuphen oottidobaappe tamaaranaadan maaddiis. Eti he timirttiyaa daro layttawu hassayidoogee qoncce!

10, 11. (a) Ne naˈay Xoossan ammananaadan neeni aybaa leemisuwaa goˈettana danddayay? (Doomettan deˈiya misiliyaa xeella.) (b) Nena maaddida leemisoti awugeetee?

¹⁰ Ne naˈay Xoossan ammananaadan maaddanawu aybippe aybippe qumaa kattanaakko xaafidobaa goˈettana danddayaasa. Waatada? Neeni keekkiyaa katta simmada, hegawu xaafidobay waati maaddiyaakko yoota. Yaatada ne naˈaayyo appile mala mittaa ayfiyaa immada, “Ha appilee xaafi wottidobaa malabaappe merettidoogaa eray?” yaagada oycha. Oychada appiliyaa naaˈˈu kessa  qanxxada ayfiyaa ayyo imma. Kattana qumaabaa xaafido qaalaappe keehi muttumurettida qaalan xaafi wottidobay he ayfiyaa giddon deˈiyoogaa yootana danddayaasa. Qassi, “Keekkiyaa kattanawu ay ay goˈettanaakko xaafida uri deˈikko, hegaappe keehi muttumurettidabaa appiliyan xaafiday oonee?” gaada oychana danddayaasa. Gita naˈassi appiliyawu woy qassi appiliyaa ayfiya mittawu xaafi wottidobay Di en ee giyoobaa shaaho gidiyoogaa yootana danddayaasa. Qassi Deˈuwaa Doomettaa—Oychana Koshshiyo Ichashu Oyshata giyo brooshuriyan sinttaa 10ppe 20 gakkanaassi deˈiya misileta issippe beˈana danddayeeta.

¹¹ Daro aawatinne aayoti Beegottite! maxeetiyan kiyiya “Hagaa Giigissiday Deˈii?” giyo huuphe yohuwaa bantta naatuura tobbiyoogaa dosoosona. Woy qassi eti akeekanawu metennabaa guutta naata tamaarissanawu hegaa goˈettoosona. Leemisuwawu, Denmarkke biittan deˈiya azinaynne machiyaa horophilliyaa kafuwaara geeddarssoosona. Eti hagaadan giidosona: “Horophileti kafo mala. SHin horophilleti phuuphulliyaa phuuphullidi guutta horophilliyaa qoxana danddayiyoonaa? Kafuwawu uttiyoosaa giigissana koshshii? Qassi horophilliyaa cenggurssaa kafuwaa yettaara ane geeddarssa. Yaatin horophilliyaa medhidaagaappenne kafuwaa medhidaagaappe keehi eranchay oonee?” Loˈˈo oyshaa oychidi hegaa mala qofaa yootiyoogee naˈay ‘adussi qoppanaadaaninne’ Xoossan ammananaadan maaddana danddayees.—Lee. 2:10-12.

12. Naati Geeshsha Maxaafaa loytti ammananaadan leemisoy waatidi maaddana danddayii?

¹² Loˈˈo leemisoy issi naˈay Geeshsha Maxaafay likke gidiyoogaa mintti ammananaadankka oottana danddayees. Leemisuwawu, Iyyooba 26:7 (nabbaba) qoppa. Ha xiqisee geeshsha ayyaanay kaalettin xaafettidoogaa neeni waata qonccissana danddayay? Neeni hegaa qonccissiyaabaa coo yootiyoogaappe, ne naˈay qoppanaadan maaddiyaabaa oottiyoogee loˈˈo. Iyyoobi teleskoppeenne orokeetee merettanaappe daro layttaa kasetidi deˈidoogaa yoota. Ne naˈay biittaa mala keehi gitabay aybinne baynnasan uttidoogaa ammananawu issoti issoti metootiyoy aybissakko bessana danddayees. Deexxiyaabay issibaa bolli uttana koshshiyoogaa bessanawu ne naˈay kuwaasiyaa woy shuchaa goˈettana danddayees. Asay naqaashaa demmanaappe daro wodiyaa kasetidi, Yihooway tuma gididabaa Geeshsha Maxaafan xaafissidoogaa loytti akeekanawu hegaa mala timirttee maaddana danddayees.—Nah. 9:6.

13, 14. Naati Geeshsha Maxaafaa maaraa loytti akeekanaadan aawaynne aayyiyaa waatidi maaddana danddayiyoonaa?

¹³ Geeshsha Maxaafaa maaraa goˈˈaa ne naati loytti akeekanaadan neeni eta maaddiyoogee keehi koshshiyaaba. (Mazamure 1:1-3 nabbaba.) Hegaadan oottiyo daro ogeti deˈoosona. Leemisuwawu, ne naati keehi haaho haruuruwan deˈiyaabadaaninne yan banttanaara deˈana asata dooriyaabadan qoppanaadan oychana danddayaasa. Yaatada, “Yan deˈiya ubbay sarotettan siga deˈanaadan ubbaa eeshshay ay mala gidana bessii?” gaada oycha. Qassi Galaatiyaa 5:19-23n deˈiya loˈˈo zoriyaabaa etawu yootana danddayaasa.

¹⁴ Hegaappe naaˈˈu keehi koshshiyaabaa tamaarana danddayettees. Koyruwan, Xoossay kessido maaray tumu sarotettaynne issippetettay deˈanaadan maaddees. Naaˈˈanttuwan, Yihooway nuna haˈˈi tamaarissiyoogan ooratta alamiyaa deˈuwawu giigissiiddi deˈees. (Isi. 54:13; Yoh. 17:3) Issi ura deˈuwan hanidabaa nu xuufiyaappe doorada he qofaa akeekanaadan maaddana danddayaasa. Wochiyo Keelan darotoo kiyiya, “Geeshsha Maxaafay Asay Laamettanaadan Oottees” giyo huuphe yohuwaappe hegaa doorana danddayaasa. Woy qassi intte gubaaˈiyan deˈiya uri Yihoowa ufayssanawu daroban laamettidaba gidikko, inttenaara gayttidi ba taarikiyaa yootanaadan oottana danddayaasa. Hegaa mala leemisoti  Geeshsha Maxaafaa maaray qonccidi erettanaadan maaddoosona.—Ibr. 4:12.

15. Ne naata tamaarissiyo wode ne waanna halchoy ayba gidana koshshii?

¹⁵ Waanna yohoy hagaa: Ne naata tamaarissiyo wode meezetido hiilla xallaa goˈettoppa. Loyttada qoppanawu mala. Eta layttaa akeekada, eti qoppanaadan denttetta. Tamaariyoogee ufayssiyaabaanne ammanuwaa minttiyaaba gidanaadan ootta. Issi aaway, “Gamˈˈidabaa tamaarissanawu ooratta hiillaa mali beˈanawu salettoppite” yaagiis.

16. Naata tamaarissiyo wode, danddayiyoogee keehi koshshiyoy aybissee? Leemisuwaa yoota.

¹⁶ Ammanoy mino gidanaadan Xoossaa ayyaanaa koshshees. (Gal. 5:22, 23) Mittaa ayfiyaagaadan ammanoy diccana mala wodiyaa koshshees. Hegaa gishshawu, ne naata tamaarissiyo wode, neeni danddayananne genccana koshshees. Jaappaanen deˈiya naaˈˈu naatu aaway hagaadan giis: “Ta machiyaanne taani nu naatuura daro wodiyaa aattoos. Gubaaˈe shiiqoy deˈiyo gallassa gidana xayikko, eta naatettaappe doommada, taani galla galla 15 daqiiqa xannaˈissaas. Nuussikka etassikka 15 daqiiqay wayssiyaaba gidenna. Woradaa xomoosiya issi ishay hagaadan giis: “Yelagatettan taani oychabeenna daro oyshay woy yootabeenna siriyo darobay ta wozanan deˈees. Takkada, shiiquwan woy so asaa xinaatiyan woy buzo xinaatiyan hegeetuppe darotu zaaruwaa demmaas. Yelidaageeti aggennan tamaarissiyoogee keehi koshshiyoy hegaassa.”

17. Aawaynne aayyiyaa loˈˈo leemiso gidiyoogee koshshiyaaba gididoy aybissee, qassi issi azinaynne machiyaa bantta macca naatussi leemiso gidiyaabaa ay oottidonaa?

¹⁷ Keehi koshshiya issibay, neeni ammanuwan leemiso gidiyoogaa. Ne naati neeni oottiyoobaa loytti xeelloosona, qassi hegee eti loˈˈobaa oottanaadan denttettanaagee qoncce. Hegaa gishshawu, aawatoonne aayetoo, intte ammanuwaa ubbatoo minttite. Yihooway intteyyo ay keena qonccekkonne intte naati akeekanaadan oottite. Bermuda biittan deˈiya azinaynne machiyaa hirggiyo wode, Yihooway kaalettanaadan bantta naatuura woossoosona; qassi naatikka banttarkka woossanaadan minttettoosona. Eti hagaadan giidosona: “Nuuni nu bayra macca naˈeessi, ‘Kumetta wozanaappe Yihoowan ammanetta, Kawotettaabaa minnada ootta, qassi daro hirggoppa’ yaagoos. A hanidabaa wurssettan akeekiyo wode, Yihooway nuna maaddiyoogaa erawusu. Hegee a Xoossaanne Geeshsha Maxaafaa ammananaadan keehi maaddiis.”

18. Yelidaageeti akeekana bessiyaabay aybee?

¹⁸ Wurssettan, naati bantta ammanoy minnanaadan oottana koshshiyoogee tuma. Eta yelida intte tokkananne haattaa ushshana danddayeeta. Hegaa dichana danddayiyay Xoossaa xalla. (1 Qor. 3:6) Yaatiyo gishshawu, a ayyaana demmanawu woossitenne intte alˈˈo naata minni tamaarissite; ayssi giikko, intte yaatiyoogawu Yihooway inttena keehi anjjana.—Efi. 6:4.