1-2. Koyro Ximootiyoosa 6:20y yootiyoogaadan, Ximootiyoosassi imettidabay aybee?

NUUNI darotoo nuussi deˈiya alˈˈobaa harati naaganaadan hadaraa immoos. Leemisuwawu, nuuyyo deˈiya miishshaa bankkiyan wottana danddayoos. Nuuni hegaadan oottiyoy nu miishshay naagetti uttananne wuuqetti xayenna giidi qoppiyo gishshataassa. Hegaa gishshawu, nuuni alˈˈobadan xeelliyoobaa hara urawu hadaraa immiyoogee woygiyoogaakko akeekoos.

² Koyro Ximootiyoosa 6:20 nabbaba. Kiitettida PHawuloosi keehi alˈˈo gidida, hegeekka Xoossay asawu halchchido tumu eraa Ximootiyoosi demmidoogaa A hassayissiis. ‘Qaalaa yootiyoonne wonggeliyaa mishiraachchuwaa’ sabbakiyo aawatettaakka Yihooway Ximootiyoosassi immiis. (2 Xim. 4:2, 5) Ximootiyoosi bawu imettidabaa naaganaadan PHawuloosi minttettiis. Ximootiyoosaagaadan nuuyyookka keehi alˈˈobati imettidosona. Hegeeti aybee? Qassi Yihooway immido he alˈˈobata nuuni naagana koshshiyoy aybisee?

3-4. Geeshsha Maxaafaa tumay keehi alˈˈo giyo gaasoti aybee?

³ Yihooway ba Qaalan, Geeshsha Maxaafan deˈiya, alˈˈo gidida tumu eraa nuussi kehatettan immiis. He tumay nuuni Yihoowaara dabbotido dabbotaa waati minttanaakko, qassi deˈuwan tumu ufayssaa waati demmanaakko tamaarissiyo gishshawu keehi alˈˈo. Nuuni he tumata ammaniyo wode, worddo timirttiyan cimettokko, qassi geeshsha deˈuwaa deˈana danddayoos.—1 Qor. 6:9-11.

⁴ Xoossaa Qaalan deˈiya tumay alˈˈo gidido hara gaasoy ‘suure wozanaa koshshay’ deˈiyo banttana ziqqi oottiyaageetu xallawu Yihooway qonccissiyo gishshataassa. (Oos. 13:48, NW) Ha wodiyan ammanettida wozannaama ashkkaray Geeshsha  Maxaafaa tumaa nuna tamaarissiyoogaa banttana ziqqi oottiya asati ammanoosona. (Maa. 11:25; 24:45) Maadoy baynnan Geeshsha Maxaafaa akeekana danddayokko; qassi hegaa akeekiyoogaappe hara alˈˈobay baawa.—Lee. 3:13, 15.

5. Yihooway nuussi immido hara hadaray aybee?

⁵ Yihooway abaanne I halchchidobaa xeelliyaagan tumaa haratussi tamaarissiyo maataakka nuussi hadaran immiis. (Maa. 24:14) Nuuni sabbakanaadan Yihooway yootidobay asay A soo asaa yara gidanaadaaninne merinaa deˈuwaa demmanaadan maaddiyo gishshawu keehi alˈˈo. (1 Xim. 4:16) Nuuni haggaaziyoy daro gidin guutta gidin, ha wodiyan oosettiya aybippenne aadhdhiya oosuwaa maaddoos. (1 Xim. 2:3, 4) Xoossaara issippe oottiyoogee keehi gita maata!—1 Qor. 3:9, NW.

6. Xoossaara issippe oottiyo bantta maataa nashshennan aggida issoti issoti waanidonaa?

⁶ Ximootiyoosa wode deˈida issi issi Kiristtaaneti Xoossaara issippe oottiyo maataa nashshibookkona. Deemaasi ha saˈaa siiqido gishshawu, PHawuloosaara haggaaziyo maataa aggibayiis. (2 Xim. 4:10) Pigeluusinne Hermmogeneesi PHawuloosa gakkida yedetaa malay nuna gakkin tuggatana giidi yayyido gishshawu, haggaaziyoogaa aggidaba milatoosona. (2 Xim. 1:15) Hemeneyoosi, Iskkinddirinne Piliixoosi kaddidaageeta gididi Yihoowawu goynniyoogaa aggidosona. (1 Xim. 1:19, 20; 2 Xim. 2:16-18) He asati ubbay koyro Yihoowa siiqoosona; shin guyyeppe I etawu immido alˈˈobaa qoppiyoogaa aggidosona.

7. Seexaanay nuna cimmanawu goˈettiyo hiillati awugeetee?

⁷ Yihooway nuussi hadaraa immido alˈˈobaa agganaadan Seexaanay waati malii? Seexaanay goˈettiyo issi issi hiillata beˈa. Seexaanay Yihoowa siiqiyoogaa woy A higgetussi azazettiyoogaa loddan loddan agganaadan oottiya hanotan qoppanaadaaninne oottanaadan Televizhiiniyaanne eraadooniyaa malabata goˈettees. I asay nubaa haasayiyoobaa woy yedetaa goˈettidi nuuni sabbakiyoogaa agganaadan yashissanawu malees. Qassi I nuuni tumaa agganaadan kaddidaageeti “balan eratetta giyo” hada haasayaa siyanaadan oottidi nuna cimmanawu malees.—1 Xim. 6:20, 21.

8. Daaneela giyo ishaa hanotaappe nuuni ay tamaarana danddayiyoo?

⁸ Nuuni naagettana xayikko, loddan loddan tumaa aggana danddayoos. Biiduwaa kaassaa dosiya Daaneela * hanotaa qoppa. I hagaadan giis: “Taayyo layttay tammaa heeraa gidiyo wode biiduwaa kaassaa kaaˈiyoogaa doommaas. He kaassay koyro darin qohiyaabaa tawu milatibeenna. SHin loddan loddan  danobaaranne iita ayyaanaa oosuwaara gayttida biiduwaa kaassaa kaaˈiyoogaa doommaas.” Guyyeppe I galla galla 15 gidiya saatiyawu biiduwaa kaassaa kaaˈees. Daaneeli hagaadan giis: “Ta hanotaa tumuppe qoriyo wode, taani kaaˈiyo biiduwaa kaassaa qommoynne hegaa kaaˈaydda wurssiyo wodee Yihoowaara dabbotido dabbotay loddan loddan shugganaadan oottidoogaa akeekaas. Qassi, taani oottiyoobay Geeshsha Maxaafaara maayettennaagaa ta huuphiyaa ammanttaas.” Hegaa gishshawu, naagettana xayikko, allaxxiyoobati nuuni tumaa mintti oyqqennaadan oottana danddayoosona. Hegaadan hanikko, Yihooway nuussi immido alˈˈobay nuuppe halana danddayees.

9. Koyro Ximootiyoosa 1:18, 19y yootiyoogaadan, PHawuloosi Ximootiyoosa aybaara geeddarssidee?

⁹ Koyro Ximootiyoosa 1:18, 19 nabbaba. PHawuloosi Ximootiyoosa wotaaddaraara geeddarssiis; qassi “lo77o olaa [I] olettana mala” minttettiis. PHawuloosi yootido olay asay asaara olettiyo olaabaa gidenna. Kiristtaaneti olaa olettiya wotaaddaratu mala gididoy ayba ogiyaanee? Kiristtoosa wotaaddara gidanawu nuussi deˈana koshshiya eeshshati awugeetee? PHawuloosa leemisuwaappe nuuni tamaarana danddayiyo ichchashubata ane beˈoos. He tamaariyoobati nuuni tumaa mintti oyqqanaadan maaddana danddayoosona.

10. Xoossa milatiyoogee aybee, qassi hegee nuussi koshshiyoy aybissee?

¹⁰ Xoossaa milatiyaagaa gida. Loˈˈo wotaaddaray ammanettidaagaa. I dosiyo issi uraa woy xoqqu oottidi xeelliyo issibaa naaganawu minnidi olettana. PHawuloosi Ximootiyoosi Xoossaa milatanaadan, hegeekka Xoossaayyo ammanettidi deˈanaadan minttettiis. (1 Xim. 4:7) Nuuni kaseegaappe aaruwan Xoossaa siiqiyo wode, tumaakka kaseegaappe aaruwan mintti oyqqana.—1 Xim. 4:8-10; 6:6.

11. Suurebaa oottanawu nuna loohissana koshshiyoy aybissee?

¹¹ Suurebaa oottanawu nena loohissa. Wotaaddaray olawu ubbatoo giigi uttanawu bana loohissana koshshees. Ayyaanay denttettin PHawuloosi Ximootiyoosi iita amuwaappe baqatanaadan, Xoossaagaa mala eeshshaa kaallanaadaaninne Kiristtaanetuura laggetanaadan zoridobaa oosuwan peeshshido gishshawu ayyaanaaban minnidi deˈiis. (2 Xim. 2:22) Yaatanawu issi uri bana loohissana koshshees. Iita amuwaara olettidi xoonanawu nuna loohissana koshshees. (Roo. 7:21-25) Hegaa bollikka, ceega asatettaa xayssidi ooratta asatetta maayanawu ubbatoo nuna loohissana koshshees. (Efi. 4:22, 24) Qassi gallassa kumettaa daafuri peˈidi, shiiquwaa shiiqanawu nuna wolqqanttiyoogee koshshana danddayees.—Ibr. 10:24, 25.

12. Nuuni Geeshsha Maxaafaa goˈettiyoogan qara gidana danddayiyo ogeti aybee?

¹² Issi wotaaddaray ba olaa miishshaa waati goˈettanaakko meezetana koshshees. Hegaa goˈettiyoogan qara gidanawu ubbatoo meezetana koshshees. Hegaadan, nuunikka Xoossaa Qaalaa goˈettiyoogan qara gidana koshshees. (2 Xim. 2:15) Nuuni nu shiiqotun hegaadan oottiyo amarida ogeta tamaaroos. SHin Geeshsha Maxaafaa tumay alˈˈo gidiyoogaa harata ammanttanawu koyikko, nuuni Geeshsha Maxaafaa ubbatoo buzo xannaˈana koshshees. Nu ammanuwaa minttanawu Xoossaa Qaalaa goˈettana koshshees. Hegawu Geeshsha Maxaafaa nabbabiyoogaa xallay gidenna. Nuuni loytti akeekanawunne Geeshsha Maxaafaa zoriyaa oosuwan peeshshanawu nu nabbabidobaa wotti dentti qoppananne nu xuufetuppe pilggana koshshees. (1 Xim. 4:13-15) Yaatiyo wode Xoossaa Qaalaa goˈettidi harata tamaarissana danddayoos. Hegaa giyoogee etawu Geeshsha Maxaafaappe xiqisiyaa  nabbabiyoogaa xalla gidenna. Nuuni yootiyoobaa ezggiyaageeti xiqisiyaa akeekanaadaaninne hegaa oosuwan waati peeshshanaakko eta maaddanawu koyoos. Hegaa gishshawu, nuuni ubbatoo Geeshsha Maxaafaa xannaˈiyo wode, Geeshsha Maxaafaa tamaarissiyoogan gooba gidana danddayoos.—2 Xim. 3:16, 17.

13. Ibraawe 5:14 maaran, nuuni akeekanchcha gidana koshshiyoy aybissee?

¹³ Akeekanchcha gida. Issi wotaaddaray gakkana qohuwaa akeekidi hegaappe naagettana bessees. Nuunikka nuna qohana danddayiya hanotaa akeekidi he qohiyaabaappe haakkana koshshees. (Lee. 22:3; Ibraawe 5:14 nabbaba.) Leemisuwawu, nuuni wodiyaa aattiyoobaanne allaxxiyoobaa akeekan doorana koshshees. Televizhiiniyaa prograametinne pilimeti darotoo shori baynnabaa bessoosona. Hegaa malabay Xoossay hanqqettanaadan oottees; qassi guyyeppe hegee nuna qohiyoogee attenna. Yaatiyo gishshawu, nuuni Xoossaa siiqiyoogaa loddan loddan agganaadan oottiya allaxxiyoobatuppe naagettana koshshees.—Efi. 5:5, 6.

14. Akeekanchcha gidiyoogee Daaneela waati maaddidee?

¹⁴ Qommoora abaa denttido Daaneeli, danobaaranne iita ayyaanaa oosuwaara gayttida biiduwaa kaassati qohiyoogaa akeekiis. I ba metuwaa xoonanaadan maaddiyaabata Wachtawur Laybreeriyaappe pilggiis. Hegee A waati maaddidee? I iitaa biiduwaa kaassata kaaˈiyoogaa aggiis. I kaaˈiya haratuura deˈiya gaytotettaa aggiis. Daaneeli, “Taani he biiduwaa kaassata aggada gubaaˈiyan deˈiya ta laggetuura harabaa oottiyoogaa woy etaara wodiyaa aattiyoogaa doommaas” yaagiis. Daaneeli haˈˈi aqinyenne gubaaˈe cima.

15. Iita odoti qohiyoy aybissee?

¹⁵ Ximootiyoosaagaadan, kaddidaageeti aassiyo worddobay qohiyoogaa nuunikka akeekana bessees. (1 Xim. 4:1, 7; 2 Xim. 2:16) Leemisuwawu, eti nu ishanttubaa woy Yihoowa dirijjitiyaabaa siranaadan oottiya worddobaa yootanawu malana danddayoosona. Hegaa mala odoy nu ammanuwaa shugissana danddayees. He worddo oduwaa nuuni ammanana bessenna. Aybissi? Hegaa mala odota, qofay moorettidonne ‘tumatetti baynna asati’ aassiyo gishshaassa. Eta halchchoy ‘palamaanne ooshshaa’ denttanaassa. (1 Xim. 6:4, 5) Eti nuuni bantta wordduwaa ammananaadaaninne nu ishantta ammaniyoogaa agganaadan koyoosona.

16. Nu qofay shaahettanaadan oottiya aybippe nu naagettana koshshii?

 ¹⁶ Ne qofay shaahettanaadan oottoppa. Ximootiyoosi “Yesuus Kiristtoosayyo ammanettida wotaaddaradan,” bessiyaagaappe aaruwan aquwaaban xeelaa wottennan; qassi ba deˈuwan hara halchchuwaa kessiyoogan ba qofay shaahettanaadan oottennan haggaazuwaa ubbatoo qoppana koshshiis. (2 Xim. 2:3, 4) Nuunikka Ximootiyoosaagaadan, aquwaabaa keehi koyana bessenna. “Duretetta siiqiyoogee” Yihoowa loytti siiqennaadan, Xoossaa Qaalaa nashshennaadaaninne hegaa haratussi yootanawu koyiyoogaa agganaadan oottees. (Maa. 13:22) ‘Kasetidi Xoossaa Kawotetta koyanawu’ nuuni ubbatoo nu deˈuwaa sima oottana, qassi nu wodiyaanne wolqqaa hegawu goˈettana bessees.—Maa. 6:22-25, 33.  

17-18. Yihoowaara dabbotido dabbota naaganawu ay oottana danddayiyoo?

¹⁷ Sohuwaara oottanawu giigettidaagaa gida. Issi wotaaddaray bana naaganawu ay oottanaakko halchchana bessees. Yihooway nuuyyo hadaraa immidobata nuuni naaganawu koyikko, qohiyaabaa beˈiyo wode sohuwaara issibaa oottana koshshees. Hegaadan oottanawu nuna aybi maaddana danddayii? Qohiyaabay gakkiyo wode nuuni waatanaakko kasetidi halchchana koshshees.

¹⁸ Leemisuwawu, issi shiiquwaa shiiqiyo wode, shiiqoy doommanaappe kase kare kiyiyoosay matan awugaara deˈiyaakko darotoo shiiqiyaageeti oychchoosona. Aybissi? Qoppennabay merettikko, eti sohuwaara yaappe kiyana danddayiyo gishshataassa. Hegaadankka, nuuni Intternneetiyaa goˈettiyo wode, pilimiyaa woy Televizhiiniyaa beˈiyo wode qoppennan pokkobaa, danobaa, woy kaddidaageeti giigissidobaa beˈikko, nuuni ay oottana bessiyaakko halchchana koshshees. Hananabawu nuuni giigettikko, Yihoowaara dabbotido dabbota mintti naagana, qassi Yihoowa sinttan geeshsha gididi deˈana danddayoos.—Maz. 101:3; 1 Xim. 4:12.

19. Yihooway nuussi immido alˈˈobaa naagikko, nuuni demmana anjjoti aybee?

¹⁹ Yihooway nuussi immido alˈˈobata nuuni naagana koshshees; hegeetikka alˈˈo gidida Geeshsha Maxaafaa tumatanne hegaa haratuyyo tamaarissiyo maata. Nuuni yaatiyo wode, nuussi geeshsha kahay deˈana, nu deˈuwan ufayttana, qassi harati Yihoowa eranaadan maaddiyoogan ufayttana. Yihooway maaddin, nuussi I hadaran immidobaa naagana danddayoos.—1 Xim. 6:12, 19.