1-3. (a) Nu ammanuwawu waanna timirttetuppe issuwaadan nuuni xeellana koshshiyoy awugee? (b) Dendduwaa timirttee keehi koshshiyoy aybissee? (Doomettan deˈiya misiliyaa xeella.)

‘INTTE ammanuwawu waanna timirtteti awugeetee?’ giidi asay nena oychikko woygada zaaruutee? Yihooway Medhidaagaanne Deˈuwaa Immiyaagaa gidiyoogaa neeni yootanaagee erettidaagaa. Qassi nuna wozanawu hayqqida Yesuus Kiristtoosa ammaniyoogaa yootennan aggakka. Hegaa bollikka, saˈay sinttappe Xoossaa asay merinawu deˈiyo gannate gidanaagaakka neeni ufayssan yootana. SHin denddoy neeni keehi nashshiyo ammanuwaappe issuwaa gidiyoogaa yootuutee?

² Nuuni gita waayiyaappe attidi saˈan merinawu deˈanawu hidootikkokka, denddoy nu ammanuwawu waanna timirttetuppe issuwaa gidiyoogaa ammaniyo loˈˈo gaasoy deˈees. Kiitettida PHawuloosi, “Haiqqida urai haiquwaappe [denddennabaa] gidikko, yaatin hekko Kiristtoosikka haiquwaappe denddibeenna giyoogaa” yaagidi, denddoy nu ammanuwawu waanna timirtte gidiyoogaa qonccissiis. Kiristtoosi denddibeennabaa gidiyaakko, i nuna haariya Kawuwaa gidana danddayenna, qassi nuuni Kiristtoosa haaruwaabaa tamaarissiyoogeekka hada. (1 Qoronttoosa 15:12-19 nabbaba.) SHin, nuuni Yesuusi hayquwaappe denddidoogaa  eroos. Nuuni hegaadan ammaniyoogan Saaduqaawetuppe dummatoos. Eti hayqqidaageeti denddiyoogaa ammanokkona. Asay qilliiccikkonne, nuuni dendduwaa mintti ammanoos.—Mar. 12:18; Oos. 4:2, 3; 17:32; 23:6-8.

³ PHawuloosi ‘Kiristtoosabaa doometta timirttiyaa’ xeelliyaagan qonccissiiddi, ‘hayqoppe denddobaakka’ xaafiis. (Ibr. 6:1, 2) Qassi denddoy i ammaniyoobaa gidiyoogaakka yootiis. (Oos. 24:10, 15, 24, 25) Denddoy nuuni Xoossaa qaalaappe tamaariyo koyro timirtte gidikkonne, nuuni dendduwaabaa loytti xannaˈana koshshees. (Ibr. 5:12) Aybissi?

4. Dendduwaa xeelliyaagan nuuni oychana danddayiyo oyshati awugeetee?

⁴ Daro asay Geeshsha Maxaafaa xannaˈiyoogaa doommiyo wode, Alˈˈaazarabaanne beni aagaadan hayquwaappe denddidaageetubaa nabbabees. Qassi eti hayqqidaageeti sinttappe denddidi zaarettidi deˈanaagaa Abrahaami, Iyyoobinne Daaneeli ammanidoogaa tamaaroosona. SHin, hayqqidaageeti denddanaagawu gelido qaalay daro layttaappe, ubba qassi daro xeetu layttappe guyyiyankka polettanaagawu naqaasha nena oychiyaakko woygada zaaruutee? Qassi hayqqidaageeti awude denddanaakko Geeshsha Maxaafay yootii? Ha oyshatu zaaroy nu ammanuwaa minttana.

5. Dendduwaa xeelliyaagan nuuni koyro beˈanabay aybee?

⁵ Hayqqida uri daro takkennan denddiyoogaabaa qoppanawu waayi metana. (Yoh. 11:11; Oos. 20:9, 10) Gidoppe attin, daro layttappe, ubba qassi daro xeetu layttappe guyyiyan denddanaagaawu gelido qaalaa shin? He qaalay hegaadan adussa wodiyaappe guyyiyan polettiyaaba gidikkonne, issi uri hayqqidoy mata wode gidin daro wodiyaappe kasekka gidin, i denddanaagaa ammanettana danddayay? Qassi daro xeetu layttappe kase qaalaa gelido denddoy polettidoogaa neeni ammanaasa. He denddoy awugee? Qassi hegee neeni sinttappe deˈana dendduwan hidootiyoobaara waani gayttii?

6. Mazamure 118y Yesuusa bolli polettidoogaa bessiyaabay aybee?

⁶ Daro layttappe kase odettida dendduwaa xeelliyaagan Mazamure 118 ane beˈoos. Issoti issoti he mazamuriyaa Daawiti xaafiis giidi qoppoosona. He mazamuriyan, “Abeet GODAU, hai nuna ashsharkkii! . . . GODAA sunttan yiya asi anjjettidaagaa gido” giya woosay deˈees. Yesuusi hayqqanaappe guuttaa kasetidi Niisaana 9n Yerusalaame geliyo wode, asay Masiyaabaa yootiya ha qofaa haasayidoogaa neeni hassayennan aggakka. (Maz. 118:25, 26; Maa. 21:7-9) SHin, Mazamure 118y daro layttappe guyyiyan polettana dendduwaa waati yootii? He mazamuree yootiyo ha qofaa akeeka: “Gimbbiyaageeti karidi ixxido shuchchai, godaa xaphuwaa minttiya ubbaappe aadhdhiya shuchcha gidiis.”—Maz. 118:22.

7. Ayhudati Yesuusa ay keena ixxidonaa?

⁷ “Gimbbiyaageeti” woykko Ayhuda haymaanootiyaa kaalettiyaageeti Masiyaa karidi ixxidosona. Eti a ixxidoy ayyo zokkuwaa zaariyoogaa woy i Kiristtoosa gidiyoogaa ekkenna ixxiyoogaa xallaana gidenna. Daro Ayhudati a keehi ixxido gishshawu, i hayqqanaadan koyidosona. (Luq. 23:18-23) Eti ubba Yesuusi hayqqanaadan oottidosona.

8. Yesuusi “godaa xaphuwaa minttiya, ubbaappe aadhdhiya shuchcha” waani gidana danddayii?

⁸ Eti Yesuusa ixxidi woridaba gidikko, i waanidi “godaa xaphuwaa minttiya ubbaappe aadhdhiya shuchcha” gidana danddayii? Hegee polettana danddayiyoy i hayquwaappe denddiyoogaa xallaana. Yesuusi hegaa qonccissiya leemisuwaa yootiis. Israaˈeelati  Xoossay kiittin hananabaa yootiyaageeta qohidoogaadan, gadiyaa goday kiittidoogeeta kottaa oottiyaageeti qohidoogaa bessiya leemisuwaa i yootiis. Leemisuwaa wurssettan, gadiyaa goday babaa laatissiyo ba siiqiyo naˈaa kiittiis. Eti naˈaa mokki ekkidonaa? CHiikka! Kottaa oottiyaageeti naˈaa woridosona. Yesuusi he leemisuwaa yooti simmidi, Mazamure 118:22n deˈiya hiraagaa odiis. (Luq. 20:9-17) Kiitettida PHeexiroosi Ayhudata ‘haariyaageeti, eta cimatinne higgiyaa tamaarissiyaageeti Yerusalaamen yaaˈidaageeta’ haasayissido wode ha xiqisiyaa goˈettiis. Mittaa ‘bolli misimaariyan eti xishidi kaqqin, Xoossai haiquwaappe denttido Naazireeta Yesuus Kiristtoosabaa’ i etawu yootiis. He wode PHeexiroosi qonccissidi hagaadan giis: “Gimbbiyaageeti intte karidi ixxido shuchchai, godaa xaphuwaa minttiya, ubbaappe aadhdhiya shuchcha gidiis; he shuchchai Yesuusa.”—Oos. 3:15; 4:5-11; 1 PHe. 2:5-7.

9. Mazamure 118:22n kasetidi odettida maalaalissiya hanotay aybee?

⁹ Mazamure 118:22y daro xeetu layttappe guyyiyan polettana dendduwaabaa yootees. Masee ixettananne hayqqana; shin i godaa xaphuwaa minttiya, ubbaappe aadhdhiya shuchcha gidanawu hayquwaappe denddana. Yaaniyoogan, hayquwaappe denddida he Naˈaa xalaalay ‘nuuni attana mala asassi imettida’ sunttay deˈiyoogaa gidiis.—Oos. 4:12; Efi. 1:20.

10. (a) Mazamure 16:10y kasetidi yootidobay aybee? (b) Nuuni Mazamure 16:10y Daawitabaa yootenna giyoy aybissee?

¹⁰ Dendduwaabaa yootiya hara xiqisiyaa ane beˈoos. He denddoy daro xeetu layttappe guyyiyan polettiis. Odettoosappe woy qaalaa geloosappe daro wodee aadhin, hayqqida uri denddana danddayiyoogaa nuuni ammanettanaadan hegee maaddees. Mazamure 16 n Daawiti, “Tana Si7ooliyau aattada immakka; neeni nenan ammanettiyaagaa musissakka” yaagidi xaafiis. (Maz. 16:10) Daawiti hegaadan giidoy i mule hayqqennaagaa woy duufuwan gelennaagaa yootanaassa gidenna. Xoossaa Qaalay Daawiti ceeggidoogaa qonccissidi yootees. Hegaappe simmin i hayqqiis; i “haiqqidi, ba maizzan gaittiis; yaatidi Daawita Kataman moogettiis.” (1 Kaw. 2:1, 10) Yaatin, Mazamure 16:10y obaa yootii?

11. PHeexiroosi Mazamure 16:10n deˈiya qofaa qonccissidoy awudee?

¹¹ Daawiti hegaa xaafoosappe issi shaˈu layttappe daroy aadhin, Mazamure 16:10y obaa yootiyaakko PHeexiroosi qonccissiis. Yesuusi hayqqidi denddin amarida saaminttaappe guyyiyan PHeexiroosi shaˈan qoodettiya Ayhudatussinne Ayhuda ammanuwawu laamettidaageetuussi haasayiis. (Oosuwaa 2:29-32 nabbaba.) I Daawiti hayqqidoogaanne moogettidoogaa yootiis. PHeexiroosi yootiyoobaa siyiyaageeti hegaa eroosona. PHeexiroosi Daawiti yaana Masiyaa “dendduwaa sinttau” xeellidoogaa yootiis. Qassi he asatuppe ooninne hegaa palamettidoogaa qonccissiyaabi xaafettibeenna.

12. Mazamure 16:10y waani polettidee, qassi hegee dendduwaa hidootaabaa ay ammananaadan oottii?

¹² PHeexiroosi ba yohuwaa minttanawu Daawiti Mazamure 110:1n haasayidobaa yootiis. (Oosuwaa 2:33-36 nabbaba.) PHeexiroosi Geeshsha Maxaafaa maaran qonccissidoogee Yesuusi “Godanne Kiristtoosa” gidiyoogaa he cora asaa ammanttanawu maaddiis. Qassi he asay Yesuusi hayquwaappe denddido wode Mazamure 16:10y polettidoogaa akeekiis. Guyyeppe, kiitettida PHawuloosi PHisddiyaa biittan Anxxookiyan deˈiya Ayhudatussi yootiyo wode, hegaara issi malabaa qonccissiis. I yootidobay eta keehi maalaaliis; yaatin eti i yootiyoobaa gujjidi siyanawu koyidosona. (Oosuwaa 13:32-37, 42 nabbaba.) Geeshsha Maxaafay  sinttappe asay hayquwaappe denddanaagaa yootiyoobay ammanttiyaaba. Hegee daro xeetu layttappe guyyiyan polettikkokka, nuuni ammanana bessees.

13. Dendduwaa xeelliyaagan nuuni oychana danddayiyo oyshati awugeetee?

¹³ Qaalaa geloosappe daro xeetu layttay aadhinkka asay hayquwaappe denddana danddayiyoogee nuna minttettana bessees. SHin issi uri, ‘Hegee ta siiqiyo uri hayquwaappe denddin beˈanawu taani daro wodiyaa naaganaagaa bessiyaabee? Taani hidootiyo denddoy awude polettanee?’ giidi oychana danddayees. Yesuusi i kiittidoogeeti erennabaynne erana danddayennabay deˈiyoogaa etawu yootiis. “Aawai ba godatettan keerido aginaanne wodiyaa” xeelliyaagan qonccibeenna darobay deˈees. (Oos. 1:6, 7; Yoh. 16:12) Gidikkonne, hegee denddoy awude polettiyaakko nuuni aynne erokko giyoogaa gidenna.

14. Yesuusa denddoy appe kase denddida asatuugaappe waani dummatii?

¹⁴ Hegaa akeekanawu, Geeshsha Maxaafay kasetidi yootiyo denddotubaa hassaya. Ubbappe aadhiyaagee Yesuusa dendduwaa. I denddibeennabaa gidiyaakko, nuuppe issoynne nu siiqiyoogeeti denddin beˈokko. Hara baggara qassi, Eelaasinne Elssaaˈi hayquwaappe denttidoogeetu mala, Yesuusa wodeppe kase denddidaageeti merinawu deˈibookkona. Eti zaarettidi hayqqidosonanne duufuwan musidosona. SHin, Yesuusi ‘hayquwaappe denddiis, qassi naaˈˈanttuwaa i hayqqennanne hayqoy sinttappe a haarenna.’ I saluwan “meri merinaukka” deˈees; a bollay mule musenna.—Roo. 6:9; Ajj. 1:5, 18; Qol. 1:18; 1 PHe. 3:18.

15. Yesuusi “baira” geetettidoy aybissee?

¹⁵ Hayquwaappe denddidi ayyaana mereta gididi saluwaa biida koyroogee Yesuusa, qassi a denddoy keehi gitaba. (Oos. 26:23) SHin saluwaa baanawu ayyaana mereta gididi denddanaagee odettidoy a xalla gidenna. Yesuusi i kiittido ammanettidaageeti saluwan aara haaranaagaa etawu yootiis. (Luq. 22:28-30) Eti he woytuwaa ekkanawu kasetidi hayqqana koshshees. Hegaappe simmidi, eti Kiristtoosaagaadan ayyaana mereta gididi denddana. PHawuloosi “Kiristtoosi haiqqidaageetu dendduwaassi baira gididi, haiquwaappe” denddidoogaa yootiis. PHawuloosi haratikka saluwaa deˈuwaa demmanawu denddanaagaa yootiiddi hagaadan giis: “Ubbaikka ba kayan kayan denddana. Kiristtoosi ubbaappe kasetidi denddiis; hegaappe guyyiyan, Kiristtoosaageeti Kiristtoosi yiyo wode denddana.”—1 Qor. 15:20, 23.

16. Saluwan deˈanawu denddiyo dendduwaa wodiyaabaa qonccissiyaabi aybee?

¹⁶ Hegee saluwan deˈanawu denddiyo  dendduwaa wodiyaa nuuni eranaadan maaddees. He denddoy “Kiristtoosi yiyo wode” hanana. Yihoowa Markkati daro layttawu Geeshsha Maxaafaappe 1914⁠ppe doommidi Yesuusi “yiyo,” kasetidi odettida wodiyan nuuni deˈiyoogaa qonccissidosona. Ha iita alamee xayiyo wodee haˈˈi keehi matiis.

17, 18. Kiristtoosi yiyo wode tiyettidaageetuppe issoti issoti waananee?

¹⁷ Geeshsha Maxaafay saluwan deˈanawu denddiyo dendduwaa xeelliyaagan gujjidi hagaadan gees: “Haiqqida asatubaa intte erana mala koyoos. . . . Nuuni Yesuusi haiqqidoogaanne qassi haiquwaappe i denddidoogaa ammanoos; hegaadankka, Xoossai . . . haiqqidaageeta Yesuusaara ehaanaagaa ammanoos. . . . Nuuni paxa de7iyaageeti, Godai yiyo gallassi hagan de7iyaageeti, haiqqidaageetuppe kasetokko. Aissi giikko, Godai ba huuphen azazuwaara . . . saluwaappe wodhdhana. Kiristtoosa ammanidi haiqqidaageeti kasetidi haiquwaappe denddana. Hegaappe guyyiyan, nuuni he wode paxa de7iyaageeti, Godaara carkkuwaa giddon gaittanau etaara issippe shaaran pude shiiqana. Hegan nuuni Godaara issippe ubba wode de7ana.”—1 Tas. 4:13-17.

¹⁸ Kiristtoosa ‘yuussay’ doommoosappe guutta wodee aadhi simmin, koyro denddoy polettana. Gita waayiyaa wode deˈiya, ayyaanan tiyettidaageeti “shaaran pude shiiqana.” (Maa. 24:31) “Pude” denddiyaageeti ‘hayquwan’ xiskkokkona woy hayqqidi daro wode takkokkona. Eti “wurssetta malkkatai punettiyo wode, liphida aifee xeellanaassi hassayennan laamettana.”—1 Qor. 15:51, 52.

19. Sinttappe nuuni naagiyo ‘kehiya denddoy’ aybee?

¹⁹ Ha wodiyan, ammanettida daro Kiristtaaneti Kiristtoosaara saluwan oottanawu ayyaanan tiyettibokkona. Gidikkonne, eti “Godaa gallassai” yin ha iita alamee xayanaagaa naagoosona. He gallassay awudekko ooninne erana danddayenna; shin naqaashay he gallassay matidoogaa bessees. (1 Tas. 5:1-3) Hegaappe simmin, hayqqidaageeti gannate gidiya saˈan deˈanawu denddana. He asati wotoy baynna asa gidanawunne zaarettidi hayqqennan deˈanawu denddana. Hegee beni wode denddidi zaarettidi hayqqidaageetuugaappe ‘kehiya denddo.’—Ibr. 11:35.

20. Nuuni sinttappe asay kayan kayan denddanaagaa ammanettana danddayiyoy aybissee?

²⁰ Saluwan deˈanawu denddiyaageeta xeelliyaagan Geeshsha Maxaafay “ubbaikka ba kayan kayan” denddanaagaa yootees. (1 Qor. 15:23) Hegaadankka, saˈan deˈanawu denddiyaageeti kayan kayan denddanaagaa nuuni ammanettana danddayoos. Hegee nuuni kaalliyaagaadan oychanaadan oottana danddayees. Mata wode hayqqidaageeti Kiristtoosa SHaˈu Layttaa Haaruwaa doomettaa heeran denddin, eta siiqiyaageeti eta mokkanee? Beni wode deˈida, kaalettiyo eray deˈiyo ammanettida asati ooratta alamiyan Xoossaa asaa darajjayiyoogan maaddanawu kasetidi denddanee? Yihoowawu haggaazi erenna asay shin? Eti denddanay awudee; qassi awaanee? Daro oyshata oychana danddayoos. SHin, haˈˈi ha oyshatubaa qoppana koshshii? Hegee gakkiyo wode beˈiyoogee loˈˈo. Yihooway oottiyoobaa beˈiyoogee keehi ufayssanaagaa ammanettoos.

21. Dendduwaa xeelliyaagan ne hidootay aybee?

²¹ He wode gakkanaashin, Xoossay hassayiyo hayqqidaageeti denddanaagaa nuuyyo Yesuusa baggaara yootida Yihoowa mintti ammanana bessees. (Yoh. 5:28, 29; 11:23) Yihooway hayqqidaageeta denttana danddayiyoogaa qonccissanawu, Yesuusi issi wode Abrahaami, Yisaaqinne Yaaqoobi ‘ayyo paxa deˈiyaageeta’ gidiyoogaa yootiis. (Luq. 20:37, 38) Nuunikka PHawuloosaagaadan, ‘Hayqqidaageeti denddanaagaa Xoossaa ammanays’ gaanaadan oottiya daro gaasoy deˈees.—Oos. 24:15.