1. Xammaqettiyoogee keehi koshshiyaaba gididoy aybissee? (Doomettan deˈiya misiliyaa xeella.)

GEESHSHA MAXAAFAA xannaˈissiyoogeetuppe shaˈan qoodettiyaageeti layttan layttan xammaqettoosona. Etappe daroti panttatettan deˈiyaageeta woy hegaappekka yelagiyaageeta. Eti tumaa tamaaridi diccennan aggokkona. Neenikka hegeetu mala yelagee? Gidikko, loyttadasa. Xammaqettiyoogee Kiristtaanetuppe koyettiyaabaa; qassi atotettaa demissiya ogetuppe issuwaa.—Maa. 28:19, 20; 1 PHe. 3:21.

2. Issi uri ba huuphiyaa Yihoowawu geppiyoogee yayyiyooba woy aggiyooba gidennay aybissee?

² Xammaqettiyoogee daro anjjo demissiyaaba gidikkonne, polana bessiyaabaykka deˈees. Neeni polidobay aybee? Neeni xammaqettido gallassi, “Yesuus Kiristtoosa yarshshuwan ammanidi, Yihoowa sheniyaa oottanawu intte nagaraappe simmidi, intte huuphiyaa ayyo geppidetii?” giya oyshawu ee gaada zaaradasa. Neeni xammaqettidoogee ne huuphiyaa Yihoowawu geppidoogaa bessees. Hegee neeni Yihoowa siiqanawunne hara aybippenne  sinttayada a sheniyaa oottanawu awu qaalaa gelidoogaa bessiyaaba. Neeni hegaadan qaalaa gelido gishshawu zilˈˈettana bessii? CHii, mule zilˈˈettana bessenna. Yihooway nena kaalettanaadan eeno giidoogan mule zilˈˈettakka. Yihoowa erennaageeti Seexaanawu haarettoosona! Dabloosi etawukka neeyyookka mule qoppenna. Neeni awu exatada Yihoowa haaruwaa eqettin neeppe merinaa deˈoy halikko, Dabloosi ufayttana.

3. Ne huuphiyaa Yihoowawu geppiyoogee ay anjjo demissii?

³ SHin Dabloosawu exatiyoogaappe, ne huuphiyaa Yihoowawu geppada xammaqettida Kiristtaane gidiyoogan demmiyo anjjuwaa qoppa. Neeni ne deˈuwaa Yihoowawu immido gishshawu, awudeegaappenne aaruwan an ammanettada hagaadan gaana danddayaasa: “GODAI tanaara de7iyo gishshau, taani yayyikke. Asi tana ai oottii?” (Maz. 118:6) Xoossaa bagga gidiyoogeenne an nashettiyoogee neeni demmana danddayiyo maata ubbaappe aadhiyaaba.

4, 5. (a) Ba huuphiyaa Yihoowawu geppiyoogee issi uri polana bessiyaaba gididoy ayba ogiyaanee? (b) Yelagatu xallaa gakkenna paaceti awugeetee?

⁴ Neeni xammaqettida Kiristtaane gidada Yihoowaara dabbotidoogee intte so asaa deˈuwawu koshshiyaabaa mala gidenna; hegaa kunttiyaageeti ne aawaanne ne aayyiyo. SHin, neeni ne aawaanne aayee keettan deˈikkokka, ne atotettawu koshshiyaabaa ne oottana bessees. Hegaa hassayana koshshiyoy aybissee? Sinttappe nena gakkana paaciyaa kasetada neeni ubbatoo erana danddayenna gishshataassa. Leemisuwawu, neeni naatettan xammaqettikko, panttatettaa wodiyan neeyyo siyettiyaabaynne nena metiyaabay kase erennaba gidana danddayees. Issi 18 laytta naˈiyaa hagaadan gaasu: “Issi naˈi timirtte keettan yeleta gallassaa bonchiyo wode keekkiyaa meenna gishshawu, Yihoowa Markka gidiyoogan darotoo azzanenna. SHin hegaappe amarida layttay aadhi simmin asho gaytotettaa amoy keehi wolqqaamiyo wode, Yihoowa higgiyawu azazettiyoogee ubbatoo loˈˈo gidiyoogaa i woy a mintti ammanana koshshees.”

⁵ Kase erenna paacee gakkiyoogeeti yelagata xalla gidokkona. Gasttidi xammaqettidaageetussikka ammanuwaa paacciya qoppibeenna darobay gakkana danddayees. He paacee aqo deˈuwaara, payyatettaara, woy oosuwaara gayttidaagaa gidana danddayees. Yelaga gidin gastta gidin, oonakka Yihoowawu ammanettiyoogaa bessana koshshiyaabay gakkees.—Yaaq. 1:12-14.

6. (a) Neeni Yihoowawu qaalaa gelidoy ubbabaana gidiyoy ayba ogiyaanee? (b) Piliphphisiyuusa 4:11-13n deˈiya qofaappe neeni ay tamaarana danddayay?

⁶ Ay hanotankka neeni ammanettada deˈanaadan maaddana mala, neeni ubbaban Yihoowawu qaalaa gelidoogaa hassaya. Hegaa giyoogee ne laggeti woy nena yelidaageeti aggikkokka, neeni Ubbabaa Haariyaagawu ubbatoo haggaazanaagaa ayyo yootadasa giyoogaa. (Maz. 27:10) Ubba hanotatunkka, neeni gelido qaalaa naaganaadan Yihooway maaddana mala woossa.—Piliphphisiyuusa 4:11-13 nabbaba.

7. “Yashshatettaaninne kokkorssan” ne atotettawu baaxetiyoogaa giyoogee woygiyoogee?

⁷ Yihooway neeni a dabbo gidanaadan koyees. SHin neeni he dabbotaa naagada deˈanawunne ne atotettawu koshshiyaabaa oottanawu baaxetana bessees. Piliphphisiyuusa 2:12y, “Yashshatettaaninne kokkorssan intte atotettaa polanau oottite” yaagees. He qofay neeni waatada Yihoowaara dabbotaa minttadanne ayba metoy gakkikkokka ayyo ammanettada deˈanaakko qoppana koshshiyoogaa bessees. Nuuni nu akeekan zemppana koshshenna. Xoossawu daro wodiyawu oottidaageetuppe issoti issotikka ayyo ammanettennan aggidosona. Yaatiyo gishshawu, ne  atotettawu baaxetanawu ay oottana danddayay?

8. Geeshsha Maxaafaa xannaˈiyoogaa giyoogee woygiyoogee, qassi hegee keehi koshshiyoy aybissee?

⁸ Nuuni Yihoowa dabbo gidanawu, i yootiyoobaa siyananne aara haasayana koshshees. Nuuni Geeshsha Maxaafaa xannaˈiyoogee Yihooway yootiyoobaa siyiyo waanna oge. Yaatanawu, Xoossaa Qaalaanne Geeshsha Maxaafaa qofay deˈiyo xuufeta nabbabiyoogaaninne wotti dentti qoppiyoogan eraa demmana koshshees. SHin, Geeshsha Maxaafaa xannaˈiyoogee timirtte keettaa eraa mala gidennaagaa hassaya. He xinaatee neeni timirtte keettaa paaciyaa aadhana xallawu tamaaridobaa hassayiyoogaa mala gidenna. SHin hegee neeni Yihoowabaa oorattabaa pilggada eriyo ufayssiya manddaraa biyoogaa mala. Geeshsha Maxaafaa xannaˈiyoogee neeni Xoossaakko shiiqanaadan maaddana; yaatikko i neekko shiiqana.—Yaaq. 4:8.

9. Neeni Geeshsha Maxaafaa xannaˈiyo wode nena maaddidabati aybee?

⁹ Xannaˈanawu nena maaddiya darobaa Yihoowa dirijjitee giigissiis. Leemisuwawu, jw.org saytiyan “Yelagata” giyaagaa garssan deˈiya, “Geeshsha Maxaafaa Xannaˈiyo Meezeta” giyaagee Geeshsha Maxaafaappe neeni goˈˈiyaabaa tamaaranaadan maaddana danddayees. Qassi jw.org saytiyan xannaˈanawu giigida, “Tumuppe Geeshsha Maxaafay Tamaarissiyoy Aybee?” giya qofay neeni mintta ammananaadan maaddana danddayees. He qofay neeni ne ammaniyoobaa haratuyyo waata yootanaakko eranaadan nena maaddana danddayees. Xannaˈanawu maaddiya hara qofay Hosppune 2009 Beegottite! maxeetiyan kiyida, “Yelagati Oychiyo Oyshaa . . . Geeshsha Maxaafaa Nabbabiyoogan Waanada Ufayttana Danddayiyaanaa?” giya huuphe yohuwan deˈees. Neeni xannaˈiyoogeenne wotta dentta qoppiyoogee ne atotettawu baaxetanawu keehi koshshiyaabata.—Mazamure 119:105 nabbaba.

10. Xammaqettida Kiristtaaniyawu woosay keehi koshshiyoy aybissee?

¹⁰ Geeshsha Maxaafaa xannaˈiyoogee Yihooway yootiyoobaa siyiyo issi oge; qassi woosay Yihoowa haasayissiyo oge. Issi Kiristtaanee woosaa coo meezedan xeellana bessenna woy qassi hegee baaxetiyo issibay coo  qaadadan yaa ushachanaadan oottiyaabadan qoppana bessenna. Woosay nuna Medhidaagaara haasayiyo oge. Yihooway ne woosaa siyanawu koyees. (Piliphphisiyuusa 4:6. nabbaba.) Nena hirggissiya aybinne gakkiyo wode, Geeshsha Maxaafay “ne toohuwaa Xoossan” wottanaadan zorees. (Maz. 55:22) Neeni hegaa tumuppe ammanay? Miilooniyan qoodettiya ishanttinne michontti he zoree banttana maaddidoogaa neeyyo yootana. Hegee nenakka maaddana danddayees!

11. Neeni ubbatoo Yihoowa galatana koshshiyoy aybissee?

¹¹ Woosay Yihooway maaddanaadan oychiyoogaa xalla gidenna. Geeshsha Maxaafay, “Xoossaa galatite” yaagees. (Qol. 3:15) Issi issitoo nu metuwaabaa xallaa qoppidi, nuuni demmido daro anjjuwaa akeekennan aggana danddayoos. Neeni Yihoowa galatana danddayiyo heezza gidiyaabaa galla galla qoppiyoogee loˈˈo. Yaatada, he anjjotu gishshawu woosan Yihoowa galata. I layttay 12 gidin xammaqettida Abigaalo giyo yelagiyaa hagaadan gaasu: “Saluwan saˈan deˈiya ooppenne aaruwan nu galatana bessiyoy Yihoowa gaada qoppays. I nuussi immido imotaa gishshawu, a nuuni ubbatoo galatana bessees. Issi wode ha keehi loˈˈo hassayissuwaa siyaas: Nuuni wontto xiskkuwaappe beegottiyo wode deˈanabay hachi Yihoowa galatidobaa xalla gidiyaakko nuuni ay demmanee?” *

12, 13. Neeni Yihoowa kehatettaa ne deˈuwan waata beˈidaakko qoppiyoogee keehi koshshiyoy aybissee?

¹² Keehi iita, daro metotuppe attida beni wode Kawoy Daawiti, “GODAI keha gidiyoogaa xeelli be7ite. Akko baqatiya asi anjjettidaagaa” yaagidi yexxiis. (Maz. 34:8) Ha xiqisee nu deˈuwan beˈiyoobaa goˈˈaa qonccissees. Neeni Geeshsha Maxaafaanne nu xuufeta nabbabiyo wode, qassi gubaaˈe shiiquwaa shiiqiyo wode, harati ammanettidi deˈanaadan Xoossay waati maaddidaakko minttettiyaabaa siyaasa. Gidoppe attin, neeni Yihoowaara dabbotaa mintta mintta biyo wode, Yihooway nena waati maaddiyaakko neeni akeekana koshshees. Neeni Yihoowa kehatettaa ne deˈuwan waata beˈadii?

¹³ Kiristtaaneti ubbay Yihoowa kehatettaa beˈido issi ogee deˈees. Xoossaakkonne a naˈaakko shiiqanaadan shoobettiyoogan hegaa beˈidosona. Yesuusi, “Tana kiittida ta Aawai taakko ehiido asappe attin, taakko yaanau danddayiya asi baawa” yaagiis. (Yoh. 6:44) Yihooway nena baakko ehiidobadan neeyyo siyettii? Issi yelagay, ‘Yihooway ta aawaanne ta aayyiyo baakko ehiis; qassi taani coo kaallays’ giidi qoppana danddayees. SHin neeni ne huuphiyaa Yihoowawu geppada xammaqettido wode, aara dumma dabbotaa medhadasa. Neeni haˈˈi tumuppe an erettadasa. Geeshsha Maxaafay, “Ooninne Xoossaa siiqikko, Xoossai a erees” yaagees. (1 Qor. 8:3) Yihoowa dirijjitiyan neeyyo deˈiya sohuwaa ubbatoo nashsha.

14, 15. Haggaazoy ne ammanuwaa minttanawu nena waati maaddana danddayii?

¹⁴ Haratuyyo ne ammaniyoobaa yootiyoode Yihooway maaddiyoogaa beˈiyo wodekka a kehatettaa neeni xeella beˈaasa. Neeni haggaazuwaaninne timirtte keettan hegaadan oottana danddayaasa. Issoti issoti banttanaara tamaariyaageetuyyo sabbakanawu metootoosona. Hegee aybissi metiyaakko akeekennan aggakka. Haasayissiyo uri woygidi zaaranaakko erana danddayettenna. Qassi nenaara tamaariya issi urawu yootiyoogaappe, darotussi yootiyoogee keehi metana danddayees. Yaatin, nena aybi maaddana danddayii?

¹⁵ Koyruwan, ne ammaniyoobaa ayssi ammaniyaakko qoppa. Nu websaytiya jw.orgiyan  xannaˈanawu giigidabay ne qaalan deˈikko, hegaa loytta goˈetta. He qofay neeni ay ammaniyaakko, aybissi ammaniyaakko, qassi haratuyyo hegaa waata yootana danddayiyaakko qoppanaadan nena maaddees. Neeni mintta ammaniyoonne loytta giigettiyo wode, Yihoowabaa markkattanawu koyana.—Erm. 20:8, 9.

16. Neeni ammaniyoobaa yayyennan yootanaadan aybi maaddana danddayii?

¹⁶ Neeni giigettiyaaba gidikkokka, ne ammaniyoobaa yootanawu yayyana danddayaasa. I layttay 13 gidin xammaqettida 18 laytta michiyaa, “Taani ammaniyoobaa erays; shin ta qoppiyoobaa yootanawu issi issitoo metootays” yaagaasu. A he metuwaa waata xoonadee? A hagaadan gaasu: “Taani hara wodiyaagaadan haasayanawu malays. Tanaara tamaariyaageeti bantta oottidobaa koyidoogaadan haasayoosona. Taanikka yayyennan hegaadan haasayana bessees. Yaatiyo gishshawu, haasayaa gidduwan, ‘Taani ini galla Geeshsha Maxaafaa tamaarissaydda . . . ’ giyoogaa malabaa gujjays. Yaagada, taani odaydda aggido qofaakko simmays. Haasayiyoobay Geeshsha Maxaafaabaa gidana xayikkonne, taani Geeshsha Maxaafaa tamaarissanawu ay oottiyaakko issi issitoo harati eranawu koyoosona. Eti issi issitoo tana hegaabaa oychoosona. Taani hegaadan darotoo oottiyo wode metootikke. Yaata simmada, taani ubbatoo ufayttays!”

17. Neeni ne ammanuwaa xeelliyo ogee haratuyyo yootanaadan waati maaddana danddayii?

¹⁷ Neeni haratuyyo qoppiyoonne eta bonchiyo wode, etikka nenanne neeni ammaniyooba bonchanawu metootokkona. Layttay 17 gidido amarida layttappe kase xammaqettida Oliviyaa hagaadan gaasu: “Taani haasayaydda Geeshsha Maxaafaabaa denttikko, asay tana zozzidaaro gees gaada yayyays.” Guyyeppe harabaa qoppiyoogaa doommaasu. Oliviyaa bana yashshiyaabaa daro qoppiyoogaappe hagaadan gaada qoppaasu: “Daro yelagati Yihoowa Markkatubaa aybanne erokkona. Eti eriyo Yihoowa Markkati nu xalaala. Hegaa gishshawu, nu hanotay eti zaaranabawu gaaso gidana danddayees. Nuuni dungguuxa woy nu ammaniyoobaa yootanawu metootiyaaba, woy asawu yootiyo wode yayyiyaaba gidikko shin? Yaanikko, eti nuuni Yihoowa Markka gidiyoogan ceeqettennabadan qoppana danddayoosona. Nuuni xalenna gishshawu, eti ubba ufayssennaba nuuyyo zaarana danddayoosona. SHin, nuuni ubbatoo haasayiyoogaadan, nuuni ammaniyoobaa metootennan yootiyaaba gidikko, eti nuna bonchana danddayoosona.”

18. Ne atotettawu baaxetanawu neeni ay oottana koshshii?

¹⁸ Nuuni qommoora beˈidoogaadan, ne atotettaa polanawu baaxetiyoogee gita aawatetta. Xoossaa Qaalaa nabbabiyoogee, hegaa wotta dentta qoppiyoogee, Yihoowa woossiyoogeenne Yihooway nena waati anjjidaakko qoppiyoogee hegeetuppe amaridaageeta. Hegaa minnada oottiyoogee, neeni Yihoowa dabbo gidiyoogaa keehi ammanettanaadan maaddana. Hegee qassi, neeni ammaniyoobaa haratuyyo yootanaadan nena denttettana.—Mazamure 73:28 nabbaba.

19. Ne atotettawu baaxetiyoogee keehi koshshiyoy aybissee?

¹⁹ Yesuusi, “Tana kaallanau koyiya urai de7ikko, bana yeggi bayo; yaatidi ba [barchiyaa mittaa] tookkidi, tana kaallo” yaagiis. (Maa. 16:24) Kiristtaaneti ubbay erissiyo ashkkara gidanawu bantta huuphiyaa Yihoowawu geppananne xammaqettana bessiyoogee qoncce. Hegee haˈˈi daro anjjuwaa, qassi Xoossay ehiyo ooratta alamiyan merinaa deˈuwaa demmanaadan maaddees. Yaatiyo gishshawu, ubbatoo ne atotettawu baaxetanawu neeyyo danddayettida ubbabaa ootta!