1, 2. Asaa aybippenne aaruwan qohidabay aybee, qassi hegawu gaasoy oonee?

SILKKEE, korinttiyaa amppoolee, kaameenne piriijee asawu deˈoy keehi loˈˈanaadan oottida, merettida oorattabaappe amaridaageeta. SHin merettida harabati deˈuwaa keehi qohiyaageeta; hegeetuppe amaridaageeti zayyiyaa, panjjiyaa, sijjaaranne bombbiyaa. Gidoppe attin, asaa aybippenne aaruwan qohida, he ubbabaappe kasetiyaabay deˈees. Hegee aybee? Wordduwaa woy qassi issi ura cimmanawu giidi tuma gidennabaa eriiddi yootiyoogaa. Koyro wordduwaa yootiday oonee? Yesuus Kiristtoosi “Xalahe halaqaa” Dabloosa, ‘wordduwawu aawa’ giis. (Yohaannisa 8:44 nabbaba.) I koyro wordduwaa awude yootidee?

² Hegee hanidoy daro shaˈu layttappe kase Edene gannatiyaana. Koyro azinaynne machchiyaa, Addaameenne Hewaana eta medhdhidaagee etawu giigissido Gannatiyan ufayttidi deˈoosona. He wode, Dabloosi kelttiyaa geliis. Eti azazettennan ixxidi hayqqenna mala, “lo77uwaanne iitaa erissiya mittaa teeraappe” meennaadan Xoossay etawu yootidoogaa I erees. Gidikkonne, Seexaanay shooshshaa baggaara Hewaanissi hagaadan giis: “CHii, intte ainnekka haiqqekketa [worddo ubbaappe koyruwaa]; Xoossai hegaa giidoogee, he mittaa teeraa intte miikko, intte aifee dooyettin, lo77uwaanne iitaa Xoossaadan intte eranaagaa i eriyo gishshaassa.”—Doo. 2:15-17; 3:1-5.

3. Seexaanaa worddoy keehi qohiyaaba gaana danddayiyoy aybissee, qassi hegee ay kaalettidee?

 ³ Hewaana A ammanada mittaa ayfiyaa miikko hayqqanaagaa Seexaanay eriyo gishshawu, A worddoy keehi qohiyaaba. Hewaanakka Addaameekka Yihoowawu azazettibookkona, qassi wurssettan hayqqidosona. (Doo. 3:6; 5:5) Hegaappe aaruwan, he nagaraa baggaara “haiqoi asa zare ubbaa gakkiis.” Ubbakka “haiqoi asa ubbaa haariis; harai atto Addaamee Xoossaa higgiyau azazettennan ixxidoogaadan, nagara oottibeennaageetakka haiqoi haariis.” (Roo. 5:12, 14) Nuuni Xoossay halchchidoogaadan wottiyoobi baynna asa gidennaynne merinawu deˈennay hegaassa. SHin nu deˈiyo “laittai laappun tamma; woi minnikko, hosppun tamma” xalla; qassi nu deˈoy ‘metuwaaninne tuggan’ kumiis. (Maz. 90:10) He ubbabay Seexaanaa wordduwaa gaasuwan haniis!

4. (a) Nuuni zaarana koshshiyo oyshati awugeetee? (b) Mazamure 15:1, 2y yootiyoogaadan, Yihoowa dabbo gidana danddayiyay O xallee?

⁴ Dabloosi oottidobaa xeelliyaagan, “tumatetti aani bainna gishshau,” I tuman minni eqqibeennaagaa Yesuusi qonccissiis. Seexaanay ba wordduwan ‘saˈa ubbaa balettiiddi’ deˈiyo gishshawu, tumatettay haˈˈikka aani baawa. (Ajj. 12:9) Dabloosi nuna balettanaadan nuuni koyokko. Yaatikko, ane heezzu oyshata beˈoos: Seexaanay asaa waati balettii? Asay worddotiyoy aybissee? Qassi Yihoowaara nu dabbotay Addaameegaadaaninne Hewaaniigaadan duuxxenna mala, nuuni ubba wode ‘tumaa haasayiyoogaa’ waati bessana danddayiyoo?—Mazamure 15:1, 2 nabbaba.

5. Ha wodiyan Seexaanay asaa waati balettii?

⁵ Nuuni ‘Seexaanaa qofaa eriyo gishshawu, an cimettennan aggana’ danddayiyoogaa kiitettida PHawuloosi erees. (2 Qor. 2:11) Worddo haymaanootiyaa, balibakkiya polotikaa, yaaretiya zalˈˈanchchata gujjin, kumetta saˈay Dabloosa haaruwan deˈiyoogaa nuuni eroos. (1 Yoh. 5:19) Yaatiyo gishshawu, maatay deˈiyo asati ‘worddotanaadan’ Seexaanaynne daydanttati oottiyoogan nuuni garamettokko. (1 Xim. 4:1, 2) Leemisuwawu, amarida zalˈˈanchchati qohiyaabaa bayzzanawu woy asaa cimmanawunne eta miishshaa ekkanawu erissuwan worddobaa yootoosona.

6, 7. (a) Haymaanootiyaa kaalettiyaageeti worddotiyoogee keehi iitaba gidiyoy aybissee? (b) Haymaanootiyaa kaalettiyaageeti yootin neeni siyido worddoy aybee?

⁶ Haymaanootiyaa kaalettiyaageeti worddotiyoogee hegaa ammaniyaageetu sinttanaa deˈuwaa qohiyaaba gidiyo gishshawu, hegee keehi iitaba. Issi uri worddo timirttiyaa ekkikko, qassi Xoossay ixxiyoobaa oottikko, hegee merinaa deˈoy appe halanaadan oottana danddayees. (Hoo. 4:9) Yesuusi ba wode haymaanootiyaa kaalettiyaageeti hegaadan asaa cimmiyoogaa erees. I etawu hagaadan giis: “Lo77o milatiya iitatoo, higgiyaa tamaarissiyaageetoonne Parisaawetoo intte issi uraa ammanttanau abbaaninne sa7an yuuyiyo gishshaunne qassi intte a ammanttiyo wode, he uraa intteegaappe naa77u kushe iitida Gaannabiyau [merinaa xayuwawu] na7a oottiyo gishshau, intteyyo aayye7ana.” (Maa. 23:15) Worddo haymaanootiyaa kaalettiya he asatussi Yesuusi minttidi yootiis. Eti tumukka, ‘wordduwawu aawa gidida, shemppo woriya Dabloosa naata.’—Yoh. 8:44.

⁷ Ha wodiyan pasttere woy qeese geetettiya woy hara bonchcho sunttan xeegettiya, haymaanootiyaa kaalettiya daroti alamiyan deˈoosona. Koyro xeetu layttan deˈiya bantta mala asatuugaadan, eti ‘Xoossaa tumatettaa wordduwan laammidi,’ Xoossaa Qaalan  deˈiya ‘tumatettay erettennaadan oottidosona.’ (Roo. 1:18, 25) Eti issitoo attida uri attiichchiis, shemppoy hayqqenna, hayqqida ubbay zaaretti yelettees, qassi attumay attumaara maccay maccaara mattumaa gayttiyoogaanne aqo lagge gidiyoogaa Xoossay xaasayi xeellees giyoogaa mala timirttiyaa tamaarissoosona.

8. Mata wode issi galla polotikaa asati yootana worddoy aybee, shin nuuni waatana koshshii?

⁸ Polotikaa asay asaa balettanawu wordduwaa goˈettees. Gita worddotuppe issoy asay “ubbabai saro; aibikka hanenna” giyo wode biron odettana. SHin he wode “bashshai eti qoppennan eta bolli yaana.” Ha alamiyaa hanotay keehi iita gidiyoogaa xaasayanawu eti yootiyooban nuuni cimettana koshshenna! Yihoowa “gallassai kaisoi qammi yiyoogaadan yaanaagaa [nuuni] loitti” eroos.—1 Tas. 5:1-4.

9, 10. (a) Asay worddotiyoy aybissee, qassi hegee ay kaalettii? (b) Nuuni Yihoowabaa ay hassayana koshshii?

⁹ Ooratti merettidabaa daro asay dosiyo wode, guyyeppe hegaa daruwaa giigissoosona. Worddoykka hegaadan haniis. Ha wodiyan asay worddotiyoogee meeze gididaba; qassi harata cimmiyaageeti erettida asatu xalla gidokkona. Y. Bottacharji xaafido, “Nuuni Worddotiyo Gaasuwaa” giya xuufee yootiyoogaadan, “worddotiyoogee asay agganawu keehi metiya eeshsha gidiyoogee erettiis.” Asay qohettennaadan woy kawuyyennaadan woykko diccanawu giidi darotoo worddotees. Eti balidobaanne mooridobaa genttanawu woy miishshan woykko haraban goˈettanawu worddotoosona. He xuufee yootiyoogaadan, “etaara erettennaageetussi, issippe oottiyaageetussi, laggetussinne siiqiyoogeetussi gitaban guuttaban coo worddotiya” asay deˈees.

¹⁰ Ha ubba worddoy ay kaalettii? Ammanettennaadaaninne dabbotay moorettanaadan oottana danddayees. Leemisuwawu, machchiyaa wodiraa laammada hegaa genttanawu ammanettida ba azinawu worddotiyoogee ay keena azzanttiyaabakko qoppa. Woy qassi cayiya uri, son ba machchiyoonne ba naata qohiiddi, asaa sinttan so asaa loytti oyqqiya ura milatiyoogee ay keena iitabakko qoppa. Gidoppe attin, Yihoowawu ‘ubbabaykka beettiyoonne qoncciyan deˈiyo’ gishshawu, hegaa mala cimmiya asay aybanne appe genttana danddayennaagaa nuuni hassayana koshshees.—Ibr. 4:13.

11. Hanaaneenne Saphphiira oottido iitabaappe nuuni ay tamaariyoo? (Doomettan deˈiya misiliyaa xeella.)

¹¹ Leemisuwawu, koyro xeetu layttan issi Kiristtaane azinaynne machchiyaa Xoossawu worddotanaadan Seexaanay eta waati denttettidaakko Geeshsha Maxaafay yootees. Hanaaneenne Saphphiira kiitettidaageeta cimmanawu bantta wozanan qoppidosona. Eti gade bayzzidi, he miishshaappe amaridaagaa xallaa kiitettidaageetuyyo ehiidosona. He aqo laggeti immiyooban daro keha gididabadan gubaaˈiyan loˈˈo asa milatanawu koyidosona. SHin, Yihooway eti oottidobaa beˈiis, qassi I bessiyaagaadan eta qaxxayiis.—Oos. 5:1-10.

12. Nagaraappe simmenna iita worddanchchati awan olettanee, qassi aybissi?

¹² Yihooway wordduwaa waati xeellii? Seexaanaynne A leemisuwaa kaalliya, nagaraappe simmenna iita worddanchchati ubbay “tama abban” olettana. (Ajj. 20:10; 21:8; Maz. 5:6) Aybissi giikko, hegaa mala worddanchchata Yihooway ‘kanadan’ haniya, hegeekka Xoossaa sheneyiyaabaa oottiya ubbatuura issi mala gididabadan xeellees.—Ajj. 22:15.

13. Nuuni Yihoowabaa ay eriyoo, qassi he eray nuuni ay oottanaadan denttettii?

 ¹³ Yihooway ‘worddotiya asaa mala gidennaagaa’ nuuni eroos. Qassi, “Xoossai worddotanau danddayenna.” (Qoo. 23:19; Ibr. 6:18) Yihooway ‘worddotiya inxxarssaa ixxees.’ (Lee. 6:16, 17) Nuuni an nashettanawu, tumatettawu I kessido maaraadan deˈana bessees. Nuuni ‘issoi issuwawu worddotennay’ hegaassa.—Qol. 3:9.

14. (a) Nuuni worddo haymaanootiyaa kaalliyaageetuppe waani dummatiyoo? (b) Luqaasa 6:45n deˈiya maaraa qonccissa.

¹⁴ Tumu Kiristtaaneti worddo haymaanootiyaa kaalliyaageetuppe dummatiyo issi ogee aybee? Nuuni ‘tumaa haasayoos.’ (Zakkaariyaasa 8:16, 17 nabbaba.) PHawuloosi, “Xoossaa ashkkarata gidiyoogaa nu huuphen bessida; . . . tumaa haasayiyoogan” yaagiis. (2 Qor. 6:4, 7) Yesuusi, “Asa dooni a wozanan kumidabaappe haasayees” yaagiis. (Luq. 6:45) Hegaa giyoogee tumanchcha uri ubba wode tumaa haasayees giyoogaa. I etaara erettennaageetussi, issippe oottiyaageetussi, laggetussinne siiqiyoogeetussi gitaban guuttaban tumaa haasayees. Nuuni yaatiyoogan ubbaban tumanchcha gidanawu baaxetiyoogaa waati bessana danddayiyaakko amarida leemisota beˈana.

15. (a) Naaˈˈu qommo deˈuwaa deˈanawu maliyoogee loˈˈoba gidennay aybissee? (b) Laggeti iitabawu denttettiyoogaa eqettanawu yelagata aybi maaddana danddayii? (Tohossa qofaa xeella.)

¹⁵ Neeni ne mala laggeta milatanawu koyiya yelaga gidikko shin? Haratuugaadan neeni naaˈˈu qommo deˈuwaa deˈennaagaa akeeka. Eti sooninne gubaaˈiyan geeshsha milatoosona; shin alamiyaa yelagatuura gayttiyo wodenne Intternneetiyan haratuura gayttiyo wode eti keehi dumma. Eti pokkobaa haasayaana, maari baynna maayuwaa maayana, iita muuziqaa siyana, likkiyaappe aattidi uyana woy jallissiyaaba goˈettana, ekkanawu woy gelanawu issippe wodiyaa aattiyoogaa genttana, qassi keehi iitabaa oottana danddayoosona. Eti banttana yelidaageetuyyo, ishanttuyyoonne michchonttuyyo, qassi Yihoowawu worddotoosona. (Maz. 26:4, 5) Nuuni ‘A nu bolla doonaa xallan bonchchiyoonne nu wozanay appe haahuwan deˈiyo’ wode Yihooway erees. (Mar. 7:6, 7) Leemiso maxaafay, “Nagaranchchata qanaatoppa; shin ubbatoo GODAASSI yayyiyoogaa aggoppa” giyoogaadan nuuni oottiyoogee keehi loˈˈo.—Lee. 23:17.  *

16. Nuuni ubba wode haggaazanawu oychchiyo wode, oyshata waati zaarana koshshii?

 ¹⁶ Neeni ubba wode haggaaziya aqinye gidada woy Beeteelen oottiyoogaa mala dumma ubba wode haggaazuwaa haggaazanawu koyennan aggakka. Neeni haggaazanawu oychchiyo wode, ne payyatettaabaa, wodiyaa aattiyoobaanne kandduwaabaa xeelliyaagan nena oychchiyo ubbabawu tumaa yootiyoogee keehi koshshiyaaba. (Ibr. 13:18) Geeshsha gidennabaa woy ne kahaa qumˈˈiyaabaa oottada, neeni hegaa cimatuyyo yootana xayikko shin? Ne kahay geeshsha gidin haggaazana mala eti maaddanaadan oychcha.—Roo. 9:1; Gal. 6:1.

17. Nuna yedettiyaageeti nu ishanttubaa oychchiyo wode nuuni ay oottana koshshii?

¹⁷ Leemisuwawu, ne biittan sunttati Kawotettaa oosuwaa teqqidi ne ishanttubaa nena oychchanawu xeesikko ne ay oottana koshshii? Neeni eriyo ubbabaa etawu yootana bessii? Biittaa haariya Rooma bitanee oychchido wode Yesuusi waatidee? Geeshsha Maxaafay, “Co77u gaanau wodee de7ees; qassi haasayanaukka wodee de7ees” giyo maaraadan, issi issitoo Yesuusi aybanne haasayibeenna! (Era. 3:1, 7; Maa. 27:11-14) Hegaa mala hanotan, nu ishantti qohettenna mala, nuuni akeekanchcha gidiyoogee keehi loˈˈo.—Lee. 10:19; 11:12.

18. Cimati nu ishanttubaa nuna oychchikko, nuuni ay oottana koshshii?

¹⁸ Gubaaˈiyan issi uri gita nagaraa oottidaba, qassi hegaa neeni eriyaaba gidikko shin? Gubaaˈiyaa geeshshatettaa naagana bessiya cimati he yohuwaabaa ne eriyoobaa oychchana danddayoosona. Nagaraa oottiday neessi mata lagge woy ne dabbo gidikko, neeni waatuutii? “Tumaa haasayiya asi suurebaa yootees.” (Lee. 12:17; 21:28) Yaatiyo gishshawu, neeni aynne ashshennan cimatuyyo tumaa wurssa yootana koshshees; qassi hegaa geellayana bessenna. Moorida uri zaarettidi Yihoowaara dabbotana mala, eti A loytti maaddiyo ogiyaa kuuyanawu ubbabaa erana koshshees.—Yaaq. 5:14, 15.

19. Kaalliya huuphe yohuwan nuuni ay tamaaranee?

¹⁹ Mazamuraawee Daawiti hagaadan giidi Yihoowa woossiis: “Neeni wozana giddo tumatettaa amottaasa.” (Maz. 51:6) Tumay nu wozanaa giddoppe kiyiyoogaa Daawiti erees. Tumu Kiristtaaneti bantta deˈuwan ubbaban ‘issoi issuwaara tumaa haasayoosona.’ Nuuni Xoossaa ashkkarati dumma gidiyoogaa bessana danddayiyo hara ogee nu haggaazuwan A tumaa haratussi tamaarissiyoogaa. Kaalliya huuphe yohoy hegaa waati oottanaakko qonccissees.