1. Amarida asay xannaˈanawu dosennay aybisee?

HA WODIYAN, deˈuwaassi koshshiya miishshaa demmanawu daro asay minnidi oottana koshshees. Nu ishanttuppe daroti bantta soo asawu koshshiya qumaa, maayuwaanne deˈiyoosaa giigissanawu daro saatiyawu oottoosona. Hara daroti oosuwawu galla galla baanawunne soo simmanawu daro saatiyaa hemettoosona. Qassi daroti bantta soo asawu koshshiyaabaa kunttanawu deexxiya wolqqa ooso oottoosona. Ha minni oottiya ishanttinne michchontti soo simmiyo wode daafuroosona! Hegaappe denddidaagan, daroti xannaˈanawu dosokkona.

2. Neeni xannaˈanawu wode demmiyoy awudee?

² Gidikkonne, Xoossaa Qaalaanne nu xuufeta wozanappe xannaˈanawu nuuni wodiyaa bazzana koshshees. Nuuni Yihoowaara dabbotidi deˈanawunne merinaa deˈuwaa demmanawu koyikko, hegee keehi koshshiyaaba! (1 Xim. 4:15) Amaridaageeti xiskki simmidi son cenggurssi siyettenna wodiyan loytti wotti dentti qoppana danddayiyo wode, xannaˈanawu ubba galla kasetidi denddoosona. Harati omarssi soo simmiyo wode xannaˈanawu, qassi Geeshsha Maxaafaaninne nu xuufetun nabbabidobaa wotti dentti qoppanawu bantta qofay shaahettenna wodiyaa goˈettoosona.

3-4. Nuuni ay keena nabbabananne beˈana koshshiyaakko laamettidabay aybee, qassi aybissi?

³ Xannaˈanawu wodiyaa bazziyoogee keehi koshshiyaaba gidiyoogee qoncce. SHin nuuni ay xannaˈana koshshii? Neeni hagaadan gaana danddayaasa: ‘Nabbabanawu keehi darobay deˈees. He ubbabaa nabbabanawu tawu deexxees.’ Issoti issoti nu xuufeta ubbaa nabbabananne nuuni demmiyo Geeshsha Maxaafaa qofay deˈiyo biidota ubbaa beˈana danddayoosona; shin nu ishatuppe daroti yaatanawu wodiyaa demmanawu metootoosona. Bolla Gididi Heemmiyaagee hegaa erees. Hegaa gishshawu, mata wodeppe haa simmin Bolla Gididi Heemmiyaagee xuufiyankka intterneetiyankka kiyiyaabaappe poxxanawu qofaa qachchiis.

⁴ Leemisuwawu, deˈuwan hanida keehi minttettiya darobata  jw.org^® websaytiyan, qassi aginan aginan kiyiya JW Brodkastingiyaa^® pirograamiyan demmana danddayiyo gishshawu, hagaappe simmin Yihoowa Markkatu Laytta Maxaafay attamettenna. Asawu immiyo Wochiyo Keelaanne Beegottite! maxeeteti haˈˈi layttan heezzutoo xallaa attamettoosona. Yihoowawu goynniyoogaa shaaho gidennabati daro wodiyaa ekkenna mala hegaadan giigiis. Hegee giigido waanna halchchoy nuussi “keehi koshshiyaabaa” qoppanawu nuuni wodiyaa bazzanaassa. (Pili. 1:10, NW) Keehi koshshiyaabay aybakko neeni waata kuuyana danddayiyaakko, qassi Geeshsha Maxaafaa buzo xinaatiyaappe neeni waata loytta goˈettana danddayiyaakko ane beˈoos.

5-6. Nuuni loytti xannaˈana koshshiyo xuufeti awugeetee?

⁵ Nuuni sinttayidi xannaˈana koshshiyaabay aybee? Nuuni ubba galla Xoossaa Qaalaa xannaˈanawu wodiyaa bazzana koshshiyoogee qoncce. Nuuni nabbabidobaa wotti dentti qoppanaadaaninne loytti pilgganaadan gubaaˈiyan saaminttaa Geeshsha Maxaafaa nibaabiyawu giigidabay haˈˈi kaseegaappe guutta. Nu halchchoy he saaminttawu immettida xiqiseta nabbabiyoogaa xalla gidennan, hegee nuna denttettin nuuni kaseegaappe aaruwan Yihoowakko shiiqanaagaa gidana bessees.—Maz. 19:14.

⁶ Nuuni loytti xannaˈana koshshiyo harabay aybee? Nuuni Wochiyo Keelaa Xinaatiyawunne Gubaaˈiyaa Geeshsha Maxaafaa Xinaatiyawu, qassi saaminttawu gidduwan shiiqiyo shiiquwawu giigida harabaakka giigettanawu koyiyoogee qoncce. Qassi Wochiyo Keelaanne Beegottite! maxeetiyaa ubbaa nuuni nabbabana koshshees.

7. Nu websaytiyaaninne JW Brodkastingiyan kiyiyaaba ubbaa nabbabanawunne beˈanawu danddayennaba gidikko, nuuni hidootaa qanxxana bessii?

⁷ Neeni, ‘Hegee loˈˈo, shin jw.org, websaytiyaaninne JW Brodkastingiyan kiyiya ubba xuufetanne biidota shin? Qassi hegan darobay deˈees!’ gaana danddayaasa. Issi leemisuwaa beˈa: Alleequwaa bayzziyo suuqiyan keehi daro qommo alleeqoy dees. Alleqo shammanawu he suuqiyaa biyaageeti ubbabaa shammana danddayokkona. Yaatiyo gishshawu, eti amaridaagaa woy issuwaa xallaa dooridi shammoosona. Hegaadan, neeni elekitronike miishshan giigiya ubbabaa nabbabananne beˈana danddayennaba gidikko, hidootaa qanxxoppa. Neeni danddayiyoobaa nabbabananne beˈa. Xannaˈiyoogaa giyoogee woygiyoogaakko, qassi nuuni xinaatiyaappe danddayettida keenan daro goˈettana mala ay oottana danddayiyaakko ane pilggoos.

8. Nuuni Wochiyo Keelaa giigettiyo wode ay ay oottana danddayiyoo, qassi yaatiyoogee nena waati maaddanee?

⁸ Neeni xannaˈiyo wode, keehi koshshiyaabaa eranawu ne nabbabiyooban xeelaa wottana koshshees. Xannaˈiyoogee imettida xuufiyaa eesuwan nabbabiyoogaanne coo zaaruwaa malaatiyoogaa gidenna. Leemisuwawu, Wochiyo Keelaa Xinaatiyawu giigettiyo wode, huuphe yohuwaa doomettan ha xinaatiyan giyaagaa koyro nabbaba. Kaallada, waanna huuphe yohuwaa, sima huuphe yohuwaanne zaareto oyshata nabbabada hegaa loytta qoppa. Yaatada, menttota loddaaninne akeekan nabbaba. Menttuwaabaa yootiya qofaa qashuwaa akeeka; hegee darotoo ubba menttotun koyro qofaa qashuwan deˈees. Menttoy qonccissiyoobaa neeni eranaadan he qofaa qashoy darotoo maaddees. Neeni kumetta menttota nabbabiyo wode, ubba menttoy sima huuphe yohuwaaranne waanna huuphe yohuwaara waani gayttiyaakko qoppa. Neeni kase erenna, qassi loytta xannaˈanawu koyiyo qaalatanne timirtteta ubbaa xaafa.

9. (a) Nuuni Wochiyo Keelaa xannaˈiyo wode, xiqisetu qofaa loytti qoppana koshshiyoy aybissee, qassi waatidii? (b) Yaasa 1:8y qonccissiyoogaadan, nuuni xiqiseta nabbabiyoogaappe harabaa ay oottana koshshii?

⁹ Nuuni gubaaˈe shiiquwan Wochiyo Keelaa xannaˈiyoogee Geeshsha Maxaafaa akeekanaadan  nuna maaddees. Yaatiyo gishshawu, xiqiseta, ubba qassi he huuphe yohoy gubaaˈiyan xannaˈettiyo wode nabbabettana xiqiseta loytta akeeka. Xiqisetun deˈiya qaalay woy qofay menttuwan deˈiya waanna qofaa waati qonccissiyaakko loytta qoppa. Qassi neeni nabbabiyo wode, xiqisetu qofaa, qassi ne deˈuwan eta waata oosuwan peeshshana danddayiyaakko takki gaada loytta qoppa.—Yaasa 1:8 nabbaba.

10. Ibraawe 5:14y yootiyo maaraadan, yelidaageeti so asaa goynuwaa wode bantta naati waati xannaˈanaakkonne waati pilgganaakko tamaarissanawu wodiyaa bazzana koshshiyoy aybissee?

¹⁰ Saaminttan saaminttan So Asaa Goynuwaa wode yelidaageeti bantta naati ufayttanaadan koyiyoogee wottin deˈiyaaba. SHin, yelidaageeti so asaa goynuwaa wode ay xannaˈanawu koyiyaakko ubba wode halchchana koshshikkonne, saaminttan saaminttan keehi ufayssiya dummabaa oottanaadan eti giigissana koshshenna. So Asaa Goynuwaa wode, aginan aginan kiyiya JW Brodkastingiyaa prograamiyaa beˈana woy issi issitoo Nohe markkabiyaa issippe keexxiyoogaa mala dumma oosuwaa oottana danddayikkokka, naati waati xannaˈanaakko eta tamaarissiyoogeekka keehi koshshiyaaba. Leemisuwawu, eti gubaaˈe shiiqotussi waati giigettanaakko woy timirtte keettan denddida oyshata waati pilgganaakko tamaarana koshshees. (Ibraawe 5:14 nabbaba.) Eti son Geeshsha Maxaafaa qofaa xannaˈiyoogan amarida wodiyaa aattiyaaba gidikko, gubaaˈiyan, woradaaninne gita shiiqotun tamaariyo, biiduwan darotoo shiiqana danddayennaageeta eti akeekanawu metootokkona. Yelidaageeti issi kutti bantta naatuura ay keena xannaˈanaakko eta layttaadaaninne eta eeshshaadan kuuyana bessiyoogee qoncce.

11. Nuuni Geeshsha Maxaafaa xannaˈissiyoogeeti banttarkka waati loytti xannaˈanaakko nuuni tamaarissiyoogee keehi koshshiyoy aybissee?

¹¹ Nuuni Geeshsha Maxaafaa xannaˈissiyoogeetikka, waati xannaˈanaakko tamaarana koshshees. Eti koyro Geeshsha Maxaafaa xannaˈiyoogaa doommiyo wode, bantta xinaatiyawu woy gubaaˈe shiiquwawu zaaruwaa giigettidi malaatiyoogaa beˈiyoogee nuna ufayssees. SHin nuuni Geeshsha Maxaafaa xannaˈissiyoogeeti waati pilgganaakko, qassi buzo waati loytti xannaˈanaakko eta tamaarissana koshshees. Yaatiyoogan, metoy merettiyo wode eti waatana bessiyaakko gubaaˈiyan deˈiya harata oychchiyoogaappe nu xuufeta pilggiyoogan banttana maaddiya qofaa waati demmanaakko eti erana.

12. Nuuni xannaˈiyo wode ay halchchana danddayiyoo?

¹² Neeni xannaˈanawu dosenna ura gidikko, xannaˈiyoogee mule ufayssenna gaada qoppana danddayaasa. SHin ufayttana danddayaasa. Guutta wode xallawu xannaˈiyoogan doomma;  qassi yaatada xannaˈiyo wodiyaa loddan loddan gujja. Neeni aybissi xannaˈiyaakko qoppa. Aybippenne aaruwan nuuni halchchana koshshiyaabay ubbatoo Yihoowakko shiiqiyoogaa gidana bessiyoogee qoncce. Issi uri oychchido oyshaa zaariyoogee woy nuna gakkida metuwaa xeelliyaagan pilggiyoogee nuuni sohuwaara oottana danddayiyooba.

13. (a) Timirtte keettan issi yelagay ba ammanuwaabaa haratussi yootanawu ay ay oottana danddayiyaakko qonccissa. (b) Neeni Qolasiyaasa 4:6n deˈiya zoriyaa waata oosuwan peeshshana danddayay?

¹³ Leemisuwawu, neeni tamaaraydda deˈiya yelagee? Ne kifiliyaa tamaareti ubbay lodda laamiyan ammanana danddayoosona. Nuuni Geeshsha Maxaafay tamaarissiyoogaadan merettidoogaa neeni ammaniyo gaasuwaa yootanawu koyana danddayaasa; shin yaatanawu danddayennabadan neessi siyettennan waayi aggana. Yaatiyo gishshawu, neeni xannaˈana koshshees! Neeni yaatiyo naaˈˈu gaasoy deˈana danddayees: (1) Xoossay ubbabaa medhdhidoogaa neeni mintta ammananaassa, qassi (2) ne ammaniyoobaa waata loytta qonccissanaakko tamaaranaassa. (Roo. 1:20; 1 PHe. 3:15) Koyro, ‘Ta kifiliyaa tamaareti lodda laamiyan ammaniyoy aybissee?’ gaada nena oychchana danddayaasa. Yaatada, nu xuufeta goˈettada he qofaa loytta pilgga. Ne ammaniyoobaa qonccissiyoogee neeni qoppidoogaadan metiyaaba gidennan aggana danddayees. Daro asay lodda laamiyan ammaniyoy eti bonchchiyo issi uri hegee tuma giidi etawu yootido gishshaa xallaassa. Neeni etawu yootana danddayiyo issibaa woy naaˈˈubaa demmikko, tumaa eranawu koyiya issi ura maaddana danddayaasa.—Qolasiyaasa 4:6 nabbaba.

14-16. (a) Geeshsha Maxaafan deˈiya, neeni loytta erenna maxaafaa eranawu ay oottana danddayay? (b) Goˈettido xiqiseti Amoxa maxaafaa loytta akeekanawu nena waati maaddana danddayiyaakko qonccissa. (“Geeshsha Maxaafan Odettida Asatubaa Loytta Era” giya saaxiniyaakka xeella.)

¹⁴ Nuuni gubaaˈiyan nabbabanaynne xannaˈanay neeni loytta erennan aggana danddayiyo Geeshsha Maxaafan deˈiya hiraaga maxaafaa gidida guuttatuppe issuwaa gaada qoppa. Oottana koshshiya koyrobay, he hananabaa yootiyaagee xaafidobaa eranawu loytta koyiyoogaa gidana danddayees. Neeni hegaa waata oottana danddayay?

¹⁵ Koyruwan, hagaadan nena oychcha: ‘Ha maxaafaa xaafidaagaabaa taani eriyoobi aybee? I oonee, I awan deˈidee, I ay ooso oottidee?’ Nuuni he maxaafaa xaafidaagaabaa loytti eriyo wode, I he qaalata woy he leemisota aybissi goˈettidaakko loytti akeekana danddayoos. Neeni Geeshsha Maxaafaa nabbabiyo wode, xaafida uraabaa akeekanaadan maaddiya qaalata koya.

¹⁶ Naaˈˈanttuwan, he maxaafay awude xaafettidaakko eriyoogee maaddees. Hegaa neeni Ooratta Alamiyaa Geeshsha Maxaafaa Birshshetta (Amaarattuwaa) wurssettaa heeran deˈiya “Geeshsha Maxaafaa Maxaafatu Sanxxarazhiyaa” giyaagaappe metootennan erana danddayaasa. Qassi, Xoossaa Qaalaa Xannaˈanawu Maaddiyaabaa, sinttaa 14-17n hananabaa yootiyaageetanne kawota odiya charttiyaa xeellana danddayaasa. Neeni Geeshsha Maxaafan xannaˈaydda deˈiyoy hananabaa yootiya maxaafa gidikko, he maxaafay xaafettiyo wode asaa deˈoy ay malakko neeni eriyoogee loˈˈo. Hananabaa yootiyaagee asay giigissanaadan yootido iita xeelay woy meezee aybee? Maxaafaa xaafidaagaara issi wodiyan deˈiday oonee? Hanotaa loytta akeekanawu Geeshsha Maxaafan dumma dumma sohuwan beˈana danddayaasa. Leemisuwawu, hananabaa yootiya Amoxi deˈido wodiyan aybi hanidaakko loytta eranawu, Amoxa 1:1 geeddarssanawu maaddiya 2 Kawotu Maxaafaanne 2 Hanidabaa Odiya maxaafan deˈiya xiqiseta nabbabiyoogee nena maaddana. Hegaa bollikka, Hooseˈi xaafidoogaa beˈana danddayaasa; I Amoxaara issi wodiyan deˈennan aggenna. Neeni ha maxaafata Geeshsha Maxaafan beˈikko, Amoxa wodiyan deˈoy ay malakko loytta akeekana. —2 Kaw. 14:25-28; 2 Odi. 26:1-15; Hoo. 1:1-11; Amo. 1:1.

17-18. Menttotun deˈiya leemisota woy hara leemisuwaa goˈettada, darin koshshennaba milatiya qofay neeni Geeshsha Maxaafaa nabbabiyo wode kaseegaappe aaruwan ufayttanaadan waati maaddana danddayiyaakko yoota.

¹⁷ Nuuni Geeshsha Maxaafaa nabbabiyo wode, kaseegaappe aaruwan eranawu mintti koyiyoogee loˈˈo. Leemisuwawu, Masiyaa hayquwaabaa kasetidi yootiya, Zakkaariyaasa shemppo 12 nabbabaydda deˈiyaabadan qoppa. (Zak. 12:10) Neeni paydo 12 gakkiyo wode, Masiyaa hayquwan “Naataana zareti” yeekkanaagaa nabbabaasa. Neeni eesuwan nabbabada kanttiyoogaappe he darin koshshennaba milatiyaabatun takki gaada, nena hagaadan oychcha: ‘Naataana zaree Masiyaara waani gaytti? Hara naqaashaa demmiyo ogee deˈii?’ Neeni guuttabaa pilggana danddayaasa. Geeddarssanawu imettida * 2 Sameela 5:13, 14 qofay, Naataani Kawuwaa Daawita naatuppe issuwaa gidiyoogaa neeni eranaadan maaddees. Geeddarssanawu imettida Luqaasa 3:23, 31, Yesuusi Mayraami baggaara Naataana zare gidiyoogaa qonccissees. (Wochiyo Keelaa, Naase 2017, sinttaa 32, mentto 4 xeella.) Neeni sohuwaara hegaa dosa bayana! Yesuusi Daawita zare gidanaagee kasetidi odettidoogaa neeni eraasa. (Maa. 22:42) SHin Daawiti 20⁠ppe dariya naata yeliis. Naataana zareti Yesuusa hayquwan yeekkanaagaa Zakkaariyaasi dummayidi yootidoogee keehi maalaaliyaaba!

¹⁸ Hara leemisuwaa beˈa. Luqaasa koyro shemppuwan, kiitanchchay Gabreeli Mayraamikko yiidoogaanne A yelana naˈaabaa maalaaliyaabaa yootidoogaa nuuni nabbaboos: “I gita gidana; qassi Ubbaappe Bolla Xoossaa Na7a geetettana;  Godai ayyo a aawaa Daawita kawotettaa immana; inne Yaaqoobantta zariyan merinau kawotana.” (Luq. 1:32, 33) Nuuni Gabreeli Yesuusa “Ubbaappe Bolla Xoossaa Na7a” giido koyro qofaa xallaa akeekennan waayi aggana. SHin Gabreeli Yesuusi ‘Kawo’ gidanaagaakka kasetidi yootiis. Hegaa gishshawu, Gabreeli yootidobay Mayraama ay qoppanaadan oottideeshsha giidi nuuni qoppana danddayoos. A Gabreeli yootidobaa Yesuusi Kawuwaa Heeroodisa sohuwan woy appe kaallidi haariya issuwaa sohuwan Israaˈeelan kawotana gaada qoppadee? Yesuusi kawo gididaakko, Mayraama kawuwaa aayyiyo gidana; qassi I soo asay kawo keettan deˈana. SHin, hegaa malabaa Mayraama Gabreelayyo haasayidobaa woy qassi A Yesuusi erissiyo ashkkaratuppe naaˈˈatudan, Kawotettan maatay imettanaadan oychchidobaa Geeshsha Maxaafay yootenna. (Maa. 20:20-23) Ha darin koshshennaba milatiyaabay Mayraama bana keehi ziqqi oottiya macca asa gidiyoogaa nuuni mintti ammananaadan oottees!

19-20. Yaaqooba 1:22-25⁠ynne 4:8y yootiyoogaadan, nuuni xannaˈiyo wode nu halchchoy aybee?

¹⁹ Kaseegaappe aaruwan Yihoowakko shiiqanawu koyiyoogee nuuni Xoossaa Qaalaanne nu xuufeta xannaˈiyo waanna gaaso gidiyoogaa nuuni ubbatoo hassayana bessees. Nuuni ‘ay mala asakkonne,’ qassi Xoossaa ufayssana mala ay giigissana koshshiyaakko geeshshidi beˈanawukka koyoos. (Yaaqooba 1:22-25; 4:8 nabbaba.) Qassi, nuuni xannaˈiyoogaa doommiyo wode ubban, Yihooway ba ayyaanaa immanaadan woossana bessees. Nuuni nabbabiyoobaappe loytti goˈettanaadaaninne nu laamettana koshshiyaabaa akeekanaadan Yihooway maaddana mala A woossana koshshees.

²⁰ Nuuni ubbay mazamurawee, “GODAA higgiyan i ufaittees; a higgiyaa gallassinne qammi qoppees. . . . I oottiyo ubbai au hanees” yaagido, Xoossawu ammanettida ashkkaraa mala gidanawu amottoos.—Maz. 1:2, 3.