Xoossaakko SHiiqa

Xoossaa Siiqoy Qonccido Oge Ubbaappe Aadhiyaagaa

Doomettaabaa 22:1-18

ABRAHAAMI Xoossaa siiqees. Ammanettida asa gidida Abrahaami cimatettan yelido ba naˈaa Yisaaqakka siiqees. Yisaaqayyo layttay 25 heera gidido wode, Abrahaami issi aaway meretan oottanau koyennabaa oottanaadan paacettiis—i ba naˈaa yarshshanaadan Xoossay ayyo odiis. Gidikkonne, he taarikee Yisaaqa hayquwan kuuyettibeenna. Abrahaami ba naˈaa yarshshana hanishin, Xoossay kiitanchaa kiittidi a teqqiis. Ha taarikee Doomettaabaa 22:1-18n deˈiyaagaa gidishin, Xoossay nuussi bessido gita siiquwaabay amarida ogiyan kasetidi odettidoogaa bessees.

Paydo 1y, “Xoossai Abrahaama paacciis” gees. Abrahaami ammanuwan erettiya asa gidikkonne, haˈˈi a ammanoy kase mule paacetti erenna ogiyan paacettiis. Xoossay: “Neeni siiqiyo ne mexi issi na7aa Yisaaqa ekkada, . . . taani neeyyo yootiyo issi deriyaa bollan a xuuggiyo yarshsho oottada taayyo yarshsha” yaagiis. (Paydo 2) Xoossay baassi oottiyaageeti danddayiyoogaappe aadhiya paaciyan paacettanaadan paqqadennaagaa hassaya. Yaatiyo gishshau, ha paacee Xoossay Abrahaaman ammanettiyoogaa bessees.—1 Qoronttoosa 10:13.

Abrahaami sohuwaara azazettiyoogan zaaruwaa immiis. “Wonttetta gallassi Abrahaami guuran denddidi, ba hariyaa caaniis; ba ashkkaratuppe naa77aanne ba na7aa Yisaaqa banaara ekkidi, xuuggiyo yarshshuwaayyo gidiya mittaa qeri ekkidi . . . baanau denddiis” yaagiyaagaa nabbaboos. (Paydo 3) Abrahaami paaciyaa xeelliyaagan ooyyoonne qonccissidi yootibeennaagee erettidaagaa.

Hegaappe heezzu gallassaa manddaridosona; hegee loyttidi wotti denttidi qoppanaadan maaddiis. SHin Abrahaami ba kuuyidobaa polanau guyye gibeenna. I giidobay a ammanuwaa qonccissees. He deriyaa haahuwan beˈidi, i ba ashkkaratuyyo: “Hagan de7⁠ishite; taaninne ta na7ai yaa biidi Xoossaassi goinnidi, inttekko simmana” yaagiis. Yisaaqi yarshshiyo dorssa mari awaanee giidi oychin, Abrahaami: “Dorssa maraa Xoossai baayyo immana” yaagiis. (Paydo 5, 8) Abrahaami ba naˈaara simmanaagaa qoppiis. Aybissi giikko, “Xoossai Yisaaqa harai atto, haiquwaappekka pattanau danddayiyoogaa eriis.”—Ibraawe 11:19.

Deriyaa bolli, Abrahaami “ba na7aa shukkanau” billamaa ekkin, issi kiitanchay a teqqiis. Abrahaami “ba na7aa gishshaa” yarshshanaadan, kacee buuran qaxetti uttido issi dorssaa Xoossay giigissiis. (Paydo 10-13) Xoossaa xeelan Yisaaqi yarshsho gidiis gaana danddayettees. (Ibraawe 11:17) Issi eranchay, “Abrahaami eeno giidi azazettidoogee Xoossaa xeelan i hegaa polidoogaara issi mala” yaagidi qonccissiis.

Yihooway Abrahaaman ammanettidoogee tumattiis. Xoossay aara gelido maachaa zaarettidi yootido gishshaunne saˈaa asay ubbay a baggaara anjjettanaagaa yootido gishshau, Abrahaami Yihoowan ammanettidoogan anjjettiis.—Paydo 15-18.

Wurssettan, Abrahaami ba naˈaa yarshshennaadan Xoossay teqqiis; shin guyyeppe Xoossay ba naˈaa yarshshiis. Abrahaami ba naˈaa yarshshanau eeno giido hanotay Xoossay ba mexi issi Naˈaa, Yesuusa nu nagaraa gishshau yarshshiyoogaassi eesho gidiis. (Yohaannisa 3:16) Kiristtoosa yarshshoy Yihooway nuussi siiquwaa qonccissido oge ubbaappe aadhiyaagaa. Xoossay nuuyyo hegaa mala yarshshuwaa yarshshido gishshau, ‘Taani Xoossaa ufayssanau ayba yarshsho yarshshiyaanaa?’ yaagidi nu huuphiyaa oychana koshshees.