Xoossay Ubba Qommo Goynuwan Ufayttii?

Asay darotoo zaariyo zaaruwaa:

▪ “Ubba haymaanootee Xoossaakko kaalettiya oge.”

▪ “Neeni suure gidikko, ay haymaanootiyaa kaallikkokka metoy baawa.”

Yesuusi woygidee?

▪ “Un77⁠o penggiyaara gelite. Aissi giikko, bashshau efiya penggee aaho; ogeekka woggaa. Hegaara geliya asaikka daro. Aissi giikko, de7⁠uwau efiya penggee un77⁠o; ogeekka xuntta. Qassi hegaara biya asatikka amaridaageeta.” (Maatiyoosa 7:13, 14) Yesuusi ubba haymaanootee Xoossaakko efees giidi ammanibeenna.

▪ “He gallassi daro asai tana, ‘Nu Godau, nu Godau, nuuni ne sunttan hananabaa yootibookkonii? Ne sunttan xalaheta kessibookkonii? Qassi nuuni Xoossai oottiyo malaataa ne sunttan oottibookkonii?’ yaagana. Taani he wode eta, ‘Taani inttena mulekka erikke; iitabaa oottiyaageeti intte ta matappe haakkite’ yaagana.” (Maatiyoosa 7:22, 23) Yesuusi bana kaalloos giya ubban ufayttenna.

DARO asay ba ammanuwaanne ba wogaa xoqqu oottidi xeellees. SHin he timirtteti Xoossaa Qaalan, Geeshsha Maxaafan deˈiyaagaara moggottana xayikko ay kaalettii? Yesuusi ba wode deˈiya haymaanootiyaa kaalettiyaageetussi: “Intte intte wogaa polanau Xoossaa qaalaa xaissideta” yaagido wode, asi kessido wogaa kaalliyoogee gattiyo qohuwaa qonccissiis. Kaallidi Xoossaa Qaalaappe: “Hagee asai tana ba bolla doonan bonchchees; shin eta wozanai taappe haahuwan de7⁠ees. Asai tau mela goinnees; aissi giikko, asi oottido azazuwaa Xoossaa higgiyaa milatissidi tamaarissees” yaagiyaagaa yootiis.—Maatiyoosa 15:1-9; Isiyaasa 29:13.

Ammano xalla gidennan oosoykka keehippe koshshees. Geeshsha Maxaafay Xoossau goynnoos giya issotu issotubaa: “Banttau eti Xoossaa eriyoogaa qoncciyan yootoosona; shin eti . . . bantta oosuwan a erokko goosona” yaagees. (Tiitu 1:16) Geeshsha Maxaafay nu wodiyan deˈiyaageeta xeelliyaagan: “Xoossaappe aattidi, ufaittiyoobaa dosiyaageeta gidana. Eti nu ammanuwaa bolla doonan ekkidabaa milatana; shin a tumu wolqqaa erikke gaana. Hegeetu mala asatukko shiiqoppa” yaagees.—2 Ximootiyoosa 3:4, 5.

Suuretettay koshshikkokka, appe aadhiyaabaa koshshees. Aybissi? Issi uri suure gididikka balana danddayiyo gishshataassa. Yaatiyo gishshau, Xoossaa xeelliyaagan suure eray keehippe koshshees. (Roome 10:2, 3) He eraa demmiyoogeenne Geeshsha Maxaafay giyoobaara moggotidi deˈiyoogee, nuuni Xoossaa ufayssanaadan danddayissees. (Maatiyoosa 7:21) Yaatiyo gishshau, tumu haymaanootee suure koshshaa, suure ammanuwaanne suure oosuwaa gujjiyoogee tuma. Qassi suure oosuwaa giyoogee Xoossaa sheniyaa galla galla oottiyoogaa giyoogaa!—1 Yohaannisa 2:17.

Geeshsha Maxaafay Xoossaabaa woygiyaakko gujjada eranau koyikko, miishsha qanxxennan Geeshsha Maxaafaa xannaˈanau Yihoowa Markkatuura gaytta.

[Sinttaa 9n deʼiya misiliyaa qonccissuwaa]

Tumu haymaanootee suure koshshaa, suure ammanuwaanne suure oosuwaa gujjees