Xalan Sabbakiyoogan Yesuusa Leemisuwaa Kaallite
Xalan Sabbakiyoogan Yesuusa Leemisuwaa Kaallite
“Intteyyo a wonggeliyaa mishiraachchuwaa yootana mala, Xoossai nuuyyo minotettaa immiis.”—1 TASALONQQE 2:2.
1. Kawotettaa mishiraachoy keehippe ufayssiyaagaa gididoy aybissee?
MISHIRAACHUWAA siyiyoogee ayba ufayssiyaabee! Mishiraacho ubbaappe aadhiyaagee Xoossaa Kawotettaa mishiraachuwaa. Ha mishiraachoy metoy, harggee, waayee, kayyoynne hayqoy xayanaagaa nuuni ammanettanaadan oottiyaagaa. Ha mishiraachoy merinaa deˈuwaa hidootay deˈanaadan oottees, Xoossaa halchuwaa qonccissees, qassi aara mata dabbotaa waatidi medhana danddayiyaakko bessees. Yesuusi asaa naatuyyo yootido ha mishiraachuwaa ubba asay ufayttidi siyana gaada qoppana danddayaasa. SHin, hanotay hegaadaana gidennaagee azzanttiyaaba.
2. Yesuusi taani “shaakkanau yaas” yaagidoy aybissakko qonccissa.
2 Yesuusi ba erissiyo ashkkaratuyyo hagaadan giis: “Taani sa7aassi sarotettaa ehaanau yiidobaa inttessi milatoppo; taani tooraa ehaanau yiidoogaappe attin, sarotettaa ehaanau yabeikke. Aissi giikko, taani na7aa a aawaappe, na7iyo i aayeeppe, na7aa machchiyookka i bolloteeppe shaakkanau yaas; asassi morkketi a so asata gidana.” (Maatiyoosa 10:34-36) Daro asay mishiraachuwaa ufayttidi ekkiyoogaappe siyanau koyenna. Issoti issoti mishiraachuwaa yootiyaageetussi morkke gidoosona; ubba eti so asakka gidana danddayoosona.
3. Sabbakiyo oosuwaa nuuni polanau ay koshshii?
3 Nuuni yootiyo tumay Yesuusi yootidoogaara issi mala; ha wodiyan asay hegaa siyiyo wode immiyo zaaroy he wodeegaara issi mala. Hegee naagiyooba. Yesuusi ba erissiyo ashkkaratuyyo: “Ashkkarai ba godaappe darenna;’ . . . Eti tana yedettidabaa gidikko, inttenakka yedettana” yaagiis. (Yohaannisa 15:20) Daro biittan nuna qoncce yedetay gakkenna; shin nuna ixxoosonanne nuuni yootiyoobaa siyanau koyokkona. Yaatiyo gishshau, mishiraachuwaa xalan yootiyoogan genccanau ammanuwaanne minotettaa koshshees.—2 PHeexiroosa 1:5-8 nabbaba.
4. PHauloosi sabbakanau ‘Xoossaa minttettoy’ koshshidoy aybissee?
4 Haggaazuwan shaahettiyoogee geella issi issitoo neessi deexxiyaaba gidanau danddayees; woykko haggaazo ogetuppe amaridaageeti hidootaa qanxxissiyaaba milatana danddayoosona. Hegaadan siyettishin ammanettidi haggaaziyay ne xalla gidakka. Kiitettida PHauloosi xalanne yayyennan sabbakiya, tumaa loytti akeekida asa gidikkonne, sabbakanau ikka baaxetana koshshido wodee deˈees. PHauloosi Tasalonqqen deˈiya Kiristtaanetussi: “Nuuni inttekko yaanaappe kase Piliphphisiyuusa giyo kataman waayettidoogaanne cayettidoogaa intte ereeta; daro phalqqettai de7ikkokka, intteyyo a wonggeliyaa mishiraachchuwaa yootana mala, Xoossai nuuyyo minotettaa immiis” yaagidi xaafiis. (1 Tasalonqqe 2:2) Haariyaageeti Piliphisiyuusan PHauloosanne a laggiyaa Sillaasa gatiman shocidosona, qasho keettan yeggidosonanne eta gediyaakka mittaara gatti daraxidi qachidosona. (Oosuwaa 16:16-24) Gidikkokka, PHauloosinne Sillaasee ‘Xoossay eta minttettin,’ sabbakiyoogaa aggibookkona. Nuuni hegaadan oottana danddayiyoy ayba ogiyaanee? Ha oyshau zaaruwaa demmanau, beni wode Xoossaa ashkkarati Yihoowabaa tumaa xalan yootanaadan danddayissiday aybakko ane beˈoos; qassi eta leemisuwaa nuuni waatidi kaallana danddayiyaakko ane beˈoos.
Morkketi Gattiyoobaa Danddayanau Xalatettaa Koshshiis
5. Yihoowassi ammanettiyaageeti ubbatoo xalana koshshidoy aybissee?
5 Xalanne yayyennaagaa gidiyoogan ubbaappe aadhiya leemisoy Yesuus Kiristtoosa gidiyoogee tuma. Gidikkokka, asaa naatu taarikiyaa doomettaappe doommidi, Yihoowayyo ammanettidaageeti ubbay xala gidana koshshiis. Aybissi? Edenen makkalay denddi simmin, Xoossaayyo oottiyaageetunne Seexaanau oottiyaageetu giddon morkketettay deˈanaagaa Yihooway kasetidi yootiis. (Doomettaabaa 3:15) Xillo asa gidida Aabeela a ishay worido wode he morkketettay sohuwaara qoncciis. Guyyeppe, Bashsha Haattaappe kase deˈida, ammanettida asa gidida Heenooka bolli he morkketettay qoncciis. Xoossaa erenna nagaranchcha asatu bolli pirddanau, Xoossay Ba daro shaˈu geeshshatuura yaanaagaa i hiraagaa yootiis. (Yihudaa 14, 15) Hegee daro asay siyanau koyiyooba gidenna. Asay Heenooka ixxiis; qassi Yihooway a deˈuwaa qanttennaba gidiyaakko eti a worana shin. Heenooki keehippe xaliis!—Doomettaabaa 5:21-24.
6. Paaroona haasayissiyo wode Muusee xalana koshshidoy aybissee?
6 Kawuwaa Paaroona haasayissida Muuse xalatettaakka qoppa. Paarooni xoossata kalˈˈatiyaaba xalla gidennan, awa ayfiyaa xoossaa, Ra naˈa gidida xoossadan asay xeellees. Gibxxe kawotu haratudan, ikka ba misiliyau goynnennan aggenna. Paarooni haasayidobay higge; i ba giidobaa xallaa poliya, wolqqaama, otorettiyaanne asi yootiyoobaa siyanau koyenna morggee zozzido kawo. Ashkke asa gidida dorssa henttanchay Muusee, he bitanee ixxishiininne shoobbennan zaari zaaridi a sintti biis. Muusee aybi hananaagaa he bitaniyau yootidee? Iita boshay gakkanaagaa yootiis. I ay oottanaadan oychidee? Amarida miilooniyan qoodettiya Paaroona aylleti he biittaappe kiyanaadan paqqadana mala oychiis! Muusee xalanau koshshidee? Koshshidoogee sirissenna!—Qoodaabaa 12:3; Ibraawe 11:27.
7, 8. (a) Ammanettida beni wode asata ayba paacee gakkidee? (b) Kiristtaanetu wodiyaappe kase deˈida asati geeshsha goynuwaa kaafiyoogaaninne aassiyoogan xala gidanaadan oottidabi aybee?
7 Hegaappe simmin deˈiya daro xeetu layttatun, hananabaa yootiyaageetinne Xoossau ammanettidi oottiya harati geeshsha goynuwaa xalan kaafiyoogaa aggibookkona. Seexaanaa alamee etayyo iitiis. PHauloosi eti: “SHuchchan cadettidosona; magaajan naa77u kiyidi phalqqettidosona; paacettidosona; bisuwan haiqqidosona; etau ubbabaikka xayin, waayettidi tuggatidi, dorssa calaanne deeshsha calaa maayidi yuuyidosona” yaagiis. (Ibraawe 11:37) Xoossaayyo ammanettidi oottiyaageeti minnidi eqqanaadan maaddiday aybee? Aabeeli, Abrahaami, Saaranne harati genccanaadan minttiday aybakko PHauloosi ha xiqisiyaappe guuttaa kasetidi yootiis. I: “He asati ubbati ammanuwan haiqqidosona; banttau Xoossai immana giidoogaakka ekkibookkona; shin haahuwan hegaa be7idi, sarotidosona” yaagiis. (Ibraawe 11:13) Xoossay qaalaa gelidoban xeelaa wottiyoogee, tumu goynuwaa xalan kaafida Eelaasanne Ermmaasa mala hananabaa yootiyaageetanne Kiristtaanetu wodiyaappe kase deˈida ammanettida haratakka genccanaadan maaddidoogee sirissenna.—Tiitu 1:2.
8 Kiristtaanetu wodiyaappe kase deˈida ammanettidaageeti sinttanaa wodiyaa hidootaaninne ufayssan naagidosona. Eti hayquwaappe denddidi, Kiristtoos Yesuusinne appe garssaara deˈiya 144,000ti oottiyo qeesetettaa oosuwaa baggaara wurssettan polo gidananne “bashshaa ailletettaappe issi gallassi kiyana.” (Roome 8:21) Hegaa bollikka, Ermmaasinne beni wode deˈida Xoossau oottida xala asati Yihooway Ermmaasassi: “Eti nenaara olettana. SHin taani ashshanau nenaara issippe de7iyo gishshau, nena xoonokkona. Taani GODAI hagaa odaas” yaagidi gelido qaalan ammanettido gishshau xalidosona. (Ermmaasa 1:19) Xoossay ayyaanaaban naaganaunne sinttappe ehaanau qaalaa gelidoban wotti denttidi qoppiyoogee, ha wodiyan nunakka hegaadan minttettees.—Leemiso 2:7; 2 Qoronttoosa 4:17, 18 nabbaba.
Yesuusi Xalan Sabbakanaadan Siiqoy Denttettiis
9, 10. Yesuusi (a) haymaanootiyaa kaalettiyaageetu sinttan, (b) a oyqqanau yiida wotaaddaratu sinttan, (c) qeesetu halaqaa sinttan, (d) PHilaaxoosa sinttan xala gidiyoogaa bessidoy ayba ogiyaanee?
9 Nuussi leemiso gidiya Yesuusi xala gidiyoogaa dumma dumma ogiyan bessiis. Leemisuwau, maatay deˈiyo asati Yesuusa ixxidabaa gidikkonne, asay eranaadan Xoossay koyiyoobaa i lefissidi yootibeenna. Haymaanootiyaa kaalettiya wolqqaama asati bantta xallaa xillo oottiyoogaanne eta worddo timirttiyaa xalan qoncciyaa kessiis. He asatussi pirdday bessees; hegaa Yesuusi etayyo qoncce ogiyan yootiis. Issi wode i hagaadan giis: “Lo77o milatiya iitatoo, higgiyaa tamaarissiyaageetoonne Parisaawetoo, intteyyo aayye7ana. Aissi giikko, kare baggaara aannuwan tiyettidi, lo77i uttidi, qassi garssa baggaara haiqqida asa meqettinne wooqqidabai ubbabai kumido duufota milateeta. Hegaadankka, qassi bolla baggaara asa ubbau xillo milateeta; shin intteyyo garssa baggaara lo77o milatiya iitatettainne makkalai kumi utiiis.”—Maatiyoosa 23:27, 28.
10 Yesuusi bana oyqqanau yiida wotaaddaratuura Geetesemaane ataakiltte sohuwan gayttido wode, xalan ba oonatettaa qonccissiis. (Yohaannisa 18:3-8) Guyyeppe a Sanhedirina giyo xoqqa pirdda keettaa efin; yan qeesetu halaqay a qoridi oychiis. Yesuusi bana qeesetu halaqay woranau gaaso koyiyoogaa eriyaaba gidikkonne, i Xoossaa Naˈaanne Kiristtoosa gidiyoogaa xalan yootiis. I “wolqqaama Xoossaappe ushachcha baggaara uttidaashiininne saluwaa shaaraara yiishin” eti beˈanaagaa gujjidi yootiis. (Marqqoosa 14:53, 57-65) Hegaappe guuttaa takkidi, bana naxa kessana danddayiya PHilaaxoosa sintti Yesuusi qashettidi shiiqiis. SHin Yesuusi ba bolli denddida mootuwau aybanne zaarennan coˈˈu giis. (Marqqoosa 15:1-5) Ha ubbabau keehippe xalatettaa koshshiis.
11. Xalatettay siiquwaara ayba ogiyan gayttii?
11 SHin Yesuusi haˈˈi PHilaaxoosau: “Taani tumatettaayyo markkattana gishshau yelettaas; qassi hegaa gishshau, ha sa7aa yaas” yaagiis. (Yohaannisa 18:37) Yihooway Yesuusa kiittidoy mishiraachuwaa yootanaadaana; i saluwan deˈiya ba Aawaa siiqiyo gishshau hegaa ufayttidi oottiis. (Luqaasa 4:18, 19) Yesuusi asaakka siiqees. I eta deˈoy iita hanotan deˈiyoogaa erees. Hegaadan nuuni xalaaninne yayyennan sabbakiyoy Xoossaanne nu shooruwaa wozanappe siiqiyo gishshataassa.—Maatiyoosa 22:36-40.
Nuuni Xalan Sabbakanau Geeshsha Ayyaanay Maaddees
12. Beni wode erissiyo ashkkarati ufayttanaadan oottidabay aybee?
12 Yesuusa hayquwaappe simmin deˈiya saaminttatun, Yihooway ooratta erissiyo ashkkarati gujettanaadan oottido gishshau erissiyo ashkkarati ufayttidosona. Daro biittaappe PHenxxaqosxxe baalaa bonchanau Yerusalaame yiida 3,000 gidiya Ayhudatinne Ayhuda haymaanootiyau laamettida asati issi gallassan xammaqettidosona! Yerusalaamen deˈiya asa ubbay he hanotaabaa haasayidaba milatees. Geeshsha Maxaafay: “Yesuusi kiittidoogeetu kushiyan daro oorattabainne malaatai oosettin, asa ubbaa yashshai oiqqiis” yaagees.—Oosuwaa 2:41, 43.
13. Ishantti xalanau woossidoy aybissee? Hegaa zaaroy ayba gididee?
13 Haymaanootiyaa kaalettiyaageeti yiillotidi PHeexiroosanne Yohaannisa oyqqidi, issi gallassaa qachidi, Yesuusabaa haasayennaadan azazidosona. Eti naaˈˈay qashuwaappe birshshettidi hanidabaa ishanttussi yootin, eti ubbay banttana gakkida yedetaa xeelliyaagan: “Godau, . . . nuuni ne ashkkarati, ne qaalaa kumetta xalan yootanaadan, nuna danddayissa” yaagidi woossidosona. Hegaa zaaroy ayba gididee? “Eta ubban Geeshsha Ayyaanai kumin, Xoossaa qaalaa xalan yootidosona.”—Oosuwaa 4:24-31.
14. Sabbakiyo oosuwan geeshsha ayyaanay nuna waatidi maaddii?
14 Erissiyo ashkkarati Xoossaa qaalaa xalan yootanaadan maaddiday wolqqaama gidida Yihoowa geeshsha ayyaanaa gidiyoogaa akeeka. Nuuni odiyoobaa ixxiyaageetussi gidinkka, tumaa haratussi xalan yootiyoogee nu minotettaana gidenna. Geeshsha ayyaanaa immanaadan nuuni Yihoowa oychikko, i immana danddayees; qassi immana. Yihoowa maaduwan, nuunikka ayba yedetaanne xooni kiyanau koshshiya xalatettaa demmana danddayoos.—Mazamure 138:3 nabbaba.
Ha Wodiyan Kiristtaaneti Xalan Sabbakoosona
15. Ha wodiyan tumay asaa ayba ogiyan shaakkii?
15 Beni wodiyaagaadan, ha wodiyankka tumay asaa shaakkiiddi deˈees. Issoti issoti tumau loˈˈo zaaruwaa immiyo wode harati nu goynuwaa akeekokkonanne bonchokkona. Yesuusi kasetidi yootidoogaadan issoti issoti nuna boroosona, baceessoosona woykko ubba ixxoosona. (Maatiyoosa 10:22) Issi issitoo asay nuna bala ogiyan xeelliyooba, qassi eraadooniyaanne gaazeexaa milatiyaabatun sunttaa mooriyooba gidoos. (Mazamure 109:1-3) Gidikkonne, saˈa yuushuwan Yihoowa asay mishiraachuwaa xalan sabbakees.
16. Nuuni sabbakiyo asatu xeelaa xalatettay laammana danddayiyoogaa bessiya temokroy awugee?
16 Nuuni xaliyoogee Kawotettaa mishiraachuwau asaa xeelay laamettanaadan oottana danddayees. Kirggisttaane biittan deˈiya issi michiyaa hagaadan gaasu: “Taani sabbakishin issi keettaaway: ‘Taani Xoossaa ammanays; shin Kiristtaanetu Xoossaa gidenna. Neeni zaarettada ha kare yiikko, ta kanaa ne bolli yeddana!’ yaagiis. Appe guyye baggan issi wogga kanay sanssalatan qashetti uttiis. SHin ‘Worddo Haymaanootiyaa Xayoy Matattiis!’ giya Kawotettaa Oduwaa Paydo 37 zamachaa wode, he son deˈiya hara asa demmanau qoppada he soo simmada baanau qofaa qachaas. Gidikkokka, kariyaa dooyiday he bitaniyaa. Taani sohuwaara Yihoowakko woossa simmada: ‘Saro, heezzu gallassappe kase nuuni haasayidobaa hassayays; qassi ne kanaakka dogabeykke. SHin taanikka neegaadan issi tumu Xoossan ammaniyo gishshau, ha tirakttiyaa neessi immanau yaas. Mata wode Xoossay bana bonchissenna haymaanootiyaa xayssana. Hagaa nabbabiyoogan, hegaabaa gujjada erana danddayaasa’ yaagaas. Bitanee he tirakttiyaa ekkin garamettaas. Hegaappe hara keettaa baas. Guuttaa takkidi bitanee tirakttiyaa oyqqidi woxxiiddi taakko yiis. ‘Taani nabbabaas; taani Xoossaa hanqquwaappe attanau ay oottana koshshii?’ yaagiis.” He bitanee xinaatiya doommidi, Kiristtaane shiiqotun shiiqiyoogaa doommiis.
17. Issi michee xalatettay yayyiya xinaatiyo waatidi minttettidee?
17 Nu xalatettay haratikka xala gidanaadan minttettana danddayees. Ruusiyaa biittan issi michiyaa banaara otobisiyan biya issinnissi maxeetiyaa bessaasu. He wode, issi bitanee ba uttidosaappe denddi eqqidi, michee kushiyaappe maxeetiyaa dafi ekkidi, gorppidi duge oliis. Ba cenggurssaa xoqqu oottidi o cayiis; a deˈiyoosaa eranau oychiisinne he heeran sabbakennaadan yootiis. Michiyaa Yihooway maaddanaadan woossaasu; qassi Yesuusi: “Ashuwaa woriyaageetuyyo yayyoppite” yaagido qaalaa hassayaasu. (Maatiyoosa 10:28) Michiyaa dendda eqqada yayyennan bitaniyau, “Taani deˈiyosaa neeyyo odikke; qassi heeran sabbakiyoogaakka aggikke” yaagaasu. Hegaappe simmin, michiyaa otobisiyaappe wodhaasu. A xannaˈissiyoora he otobise giddon deˈiyoogaa michiyaa erabeykku. He maccaasiyaa asaa yayyada Kiristtaane shiiqotun beettennaaro. SHin michee xalatettaa beˈada, he maccaasiyaa Kiristtaane shiiqotun beettiyoogaa doommanau qofaa qachaasu.
18. Yesuusaagaadan xalan sabbakanau nena aybi maaddii?
18 Xoossaappe haakkida ha alamiyan sabbakanau Yesuusaagaadan xalana koshshees. Neeni hegaadan oottanau aybi maaddii? Sinttanaabaa qoppa. Xoossaanne ne shooruwaa minttada siiqiyoogaa aggoppa. Xala gidanau maaddanaadan Yihoowakko woossa. Yesuusi nenaara deˈiyo gishshau, nerkka gidennaagaa ubbatoo hassaya. (Maatiyoosa 28:20) Geeshsha ayyaanay nena minttana. Qassi Yihooway nena anjjananne maaddana. Yaatiyo gishshau, xaliyaageetanne, “Godai tana maaddiyaagaa; taani yayyikke. Asi tana ai oottii?” yaagiyaageeta gidoos.—Ibraawe 13:6.
Woygada Zaaruutee?
• Xoossau oottiyaageeti xalanau koshshiyoy aybissee?
• Xala gidanau . . .
Kiristtoosappe kase deˈida ammanettida asatuppe,
Yesuus Kiristtoosappe,
beni wode Kiristtaanetuppe,
ha wodiyan deˈiya Kiristtaanetuppe ay tamaariyoo?
[Oyshata]
[Sinttaa 27n deʼiya misiliyaa]
Yesuusi haymaanootiyaa kaalettiyaageetu hanotaa yayyennan qoncciyaa kessiis
[Sinttaa 29n deʼiya misiliyaa]
Yihooway nuuni sabbakanau xalanaadan oottees