‘Xilloti Awa Ayfiyaadan Pooˈana’

“He wode xilloti bantta aawaa kawotettan awa aifiyaadan poo7ana.” —MAATIYOOSA 13:43.

1. Yesuusi leemisuwan qonccissido, Kawotettaara gayttida dumma dummabati awugeetee?

YESUUS KIRISTTOOSI Kawotettaara gayttida dumma dummabata qonccissanau daro leemisuwaa yootiis. I “asau he ubbaa leemisuwan odiis; leemisoi bainnan i issibaakka odenna.” (Maatiyoosa 13:34, 35) Kawotettaa tumaa zerettaa zeriyoogaabaa yootido leemisuwan, mishiraachuwaa ekkanaadan issi ura wozanay oottiyoobaanne i ayyaanaaban diccanaadan Yihooway oottiyoobaa Yesuusi loyttidi qonccissiis. (Marqqoosa 4:3-9, 26-29) Kawotettaa kiitaa ekkiyaageetu qooday doomettan qoncci beettennaba gidikkonne, hegee keehippe daranaagaakka Yesuusi leemisuwan yootiis. (Maatiyoosa 13:31-33) Gujjidikka, Kawotettaa kiitaa ekkiya ubbay he Kawotettau bessiyaagaadan haarettees giyoogaa gidennaagaa i qonccissiis.—Maatiyoosa 13:47-50. *

2. Yesuusi yootido, gisttiyaanne zardduwaa leemisuwan loˈˈo zerettay ay malaatii?

² Gidikkokka, Yesuusi yootido leemisuwaappe issoy aara a Kawotettan haariyaageeta shiishshiyoogaabaa yootees. Hagee darotoo gisttiyaanne zardduwaa leemisuwaa geetettiyaagaa gidishin, Maatiyoosa shemppo 13n dees. Zerido zerettay “Kawotettaa qaalaa” gidiyoogaa Yesuusi hara leemisuwan yootidaba gidikkonne, ha leemisuwan loˈˈo zerettay harabaa, giishin “kawotettaa asaa” malaatiyoogaa yootiis. (Maatiyoosa 13:19, 38) Hageeti Kawotettau haarettiyaageeta gidennan, Kawotettaa “naata” woy hegaa laattiyaageeta.—Roome 8:14-17; Galaatiyaa 4:6, 7 nabbaba.

Gisttiyaanne Zardduwaa Leemisuwaa

3. Leemisuwan odettida bitaniyaa gakkida metuwaanne i he metuwaa waatidi giigissanau qoppidaakko qonccissa.

³ Leemisoy hagaadan gees: “Saluwaa kawotettai ba goshshan lo77⁠o zerettaa zerida bitaniyaa milatees. SHin qammi asai xiskkiichchidaashin, a morkkee yiidi, gisttiyaa zeridoogaa bolli zardduwaa zeridi biis. SHin gisttee mokkidi, aifido wode, zarddoikka a giddon beettiis. A ashkkarati akko yiidi, ‘Godau, neeni ne goshshan lo77⁠o zerettaa zerabeikkii? Yaatin, zarddoi auppe yiidee?’ yaagidosona. Yaagin Godai, ‘Hegaa morkkee oottiis’ yaagiis. Ashkkarati, ‘Nuuni biidi shoddanaagaa dosai?’ yaagidosona. SHin i ‘CHii zardduwaa intte shoddiiddi, gisttiyaara shoddana. Bochchoppite; cakkiyo wodee gakkanaashin, issippe diccona. Cakkiyo wodee gakkin, taani cakkiyaageeta, kasetidi zardduwaa maxite; maxidi taman xuugganau mirqqiyan mirqqiyan qachchite; shin gisttiyaa ta gootaran qolite’ gaana.”—Maatiyoosa 13:24-30.

4. (a) Leemisuwan odettida bitanee oonee? (b) Yesuusi ha zerettaa zeriyoogaa doommidoy awudee, ayba ogiyaanee?

⁴ Ba gaden loˈˈo zerettaa zerida bitanee oonee? Yesuusi guyyeppe ba erissiyo ashkkaratuyyo: “Lo77⁠o zerettaa zeriyaagee tana Asa Na7aa” giido wode he oyshau  zaaruwaa immiis. (Maatiyoosa 13:37) Yesuusi, ‘Asa Naˈay’ saˈan heezzu laytta baggaa haggaazido wode, kattaa zeranau gadiyaa giigissiis. (Maatiyoosa 8:20; 25:31; 26:64) Yesuusi 33 M.L. PHenxxaqosxxe gallassaappe doommidi loˈˈo zerettaa, “kawotettaa asaa” zeriyoogaa doommiis. Ha zeriyoogee doomettidoy, Yesuusi Yihoowa kalˈˈatidi ba erissiyo ashkkaratu bolli geeshsha ayyaanaa gussin, eti tiyettida Xoossaa naata gidido wode. * (Oosuwaa 2:33) Loˈˈo zerettay mokki diccidi bootiis. Yaatiyo gishshau, loˈˈo zerettaa zeriyoogaa halchoy, Yesuusaara issippe a Kawotettaa laattiyaanne aara haariyaageetu qooday kumanaashin eta shiishshanaassa.

5. Leemisuwan morkke geetettiday oonee, zardduwan leemisettidaageeti shin?

⁵ Morkkee oonee, zarddoy shin? Morkkee “xalahe halaqaa” gidiyoogaa Yesuusi yootiis. Zarddoy “xalahe halaqaa asaa” gidiyoogee qoncciis. (Maatiyoosa 13:25, 38, 39) Zarddoy puranaappe kase gisttiyaappe shaakkanau metiya, marzzee deˈiyooba. Banttana Kawotettaa asa giyaaba gidikkonne, loˈˈo ayfiyaa ayfenna worddo Kiristtaaneta, hagee loytti qonccissiya leemiso! Kiristtoosa kaalloos giya, ha loˈˈo milatiya iita Kiristtaaneti tumuppe Seexaanaa Dabloosa ‘zerettaa’ shaahota.—Doomettaabaa 3:15.

6. Zarddoy qoncciyoogaa doommidoy awudee, he wode asay xiskkidoy ayba ogiyaanee?

⁶ Ha zarddo mala Kiristtaaneti qonccidoy  awudee? “Qammi asai xiskkiichchidaashin” gidiyoogaa Yesuusi yootiis. (Maatiyoosa 13:25) Hegee awudee? Hegaa zaaruwaa kiitettida PHauloosi Efisoona gubaaˈiyaa cimatuyyo: “Taani biidoogaappe guyyiyan, wudiyaassi qarettenna iita wanggireelloti intte giddo gelanaagaanne, kaalliyaageetakka bantta geeduwaa kaalettanau wordduwaa haasayiya asati intte giddoppe denddanaagaa erais” giidoogaappe akeekoos. (Oosuwaa 20:29, 30) I he cimati ayyaanaaban beegottidi deˈanaadan zoriis. Kaddidaageetu timirttiyaa ‘teqqiya,’ kiitettidaageetuppe issoti issoti hayquwan xiskki simmin, daro Kiristtaaneti ayyaanaaban xiskkidosona. (2 Tasalonqqe 2:3, 6-8 nabbaba.) Kaddiyaageetu timirttee doommidoy he wode.

7. Gisttiyaappe amaridaagee zardduwau laamettidee? Qonccissa.

⁷ Yesuusi gisttee zarddo gidanaagaa gidennan, gistte giddon zarddoy zerettidoogaa yootiis. Yaatiyo gishshau, kase tumu Kiristtaane gidida, tumaa aggidaageeta ha leemisoy malaatenna. Hegaappe dumma ogiyan, ha leemisoy Seexaanay Kiristtaane gubaaˈiyaa mooranau iita asati yaa gelanaadan oottiyoobaa malaatees. Kiitettidaageetuppe wurssettan attida, Yohaannisi cimido wode, he makkaliyo hanotay qoncci beettiis.—2 PHeexiroosa 2:1-3; 1 Yohaannisa 2:18.

“Cakkiyo Wodee Gakkanaashin, Issippe Diccona”

8, 9. (a) Goday ba ashkkarata azazidobay, Yesuusi yootiyo wode siyiyaageeti akeekiyooba gididoy aybissee? (b) Wurssettan, gistteenne zarddoy issippe diccidoy ayba ogiyaanee?

⁸ Godaa ashkkarati hanettidabaa yooti simmidi, “Nuuni biidi [zardduwaa] shoddanaagaa dosai?” yaagidi oychidosona. (Maatiyoosa 13:27, 28) A zaaroy garamissana danddayees. Cakkiyo wodee gakkanaashin gistteenne zarddoy issippe diccanaadan eti aggi bayanaadan yootiis. He azazoy Yesuusi erissiyo ashkkarati akeekiyooba. Gisttiyaa zardduwaappe shaakki eriyoogee ay keena metiyaabakko eti eroosona. Goshshaabaa amaridabaa eriyaageeti zardduwaa xaphoy gisttiyaa xaphuwaara oyqettiyoogaa eroosona. * Eti bochennaadan Goday yootidoogee garamissenna!

⁹ Hegaara issi mala hanotan, daro xeetu layttau Kiristtaane geetettiya dumma dumma haymaanooteti keehi daro zardduwaa ayfidosona; he zarddoy koyro Rooma Kaatolikiyaaninne Orttodookise haymaanootiyan, qassi hegaappe takkidi, daro Protesttantte citatun ayfiis. Hegaadankka, tumu gisttiyaa guutta ayfeekka goshshan leemisettida alamiyan zerettiis. Leemisuwan odettida bitanee cakkiyo wodee gakkanaashin, zerido kattay gakkiyo adussa wodiyaa danddayan naagiis.

Daro Wodiyau Naagido, Cakkiyo Wodiyaa

10, 11. (a) Cakkiyo wodee awudee? (b) Gisttiyan leemisettidaageeti Yihoowa gootaraa shiiqiiddi deˈiyoy ayba ogiyaanee?

¹⁰ Yesuusi: “Cakkiyo wodee, wodiyaa wurssettaa; qassi cakkiyaageeti kiitanchchata” yaagiis. (Maatiyoosa 13:39) Ha iita siraataa wurssetta gallassatun asay shaahettees; giishin Kawotettaa asay zardduwan leemisettidaageetuppe shaahettidi shiiqees. Hegaa xeelliyaagan kiitettida PHeexiroosi: “Pirddai Xoossaa asaa bolli doomettiyo wodee gakkiis. Qassi he pirddai koiro nu bolli doomettiyaabaa gidikko, a wonggeliyaayyo azazettennaageetu wurssettai aiba gidanee?” yaagiis.—1 PHeexiroosa 4:17.

¹¹ Wurssetta gallassay, woykko “siraataa wurssettay” doommi simmin takkennan, banttana tumu Kiristtaane giyaageetu bolli pirdday doommiis; he pirdday eti tumuppe “kawotettaa asaa” woy “xalahe halaqaa asaa”  gidiyoogaa qonccissees. ‘Kasetada’ Gita Baabiloona kunddaasu; hegaappe simmin cahay doomettido wode kawotettaa asay shiiqiis. (Maatiyoosa 13:30) SHin gisttiyan leemisettidaageeti ha wodiyan Yihoowa gootaraa shiiqqiiddi deˈiyoy ayba ogiyaanee? Ha cakettidaageeti Xoossan nashettiyoonne a naaguwaa demmiyo, zaarettidi eqqida Kiristtaane gubaaˈiyaa yiidosona woykko saluwaa woytuwaa demmidosona.

12. Cahay ay keena wodiyaa takkii?

¹² Pirdday ay keena wodiyau takkii? Yesuusi ‘cahaa wode’ giido gishshau, hegee daro wodiyaa takkiyaaba. (Ajjuutaa 14:15, 16) Tiyettidaageetu ubbaassi wurssetta wode ubban pirdday imettees. Eta bolli wurssetta maatafay wodhana gakkanaashin pirdday imettiiddi takkees.—Ajjuutaa 7:1-4.

13. Zarddoy xube gidiyoy ayba ogiyaanee, iitabaa oottiyoy shin ayba ogiyaanee?

¹³ Kawotettaappe qorettiyaageeti oonee, qassi eti xube gidiyoynne iitabaa oottiyoy ayba ogiyaanee? (Maatiyoosa 13:41) Zardduwan leemisettida, Kiristtaane giyo ammanuwaa qeeseti daro xeetu layttau miilooniyan qoodettiya asaa balettidosona. Eti hegaadan oottidoy, siˈooliyaa tamaa merinaa qixaatiyaanne kirqqi giya, qassi geema gidida Sillaasiyaa mala, Xoossaa bonchissenna, “xube gidiya” timirttiyaa tamaarissiyoogaana. Haymaanootiyaa kaalettiya daroti ha alamiyaa laggettiyoogaaninne issi issi hanotan shori baynna kandduwaa bessiyoogan bantta wudiyau iita leemiso gididosona. (Yaaqooba 4:4) Hegaa bollikka, Kiristtaane giyo haymaanootee ba yameti poliyo shori baynna hanotaa coˈˈu gi xeellees. (Yihudaa 4 nabbaba.) Ha ubbabay deˈishinkka, eti Xoossaa asa milatanau maloosona. Kawotettaa asay, zarddo mala hanotaappenne xube gidiya, mooriya timirttiyaappe haakkidoogan ay keena ufayttiyoonaa!

14. Zardduwan leemisettidaageeti yeekkiyoynne achaa garcciyoy ayba ogiyaanee?

¹⁴ Zardduwan leemisettidaageeti yeekkiyoynne achaa garcciyoy ayba ogiyaanee? (Maatiyoosa 13:42) ‘Xalahe halaqaa asay’ barchetiyoy, zardduwan leemisettidaageeti ayyaanaaban marzze mala gidiyoogaa ‘kawotettaa asay’ qoncciyaa kessidoogaana. Bantta woosa keettaa yametu maadoy guuxxi guuxxi biyo gishshaunne yameta ayssana danddayenna gishshaukka, eti yeekkoosona.—Isiyaasa 65:13, 14 nabbaba.

15. Zardduwan leemisettidaageeti taman xuugettiyoy ayba ogiyaanee?

¹⁵ Zarddoy shiiqidi taman xuugettiyoy ayba ogiyaanee? (Maatiyoosa 13:40) Hegee, zarddoy wurssettan waananaakko qonccissees. Zarddoy leemiso hanotan toˈenna taman olettiyoogee merinau xayiyoogaa malaatees. (Ajjuutaa 20:14; 21:8) Zardduwan leemisettida, worddo Kiristtaaneti ‘iita waayiyaa’ wode xayana.—Maatiyoosa 24:21.

Eti “Awa Aifiyaadan Poo7ana”

16, 17. Xoossaa beeta maqidasiyaa xeelliyaagan Milkkiyaasi woygidi hananabaa yootidee, hegee polettiyoogaa doommidoy ayba ogiyaanee?

¹⁶ Gisttiyan leemisettidaageeti ‘awa ayfiyaadan  pooˈiyoy’ awudee? (Maatiyoosa 13:43) Xoossaa beeta maqidasiyaa geeshshiyoogaa xeelliyaagan, Milkkiyaasi hagaadan giis: “‘Be7⁠ite, ta biyo ogiyaa giigissanaadan, taani kiittiyo asa kasetada yeddana; qassi intte koyiyo GODAIKKA intte qoppennan de7⁠ishin, Beeta Maqidasiyaa puttu gaana. Intte naagiyo, ta maachchaa kiitaa ekkidi yiya ta kiittiyoogeekka yaana’ yaagees. SHin i biraanne worqqaa seerissidi geeshshiya tamaa malanne maayuwaa meecciyo saamunaa mala gidiyo gishshau, i yiyo gallassi danddayanai oonee? Qassi i qoncciyo wode a sinttan eqqanau danddayiyai oonee? I biraanne worqqaa geeshshiyaagaadaaninne tigiyaagaadan uttidi, Leewa zareta geeshshana; eti GODAASSI likke yarshshuwaa yarshshana gakkanaashin, i eta geeshshana.”—Milkkiyaasa 3:1-3.

¹⁷ Ha wodiyan, Yihooway ‘maachaa kiitaa ekkidi yiya kiitanchaa,’ Yesuus Kiristtoosaara 1918n ayyaana beeta maqidasiyaa geeshshido wode, ha hiraagay polettiyoogaa doommidoogee qoncce. Geeshshiyoogee wuriyo wode aybi hananaakko Milkkiyaasi: “Intte zaarettidikka xilluwaappenne nagaranchchaappe gidduwan de7⁠iya zawaanne Xoossaassi azazettiyaageetuppenne azazettennaageetuppe gidduwan de7⁠iya zawaa be7ana” yaagiis. (Milkkiyaasa 3:18) Tumu Kiristtaaneti zaaretti minettidi bantta oosuwaa minni oottodoogee cahaa oosoy doommidoogaa bessees.

18. Nu wodiyan aybi hananaagaa Daaneeli kaseti yootidee?

¹⁸ Hananabaa yootiya Daaneeli nu wodiyaa xeelliyaagan: “Aadhdhida eranchchati, saluwaa poo7⁠uwaadan, qassi darota xillotettaa ogiyaa kaalettidaageeti meri merinau xoolinttiyaadan poo7ana” yaagidi hananabaa yootiis. (Daaneela 12:3) Ha keehippe pooˈiyaageeti oonee? Yesuusi gisttiyaanne zardduwaa leemisuwan yootido loˈˈo gisttiyan leemisettida, ayyaanan tiyettidaageetuppe haraa gidana danddayokkona! Zawi baynna dorssa mala asay awudeegaappenne aaruwan gujji gujji biyoogee, zardduwan leemisettida worddo Kiristtaaneti Kawotettaappe qorettiyoogaa qoncciyan bessees. Sinttappe Kawotettaa haaruwan deˈana ha asati, ayyaanan tiyettida Israaˈeeletuppe attidaageetuura hashetiyoogan etikka ha xuma alamiyan pooˈuwaa pooˈissoosona.—Zakkaariyaasa 8:23; Maatiyoosa 5:14-16; Piliphphisiyuusa 2:15.

19, 20. ‘Kawotettaa asay’ yeemottidi naagiyoy aybee, qassi kaalliya huuphe yohuwan ay tobbanee?

¹⁹ Ha wodiyan, ‘kawotettaa asay’ saluwan demmana boncho woytuwaa yeemotti naagees. (Roome 8:18, 19; 1 Qoronttoosa 15:53; Piliphphisiyuusa 1:21-24) Gidikkokka, he wodee gakkanaashin, eti ammanettidi deˈanau, ubbatoo pooˈuwaa pooˈissanaunne ‘xalahe halaqaa asaappe’ dummatidi deˈanau bessees. (Maatiyoosa 13:38; Ajjuutaa 2:10) Nu wodiyan, zarddoy leemiso hanotan qorettiyoogee kaalettidobaa beˈiyo maataa demmidoogan nuuni ubbay keehippe ufayttoos!

²⁰ SHin Kawotettaa asaanne Kawotettaa haaruwan saˈan merinau deˈanau hidootiya, awudeegaappenne aaruwan gujji gujji biya zawi baynna daro asaa giddon ayba gaytotettay deˈii? Kaalliya huuphe yohoy ha oyshaa zaarees.

[Tohossa qofata]

[Oyshata]

[Sinttaa 20n deʼiya misiliyaa]

PHenxxaqosxxe galla 33 M.Ln loˈˈo zerettaa zeriyoogee doomettiis

[Sinttaa 23n deʼiya misiliyaa]

Gisttiyan leemisettidabay ha wodiyan Yihoowa gootaran shiiqiiddi deˈees

[Sinttaa 23n deʼiya misiliyaa]

Pictorial Archive (Near Eastern History) Est.

Hassayay?

Yesuusi yootido gisttiyaanne zardduwaa leemisuwan, kaallidi deˈiyaageeti ay malaatiyoonaa?

• Loˈˈo zerettay

• Zerettaa zerida bitanee

• Zerettaa zeriyoogee

• Morkkee

• Zarddoy

• Cakkiyo wodee

• Gootaray

• Yeekkiyoogeenne achaa garcciyoogee

• Toˈenna tamay