Intte Mala Kiristtaaneta Bonchiyoogan Kaseteetii?

“Ishatetta siiquwan issoy issuwaara wozanappe siiqettite. Issoy issuwaa bonchiyoogan kasetite.”—ROO. 12:10, NW.

1, 2. (a) PHauloosi Roome Kiristtaanetuyyo xaafido dabddaabbiyan woygi zoridee? (b) Nuuni woygiya oyshata beˈanee?

KIITETTIDA PHauloosi Roome Kiristtaanetuyyo xaafido dabddaabbiyan, Kiristtaane gidiyoogaadan nuuni gubaaˈe giddon siiqettiyoogee keehippe koshshiyoogaa minttidi yootiis. Nuuni siiqettiyoy “asa bessanau” gidana koshshennaagaa akeekissiis. I ‘ishatetta siiquwaabaakka’ yootiis; qassi hegaa mala siiqoy “wozanappe” gidana koshshiyoogaa akeekissiis.—Roo. 12:9, 10a, NW.

² Ishatetta siiquwaa bessiyoogee haratussi pashkkiyoogaappe aadhiyaaba gujjiyoogee tuma. Hegaa mala siiqoy oosuwan qonccana koshshees. Issi hanotan qonccissana xayikko, nuuni siiqiyoogaa ooninne erana danddayenna. Yaatiyo gishshau, PHauloosi, “Issoy issuwaa bonchiyoogan kasetite” yaagidi gujji zoriis. (Roo. 12:10⁠b, NW) Bonchiyoogee ay ay gujjii? Nu mala Kiristtaaneta bonchiyoogan kasetiyoogee keehippe koshshiyoy aybissee? Nuuni hegaadan waatidi oottana danddayiyoo?

Bonchiyoogee Woygiyoogee?

3. Geeshsha Maxaafay koyro xaafettido doonan, “bonchuwaa” giya qaalaa birshshettay aybee?

³ “Bonchuwaa” geetettida Ibraysxxe qaalaa sitta birshshettay “deexuwaa” giyoogaa. Bonchettiya uri keehi xoqqu oottidi xeelliyo ura. He Ibraysxxe qaalay Geeshsha Maxaafan darotoo “anggaa” geetettidikka birshshettiis; he birshshettay bonchiyo ura xoqqu oottidi xeelliyoogaa bessees. (Doo. 45:13, NW) Geeshsha Maxaafan “boncho” geetettidi birshshettida Giriike qaalay xoqqu oottidi alˈˈobadan xeelliyoogaa giya qofaa oyqqiis. (Luq. 14:10) Ee, nuuni bonchiyoogeeti nuuni alˈˈobadan xoqqu oottidi xeelliyoogeeta.

4, 5. Bonchuwan oyqqiyoogee bonchi xeelliyoogaara gayttiyoy ayba ogiyaanee? Leemisuwan yoota.

⁴ Harata bonchiyoogee ay ay gujjii? Bonchiyoogaa doommiyoy nuuni harata xeelliyo ogiyaana. Nuuni harata xeelliyo hanotay eta oyqqiyo ogiyaarakka gayttidaba. Hara guussan, koyro nu ishaa bonchi xeelloos; yaatidi a bonchuwan oyqqana danddayoos.

⁵ Issi Kiristtaanee wozanappe gidana xayikko, ba mala Kiristtaaneta waatidi bonchana danddayii? (3 Yoh. 9, 10) Issi puutee dalqqidalqqiyoy aradda biittan tokkiyoogaa xallaana gidiyoogaadan, ubbatoo tumuppe bonchana danddayiyoy wozanappe gidiyo wode xallaana. Nuuni harata bonchiyoy wozanappe gidana xayikko, lada biittan tokettida puutee meliyoogaadan bonchiyoogaa issi wode agganaagee erettidaba. Yaatiyo gishshau, PHauloosi bonchanaadan zorido zoriyaappe kase, “Intte siiqoi asa bessanau siiqettiyoobaa gidanau bessenna” yaagidi geeshshi yootidoogee garamissenna.—Roo. 12:9; 1 PHeexiroosa 1:22 nabbaba.

“Xoossaa Leemisuwan Merettida Asaa” Bonchite

6, 7. Nuuni harata bonchana koshshiyoy aybissee?

⁶ Harata wozanappe bonchi xeelliyoogee eta bonchuwan oyqqanau koshshiyaaba gidiyo gishshau, nu ishantta ubbaa bonchanaadan Geeshsha Maxaafay yootiyo gaasuwaa  nuuni mule dogana koshshenna. Yaatiyo gishshau, he gaasotuppe naaˈˈata ane beˈoos.

⁷ Saˈan deˈiya hara meretatuppe dummatiya ogiyan, asaa naati “Xoossaa leemisuwan” merettidosona. (Yaaq. 3:9) Yaatiyo gishshau, Xoossau deˈiya siiquwaa, aadhida eratettaanne suure pirddaa mala eeshshati nuuyyo deˈoosona. Nuna Medhidaagaappe nuuni demmido harabaakka akeekite. Mazamuraawee, “Abeet GODAU, . . . neeni ne bonchchuwaa salotuppe bollan xoqqu xoqqu ootta wottadasa. . . . [Asa] neeni kiitanchchatuppe amaridaagaa ziqqissadasa; bonchchuwaanne gitatettaa akiliiliyaa a huuphiyan wottadasa” yaagiis. (Maz. 8:1, 4, 5; 104:1) * Xaaxi waaxi xeelliyo wode, Xoossay asaa naata bonchuwaa akiliiliyan alleeqissiis. Hegaa gishshau, nuuni issi ura bonchiyo wode, asaa naati bonchettanaadan oottiday Yihoowa gidiyoogaa ammanidi ekkiyoogaa bessoos. Nuuni ubba asaa bonchana bessiyo gaasoy deˈiyaaba gidikko, nu mala Kiristtaaneta keehippe bonchana bessennee?—Yoh. 3:16; Gal. 6:10.

Nuuni Issi Keettaa Asa

8, 9. Nu mala Kiristtaaneta bonchanaadan PHauloosi yootido gaasoy aybee?

⁸ Nuuni issoy issuwaa bonchana koshshiyo hara gaasuwaa PHauloosi yootiis. Bonchanaadan zoranaappe kase i, “Ishatetta siiquwan issoy issuwaara wozanappe siiqettite” yaagiis. “Wozanappe siiqettite” geetettida Giriiketto qaalay, issoy issuwaara maadettiyaanne siiqettiya so asaa giddon deˈiya mino issippetettaa malaatees. Yaatiyo gishshau, PHauloosi he qaalaa goˈettiyoogan, gubaaˈiyan deˈiya gaytotettay siiqettidi issippetettan deˈiya so asaagaa mala gidana koshshiyoogaa qonccissiis. (Roo. 12:5) Hegaa bollikka, PHauloosi hegaa xaafidoy, eta ubbau Aawa gidida Yihooway ba naata oottidi ekkido, ayyaanan tiyettida Kiristtaanetussa gidiyoogaa hassayite. Yaatiyo gishshau, eti keehi siiqettiya so asa mala. Hegaa gishshau, PHauloosa wode deˈida ayyaanan tiyettida Kiristtaaneti issoy issuwaa siiqanaadan oottiya mino gaasoy deˈiyoogee tuma. Ha wodiyan deˈiya ayyaanan tiyettida Kiristtaanetu hanotaykka hegaara issi mala.

⁹ ‘Hara dorssata’ xeelliyaaganshin woygana danddayettii? (Yoh. 10:16) Haˈˈi Xoossay eta ba naata oottidi ekkibeennaba gidikkokka, eti alame yuushuwan issi keetta asa mala gidida Kiristtaane gidiyo gishshau, issoy issuwaa isha, micho giidi xeesiyoogee bessiyaaba. (1 PHe. 2:17; 5:9) Hara dorssatu yame gididaageeti issoy issuwaa “isha” woy “micho” giyoy aybissakko loytti akeekikko, etikka bantta mala Kiristtaaneta wozanappe bonchana bessiyo mino gaasoy deˈees.—1 PHeexiroosa 3:8 nabbaba.

Bonchiyoogee Keehippe Koshshidoy Aybissee?

10, 11. Bonchi xeelliyoogeenne bonchuwan oyqqiyoogee keehippe koshshiyoy aybissee?

¹⁰ Bonchi xeelliyoogeenne bonchuwan oyqqiyoogee keehippe koshshiyoy aybissee? Nu ishatanne michota bonchiyoogee kumetta gubaaˈiyaa sarotettaunne issippetettau keehippe maaddiyaaba gidiyo gishshataassa.

¹¹ Yihoowaara mata dabbo gidiyoogeenne a ayyaanaa maaduwaa demmiyoogee nuuni tumu Kiristtaane gidiyoogaadan keehippe minettanaadan oottiyoogaa akeekoos. (Maz. 36:7; Yoh. 14:26) Hegaadankka, nu mala Kiristtaaneti nuna nashshiyo wode minettoos. (Lee. 25:11) Issi uri nuna wozanappe nashshiyoodenne bonchiyoode ufayttoos. Hegee nuuni murttidi, ufayssan deˈuwaa ogiyan simerettanaadan minttettees. Intteyyo hegaadan siyettido wodee deˈennan aggenna.

12. Nuuni ubbay gubaaˈiyan siiqettiyo hanotay deˈanaadan oottana danddayiyoy ayba ogiyaanee?

¹² Nuuni bonchettanau koyiyoogee nuussi meretan deˈiyaaba gidiyoogaa Yihooway eriyo gishshau, i ba Qaalan, “Issoi  issuwaa bonchchiyoogan ufaittite” yaagidi zoridoogee bessiyaaba. (Roo. 12:10; Maatiyoosa 7:12 nabbaba.) Awudekka maaddiya he zoriyaa oosuwan peeshshiya ubba Kiristtaaneti, Kiristtaane ishanttu giddon siiqo hanotay deˈanaadan oottoosona. Hegaa gishshau, ‘Taani gubaaˈiyan deˈiya issi ishaa woy issi michiyo bonchiyoogaa haasayaaninne oosuwan bessoosappe ay keena wodee aadhidee?’ yaagidi nuna oychana koshshees.—Roo. 13:8.

Nuuni Ubbay Bonchiyoogan Kasetana Koshshees

13. (a) Bonchiyoogan kasetana koshshiyay oonee? (b) Roome 1:7n deˈiya PHauloosa zoree ay qonccissii?

¹³ Bonchiyoogan kasetana koshshiyay oonee? PHauloosi Ibraawe Kiristtaanetussi xaafido dabddaabbiyan gubaaˈiyaa cimata, ‘Inttena kaalettiyaageeta’ yaagidi qonccissiis. (Ibr. 13:17) Cimati daro oosuwan kasetiyoogee tuma. Yaatikkonne, eti wudiyaa heemmiyaageeta gidiyoogaadan, hara cimata gujjin, bantta mala Kiristtaaneta bonchiyoogan kasetana koshshiyoogee qoncce. Leemisuwau, cimati ayyaanaaban gubaaˈiyau koshshiyaabaa tobbanau shiiqiyoode, hara cimati immiyo qofaa akeekan ezggiyoogan issoy issuwaa bonchoosona. Hegaa bollikka, issibaa kuuyiyo wode ubba cimatu qofaanne xeelaa akeekiyoogan bonchiyoogaa bessoosona. (Oos. 15:6-15) Gidikkokka, PHauloosi Roome Kiristtaanetuyyo xaafido dabddaabbee cimatu xallaassa gidennan, kumetta gubaaˈiyaassa gidiyoogaa nuuni akeekana koshshees. (Roo. 1:7) Yaatiyo gishshau, bonchiyoogan kasetanaadan immettida zoree ha wodiyan nu ubbaassi haniyaaba.

14. (a) Bonchiyoogan kasetiyoogaanne bonchiyoogaa giddon deˈiya dummatettaa leemisuwan qonccissa. (b) Nuuni nuna woygiya oyshaa oychana danddayiyoo?

¹⁴ PHauloosa zoree oyqqido harabaakka akeekite. I Roomen deˈiya ba mala Kiristtaaneti bonchanaadan xalla gidennan, bonchiyoogan kasetanaadan zoriis. Hegee keehippe koshshiyoy aybissee? Ha leemisuwaa qoppite. Nabbabiya tamaareti nabbabiyoogaa tamaaranaadan issi asttamaaree zoranee? Akkay. Eti nabbabiyoogaa eriyo gishshau, asttamaaree kaseegaappe loytti nabbabanaadan eta maaddanau koyees. Hegaadankka, bonchanaadan denttettiyaaba gidida, issoy issuwaa siiqiyoogee tumu Kiristtaaneta shaakki erissiyaaba. (Yoh. 13:35) Gidikkokka, nabbabi eriya tamaareti nabbabiyo hiillaa gujjana danddayiyoogaadan, nuunikka bonchiyoogan kasetiyaageeta gidiyoogan dichaa bessana danddayoos. (1 Tas. 4:9, 10) Hegee nuuni ubbay  oottanaadan imettidaba. ‘Taani gubaaˈiyan harata kasetada bonchiyoogan hegaadan oottaydda deˈiyaanaa?’ giidi nuna oychana danddayoos.

‘Hiyyeesata’ Bonchite

15, 16. (a) Nuuni bonchiyo wode xaasayi xeellana koshshennay oonee, aybissi? (b) Nu ishatanne nu michota ubbaa wozanappe bonchiyoogaa aybi qonccissana danddayii?

¹⁵ Gubaaˈiyan deˈiyaageeta bonchiyo wode, xaasayi xeellana koshshennay oonee? Xoossaa Qaalay, “Hiyyeesaassi kehiya asi GODAASSI tal77⁠ees; GODAI he lo77⁠o oosuwaa acuwaa qanxxees” yaagees. (Lee. 19:17) Nuuni harata bonchiyoogan kasetanau baaxetiyo wode, ha xiqisiyan deˈiya baaso siraatay nuna waatidi bochana koshshii?

¹⁶ Daro asay xoqqa maatay deˈiyo ura bonchiyaaba gidikkonne, banttappe laafiyaabadan xeelliyoogeeta bonchennaagaa maayeeta. SHin Yihooway he asatu mala gidenna. I, “Tana bonchchiyaageeta taani bonchchana” yaagiis. (1 Sam. 2:30; Maz. 113:5-7) Yihooway baassi oottiyaageetanne bana bonchiyaageeta ubbaa bonchees. I ‘banttana ziqqi oottiyaageeta’ xaasayi xeellenna. (Isiyaasa 57:15 nabbaba; 2 Odi. 16:9) Nuuni Yihoowa leemisuwaa kaallana koyoos. Hegaa gishshau, nuuni harata ay keena wozanappe bonchiyaakko eranau, ‘Gubaaˈiyan maati baynnaageeta waata oyqqiyaanaa?’ giidi nuna oychana koshshees. (Yoh. 13:14, 15) Nuuni hegau immiyo zaaroy harata ay keena wozanappe bonchiyaakko qonccissees.—Piliphphisiyuusa 2:3, 4 nabbaba.

Nu Wodiyaa Immiyoogan Bonchiyoogaa Bessoos

17. Harata bonchiyoogan kasetana danddayiyo waanna ogee awugee, hegaadan hanidoy aybissee?

¹⁷ Gubaaˈiyan deˈiya ubbata bonchiyoogan nuuni kasetana danddayiyo waanna ogee aybee? Haratuyyo nu wodiyaa immiyoogaa. Hegaadan hanidoy aybissee? Kiristtaane gidiyoogaadan nu deˈuwan oosoy daro; qassi gubaaˈiyan oottiyo keehippe koshshiya daro oosoti unddenna wodiyaa ekkoosona. Yaatiyo gishshau, nuuni wodiyaa alˈˈobadan xeelliyoogee garamiyaaba gidenna. Nu ishatinne michoti bantta wodiyaappe daruwaa nuussi immanaadan oychana koshshennaagaakka akeekoos. Hegaadankka, gubaaˈiyan deˈiya harati nuuni daro wodiyaa etassi immanaadan oychana koshshennaagaa akeekiyo wode nashshoos.

18. Sinttaa 22n deˈiya misilee bessiyoogaadan, nu mala Kiristtaanetuyyo nu wodiyaappe guuttaa immanau koyiyoogaa waatidi bessana danddayiyoo?

¹⁸ Gidoppe attin, nu mala Kiristtaanetuyyo wodiyaa immanau nuuni (ubba qassi gubaaˈiyaa cimati) oottiyoobaa guutta wodiyau agganau koyiyoogee eta bonchiyoogaa bessiyoogaakka akeekoos. Ayba ogiyan? Nu ishatussi amarida wodiyaa immanau nuuni oottiyoobaa guutta wodiyau aggiyoogee, eta ‘Intte tau alˈˈo gidiyo gishshau, ta oosuwaa oottiyoogaa aggada inttenaara amarida wodiyaa aattiyoogaa xoqqu oottada xeellays’ giyoogaa mala. (Mar. 6:30-34) Hegaadan oottennaagee, oottiyoobaa etappe aattidi xeelliyoogaa bessiyaaba. Nu ishaassi amarida wodiyaa immanau nu oosuwaa aggennaba gidikko, a nuuni laafabadan xeelliyaabadan ayyo siyettanaadan oottoos. Issi issitoo eesuwan oottana koshshiya allaalliyaa guutta wodiyaukka aggana bessennaagee qoncce. Gidikkokka, nu  ishatuyyoonne michotuyyo guutta wodiyaa immanau koyiyoogee woy koyennaagee, nu eta ay keena wozanappe bonchiyaakko darobaa qonccissees.—1 Qor. 10:24.

Bonchiyoogan Kasetanau Murttite

19. Nu wodiyaa immiyoogaappe hara ayba ogiyan nu mala Kiristtaaneta bonchana danddayiyoo?

¹⁹ Nu mala Kiristtaaneta nuuni bonchana danddayiyo, keehippe koshshiya hara ogeti deˈoosona. Leemisuwau, nuuni etau wodiyaa immiyoode, eti giyoobaakka ezgganau koshshees. Hegankka Yihooway nuuyyo leemiso gidees. Mazamuraawee Daawiti, “GODAA aifee xillotukko xeellees; qassi i ubba wode eta waasuwaa ezggees” yaagiis. (Maz. 34:15) Nu ishantta, ubba qassi maaduwaa koyidi nuukko yiidaageeta wozanappe ezggiyoogan Yihoowa leemisuwaa kaallanau baaxetoos. Hegaadan oottiyoogan eta bonchiyoogaa bessoos.

20. Bonchiyoogaa xeelliyaagan nuuni wozanan wottana koshshiyo akeekissoti awugeetee?

²⁰ Qommoora beˈidoogaadan, nu mala Kiristtaaneta wozanappe bonchana koshshiyoy aybissakko loytti hassayana koshshees. Hegaa bollikka, hiyyeesata gujjin ubba asaa bonchiyoogan kasetanau, injje wodiyaa koyoos. Hegaadan oottiyoogan, gubaaˈiyan ishatetta siiquwaanne issippetettaa minttoos. Yaatiyo gishshau, issoy issuwaa bonchiyoogaa xalla gidennan, ubbatoo kasetidi bonchiyaageeta gidoos. Hegaadan oottanau murttidetii?

[Tohossa qofata]

Hassayay?

• Bonchuwan oyqqiyoogee bonchi xeelliyoogaara gayttiyoy ayba ogiyaanee?

• Nu mala Kiristtaaneta bonchana koshshiyoy aybissee?

• Issoy issuwaa bonchiyoogee keehippe koshshiyoy aybissee?

• Nu mala Kiristtaaneta ayba ogetun bonchana danddayiyoo?

[Oyshata]

[Sinttaa 22n deʼiya misiliyaa]

Nu mala Kiristtaaneta bonchana danddayiyoy ayba ogiyaanee?