Kasetidi “A Xillotettaa” Ubbatoo Koyite

“SHin kasetidi, Xoossaa kawotettaanne a xillotettaa koyite; i intteyyo he ubbabaa immana.”—MAA. 6:33.

1, 2. Xoossaa xillotettay aybee, hegee aybin baasettidee?

‘SHIN kasetidi, Xoossaa kawotettaa koyite.’ (Maa. 6:33) Yesuus Kiristtoosi Deriyaa Bollan Tamaarissido Timirttiyan yootido ha zoriyaa Yihoowa Markkati ha wodiyan loyttidi eroosona. He Kawotettaa aysuwaa dosiyoogaanne au ammanettanau koyiyoogaa nu deˈuwan oottiyo ubbaban bessanau baaxetoos. SHin, nuuni he zoriyan kaallidi deˈiya, “a xillotettaa” giya qofaakka hassayana bessees. Xoossaa xillotettay aybee, kasetidi a koyiyoogee woygiyoogee?

² “Xillotettaa” geetettida qaalay koyro doonan, “suure pirddaa” woykko “suuretettaa” geetettidikka birshshettana danddayees. Yaatiyo gishshau, Xoossaa xillotettay a maaraadaaninne a siraataadan suure gididaba. Yihooway medhidaagaa gidiyoogaadan, loˈˈo woy iita gididabau, qassi likke woy likke gidennabau maaraa kessiyo maatay ayyo dees. (Ajj. 4:11) SHin Xoossaa xillotettay qareti baynna, sitti giida higge woykko zawi baynna azazuwaa oyqqidaba gidenna. Hegaappe, Yihoowa oonatettaaninne a waanna eeshshaa suure pirddan, qassi hara waanna eeshshatun, giishin siiquwan, aadhida eratettaaninne  wolqqan baasettidaagaa. Yaatiyo gishshau, Xoossaa xillotettay a sheniyaaranne a halchuwaara gayttidaba. Hegee ayyo oottanau koyiyaageetuppe i naagiyoobaa gujjees.

3. (a) Kasetidi Xoossaa xillotettaa koyiyoogee woygiyoogee? (b) Nuuni Yihoowa xillotettaa maaraa naagiyoy aybissee?

³ Xoossaa xillotettaa kasetidi koyiyoogee woygiyoogee? Hegee Xoossaa ufayssanau a sheniyaa poliyoogaa giyoogaa. Xoossaa xillotettaa koyiyoogee nu kessiyo maaraadan gidennan a siraataadaaninne a polo maaraadan deˈanau baaxetiyoogaa gujjees. (Roome 12:2 nabbaba.) Hegaadan deˈiyoogee Yihoowaara nuuyyo deˈiya dabbotaara gayttidaba. Hegee qixaatiyau yayyidi a higgiyau azazettiyoogaa giyoogaa gidenna. Hegaappe, Xoossaa siiqiyoogee nu huuphessi maaraa kessiyoogaappe a maaraa naagidi, a ufayssanau baaxetanaadan denttettees. Hegee oottanau bessiyaaba gidiyoogaa akeekoos; nuuni merettidoy hegaa oottanaassa. Xoossaa Kawotettaa Kawuwaa Yesuus Kiristtoosaagaadan nuuni xillotettaa siiqanau bessees.—Ibr. 1:8, 9.

4. Xoossaa xillotettaa koyiyoogee keehippe koshshiyoy aybissee?

⁴ Yihoowa xillotettaa koyiyoogee ay keena koshshiyaabee? Ane issibaa qoppite: Edene ataakiltte sohuwan Addaameenne Hewaana koyro paacettido paacee, Yihooway maaraa kessanau bessiyaagaa gidiyoogaa eti ammanidi ekkiyoogaara woy aggiyoogaara gayttidaba. (Doo. 2:17; 3:5) Eti azazettibeennaagee eta zeretta gidida nu bolli tuggaanne hayquwaa kaalettiis. (Roo. 5:12) Hara baggaara, Xoossaa Qaalay, “Xillotettaanne aggenna siiquwaa koyiya uraa baree aduqqees; qassi he urai xillotettaanne bonchchuwaa demmees” yaagees. (Lee. 21:21) Ee, kasetidi Xoossaa xillotettaa koyiyoogee, Yihoowaara loˈˈo dabbotan deˈanaadan oottees; hegee qassi nuuni atotettaa demmanaadan maaddees.—Roo. 3:23, 24.

Bana Xillo Giyoogee Gattiyo Daafaa

5. Nuuni ayba daafaappe naagettana bessii?

⁵ Kiitettida PHauloosi Roome Kiristtaanetuyyo xaafido dabddaabbiyan, muruta hanotan kasetidi Xoossaa xillotettaa koyanau nuuni ubbay haakkana koshshiyo daafaa qonccissiis. PHauloosi ba mala Ayhudatubaa, “Xoossai asaa xillissiyo ogiyaa eti erennan, bantta huuphe xillotettaa essanau koyidosona; qassi bantta huuphen Xoossai asaa xillissiyo ogiyau haarettibookkona” yaagidi yootiis. (Roo. 10:2, 3) PHauloosi giidobay, he asati bantta xillotettaa essanau bichaariyo gishshau Xoossaa xillotettaa akeekibeennaagaa bessees. *

6. Nuuni ayba xeelaappe haakkana koshshii, aybissee?

⁶ He piriyan gelana danddayiyo issi ogee, nuna haratuura geeddarissidi Xoossau oottiyoogaa annaacettiyoobadan xeelliyoogaa. Hegaa mala xeelay nu eran likkiyaappe aattidi ammanettanaadan oottana danddayees. SHin, nuuni hegaadan oottiyaaba gidikko, Yihoowa xillotettaa dogiyoogee erettidaba. (Gal. 6:3, 4) Nuuni suurebaa oottanaadan denttettana koshshiyaabay Yihoowa siiqiyoogaa. Nu xillotettaa bessanau oottiyo aybinne nuuni Yihoowa siiqoos giyoogee mela gidanaadan oottees.—Luqaasa 16:15 nabbaba.

7. Issi uri bana xillo giyoogee kaalettiyo daafaabaa Yesuusi waatidi qonccissidee?

⁷ “Banttana xillo giidi, hara asa ubbaa” kariyaageetubay Yesuusa qofissiis. Issi uri bana xillo giyoogee gattiyo daafaabaa hagaadan giidi leemisuwan yootiis: “Naa77⁠u asati Xoossaa woossanau Beeta Maqidasiyaa kiyidosona; etappe issoi Parisaawe, issoi giiraa shiishshiyaagaa. Parisaawee eqqidi, ba wozana giddon woossiiddi, ‘Xoossau, taani hara asa ubbaadan, worddanchcha, uuzenne shaaramuxa woi ha giiraa shiishshiyaagaa mala gidenna gishshau, nena galatais. Saaminttan saaminttan naa77⁠utoo xoomais; taani demmiyo miishsha ubbaappe asirataa immais’ yaagiis. SHin giiraa shiishshiyaagee haahuwan eqqidi,  harai atto saluwaa xeellanaukka dosibeenna. SHin, ‘Xoossau, taani nagaranchcha; tana maara’ yaagidi, ba tiraa bubbuxiis.” Yesuusi, “Taani inttessi odiyoogee aibee giikko, hagee Parisaawiyaappe xillidi, ba soo biis. Aissi giikko, bana xoqqu oottiya urai kauyyana; shin bana kaushshiya urai xoqqu gaana” yaagidi kuuyiis.—Luq. 18:9-14.

Hara Daafaa—“Keehi Daro Xillo” Gidiyoogaa

8, 9. “Keehi daro xillo” gidiyoogee woygiyoogee, hegee nu bolli ayba daafaa kaalettana danddayii?

⁸ Nuuni haakkana koshshiyo hara daafay Eranchchaa 7:16n deˈiya, “Neeni elle xayennaadan, keehi daro xillo woikko keehi daro aadhdhida eranchcha gidoppa” yaagiyaagaa. Ayyaanaa kaaletuwan ha qofaa xaafidaagee paydo 20n, “Xillobaa xalaalaa oottiiddi, nagara oottennan de7⁠iya asi ha sa7aa bollan baawa” yaagidi, nuuni hegaa mala xeelaappe haakkana koshshiyo gaasuwaa yootiis. “Keehi daro xillo” gidida uri xillotettau ba maaraa kessidi, hegan haratu bolli pirddees. Gidoppe attin, hegaadan oottiyoogan, ba maaraa Xoossaa maaraappe aattidi xeelliyoogaa akeekenna; yaatiyoogan, Xoossaa xeelan nagarancha gidees.

⁹ “Keehi daro xillo” gidiyoogee Yihooway issibaa oottiyo ogiyaa ubba siranaadan oottana danddayees. SHin, Yihooway kuuyidobay bessiyaaba woy likke gidiyoogaa nuuni sirikko, hegee nu kessido xillotettaa maaraa Yihoowagaappe aatti xeelliyoogaa doommida giyoogaa mala gidiyoogaa akeekana koshshees. Hegee likkenne likke gidennabau nuuni kessido maaran Yihoowa bolli shilootan pirddiyoogaa mala. SHin, xillotettaa maaraa kessiyo maatay deˈiyoy Yihoowappe attin nuna gidokko!—Roo. 14:10.

10. Iyyooba hanotan qonccidaagaadan, nuuni Xoossaa bolli pirddanaadan oottana danddayiyaabi aybee?

¹⁰ Nuuppe ooninne Yihoowa bolli eriiddi pirddanau koyennaba gidikkonne, nu polotettaa pacay hegaadan ootissana danddayees. Nuuni bessennaba giyoobay polettiyoode woykko metoy nu bolli gakkiyo wode, hegaadan oottana danddayoos. Ammanettida asa gidida Iyyoobikka hegaa mala balabaa oottiis. Iyyoobi koyro “boree bainnanne suure asa; Xoossaassi yayyidi, iitabaappekka haakkida asa” geetettiis. (Iyy. 1:1) SHin guyyeeppe, Iyyoobi bessennabaadan xeellido metoy bolli bollan a gakkiis. Hegee Iyyoobi “Xoossaa xillo giyoogaa aggidi, bana xillo” gaanaadan oottiis. (Iyy. 32:1, 2) Iyyoobi ba xeelaa laammana koshshiis. Yaatiyo gishshau, issi issitoo nuuni hegaadan qoppikko, garamettana koshshenna. Hegaa mala hanotay merettikko, nu qofaa laammanau aybi maaddanee?

Nuuni Hanotaa Wurssidi Eriyoy Ubbatoo Gidenna

11, 12. (a) Nuuni issibaa bessennabadan qoppiyaaba gidikko, ay hassayana koshshii? (b) Yesuusi woyniyaa turaa giddon oottiyaageetubaa yootido leemisoy bessennabaa qonccissiyaabadan issi uri xeellana danddayiyoy aybissee?

¹¹Nuuni hanotaa wurssidi eriyoy ubbatoo gidennaagaa koyruwan hassayana koshshees. Iyyooba hanotaykka hegaa mala. Seexaanay a wordduwan mootido, Xoossaa naati saluwan shiiqido shiiquwaabaa i erenna. (Iyy. 1:7-12; 2:1-6) Iyyoobi ba metuwau gaaso gididay Seexaanaa gidiyoogaa erenna. Iyyoobi Seexaanay  tumuppe oonakko waayi erana. Hegaa gishshau, i bana metoy gakkanaadan oottiday Xoossaa giidi balan qoppiis. Ee, nuuni hanotaa wurssidi erennaba gidikko, sohuwaara bala ogiyan kuuyana danddayoos.

¹² Leemisuwau, Yesuusi woyniyaa turaa giddon oottiyaageetubaa yootido leemisuwaa qoppite. (Maatiyoosa 20:8-16 nabbaba.) Woyniyaa turaa goday kumetta gallassaa oottidaageetussi gidin issi saatiyaa oottidaageetussikka, lagge damoozaa qanxxidoogaa Yesuusi yootiis. Hegan intteyyo aybi siyettii? Hegee likke milatii? Kumetta gallassaa suulliya awan oottidaageetussi qarettennan aggekketa. Eti haratuugaappe aaro damoozaa demmana koshshees giidi qoppana danddayeeta. Hegaadan kuuyiyoogan, he woyniyaa turaa goday siiqennaagaanne bessennabaa oottiyaagaa giidi qoppana danddayeeta. Ubba i zuuzummida oosanchatussi zaaridobay ba maataa bessenna ogiyan goˈettidoba malatana danddayees. SHin nuuni ubbabaa wurssidi eriyoo?

13. Yesuusi woyniyaa turaa giddon oottiyaageetubaa yootido leemisuwaa hara ayba ogiyan xeellana danddayiyoo?

¹³ Ha leemisuwaa ane hara ginan yuushshi qoppoos. He woyniyaa turaa goday, bantta so asau koshshiyaabaa kunttiyoogee he ubba asatussi koshshiyoogaa akeekidoogee qoncce. Yesuusi saˈan deˈido wode goshshan oottiyaageeti damoozaa hachi hachi ekkoosona. Eta soo asay banttau koshshiyaabaa kunttiyoy he damoozaana. Hegaa hassayidi, woyniyaa turaa goday wurssettan qaxarin, issi saate xalla oottida asatubaa qoppite. Eti issi saate damoozan bantta soo asau koshshiyaabaa kunttanau waayi danddayana; gidikkonne, eti oottanau koyidosona, qassi qaxarettanau gallassa kumettaa naagiiddi peˈidosona. (Maa. 20:1-7) Eti kumetta gallassaa oottennan peˈidoy bantta balaana gidenna. Eti eriiddi ooso ixxidoogaa bessiyaabi aybinne baawa. Haratu deˈoy neeni he gallassan oottada ehiyooban baasettidoogaa eraydda, neeni kumetta gallassaa naagaydda peˈiyoogee woygiyoogaakko ane qoppa. Neeni issi oosuwaa demmiyaakko ayba galatanee—qassi ne soo asau koshshiyaabau gidiya damoozaa demmiyaakko ay keena garamettanee!

14. Woyniyaa turaabaa yootiya leemisuwaappe maaddiya ayba timirtte tamaariyoo?

¹⁴ Woyniyaa turaa goday oottidobaa ane zaarettidikka akeekoos. I ooyyoonne bessiyaagaappe guutta damoozaa qanxxibeenna. Hegaappe, oosanchati ubbay banttau koshshiyaabaa kunttiyo maatay deˈiyoobadan xeelliis. Hegee hirayso giyaappe shammiyoobadan daro oosanchi deˈiyo hanota; gidikkokka, i hegan goˈettana giidi bessiyaagaappe guutta damooza etau qanxxibeenna. Oosanchati ubbay bantta soo asau koshshiyaabau gidiya damoozaa ekkidi biidosona. He ubba hanotaa qoppiyoogee, woyniyaa turaa goday oottidobaa nuuni xeelliyo hanotaa laammanaadan oottana danddayees. I oottidobay siiqiyoogaa bessiyaabaappe attin, ba maataa bessenna ogiyan goˈettidoogaa bessenna. Hegaappe ay tamaarana danddayiyoo? Amaridabaa xallaa qoppiyoogee bala kuushshaa  kuuyanaadan oottana danddayiyoogaa tamaaroos. Ha leemisoy higgiyaaninne asi oottidobaa xallan baasettibeenna Xoossaa xillotettay, keehi xoqqa gidiyooga qonccissiyoogee tuma.

Nu Xeelay Moorettananne Guutta Eran Baasettidaba Gidana Danddayees

15. Nu xeelay moorettana woy guutta eran baasettidaba gidana danddayiyoy aybissee?

¹⁵ Bessennaba milatiya hanotay merettiyo wode nuuni hassayana koshshiya naaˈˈanttobay, nu xeelay moorettananne guutta eran baasettidaba gidana danddayiyoogaa. Polotettaa pacan, asaa coo ixxiyoogan woy wogaa dummatettan nu xeelay moorettana danddayees. Nuuni asaa koshshaanne eta wozanan deˈiyaabaa erennaagaappe denddidaagan, nu xeelay guutta eran baasettidaagaa gidanaukka danddayees. Hegaappe dumma hanotan, Yihoowaynne Yesuusi eriyoobay hegaadan guutta gidenna.—Lee. 24:12; Maa. 9:4; Luq. 5:22.

16, 17. Daawiti Berssaabiira wodiraa laammido wode, Yihooway ba higgiyaadan pirddibeennay aybissa gidana danddayii?

¹⁶ Daawiti Berssaabiira wodiraa laammidoogaa yootiya taarikiyaa ane yuushshi qoppoos. (2 Sam. 11:2-5) Muuse Higgee yootiyoogaadan, eti hayqqana bessees. (Wog. 20:10; Zaa. 22:22) Yihooway eta qaxxayidaba gidikkokka, ba higgiyaadan qaxxayibeenna. Yihooway hegaadan oottidoogee bessennabee? I Daawita loˈˈo ayfiyan xeellidi, ba xillotettaa maaraa kanttidee? Geeshsha Maxaafaa nabbabiya issi issi asatussi hegaadan siyettees.

¹⁷ SHin, Yihooway wodiraa laammiyoogaara gayttida he higgiyaa immidoy asaa wozanaa erana danddayenna, polo gidenna daannatussa. Eti eriyoobi guutta gidikkokka, issi mala hanotan pirddanaadan he higgee eta maaddiis. Hara baggaara, Yihooway asa wozanan deˈiyaabaa erees. (Doo. 18:25; 1 Odi. 29:17) Yaatiyo gishshau, Yihooway polo gidenna daannatussi immido higgee, i issibaa oottennaadan teqqees giidi nuuni qoppana koshshenna. Hegaadaana gidiyaakko, he hanotay xeellanau metootiya uri wottanaadan giigida manaaxxiriyaa geeshshidi xeelliya uri wottanaadan wolqqanttiyooba mala gidennee? Yihooway Daawitanne Berssaabi wozanaa akeekidi, eti tumuppe nagaraappe simmidoogaa beˈana danddayees. I hegaa mala hanotaa qoppidi, bessiyaagaadan maarotaaninne siiquwan etau pirddiis.

Paci Baynnan Yihoowa Xillotettaa Koyite

18, 19. Nuuni kessiyo xillotettaa maaran Yihoowa bolli mule pirddennaadan nuna aybi maaddii?

¹⁸ Hegaa gishshau, Yihooway oottido issibaa, giishin nuuni Geeshsha Maxaafan nabbabiyoobaa gidin woy nu deˈuwan gakkiyaabaa issi issitoo likke gidennabadan xeellikko, nuuni kessido xillotettaa maaran Xoossaa bolli mule pirddana koshshenna. Nuuni hanotaa wurssidi eriyoy ubbatoo gidennaagaanne nu xeelay moorettana woy guutta eran baasettidaba gidana danddayiyoogaa hassayite. “Asa hanqqoi Xoossai koyiyo xillotettaa” eheennaagaa mule dogoppite. (Yaaq. 1:19, 20) Yaatikko, nu wozanay mule ‘Godaa bolli yiillotenna.’—Lee. 19:3.

¹⁹ Xillobaunne loˈˈobau maaraa kessana danddayiyay Yihoowa xalla gidiyoogaa Yesuusaagaadan ubbatoo ammanidi ekkoos. (Mar. 10:17, 18) Suure ‘eraa’ woykko “tumatettaa eratettaa” demmanau baaxetoos. (Roo. 10:2; 2 Xim. 3:7) Hegaa ammanidi ekkiyoogaaninne Yihoowa sheniyaadan deˈiyoogan, kasetidi “a xillotettaa” koyiyoogaa bessoos.—Maa. 6:33.

[Footnotes]

Hassayay?

• Yihoowa xillotettaa koyiyoogee keehippe koshshiyoy aybissee?

• Nuuni haakkana koshshiyo naaˈˈu daafati awugeetee?

• Kasetidi Xoossaa xillotettaa waatidi koyana danddayiyoo?

[Oyshata]

[Sinttaa 17n deʼiya misiliyaa]

Yesuusi beeta maqidasiyan woossida naaˈˈu asatubaa yootido leemisuwaappe ay tamaariyoo?

[Sinttaa 18n deʼiya misiliyaa]

Tammanne isiini saatiyan doommida oosanchatussi kumetta gallassaa oottidaageetuura lagge damoozaa qanxxidoogee bessennabee?