Woosaa

2 Ookko?

UBBA woosaa Xoossay siyii? Ha wodiyan, hegaadan qoppiyoogee darotoo meeze gididaba. Ammanuwaa walakkiyoogaa kaafiyaanne dummatettay deˈishinkka, ubba haymaanootee loˈˈo geetettanaadan koyiya darota he qofay ufayssees. Gidikkokka, he qofay tuma gidennan aggana danddayees.

Darotoo asay woossana bessiyoogaakko woossennaagaa Geeshsha Maxaafay yootees. Geeshsha Maxaafay xaafettido wode, asay eeqa misiliyaakko woossiyoogee meeze gididaba. SHin hegaadan oottennaadan Xoossay zaari zaaridi yootiis. Leemisuwau, eeqaa xeelliyaagan Mazamure 115:4-6y, “Etau haittai de7⁠ees; shin siyokkona” yaagees. Ha qofay qoncce. Neeni woossiyoobaa siyenna xoossaakko aybissi woossay?

Geeshsha Maxaafan deˈiya qoncce qofay hegaa xeelliyaagan darobaa yootees. Tumuppe hananabaa yootiya Eelaasi Baˈaala sunttan hananabaa yootiyaageeti bantta xoossaakko woossanaadan yootiis; hegaappe simmin Eelaasi ba Xoossaakko woossiis. Eelaasi tumu Xoossay siyidi zaaranaagaa, qassi worddo xoossay zaarennaagaa yootiis. Baˈaala sunttan hananabaa yootiyaageeti Eelaasi giidobaa siyidi, ubba bantta cenggurssaa xoqqu oottidi minttidi woossidosona; shin ayba zaaronne demmibookkona! He taarikee, “Etabaa ezggidi zaaro immiyaabi issoinne baawa” yaagees. (1 Kaw. 18:29) Gidoppe attin, Eelaasi woossido wode aybi hanidee?

Eelaasi woossi simmin, i giigissido yarshshuwaa maanaadan saluwaappe tamaa yeddiyoogan, a Xoossay a woosaa sohuwaara zaariis. Dummatettaa medhidabay aybee? Koyro Kawotu 18:36, 37n deˈiya, Eelaasi woossido woosan hegau maaddiya qofay deˈees. He woosay keehi qantta—beni Ibraysxxe qaalan he woosay 30 gidiya qaalatu xallaa oyqqiis. Gidikkokka, he guutta qaalatun Eelaasi Yihoowa giya a sunttan Xoossaa heezzutoo xeesiis.

“Godaa” giya birshshettay deˈiyo Baˈaali Kanaanetu xoossaa; qassi he xoossay daro heeran dumma dumma. Gidikkokka, Yihoowa giya sunttay, salo gufanttuwaaninne saˈa micettan A xallay xeesettiyo dumma suntta. He Xoossay ba asaayyo, “Taani GODAA [“Yihoowa,” NW]; hegee ta sunttaa. Ta bonchchuwaa taani harau immikke” yaagiis.—Isi. 42:8.

Dumma dumma xoossaakko woossidoba gidikkokka, Eelaasa woosaynne Baˈaala sunttan hananabaa yootiyaageetu woosay likkee? Baˈaalayyo goynniyoogee haymaanoote wogaa polanau wodiraa laammiyoogaaninne ubba qassi asaa yarshshiyoogan, asaa kawushshidaba. Hegaappe dumma hanotan, Yihooway ba asay Israaˈeeli, hegaa mala kawushshiyaabaappe naxa kiyidi, boncho ogiyan baayyo goynnanaadan azaziis. Yaatiyo gishshau, ane hagaa qoppa: Neeni keehi bonchettida ne laggiyau dabddaabbe xaafiyaakko, ne laggee xoqqu ootti xeelliyo ubbabaappe  dummatiya, keehi iita deˈo deˈiya hara uri he dabddaabbiyaa ekkees gaada qoppay? Qoppennaagee qoncce!

Neeni Yihoowakko woossikko, asaa naatu Aawaa, Medhidaagaakko woossaasa. * Hananabaa yootiya Isiyaasi woossiiddi, “Abeet GODAU [“Yihoowau,” NW], neeni nu aawaa” yaagiis. (Isi. 63:16) Yaatiyo gishshau, Yesuus Kiristtoosi bana kaalliyaageetussi, “Taani ta Aawaakkonne intte Aawaakko, ta Xoossaakkonne intte Xoossaakko, pude bais” yaagidoy he Xoossaa. (Yoh. 20:17) Yihooway Yesuusa Aawaa. Yesuusi akko woossidonne bana kaalliyaageeti akko woossanaadan tamaarissido Xoossay A.—Maa. 6:9.

Geeshsha Maxaafay nuuni Yesuusakko, Mayraamikko, geeshshatukko woy kiitanchatukko woossanaadan yootii? CHii, Yihoowa xalaalaakko woossanaadan yootees. Hegau naaˈˈu gaasuwaa qoppa. Koyruwan, woosay goyno; qassi Yihoowa xalaalau goynnana bessiyoogaa Geeshsha Maxaafay yootees. (Kes. 20:5) Naaˈˈanttuwan, Geeshsha Maxaafay i ‘woosaa Siyiyaagaa’ gidiyoogaa yootees. (Maz. 65:2) Yihooway haratuyyo daro maataa immiyaaba gidikkokka, ha maataa hara ooyyoonne immibeenna. Nuuni woossiyo woosaa siyanau qaalaa gelida Xoossay A.

Xoossay ne woosaa siyanaadan koyiyaaba gidikko, Geeshsha Maxaafay, “Godaa [“Yihoowa,” NW] sunttaa xeesiya ooninne attana” yaagiyoogaa akeeka. (Oos. 2:21) SHin ay gidikkonne Yihooway ubba woosaa siyii? Woykko nu woosaa Yihooway siyanaadan koyikko, nuuni erana koshshiya harabi deˈii?

[Tohossa qofata]

[Sinttaa 5n deʼiya misiliyaa]

Baˈaala sunttan hananabaa yootiyaageetussi Eelaasi yootidobay Xoossay ubba woosaa siyennaagaa qonccissiis