Kayyottiyaageeta Yesuusaagaadan Minttettite

BIITAANIYAN deˈiya Alˈˈaazari keehippe harggiis. A michontti Marttanne Mayraama bantta mata laggiyaa Yesuusakko asa kiittidosona. SHin Alˈˈaazari he harggiyan hayqqiis. A moogi simmin, eta shoorotinne laggeti Marttonne Mayraamo “minttettanau yiidosona.” (Yoh. 11:19) Wurssettan Yesuusi Biitaaniyaa gakkidi, ba laggeta beˈanau biis. I yootidobaanne oottidobaa qoppiyoogan, kayyottidaageeta waati minttettanaakko tamaarana danddayoos.

Etakko Biyoogee Etau Qoppiyoogaa Bessees

Yesuusi Biitaaniyaa gakkanau, Yorddaanoosa SHaafaa pinnidi, mirqqetta ogiyaa oyqqidi Yarkkoppe pudettaa kiyanau naaˈˈu gallassa gidiyaagaa hemettiis. Martta Yesuusaara gayttanau sohuwaara heeraappe haakkada baasu. Guyyeppe Mayraama Yesuusi yiidoogaa siyada akka aara gayttanau eesuwan baasu. (Yoh. 10:40-42; 11:6, 17-20, 28, 29) Yesuusi yaa biidoogee kayyottida he michontta keehippe minttettidoogee qoncce.

 Ha wodiyan, nuunikka kayyottidaageetukko biyoogee eta minttettana danddayees. Bantta usuppun laytta naˈay, Teˈoy daafan hayqqido, Iskatinne Lidiyaa, “Nu soo asaynne nu laggeti nuukko yiidi minttettanaadan koyida. Eti qamma bilahe hosppitaaliyaa yiidosona” yaagidosona. Eta laggeti yiidi woygidonaa? Iskatinne Lidiyaa, “He wode eti aynne gaanaadan koyibookko. Nuuyyo koshshiyaabay eti nuukko yiidoogaa; eti nuuyyo qoppiyoogaa bessidosona” yaagidosona.

Alˈˈaazara hayquwan yeekkiyaageeta beˈido wode, Yesuusi ‘ba wozanan daro mishettidi’ ‘afuxxidoogaa’ Geeshsha Maxaafay yootees. (Yoh. 11:33-35, 38) Haratu sinttan yeekkiyoogaa Yesuusi laafatettadan xeellibeenna. Yesuusi eta seelaanne etau siyettiyaabaa akeekiis. Hegaappe nuuni ay tamaariyoo? Nuuni kayyottidaageetukko biyo wode, yeekkiyaageetuura yeekkanau yeellatana koshshenna. (Roo. 12:15) Hara baggaara, kayyottida uri yeekkanaadan denttettana koshshiyaabadan qoppoppite. Issoti issoti asa sinttan yeekkanau koyennan agganau danddayoosona.

Qaretan Ezggite

Yesuusi Marttonne Mayraamo minttettiyaabaa haasayanau giigi uttennan aggenna; shin koyro eti haasayanaadan oottidaba milatees. (Yoh. 11:20, 21, 32) Martto haasayissido wode, o oychidi, a giyoobaa ezggiis.—Yoh. 11:25-27.

Loyttidi ezgganau he urau wozanappe qoppana koshshees. Kayyottidaageeta minttettanau nuuni loyttidi ezggana koshshees. Kayyottidaageeti banttau siyettiyaabaa qonccissanaadan oychiyoogan, nuuni loytti ezggiyaageeta gidiyoogaa bessana danddayoos. Gidikkokka, eti haasayanau koyennaba gidikko, haasayissennaadan naagettite. Eti keehippe daafuridi shemppanau koyana danddayoosona.

Kayyottiyaageeti jollu gaanau, qassi issi issitoo issibaa zaari zaari yootana danddayoosona. Issoti issoti banttau siyettiyaabaa yootanau guyye gookkona. Mayraamanne Martta naaˈˈaykka Yesuusayyo, “Godau, neeni hagan de7⁠idabaa gidiyaakko, ta ishai haiqqenna” yaagidosona. (Yoh. 11:21, 32) Yesuusi ay oottidee? Eti giyoobaa danddayaaninne qaretan ezggiis. Etau aybi siyettana koshshiyaakko yootibeenna. I kayyottida uri keehippe seelettana danddayiyoogaa akeekidoogee sirissenna.

Kayyottiyaageetukko biyo wode intte woyganaakko erennaba gidikko, “Neeyyo siyettiyaabaa haasayanau koyay?” yaagidi oychiyoogan haasayaa doommana danddayeeta. Yaatidi, i woy a giyoobaa wozanappe ezggite. Intte siyiyoobaa akeekan ezggite. He urakko xeelliiddi, ayyo woy iyyo siyettiyaabaa akeekanau malite.

Kayyottida urau siyettiyaabaa akeekiyoogee metiyaaba. Lidiyaa hagaadan gaasu: “Nuuni koyiyoobay laamettiis. Nuna oychanau yiida asaa sinttan issi issitoo keehippe yeekkoos. Harati loˈˈonne minttettiya qaalan haasayanaadan koyoos. Nuuyyo siyettiyaabaa akeekanau nu laggeti banttau danddayettidabaa ubbaa oottidosona.”

Yesuusi polo ogiyan hegaadan oottiis. ‘Ay asinne ba wozanan unˈˈettiyoobaynne azzaniyoobay’ deˈiyoogaa i erees. (2 Odi. 6:29) Naaˈˈu michonttikka a sarotido wode, Yesuusi dumma dumma ogiyan zaariis. Martta haasayiyoogaa aggabeykku; yaatiyo gishshau Yesuusi iira haasayiis. Mayraama yeekkiyo gishshau, iira darobaa haasayibeenna. (Yoh. 11:20-28, 32-35) Ha leemisuwaappe nuuni ay tamaarana danddayiyoo? Kayyottida uri haasayiyo wode, daro baggaa i haasayanaadan oottiyoogee loˈˈo gidana danddayees. Eti bantta azzanuwaa qonccissiyoogaa intte  ezgganau koyiyoogee eta keehippe minttettana danddayees.

Minttettiya Qaalata

Mayraamanne Martta Yesuusa, “Neeni hagan de7⁠idabaa gidiyaakko” yaagido wode, i oonaaninne gaasoyibeenna woykko eti giidoban yiillotibeenna. I Martto, “Ne ishai haiquwaappe denddana” yaagidi minttettiis. (Yoh. 11:23) Yesuusi amarida qaalatun hananau deˈiyaabaa qoppanaadan o maaddiis; qassi hidooti deˈiyoogaa kehatettan akeekissiis.

Kayyottida ura haasayissiyo wode, guutta gidikkokka, wozanappe loˈˈo qaalan haasayiyoogee keehippe maaddana danddayiyoogaa hassayite. Minttettiya qaalaa haasayana woy xaafana danddayettees. Dabddaabbiyaanne karddiyan xaafidobaa zaari zaari nabbabana danddayiyo gishshau, hegee daro wodiyau minttettana danddayees. Kaata ba azinay Boobi hayqqoosappe uddufun aginay aadhi simmin, asay immido karddiyaa ubbaa zaarettada nabbabaasu. A, “Hegee koyroogaappe aaruwan tana minttettiis. Taani minettidoy he wode” yaagaasu.

Intte minttettanau ay ay xaafana danddayeetii? Hayqqida uraabaa, giishin intte aara issippe oottidobaa woykko he uraa loˈˈo eeshshaa xaafana danddayeeta. Kaata hagaadan gaasu: “Boobanne a eeshshaa xeelliyaagan loˈˈobaa yootiyoogee taani he wodiyan miiccanaadaaninne yeekkanaadan oottees. I oottido miichiyaabati taani miiccanaadaaninne issippe aattido ufayssiya wodiyaa hassayanaadan oottoosona. Taani haˈˈikka nashshiyo daro karddetun Geeshsha Maxaafaa xiqiseti deˈoosona.”

Maaddiyaabaa Oottite

Alˈˈaazarau mata dabbo gididaageeta minttettanau Yesuusi nuuni oottana danddayennabaa oottiis. I Alˈˈaazara hayquwaappe denttiis. (Yoh. 11:43, 44) Gidikkokka, qumaa kattiyoogaa, eta oychanau yiyaageeta nu son mokkiyoogaa, maayuwaa meecciyoogaa, guutta naata naagiyoogaa, kiitettiyoogaa woykko eti issisaa baanau goˈettiyoobaa giigissiyoogaa mala kayyottidaageeta maaddiya, nuuyyo danddayettiyaabaa oottana danddayoos. Nuuni siiquwan wozanappe oottiyo guuttabaa kayyottida uri keehippe nashshanaagee sirissenna.

Kayyottidaageeti guutta wodiyau banttarkka takkanau koyana danddayiyoogee erettidaagaa. Gidikkokka, intte kasetidi, bessiya wodiyan eta aggennan oychana danddayeeta. Issi kayyottida aayyiyaa, “Hagaa keena wodiyaappe simmin kayyottiyoogaa aggana giyoobi baawa” yaagaasu. Issoti issoti hayqqida uraa a bullacha gallassaanne i hayqqido gallassaa mala wodetun, layttan layttan hassayanau maloosona. Hegaa mala wodetun etakko biyoogan, meto wodiyan ammanettida lagge gidiyoogaa bessana danddayeeta.—Lee. 17:17.

Yesuusa minttettoy ba erissiyo ashkkaratussi, “Nu dabboi Al77aazari xiskkiis; shin xiskkuwaappe a denttanau taani bais” yaagidi yootido hidootaa gujjees. (Yoh. 11:11) Yesuusi hayqqidaageeti denddanaagaa bana kaalliyaageetussi ammanttiyaabaa yootiis. I Martto, “Hegaa neeni ammanai?” yaagidi oychiis. A, “Godau, ee taani ammanais” yaagaasu.—Yoh. 11:24-27.

Yesuusi hayqqidaageeta denttanaagaa ammaneetii? Ammaniyaaba gidikko, kayyottiyaageetuyyo ha alˈˈo hidootaa yootite. Eta maaddiyaaba oottite. Yaatikko, intte yootiyoobaynne oottiyoobay amarida keenaa eta minttettana.—1 Yoh. 3:18.

[Sinttaa 30n deʼiyaagaa]

(Loyttada beˈana koyikko maxeetiyaa xeella)

PEERIYAA

Yorddaanoosa SHaafaa

Yarkko

Biitaaniyaa

Maxine Abbaa

Yerusalaame

SAMMARIYAA