Ayba Metuwaanne Xoonanau Wolqqaa Demmiyoogaa

“Kiristtoosi [“Xoossay,” NW] tau immido wolqqan, ubbabaa oottanau taani danddayais.”—PILI. 4:13.

1. Yihoowa ashkkarata daro metoy gakkiyoy aybissee?

YIHOOWA ashkkarata darotoo dumma dumma metoy gakkees. Issi issi metoti nu polotettaa pacaa gaasuwan gakkiyaageeta woy nuuni deˈiyo ha siraatay kaalettiyoobata. Qassi harati, Xoossau oottiyaageetunne oottennaageetu giddon deˈiya morkketettaa gaasuwan gakkiyaageeta. (Doo. 3:15) Asaa naatu taarikiyaa doomettaappe doommidi, Xoossay ammanettida ba ashkkarati haymaanootiyaa gaasuwan gakkiya yedetaa genccanaadan, laggeti gattiyo qohiya sugettaa eqettanaadaaninne ubba qommo metuwan genccanaadan maaddiis. Nuunikka hegaadan oottanaadan A geeshsha ayyaanay maaddana danddayees.

Haymaanootiyaa Gaasuwan Gakkiya Yedetaa Genccanau Maaduwaa Demmiyoogaa

2. Haymaanootiyaa gaasuwan gattiyo yedetaa halchoy aybee, he yedetay ayba ogiyan gakkii?

² Haymaanoote gaasuwan gakkiya yedetay, asaa eta ammanuwaa gaasuwan eriiddi caddi oyqqi qohiyoogaa. Haymaanootiyaa gaasuwan yedetaa gattiyo halchoy, he haymaanootiyaa muleera xayssanaassa; i aakkennaadan woy a kaalliyaageeti bantta ammanuwaa agganaadan oottanaassa. Yedetay dumma dumma ogiyan gakkana danddayees; issoy issoy qoncce, haray qassi geema. Geeshsha Maxaafay Seexaanay gattiyo qohuwaa gaammoynne shooshshay  gattiyo qohuwan leemisees.—Mazamure 91:13 nabbaba.

3. Seexaanay gaammuwaadaaninne shooshshaadan yedetaa gattiyoy ayba ogiyaanee?

³ Seexaanay kobaa denttiyoogan, qashettanaadan oottiyoogan woy Yihoowa Markkatu oosuwaa teqqiyoogan, darotoo iita gaammuwaadan qoncce qohuwaa gattiis. (Maz. 94:20) Ha wodiyan deˈiya Yihoowa Markkatu oosuwaabaa yootiya, Laytta Maxaafan hegaa mala hiillaa qonccissiya daro taarikee kiyees. Makkalancha asay issippe denddidi Xoossaa ashkkaratu bolli daro heeran qohuwaa gattiis; hegeetuppe amaridaageeta denttettidaageeti haymaanootiyaa kaalettiyaageeta woy polotikaa asata. Gaammuwaagaa mala he qohoy amaridaageeti Yihoowayyo oottiyoogaa agganaadan oottiis. Dabloosi asaa qofaa mooranaunne eti a sheniyaa polanaadan, shooshshaadan geemankka qohees. Hegaa mala qohuwaa gattiyoy nuna ayyaanaaban shugissanaassa woy mooranaassa. SHin Xoossaa geeshsha ayyaanaa baggaara, nuuni he naaˈˈu qommo yedetaakka eqettana danddayoos.

4, 5. Yedetau giigettiyo loˈˈo ogee awugee, aybissi? Leemisuwaa yoota.

⁴ Sinttappe gakkana danddayiya dumma dumma yedetaabaa qoppiyoogee ayyo giigettiyo loˈˈo oge gidenna. Nuna sinttappe ayba yedetay gakkanaakko erana danddayokko; yaatiyo gishshau, hanennan attana danddayiyaabau hirggiyoogee aynne maaddenna. Gidikkokka, nuuni oottana danddayiyoobay deˈees. Yedetaa loˈˈo ogiyan genccidaageetuppe daroti hegaadan oottidoy, Geeshsha Maxaafay yootiyoogaadan, Yihoowayyo ammanettidaageeti bantta suuretettaa naagido ogiyaa, hegaadankka Yesuusa timirttiyaaninne leemisuwan wotti dentti qoppiyoogaana. Hegee eti Yihoowa wozanappe siiqanaadan oottiis. He siiqoy ayba paaceenne gakkido wode eti genccanaadan maaddiis.

⁵ Maalaawe biittan deˈiya nu michotuppe naaˈˈatu leemisuwaa qoppite. Eti polotikaa parttiyaa karddiyaa shammanaadan daro asati eta bukkidosona; eta maayuwaa qaaridosona, qassi wolqqan asho gaytotettaa polanau manddidosona. He asati Beeteelen oottiyaageetikka parttiyaa karddiyaa ekkidosona giidi wordduwaa etau yootidosona. Michontti woygidi zaaridonaa? “Nuuni Xoossaa Yihoowa xallau oottoos. Macara biiruwan oottiya ishantti karddiyaa shammikkokka, hegee nu qofaa laammenna. Intte nuna worikkokka, nuuni kaddokko!” yaagidosona. Michontti hegaadan xalatettan zaari simmin asati eta kessi yeddidosona.

6, 7. Yihooway ba ashkkarati yedetaa genccanaadan waatidi wolqqaa immii?

⁶ Kiitettida PHauloosi Tasalonqqen deˈiya Kiristtaaneti tumaa kiitaa ekkidoy ‘daro waayiyaana’ gidikkokka ‘geeshsha ayyaanaa baggaara demmiyo ufayssaana’ gidiyoogaa yootiis. (1 Tas. 1:6) Beni wode deˈidanne ha wodiyan deˈiya, yedetay gakkin xooni kiyida daro Kiristtaaneti, paacee banttau keehippe wolqqaamido wodiyan Xoossaa geeshsha ayyaanaa ayfiyaa macara gidida, garssa sarotettaa demmidoogaa yootidosona. (Gal. 5:22) He sarotettay eti bantta wozanaanne qofaa naaganaadan maaddiis. Ee, Yihooway ba ashkkarati paaciyaa xoonanaadaaninne metoy gakkiyo wode aadhida eratettan tangguwaa ekkanaadan wolqqaa immanau ba ayyaanaa goˈettees. *

⁷ Xoossaa ashkkarati keehippe iita yedetankka ubbatoo bantta suuretettaa naaganau murttidosona; hegaa akeekiyaageeti maalaalettoosona. He Kiristtaaneti asaagaappe aadhiya wolqqan kumidaba milatees; qassi tumukka hegaadaana. Kiitettida PHeexiroosi, “Asi inttena Kiristtoosa sunttaa gishshau boriyaabaa gidikko, intte anjjettidaageeta; aissi giikko, bonchcho Ayyaanai, Xoossaa Ayyaanai, intte bolli shemppana” yaagiis. (1 PHe. 4:14) Nuuni geeshshatettaa maaraa naagiyoogan yedetay gakkiyoogee, nuuni Xoossan nashettiyoogaa bessiyaaba. (Maa. 5:10-12; Yoh. 15:20) Yihooway anjjiyoogaa bessiya ha hanotay keehippe ufayssiyaaba!

Laggetu Sugettaa Eqettanau Maaduwaa Demmiyoogaa

8. (a) Yaasunne Kaaleebi laggetu sugettaa eqettanaadan maaddiday aybee? (b) Yaasunne Kaaleeba leemisuwaappe ay tamaarana danddayiyoo?

⁸ Kiristtaaneti genccana bessiyo keehippe  geema gidida yedetay iitabau denttettiya laggetu sugettaa. Gidikkokka, Yihoowa ayyaanay alamiyaa ayyaanaappe keehi wolqqaama gidiyo gishshau, asay nuna baceessiyo, nuna xeelliyaagan worddobaa yootiyo woykko eta maaraa kaallanaadan wolqqanttiyo wode eqettana danddayoos. Leemisuwau, Yaasunne Kaaleebi Kanaane biittaa wochanau biida hara tammatu xeelaa maayennaadan oottiday aybee? Eti geeshsha ayyaanaa kaaletuwaa kaallido gishshau ‘dummatidosona’ woykko eta ayyaanay woy qofay dummatiis.—Qoodaabaa 13:30; 14:6-10, 24 nabbaba.

9. Kiristtaaneti daro asaappe dummatanau koyana bessiyoy aybissee?

⁹ Yesuusi kiittidoogeetikka geeshsha ayyaanay wolqqaa immin, daroti tumu haymaanootiyaa asttamaaredan bonchiyoogeetuyyo azazettiyoogaappe Xoossau azazettidosona. (Oos. 4:21, 31; 5:29, 32) Daroti asaara ooyettennaadan woy eqettennaadan daro asay oottiyoobaa oottanau koyoosona. Gidikkokka, tumu Kiristtaaneti suure gidiyoogaa eriyoobau darotoo mino tangguwaa ekkana koshshees. Gidoppe attin, eti Xoossaa ayyaanaa baggaara demmido minotettan haratuppe dummatanau yayyokkona. (2 Xim. 1:7) Nuuni laggetu sugettan xoonettana bessenna issi hanotaa qoppite.

10. Issi issi Kiristtaaneti ay oottana bessiyaakko metootanaadan oottana danddayiyaabi aybee?

¹⁰ Issi issi yelagati eta laggee Geeshsha Maxaafaa maaraara moggennabaa oottiyoogaa eriyo wode, waatana bessiyaakko metootana danddayoosona. Gubaaˈe cimati a maaddanaadan yootiyoogee bantta laggiyau ammanettennaagaa bessiyaabadan qoppana danddayoosona; yaatiyo gishshau, bessenna ogiyan ammanettiyoogaappe denddidaagan hegaa yootennan aggiigoosona. Moorobaa oottidaagee ba laggee a nagaraa genttanaadan oychanakka danddayees. Hegaa mala metoy yelagatu xallaa gakkiyaaba gidennaagee tuma. Laggee woy so asaappe issoy oottido nagaraa xeelliyaagan gubaaˈe cimatuyyo yootanau issi issi gasttatikka metootana danddayoosona. SHin tumu Kiristtaaneti hegaa mala sugettay gakkiyo wode waatana koshshii?

11, 12. Gubaaˈiyaa yame gidida uri intte a nagaraa genttanaadan oychiyaaba gidikko, oottana bessiya loˈˈobay aybee, aybissi?

¹¹ Ane ha hanotaa qoppite. Issi yelaga ishaa Toomi gubaaˈiyan deˈiya ba laggee Baassi pornograafiyaa beˈiyoogaa meeze oottidoogaa akeekiis. Ba laggee Baassi oottiyoobay bana keehippe qofissidoogaa Toomi ayyo yootiis. Gidikkokka, Baassi i yootiyoobaa allaallenne gibeenna. Toomi hegaa gubaaˈiyaa cimatuyyo yootanaadan a zorido wode, Toomi tumuppe a lagge gidikko, gubaaˈe cimatuyyo yootana bessennaagaa Baassi odiis. Toomi bantta laggetettay duuxxennaadan yayyana koshshii? Baassi ba oottidobaa kashi giikko, gubaaˈe cimati ooni giyoobaa ammananaakko Toomi hirggana danddayees. SHin Toomi hegaa yootennaba gidikko, hanotay giigana danddayenna. Hegee ubba Baassassi Yihoowaara deˈiya dabbotay duuxxanaadan oottana danddayees. Toomi, “Asassi yayyiyoobi he aawussi pire gidees; shin GODAN ammanettiya asi saro de7ees” yaagiyaagaa hassayana koshshees. (Lee. 29:25)  Toomi harabaa ay oottana danddayii? Toomi Baassakko biidi, a mooruwaabaa siiquwaaninne qoncciyan haasayana danddayees. Hegau xalana koshshees. Gidoppe attin, Baassi ba mooruwaabaa haasayanau hegaa injje wodedan xeellana danddayees. Baassi ba mooruwaa gubaaˈe cimatuyyo yootanaadan Toomi zaarettidi minttettanaunne amarida wode giddon i hegaadan oottennaba gidikko, Toomi cimatuyyo yootanaagaa odana koshshees.—Wog. 5:1.

¹² Hegaa mala hanotaa intte oyqqana koshshiyaaba gidikko, intte laggee intte a maaddanau oottiyoobaa koyro nashshennan aggana danddayees. SHin intte ayyo loˈˈobaa oottidoogaa guyyeppe akeekana danddayees. Nagaraa oottida uri harati maaddin he maaduwan goˈettiyaaba gidikko, intte xalanne ammanettidaageeta gidiyoogau inttena ubbatoo galatana danddayees. Hara baggaara, gubaaˈe cimati a maaddanaadan intte oychido gishshau i hanqqettiyaaba gidikko, intte tumuppe koyiyoy hegaa mala laggee? Ubbatoo oottana bessiya suurebay, ooppenne aadhiya Dabbuwaa, Yihoowa ufayssiyoogaa. Nuuni a kaseyiyo wode, ammanettidaageeta gidiyo gishshau, a siiqiya harati nuna bonchoosona; qassi nuuyyo tumu lagge gidoosona. Nuuni Kiristtaane gubaaˈiyan Dabloosau mule soho immana koshshenna. Nuuni ayyo soho immiyaaba gidikko, Yihoowa geeshsha ayyaanaa keehi azzanttoos. SHin, Kiristtaane gubaaˈee geeshsha gididi deˈanaadan oottiyoogan, geeshsha ayyaanaara moggidi oottoos.—Efi. 4:27, 30.

Ubba Qommo Metuwaa Genccanau Wolqqaa Demmiyoogaa

13. Yihoowa ashkkarata ayba metoy gakkii, hegaa mala metoy keehi daridoy aybissee?

¹³ Dumma dumma metoy, giishin miishshaa metuwaa, oosuwaappe kiyiyoogaa, meretay gattiyo daafaa, siiqiyo uri hayqqiyoogaa, payyatettay xayiyoogaa malabay gakkana danddayees. Nuuni deˈiyoy ‘wayssiya wodiyaana’ gidiyo gishshau, matan gidin takkidi metoy nuna ubbaa gakkanaagaa naagana koshshees. (2 Xim. 3:1) Hegee gakkiyo wode dagammana koshshenna. Ayba metoy gakkikkokka genccanau geeshsha ayyaanaa baggaara wolqqaa demmana danddayoos.

14. Iyyoobi bana gakkida metuwaa genccana mala aybi maaddidee?

¹⁴ Iyyooba bolli bollan metoy gakkiis. Mehiyaappenne naatuppe mela attiis, a laggeti a kaddidosona, i harggiis, qassi a maccaasiyaa Yihoowan ammanettiyoogaa aggaasu. (Iyy. 1:13-19; 2:7-9) SHin Iyyoobi Eelihu baggaara loˈˈo minttettuwaa demmiis. Iyyoobayyo Eelihu giidobaynne Yihooway yootana koyido waannabay, “Xoossai oottiyo maalaalissiya oosuwaa takki gaada akeeka” yaagiyaagaa. (Iyy. 37:14) Iyyoobi bana gakkida metuwaa genccanau maaddidabay aybee? Nuna gakkiya metuwaa xoonanau shin aybi maaddana danddayii? Yihoowa geeshsha ayyaanaynne wolqqay qonccido dumma dummabata hassayiyoogaanne wotti denttidi qoppiyoogaa. (Iyy. 38:1-41; 42:1, 2) Xoossay nuna maaddidoogaa huuphe xekkan akeekido wodeta hassayana danddayoos. I haˈˈikka nuna maaddanau koyees.

15. PHauloosi metuwaa genccanaadan minttettiday aybee?

¹⁵ Kiitettida PHauloosi ba ammanuwaa gishshau, shemppo miya daro metuwaa gencciis. (2 Qor. 11:23-28) He paacciya hanotaa shabbirettennan waanidi danddayidee?  Yihooway maaddanaadan an ammanettidi woossiyoogaana. Ammanuwaa gaasuwan a woriyo heeran gidennan aggenna, paacee gakkido wode PHauloosi hagaadan giidi xaafiis: “Taani kumetta kiitaa Aihuda gidenna asai ubbai siyanau yootana mala, Godai ta matan eqqidi, taayyo wolqqaa immiis. Qassi gaammuwaa doonaappekka tana ashshiis.” (2 Xim. 4:17) Hegaa gishshau, PHauloosi ba deˈuwan beˈidobaappe, ba mala Kiristtaaneti ‘issibaukka hirggana’ bessennaagaa ammanettana mala yootiis.—Piliphphisiyuusa 4:6, 7, 13 nabbaba.

16, 17. Yihooway ha wodiyan ba ashkkarata gakkiya metuwan waatidi maaddiyaakko leemisuwaa yoota.

¹⁶ Roksino giyo issi aqinyiyaa Yihooway ba asaa maaddiyoogaa akeekaasu. A awuraajjaa shiiquwan beettanau amarida shemppo gallassaa ba halaqaa oychido wode, i hanqqettidi, a biyaaba gidikko oosuwaappe yedettanaagaa yootiis. SHin Roksina shiiquwaa baasu; qassi oosuwaappe kiyenna mala Yihoowakko minttada woossaasu. Hegaappe simmin woppu gaasu. SHiiquwaappe simmin, Saynno galla, i halaqay giidoogaadankka o oosuwaappe kessiis. Roksina hirggaasu. He oosuwan guutta damooza demmiyaaba gidikkokka, so asau koshshiyaabaa kunttanau maaddiyo gishshau, he oosuwaa oottanau koyaasu. A zaarettada Yihoowakko woossaasu; qassi iyyo ayyaanaaban koshshiyaabaa awuraajjaa shiiquwan Xoossay kunttido gishshau, asatettau koshshiyaabaakka kunttanaagaa wotta denttada qoppaasu. Roksina soo baydda, paabirkkan maayuwaa sikkiyo maashiiniyan oottiya, meezee deˈiyo ura qaxarana koyiyoogaa qonccissiya issi erissuwaa beˈada, oosuwau malkkachaa gelissaasu. Iyyo he oosuwaa meezee baynnaagaa eriyaaba gidikkokka a oottanaadan halaqay yootiis; a he oosuwan kase demmiyo damoozau naaˈˈu kushe gidiyaagaa demmawusu. Yihooway i woosaa siyidoogaa Roksina akeekaasu. Gidikkokka, ubbaappe aadhiya anjjoy, banaara oottiyaageetuppe amaridaageetuyyo mishiraachuwaa yootana danddayidoogaa. I halaqaa gujjin, hegeetuppe ichashati tumaa siyidi xammaqettidosona.

¹⁷ Issi issitoo, Xoossay nu woosaa sohuwaara woy nuuni qoppido ogiyan zaaribeenna gishshau, siyibeennaba milatana danddayees. Hegaadaana gidikko, hegau loˈˈo gaasoy deˈiyoogau siree baawa. Yihooway hegaa erees; shin hegee nuuyyo sinttappe qonccana danddayees. Nuuni issibaa ammanettana danddayoos; hegeekka Xoossay baayyo ammanettida ura aggenna.—Ibr. 6:10.

Metuwaanne Paaciyaa Xooni Kiyanau Maaduwaa Demmiyoogaa

18, 19. (a) Metoynne paacee nu bolli gakkanaagaa naagana danddayiyoy aybissee? (b) Intte metuwaa ayba ogiyan xooni kiyana danddayeetii?

¹⁸ Yihoowa asay paacee, hidootaa qanxxissiyaabay, yedetaynne laggetu sugettay gakkiyo wode garamettenna. Ha alamee nuuyyo morkke. (Yoh. 15:17-19) Gidikkokka, nuuni Xoossaayyo oottiyo wode nu bolli gakkiya ay metuwaakka xooni kiyanau geeshsha ayyaanay maaddana danddayees. Nuuni danddayiyoogaappe aaruwaa paacettanaadan Yihooway paqqadenna. (1 Qor. 10:13) I nuna mulekka yeggenna woy aggenna. (Ibr. 13:5) Ayyaanaa kaaletuwan xaafettida a Qaalaa azazettiyoogee nuna naageesinne minttettees. Hegaa bollikka, nuussi maadoy keehi koshshiyo wode, nu mala Kiristtaaneti nuna maaddanaadan Xoossaa ayyaanay denttettana danddayees.

¹⁹ Nuuni ubbay woossiyoogaaninne Geeshsha Maxaafaa xannaˈiyoogan geeshsha ayyaanaa maaduwaa koyiyaageeta gidoos. Nuuni “ubbaban ufaissan genccanaadaaninne danddayanaadan, Xoossai ba bonchchuwaa gitaadan immiyo wolqqa ubban” minniyaageeta gidoos.—Qol. 1:11.

[Tohossa qofaa]

Woygada Zaaruutii?

• Yedetaa eqettanau waana giigettana danddayay?

• Issi uri ba oottido nagaara genttanaadan oychikko, neeni waatana koshshii?

• Ayba metoy gakkiyaaba gidikkokka, ayba maaduwan ammanettana danddayay?

[Oyshata]

[Sinttaa 30n deʼiya misiliyaa qonccissuwaa]

Yaasuppenne Kaaleebappe ay tamaarana danddayiyoo?

[Sinttaa 31n deʼiya misiliyaa qonccissuwaa]

Nagaraa oottida laggiyaa waatada maaddana danddayay?