Hiraagaa 2. Koshaa

“Koshaikka de7ana.”—MAR. 13:8.

● Nijeere biittan, Kuwarataji giyo heeran issi bete bitanee bete asay deˈiyoosaa koyees. He bitaniyaa mata dabboti, a ishatinne michotikka namisaappe baqatanau yaa biidosona. SHin, he bitanee saˈan saleenaa hiixxidi barkka ichiis. I barkka deˈiyoy aybissee? Siidi geetettiya he heeraa halaqay, “I koshshiya qumaa [ba soo asau] demmanau danddayibeenna; qassi eta waayiyaa beˈiiddi deˈanau danddayibeenna” yaagidi yootiis.

HANOTAY AY QONCCISSII? Alame yuushuwan 7 asaappe 1y koshshiya qumaa ubba galla demmenna. Afirkkan Sahaarappe tohossa baggan deˈiya biittatun hanotay keehippe iita; 3 asaappe 1y keehi namisettees. Hegee woygiyoogaakko akeekanau, aaway, aayyiyaanne naˈay deˈiyo issi keettaa asaa qoppa. Etappe naaˈˈaa xallau gidiya qumay deˈikko, meennan agganay oonee? Aaway, aayiiyye naˈay? Hegee galla galla hanotaadan hegaa mala so asay kuuyiyooba.

DAROTOO ASAY WOYGII? Biittay ubba asau gididi palahiya kattaa mokkees. Biittaa aquwaa loytti oyqqana koshshees.

HEGEE TUMEE? Goshshanchati awude wodeegaappenne aaruwan daro kattaa shiishanaunne issisaappe harasaa efanau danddayiyoogee tuma. Kawotettati kattaa bessiya ogiyan oyqqiyoogan namisaa xayssana danddayiyoogaa yootoosona. Gidoppe attin, eti daro layttau hegaadan oottanau baaxetidaba gidikkokka danddayibookkona.

NE QOFAY AYBEE? Marqqoosa 13:8y polettiiddi deˈii? Tekinolojee diccidaba gidikkokka, alame yuushuwan asay namisan qohettiiddi deˈii?

Biittaa qaattaynne koshay wurssetta gallassatu malaata gidida harabatuyyo darotoo gaaso gidoosona.

[Sinttaa 5n deʼiya misiliyaa qonccissuwaa]

“Wolqqaama qufiyan, karaaninne hara harggiyan hayqqiya naatuppe heezzaappe issi kushe gidiyaagaappe dariyaageeti koshshiya qumaa demmidaba gidiyaakko hayqqokkona.”​—AN M. VENEMEN, YU EN NAATA MAADDIYA DIRIJJITIYAA HALAAFIYAA.

[Sinttaa 5n deʼiya misiliyaa qonccissuwaa]

© Paul Lowe/Panos Pictures