2 Xoossay Asau Qoppenna Hegee Tumee?
2 Xoossay Asau Qoppenna Hegee Tumee?
Geella neeni siyidobaa: “Xoossay tumuppe asaassi qoppiyaaba gidiyaakko, i iitabaanne tuggaa alamiyaappe xayssana. I ubba asau qoppikkokka, huuphe xekkan ta bolli gakkiyaabay a qofissenna.”
Geeshsha Maxaafay tamaarissiyoobaa: Iitabau gaasoy Xoossaa Yihoowa gidenna. (Yaaq. 1:13) I iitabaa awudenne gidin xayssana danddayiyaaba gidikkokka, asaa naatu taarikiyaa doomettan denddida wolqqaama oyshaa zaaranau, iita asay guutta wodiyau deˈanaadan paqqadiis. I wurssettan, asaa naata tuggaappe woppissanau tangguwaa ekkana; qassi a haaruwaa eqettiyaageeti gattido qoho ubbaa giigissana.—Doo. 3:1-6; Isi. 65:17. *
Xoossay asa ubbau qoppiyoogaa xalla gidennan, huuphe xekkan nuussi wozanappe qoppees. Maatiyoosa 10:29-31 nubaa nuuni erennabaa ubbaa i eriyoogaa qonccissees: “Naa77u siine kafoti bakkannan baizettokkonaayye? Intte Aawai gaana xayikko, he siine kafotuppe issinniyaakka sa7an wodhdhukku. SHin harai atto, intte huuphiyan de7iya binnaana ubbaikka qoodan de7ees. Simmi yayyoppite; daro siine kafotuppe intte aadhdheeta.”
Tumaa eriyoogee nena maaddiyo ogiyaa: Darotoo, meqetta iita gidida woy nuussi qoppenna asaappe haakkoos. Xoossay asaa naatussi qoppenna giya worddoy, daroti a eranau mule koyennaadan woy eti harabaa aynne oottana danddayennabadan qoppiyo wode xallan akko woossanaadan oottidoogee garamissenna. Xoossaa Yihooway nuussi tumuppe qoppiyoogaa eriyoogee, neeni abaa loytta eranau koyanaadaaninne aara dabbotanaadan oottana danddayees.
Leemisuwau, neeni Xoossaakko woossennan aggakka; shin i ta woosaa siyaneeshsha woy zaaraneeshsha gaada qoppana danddayaasa. ‘Woosaa siyiyaagee’ wozanappe baakko woossiya ubbatu woosaa siyanau ubbatoo giigi uttidoogaa Geeshsha Maxaafay yootees.—Maz. 65:2.
Xoossay ‘neeyyo qoppiyo gishshau, nena hirggissiya ubbabaa a bolli olanaadan’ shoobbees. (1 PHe. 5:7) Xoossaa Qaalay, “GODAI wozanai me77idoogeetussi mataana; qassi bantta ayyaanan liiqidaageeta ashshees” yaagiyo gishshau, nuna wolqqaama metoy gakkiyo wodekka, i nuuyyo qoppiyoogaa ammanettana danddayoos.—Maz. 34:18.
[Tohossa qofaa]
^ MENT. 3 Xoossay tuggaa coˈˈu giidi xeelliyoy aybissakko gujo qofaa demmanau, Tumuppe Geeshsha Maxaafay Tamaarissiyoy Aybee? giya maxaafaa shemppo 11 xeella.
[Sinttaa 5n deʼiya misiliyaa qonccissuwaa]
Xoossay nuussi qoppennaba gidikko, nuuni akko woossanaadan i shoobbiyoy aybissee?
