XOOSSAY Nuna Qaxxayiiddi Deˈii?

Laappune 2011n biittaa qaattaa likkiyan 9.0 gidida biittaa qaattaynne sunaami Jaappaane biittan denddi simmin, he biittan polotikan keehi erettida issi bitanee, “Taani daafan qohettidaageetussi azzaniyaaba gidikkokka, [hegee] ‘tembatsu’ (xoossaa qixaate) gaada qoppays” yaagiis.

Ichashe 2010n Heytin denddida biittaa qaattay 220,000ppe dariya asaa worido wode, televizhiiniyan sabbakiyoogan erettida issi bitanee, eti “dabloosaara maacettido” gishshau hegee gakkidoogaanne “xoossaakko simmana” koshshiyoogaa yootiis.

Pilippinsse biittan Maanila kataman cora asay shabbirettidi woxxishin 79 asay hayqqido wode Kaatolike qeesee, “Xoossay donjjillidanne jallida nu zoriya wozanay beegottanaadan oottanau koyees” yaagiis. He biittaa darotoo qohiya “woddaa, wolqqaama gotiyaanne hara daafabaa yeddidi Xoossay ba hanqquwaa qonccissees giidi, gastta asaa giddon xeetaappe laatamanne isiini kushee ammaniyoogaa” he biittaa gaazeexatuppe issoy yootiis.

XOOSSAY iita asaa qaxxayanau daafabaa yeddees giidi ammaniyoogee beniisappe deˈiyaaba. Porttugaale biittan, Lisboone kataman 1755n denddida biitta qaattay, tamaynne sunaami giyo beetay 60,000 gidiya asaa wori simmin, keehippe erettida palasppaa Volteeri, “SHori baynnaban ufayttiyoogee darido Paariseppe Lisboonen deˈiya iitatettay darideeyye?” yaagidi oychiis. Miilooniyan qoodettiya asay, Xoossay asaa qaxxayanau meretay gattiyo daafaa goˈettiishsha giidi qoppiyoogee tuma. Daro biittatun hegaa mala daafabay Xoossaa ooso geetettees.

Ha ubbabaa qoppidi nuuni hagaadan oychana koshshees: Xoossay tumuppe asaa qaxxayanau meretay gattiyo daafaa goˈettii? Mata wode gakkida daro daafati Xoossaa qixaatee?

Issoti issoti hegaa Xoossaa bolli wottanau, Xoossay mereta wolqqata goˈettidi bashshaa ehiidoogaa bessiya, Geeshsha Maxaafan deˈiya taarikiyaa yootoosona. (Doo. 7:17-22; 18:20; 19:24, 25; Qoo. 16:31-35) Gidikkokka, Geeshsha Maxaafan deˈiya he taariketa pilggiyoogee hegeeta ubbaa dummayiya heezzu waannabati deˈiyoogaa qonccissees. Koyruwan, Xoossay kasetidi akeekissiis. Naaˈˈanttuwan, loˈˈo asaanne iita asaa shaakkennan xayssiya, ha wodiyan meretay gattiyo daafaappe dumma ogiyan, Xoossay xayana bessiya asaa xayssiis. Laamettenna iitatu xallaa woy seeraa siyennan ixxidaageetu xallaa xayssiis. Heezzanttuwan, Xoossay suure asati bashshaappe attiyo ogiyaa giigissiis.—Doo. 7:1, 23; 19:15-17; Qoo. 16:23-27.

Ha wodiyan miilooniyan qoodettiya asaa deˈuwaa laalida, zawi baynna bashshaa Xoossay ehiidoogaa bessiyaabi baawa. Yaatin, hegaa mala bashshay gujjanaadan gaaso gididabay aybee? Nuuni hegaa malabay gakkiyo wode waanidi genccana danddayiyoo? Daafabay xayiyo wodee yaanee? Ha oyshatu zaaruwaa kaalliya huuphe yohuwan beˈana.